نئی دہلی،14 اپریل   حکومت ہند کی کیمیکل اور فرٹیلائیزر کی وزارت  کے فرٹیلائزرس کے محکمے کے تحت کام کرنے والی فرٹیلائزر کی ممتاز کمپنی نیشنل فرٹیلائزرس لمیٹڈ ملک میں کووڈ-19 کی وجہ سے ملکی سطح کے لاک ڈاؤن کے دوران کسان برادری کو فرٹیلائزرس کی خاطر خواہ سپلائی کو یقینی بنا رہی ہے۔

این ایف ایل کے چیئرمین اور مینیجنگ ڈائرکٹر جناب منوج مشرا نے بتایا کہ نانگل، بھٹنڈا، پانی پت اور وجے نگر پلانٹس کی دو یونٹوں میں پورے زور شور سے پروڈکشن کا کام چل رہا ہے۔ یہ پانچ پلانٹ روزانہ 11 ہزار میٹرک ٹن سے زیادہ فرٹیلائیزر کا پروڈکشن کر رہے ہیں۔ اور مستقل طور پر اسے بازار میں بھیج رہے ہیں۔

ایسے مشکل دور میں  ان پلانٹس کے زیادہ سے زیادہ کاموں کو جاری رکھنا اور خصوصی طور پر ملک کی کسان برادری کے تئیں حکومت کی عہد بندی کو پورا کرنے کے سلسلے میں این ایف ایل کو بہت زیادہ کامیابی ملی ہے۔

حکومت ہند نے ضروری اشیائے صارفین کے قانون کے تحت ملک میں فرٹیلائیزرس پلانٹ کو چلانے کی اجازت دی ہے تاکہ زرعی شعبے کو لاک ڈاؤن کے دوران مشکلات کا سامنا نہ کرنا پڑے اور اسے آئندہ خریف کی فصل کے لیے خاطر خواہ فرٹیلائیزر دستیاب ہوسکے۔

 ان پلانٹوں میں لدائی، اُترائی، بھیجے جانے اور تقسیم کی سرگرمیاں پورے زور وشور سے جاری ہیں پھر بھی کووڈ-19 سے بچنے کے لیے احتیاط کے سلسلے میں کوئی سمجھوتہ نہیں کیا گیا ہے۔ تمام یونٹوں میں کووڈ-19 کے پھیلنے کو روکنے کے لیےمناسب بچاؤ کی تدابیر کو یقینی بنانے کے لیے ایک خصوصی ٹاسک فورس قائم کی گئی ہے۔ ان پلانٹوں کے احاطے میں کام کرنے والے مزدوروں اور تمام دیگر اسٹاف کو ماسک فراہم کرائے گئے ہیں۔ بار بار ہاتھ دھوئے جانے کو یقینی بنایا گیا ہے۔

این ایف ایل اور اس کے ملازمین ضرورت مندوں کو ضروری اشیا مثلاً خوراک اور ادویات تقسیم کرتے ہوئے کورونا وائرس کو پھیلنے سے روکنے کی حکومت ہند کی کوشش  میں بھی  سرگرمی سے تعاون کر رہے ہیں۔ انھوں نے  پی ایم کیرس فنڈ میں اپنی ایک مہینے کی تنخواہ بھی دی ہے۔

****************

م ن۔ ا گ ۔ ر ا

U: 1713