ফিৎ ইন্দিয়ানা হৌদোকখিবা ফিৎ ইন্দিয়া এক্তিব দে থৌরমদা চাউনা মায় পাকখ্রবা মতুংদা, ভারত সরকারগী মরুওইবা হকশেলগী ঈহৌনা অনৌবা হকশেলগী থৌরাং অমা নৌনা পায়খৎনবা থৌরাং তৌরে। হন্দক্তি, সেন্ত্রেল বোর্দ ওফ সেকেন্দরী এদ্যুকেসন (সি.বি.এস.ই.)গা খূৎশম্নদুনা লৈবাক অসিদা লৈবা স্কুল তম্লিবা মহৈরোইশিংগীদমক পাঙথোক্লগনি। থৌরম অসিগী মনুংদা আয়ুশ মন্ত্রালয়গী হকচাং ফনা লৈনবা চৎন-পথাপশিংবু মহৈরোইশিংদা তাক্কনি।

অসিগুম্বা অহানবা মখলগী লৌখৎলক্লিবা থৌরাং অসিগী মরমদা পল্লদুনা হ্যুমেন রিসোর্স চাউখৎ থৌরাংগী মন্ত্রী শ্রী রামেস পোখ্রিয়াল ‘নিশাঙ্ক’না হায়রি মদুদি, সি.বি.এস.ই.না ফিৎ ইন্দিয়া মুবমেন্তপু মসিনা হেক হৌদোরকপদগী শৌগত্তুনা লাক্লি। মমাঙদা সি.বি.এস.ই. স্কুল ১৩৮৬৮দি ফিৎ ইন্দিয়া থৌরমগী শরুক য়াদুনা লাকখ্রে অমসুং সি.বি.এস.ই. স্কুল ১১৬৮২ না ফিৎ ইন্দিয়াগী ফ্লেগ ফংখ্রে। হৌজিক্তি মসিগী অনৌবা খোঙথাং অসিনা ঐঙোন্দা থাজবা পোকহল্লে মদুদি ঐখোয়গী প্রধান মন্ত্রি শ্রী নরেন্দ্র মোদীগী অশানবা মিৎয়েং অমসু ওইরিবা লৈবাক অসিদা লৈবা মহৈরোইশিংনা লোকদাউন অসিগী মনুংদা কান্নবা ফংনা শরুক য়াবতা নত্তনা হকচাং ফনা অমসুং হকশেল কাঙলোন চুম্না হিংবা হায়বসি মখোয়গী হিংবগী লম্বী অমসু ওইরগনি হায়বসিনি।

নহারোল অমসুং শান্ন-খোৎনবগী কেন্দ্র মন্ত্রি শ্রী কিরেন রিজিজুনা ফোঙদোক্লি মদুদি ওনলাইন সেসনশিং অসি হৌজিক্তি য়াম্না মরু ওইবা অমা ওইরে। মহাক্না হায়, “অঙাংশিং অসি হৌজিক্তি হকচাং শাজেল কয়া য়াওদনা য়ুমদা লৈরে। অসিগুম্বা শাজেলদা খঙ-হৈরবশিংনা পীবা সেসনশিং অসিনা অঙাংশিংবু য়ুমদা লৈরবসু শাজেল তৌবা য়াহল্লগনি। হৌজিক ওইরিবা মতম অসিদদি মীপুম খুদিংমক, মরু ওইনা অঙাংশিংবু হকচাং ফনা লৈহনবা অমসুং ইম্যুন কলহনবা মথৌ তাই। মসিগী সেসনশিং অসিদা, হকশেলগা মরী লৈনবা হিরমশিংতা নত্তনা, আয়ুশ মন্ত্রালয়গী ইম্যুন কলহন্নবা অচম্বা খোঙথাংশিংগা মরী লৈনবা চৎন-পথাপশিংসু খন্ন-নৈনগনি। মসিগী পুকৈ থল্লবা সেসনশিং অসিনা অঙাংশিং অমসুং মমা-মপাশিংদা কান্নবা চাউনা পীগনি।”

কোভিদ-১৯না মরম ওইদুনা লৈবাক পুম্বা মেগী ৩ ফাওবা লোকদাউন তৌখিবা অমদি প্রধান মন্ত্রিনা নাগরিক পুম্নমকপু ইম্যুন কলহন্নবা অমসুং হকচাং ফনা লৈনবা ফোঙদোকখিবদুগী মতুং তারকপদা ফিৎ ইন্দিয়া অমসুং সি.বি.এস.ই.না হায়রিবা তোপ-তোপ্পা খোঙথাং অসি স্কুল তম্লিবা মহৈরোইশিংবু হকচাং ফনা থম্নবা লৌখৎখিবনি। হকশেলগা মরী লৈনবা হিরমশিংদতা নত্তনা, আয়ুশ মন্ত্রালয়না পীবা ইম্যুন কলহন্নবা অমসুং হকচাং ফনা লৈনবা চৎন-পথাপশিংসু মহৈরোইশিংদা তাক্কনি।

ইং ২০২০গী এপ্রিলগী তাং ১৫গী অয়ুক পুং ৯: ৩০ তাবদগী হৌদুনা মহৈরোইশিংনা ফিৎ ইন্দিয়া মুবমেন্ত অমসুং সি.বি.এস.ই.গী ফেসবুক অমসুং ইন্সতগ্রাম হেন্দলশিংদগী লায়না য়েংবা য়াগনি। হায়রিবা সেসন পুম্বসি য়ুত্যুবতসু মখোয়গী নুংঙাইনবগীদমক ফংহনগনি।

 লাইব সেসনশিং অসিনা অঙাংশিংগা হকশেলগা মরী লৈনবা নোংমগী তৌগদবা শাজেলদগী হৌদুনা য়োগ ফাওবা, ন্যুত্রিসন্দগীনা ৱাখল ফনা থম্নবা ফাওবা কোনশিনগনি। শক্নাইরবা শাজেলগী অখঙ-অহৈ আলিয়া ইম্রান, ন্যুত্রিস্নিস্ত পুজা মাখিজা, ৱাখল ফনা থম্নবগী হীরমদা খঙ-হৈরবা হীনা ভিমানী অমসুং অতোপ্পা কয়া অমসু সেসনশিং অসিদা শরুক য়াগনি।

লাইব স্ত্রিমিং অসি সি.বি.এস.ই.গী সোসল মেদিয়া হেন্দলশিং, জি ও ক্যু আই আই, অমসুং সিল্পা সেথী এপ্তসু ফংগনি।

*****