ಎಲ್ಲಾ ಪ್ರಮುಖ ಕೇಂದ್ರಗಳನ್ನು ಸಂಪರ್ಕಿಸಲು ಭಾರತೀಯ ರೈಲ್ವೆಯು 58 ಮಾರ್ಗಗಳಲ್ಲಿ ವೇಳಾಪಟ್ಟಿಯೊಂದಿಗೆ 109 ಪಾರ್ಸೆಲ್ ರೈಲುಗಳನ್ನು ಓಡಿಸುತ್ತಿದೆ

ಇಷ್ಟೊಂದು ಸಂಖ್ಯೆಯ ಪಾರ್ಸೆಲ್ ರೈಲುಗಳಿಗೆ ಮೊದಲ ಬಾರಿಗೆ ಸಮಯ ನಿಗದಿಯ ವೇಳಾಪಟ್ಟಿ

ಸ್ಥಳೀಯ ಕೈಗಾರಿಕೆಗಳು, ಇ-ಕಾಮರ್ಸ್ ಕಂಪನಿಗಳು, ಆಸಕ್ತ ಗುಂಪುಗಳು, ವ್ಯಕ್ತಿಗಳು ಮತ್ತು ಇನ್ನಿತರ ನಿರೀಕ್ಷಿತ ಲೋಡರ್‌ಗಳು ಪಾರ್ಸೆಲ್‌ಗಳನ್ನು ಕಾಯ್ದಿರಿಸಬಹುದು

ಈ ಕುರಿತ ಮಾಹಿತಿ ಎನ್‌ಟಿಇಎಸ್ ವೆಬ್‌ಸೈಟ್‌ನಲ್ಲಿಯೂ ಲಭ್ಯವಿದೆ

ದೇಶಾದ್ಯಂತದ ಸರಬರಾಜು ಸರಪಳಿಗೆ ಪ್ರಮುಖ ಉತ್ತೇಜನ ನೀಡಲು, ಭಾರತೀಯ ರೈಲ್ವೆ ವೇಳಾಪಟ್ಟಿಯೊಂದಿಗೆ ಅಡೆತಡೆಯಿಲ್ಲದ ಪಾರ್ಸೆಲ್ ರೈಲುಗಳ ಸೇವೆಗಳನ್ನು ಪರಿಚಯಿಸಿದೆ. ಇದು ಜನಸಾಮಾನ್ಯರು, ಕೈಗಾರಿಕೆ ಮತ್ತು ಕೃಷಿಗೆ ಅಗತ್ಯವಾದ ಪ್ರಮುಖ ವಸ್ತುಗಳ ಲಭ್ಯತೆಯನ್ನು ಹೆಚ್ಚಿಸುತ್ತದೆ ಎಂದು ನಿರೀಕ್ಷಿಸಲಾಗಿದೆ.

ಲಾಕ್-ಡೌನ್ ಪ್ರಾರಂಭವಾದಾಗಿನಿಂದ ಪಾರ್ಸೆಲ್ ವಿಶೇಷ ರೈಲುಗಳಿಗಾಗಿ ಸುಮಾರು 58 ಮಾರ್ಗಗಳನ್ನು (109 ರೈಲುಗಳು) ಓಡಿಸಲಾಗುತ್ತಿದೆ. 2020 ರ ಏಪ್ರಿಲ್ 5 ರವರೆಗೆ 27 ಮಾರ್ಗಗಳನ್ನು ಕಾರ್ಯಗತಗೊಳಿಸಲಾಗಿದ್ದು, ಅವುಗಳಲ್ಲಿ 17 ಮಾರ್ಗಗಳು ನಿಯಮಿತ ನಿಗದಿತ ಸೇವೆಗಳಾಗಿದ್ದರೆ, ಉಳಿದವು ಒಮ್ಮುಖ ಪ್ರಯಾಣಕ್ಕೆ ಮಾತ್ರ. ಹಾಗೆಯೇ, 40 ಹೊಸ ಮಾರ್ಗಗಳನ್ನು ಗುರುತಿಸಿ ಕಾರ್ಯಗತಗೊಳಿಸಲಾಗಿದೆ (ಮತ್ತು ಹಿಂದಿನ ಕೆಲವು ಮಾರ್ಗಗಳ ಆವರ್ತನವನ್ನು ಹೆಚ್ಚಿಸಲಾಗಿದೆ). ಇದರೊಂದಿಗೆ ಭಾರತದ ಎಲ್ಲಾ ಪ್ರಮುಖ ನಗರಗಳು ಪ್ರಮುಖ ಸರಕುಗಳ ತ್ವರಿತ ಸಾಗಾಟದೊಂದಿಗೆ ಸಂಪರ್ಕ ಸಾಧಿಸಿದಂತಾಗುತ್ತದೆ. ಈ ಸೇವೆಗಳನ್ನು ಮತ್ತಷ್ಟು ಹೆಚ್ಚಿಸುವ ನಿರೀಕ್ಷೆಯಿದೆ.

ವೇಳಾಪಟ್ಟಿಯೊಂದಿಗಿನ ಪಾರ್ಸೆಲ್ ರೈಲುಗಳನ್ನು ಗ್ರಾಹಕರ ಬೇಡಿಕೆಗೆ ಅನುಗುಣವಾಗಿ ಯೋಜಿಸಲಾಗಿದೆ. ಸಮಯ ನಿಗದಿಪಡಿಸಿದ ಪಾರ್ಸೆಲ್ ರೈಲುಗಳು ದೆಹಲಿ, ಮುಂಬೈ, ಕೋಲ್ಕತಾ, ಚೆನ್ನೈ, ಹೈದರಾಬಾದ್, ಮತ್ತು ಬೆಂಗಳೂರುಗಳಂತಹ ದೇಶದ ಪ್ರಮುಖ ಕಾರಿಡಾರ್‌ಗಳನ್ನು ಸಂಪರ್ಕಿಸುತ್ತವೆ. ಇದಲ್ಲದೆ, ದೇಶದ ಈಶಾನ್ಯ ಪ್ರದೇಶದಲ್ಲಿ ಸರಬರಾಜುಗಳನ್ನು ಖಚಿತಪಡಿಸಿಕೊಳ್ಳಲು ಗುವಾಹಟಿಗೆ ಸೂಕ್ತ ಸಂಪರ್ಕವನ್ನು ಖಾತ್ರಿಪಡಿಸಲಾಗಿದೆ.

ಈ ರೈಲುಗಳ ಮೂಲಕ ಸಂಪರ್ಕ ಹೊಂದಿದ ಇತರ ಪ್ರಮುಖ ನಗರಗಳೆಂದರೆ ಭೋಪಾಲ್, ಅಲಹಾಬಾದ್, ಡೆಹ್ರಾಡೂನ್, ವಾರಣಾಸಿ, ಅಹಮದಾಬಾದ್, ವಡೋದರಾ, ರಾಂಚಿ, ಗೋರಖ್‌ಪುರ, ತಿರುವನಂತಪುರಂ, ಸೇಲಂ, ವಾರಂಗಲ್, ವಿಜಯವಾಡ, ವಿಶಾಖಪಟ್ಟಣಂ, ರೂರ್ಕೆಲಾ, ಬಿಲಾಸ್ಪುರ್, ಭೂಸಾವಾಲ್, ಟಾಟಾನಗರ್, ಜೈಪುರ, ಝಾನ್ಸಿ, ಆಗ್ರಾ, ನಾಸಿಕ್, ನಾಗ್ಪುರ, ಅಕೋಲಾ, ಜಲ್ಗಾಂವ್, ಸೂರತ್, ಪುಣೆ, ರಾಯ್‌ಪುರ, ಪಾಟ್ನಾ, ಅಸನ್ಸೋಲ್, ಕಾನ್ಪುರ, ಬಿಕಾನೇರ್, ಅಜ್ಮೀರ್, ಗ್ವಾಲಿಯರ್, ಮಥುರಾ, ನೆಲ್ಲೂರು, ಜಬಲ್ಪುರ್  ಇತ್ಯಾದಿ.

ಈ ಅವಧಿಯಲ್ಲಿ ಗ್ರಾಹಕರ ಬೇಡಿಕೆಗೆ ಅನುಗುಣವಾಗಿ ಭಾರತೀಯ ರೈಲ್ವೆ ಇತರ ಪಾರ್ಸೆಲ್ ರೈಲುಗಳನ್ನು ಸಹ ಓಡಿಸುತ್ತಿದೆ - ಅವುಗಳೆಂದರೆ:

ಎ)        ‘ಹಾಲು ವಿಶೇಷ’- ಪಾಲನ್ಪುರ (ಗುಜರಾತ್) ದಿಂದ ಪಾಲ್ವಾಲ್ (ದೆಹಲಿ ಹತ್ತಿರ), ಮತ್ತು ರೇಣಿಗುಂಟಾ (ಎಪಿ) ದಿಂದ ದೆಹಲಿಗೆ

ಬಿ)        ಹಾಲು ಉತ್ಪನ್ನಗಳು- ಕಂಕರಿಯಾ (ಗುಜರಾತ್) ದಿಂದ ಕಾನ್ಪುರ (ಯುಪಿ) ಮತ್ತು ಸಂಕ್ರೈಲ್ (ಕೋಲ್ಕತಾ ಬಳಿ) ಗೆ

ಸಿ)        ಆಹಾರ ಉತ್ಪನ್ನಗಳು - ಮೊಗಾ (ಪಂಜಾಬ್) ನಿಂದ ಚಾಂಗ್ಸಾರಿ (ಅಸ್ಸಾಂ) ವರೆಗೆ

ವೇಳಾಪಟ್ಟಿಯೊಂದಿಗಿನ ಪಾರ್ಸೆಲ್ ರೈಲುಗಳು ಬೇಡಿಕೆ ಕಡಿಮೆ ಇರುವ ಮಾರ್ಗಗಳಲ್ಲಿಯೂ ಸಹ ಓಡುತ್ತಿವೆ, ಇದರಿಂದಾಗಿ ದೇಶದ ಯಾವುದೇ ಭಾಗವು ಸಂಪರ್ಕರಹಿತವಾಗಿಲ್ಲ. ಕೆಲವು ರೈಲುಗಳನ್ನು ಕೇವಲ 2 ಪಾರ್ಸೆಲ್ ವ್ಯಾನ್‌ಗಳೊಂದಿಗೆ ಅಥವಾ 1 ಪಾರ್ಸೆಲ್ ವ್ಯಾನ್ ಮತ್ತು ಬ್ರೇಕ್ ವ್ಯಾನ್‌ನೊಂದಿಗೆ ಓಡಿಸಲಾಗುತ್ತಿದೆ.

ವಿವಿಧ ವಲಯಗಳಲ್ಲಿ COVID-19 ಸಾಂಕ್ರಾಮಿಕ ಹಿನ್ನೆಲೆಯಲ್ಲಿ ಪರಿಚಯಿಸಲಾದ ಈ ಪಾರ್ಸೆಲ್ ರೈಲುಗಳು ಕೆಳಕಂಡಂತಿವೆ:

(ಈ ಮಾಹಿತಿಯು ಏಪ್ರಿಲ್ 8 ರ ಬೆಳಿಗ್ಗೆಯವರೆಗೆ ಮಾತ್ರ. ಇದನ್ನು ನಿಯಮಿತವಾಗಿ ಪರಿಷ್ಕರಿಸುವ ಸಾಧ್ಯತೆಯಿದೆ)

ಮಾರ್ಗಗಳ ಪಟ್ಟಿ

ಒಟ್ಟು ಮಾರ್ಗಗಳು 58

ಇದುವರೆಗೆ, ಸುಮಾರು 32 ಜೋಡಿ ಪಾರ್ಸೆಲ್ ವಿಶೇಷವನ್ನು ಅಂತರ ರೈಲ್ವೆ (ದೀರ್ಘ ದೂರ) ಎಂದು ಸೂಚಿಸಲಾಗಿದೆ, ಉಳಿದವು ಒಳ-ರೈಲ್ವೆ (ಕಡಿಮೆ ದೂರ).

ಈ ಪಾರ್ಸೆಲ್ ವಿಶೇಷ ರೈಲುಗಳಿಗಾಗಿ ಕೆಲವು ದೀರ್ಘ ಮಾರ್ಗಗಳು ಹೀಗಿವೆ:

1)        ಕಲ್ಯಾಣ್ - ಸಂತ್ರಗಚಿ

2)       ಕಲ್ಯಾಣ್ - ಚಂಗ್ಸರಿ

3)       ನವದೆಹಲಿ - ಚೆನ್ನೈ

4)       ಸೇಲಂ - ಭಟಿಂಡಾ

5)       ಸೇಲಂ - ಹಿಸಾರ್

5)       ಯಶವಂತಪುರ - ಹಜರತ್ ನಿಜಾಮುದ್ದೀನ್

6)       ಯಶವಂತಪುರ - ಹೌರಾ

7)        ಯಶವಂತಪುರ - ಗೋರಖ್ಪುರ

8)       ಯಶವಂತಪುರ - ಗುವಾಹಟಿ

9)       ಅಹಮದಾಬಾದ್ - ಗುವಾಹಟಿ

10)      ಕರಂಬೇಲಿ - ಚಂಗ್ಸರಿ

11)       ಕಂಕರಿಯಾ – ಸಂಕ್ರೈಲ್

ಈ ರೈಲುಗಳ ಮೂಲಕ ಪಾರ್ಸೆಲ್‌ಗಳನ್ನು ಸಾಗಿಸುವ ಸೌಲಭ್ಯವನ್ನು ಯಾವುದೇ ವ್ಯಕ್ತಿ ಅಥವಾ ಸಂಸ್ಥೆಯು ಪಡೆಯಬಹುದು. ಈ ಕೆಳಗಿನ ಸರಕುಗಳನ್ನು ದೇಶದ ಉದ್ದಗಲಕ್ಕೂ ಸಾಗಿಸಲಾಗುತ್ತಿದೆ:

i.      ಬೇಗ ಹಾಳಾಗುವ ವಸ್ತುಗಳು (ಮೊಟ್ಟೆ, ಹಣ್ಣುಗಳು, ತರಕಾರಿಗಳು, ಮೀನು ಸೇರಿದಂತೆ)

ii.     ಔಷಧಿಗಳು, ವೈದ್ಯಕೀಯ ಉಪಕರಣಗಳು, ಮುಖಗವಸುಗಳು

iii.    ಹಾಲು ಮತ್ತು ಡೈರಿ ಉತ್ಪನ್ನಗಳು

iv.    ಬೀಜಗಳು (ಕೃಷಿ ಬಳಕೆಗಾಗಿ)

v.     ಇ-ಕಾಮರ್ಸ್ ಸರಕುಗಳು, ಪ್ಯಾಕೇಜ್ ಮಾಡಲಾದ ಆಹಾರ ವಸ್ತುಗಳು, ಪುಸ್ತಕಗಳು, ಸ್ಟೇಷನರಿ, ಪ್ಯಾಕಿಂಗ್ ವಸ್ತುಗಳು ಮುಂತಾದ ಇತರ ಸಾಮಾನ್ಯ ಸರಕುಗಳು

ಸಾಧ್ಯವಿರುವ ಸ್ಥಳಗಳಲ್ಲಿ ರೈಲುಗಳಿಗೆ ಮಾರ್ಗ-ನಿಲುಗಡೆಗಳನ್ನು ನೀಡಲಾಗಿದೆ, ಇದರಿಂದಾಗಿ ಪಾರ್ಸೆಲ್‌ಗಳನ್ನು ಗರಿಷ್ಠವಾಗಿ ತಲುಪಿಸಬಹುದು. ಈ ರೈಲುಗಳ ವೇಳಾಪಟ್ಟಿಯನ್ನು ವಲಯ ರೈಲ್ವೆಗಳು ಪ್ರಮುಖ ಪತ್ರಿಕೆಗಳಲ್ಲಿ ಪ್ರಕಟಿಸುತ್ತಿವೆ. ಇದಲ್ಲದೆ, ಸಾಮಾನ್ಯ ಗ್ರಾಹಕರು ಮತ್ತು ಸರ್ಕಾರಿ ಸಂಸ್ಥೆಗಳನ್ನು ಸಹ ಸಂಪರ್ಕಿಸಲಾಗುತ್ತಿದೆ.

***