COVID-19 ಲಾಕ್‌ಡೌನ್ ನಡುವೆ ಮಾರ್ಚ್ 21 ರಿಂದ 14 ದಿನಗಳಲ್ಲಿ 721 ರೇಕ್ ಗಳಲ್ಲಿ 20.19 ಲಕ್ಷ ಮೆಟ್ರಿಕ್ ಟನ್ ಆಹಾರ ಧಾನ್ಯ ಸಾಗಿಸಿದ ಭಾರತ ಆಹಾರ ನಿಗಮ

ಪ್ರಧಾನ ಮಂತ್ರಿ ಗರೀಬ್ ಕಲ್ಯಾಣ್ ಅನ್ನ ಯೋಜನೆ (ಪಿಎಂಜಿಕೆಎ) ಯನ್ನು ಜಾರಿಗೆ ತರಲು ಭಾರತ ಆಹಾರ ನಿಗಮವು (ಎಫ್‌ಸಿಐ) ದೇಶಾದ್ಯಂತ ರಾಜ್ಯಗಳಿಗೆ ಸಾಕಷ್ಟು ಆಹಾರಧಾನ್ಯಗಳನ್ನು ಕಳುಹಿಸಿದೆ, ಇದರಲ್ಲಿ ಮುಂದಿನ ಮೂರು ತಿಂಗಳವರೆಗೆ ಪ್ರತಿ ವ್ಯಕ್ತಿಗೆ 5 ಕೆಜಿ ಆಹಾರ ಧಾನ್ಯವನ್ನು ಎಲ್ಲಾ ರಾಷ್ಟ್ರೀಯ ಆಹಾರ ಭದ್ರತಾ ಕಾಯ್ದೆಯ (ಎನ್‌ಎಫ್‌ಎಸ್‌ಎ) ಫಲಾನುಭವಿಗಳಿಗೆ ಉಚಿತವಾಗಿ ವಿತರಿಸಬೇಕಾಗಿದೆ. ಉತ್ತರ ಪ್ರದೇಶ, ಬಿಹಾರ, ತೆಲಂಗಾಣ, ಅಸ್ಸಾಂ, ಹಿಮಾಚಲ ಪ್ರದೇಶ, ಮೇಘಾಲಯ, ಸಿಕ್ಕಿಂ, ಉತ್ತರಾಖಂಡ, ಮಹಾರಾಷ್ಟ್ರ, ಗುಜರಾತ್, ಹರಿಯಾಣ, ಕೇರಳ, ಮಿಜೋರಾಂ ಮುಂತಾದ ಹಲವು ರಾಜ್ಯಗಳು ಈಗಾಗಲೇ ಈ ಯೋಜನೆಯಡಿ ಎಫ್‌ಸಿಐನಿಂದ ಆಹಾರ ಧಾನ್ಯಗಳನ್ನು ಪಡೆಯಲು ಪ್ರಾರಂಭಿಸಿವೆ. ಮುಂದಿನ ಕೆಲವು ದಿನಗಳಲ್ಲಿ ಇತರ ರಾಜ್ಯಗಳು ಪಿಎಂಜಿಕೆಎ ಅಡಿಯಲ್ಲಿ ವಿತರಣೆಗಾಗಿ ಆಹಾರ ಧಾನ್ಯಗಳನ್ನು ಪಡೆಯುತ್ತವೆ. ಎಫ್‌ಸಿಐ ದಣಿವರಿಯದೆ ಕಾರ್ಯನಿರ್ವಹಿಸುತ್ತಿದ್ದು,  ರಾಷ್ಟ್ರವ್ಯಾಪಿ ಲಾಕ್‌ಡೌನ್ ಸಮಯದಲ್ಲಿ ದೇಶದ ಪ್ರತಿಯೊಂದು ಭಾಗದಲ್ಲೂ ಸಾಕಷ್ಟು ಆಹಾರ ಧಾನ್ಯದ ದಾಸ್ತಾನು ಲಭ್ಯವಾಗುವಂತೆ ನೋಡಿಕೊಂಡಿದೆ. COVID-19 ಸಾಂಕ್ರಾಮಿಕ ರೋಗದ ವಿರುದ್ಧ ಹೋರಾಡಲು ಲಾಕ್‌ಡೌನ್ ಘೋಷಣೆಯಾದ 24.03.2020 ರಿಂದ ಕಳೆದ 14 ದಿನಗಳಲ್ಲಿ, ಎಫ್‌ಸಿಐ ದಿನಕ್ಕೆ ಸರಾಸರಿ 1.44 ಲಕ್ಷ ಮೆ.ಟನ್ ಆಹಾರ ಧಾನ್ಯವನ್ನು ಸಾಗಾಟ ಮಾಡಿದೆ. 06.04.2020 ರವರೆಗೆ ಒಟ್ಟು 658 ರೇಕ್‌ಗಳಲ್ಲಿ ದೇಶಾದ್ಯಂತ ಸುಮಾರು 18.42 ಲಕ್ಷ ಮೆ.ಟನ್ ಆಹಾರ ಧಾನ್ಯಗಳನ್ನು ಸಾಗಿಸಲಾಗಿದೆ. ಅಂದಾಜು 1.76 ಲಕ್ಷ ಮೆ.ಟನ್ ಆಹಾರ ಧಾನ್ಯವನ್ನು ಸಾಗಿಸುವ 63 ರೇಕ್‌ಗಳನ್ನು ಇಂದು ಮತ್ತೆ ಲೋಡ್ ಮಾಡಲಾಗುತ್ತಿದೆ.

ಎನ್‌ಎಫ್‌ಎಸ್‌ಎ ಅಡಿಯಲ್ಲಿ ಆಹಾರ ಧಾನ್ಯಗಳ ನಿಯಮಿತ ಅವಶ್ಯಕತೆಗಳನ್ನು ಮತ್ತು ಪಿಎಂಜಿಕೆಎ ಅಡಿಯಲ್ಲಿ ಹೆಚ್ಚುವರಿ ಹಂಚಿಕೆಯನ್ನು ಪೂರೈಸುವ ಜೊತೆಗೆ, ಎಫ್‌ಸಿಐ ಇ-ಹರಾಜು ಮಾರ್ಗದ ಮೂಲಕ ಹೋಗದೆ ನೇರವಾಗಿ ರಾಜ್ಯ ಸರ್ಕಾರಗಳಿಗೆ ಗೋಧಿ ಮತ್ತು ಅಕ್ಕಿಯನ್ನು ಒದಗಿಸುತ್ತಿದೆ, ಆಹಾರ ಧಾನ್ಯಗಳ ನಿರಂತರ ಪೂರೈಕೆಯನ್ನು ಖಚಿತಪಡಿಸಿಕೊಳ್ಳಲು ಮುಕ್ತ ಮಾರುಕಟ್ಟೆ ಮಾರಾಟ ದರದಲ್ಲಿ. ಆಯಾ ಜಿಲ್ಲಾಧಿಕಾರಿಗಳು ಮಾಡಿರುವ ಅವಶ್ಯಕತೆಗಳ ಮೌಲ್ಯಮಾಪನದ ಆಧಾರದ ಮೇಲೆ ಗೋಧಿ ಹಿಟ್ಟು ಮತ್ತು ಇತರ ಗೋಧಿ ಉತ್ಪನ್ನಗಳ ತಯಾರಕರ ಅವಶ್ಯಕತೆಗಳನ್ನು ಪೂರೈಸಲು ಗೋಧಿಯನ್ನು ನೀಡಲಾಗುತ್ತದೆ. ಈ ಮಾದರಿಯಲ್ಲಿ ಎಫ್‌ಸಿಐ 13 ರಾಜ್ಯಗಳಲ್ಲಿ 1.38 ಲಕ್ಷ ಮೆ. ಟನ್  ಗೋಧಿ ಮತ್ತು 8 ರಾಜ್ಯಗಳಲ್ಲಿ 1.32 ಲಕ್ಷ ಮೆ. ಟನ್  ಅಕ್ಕಿಯನ್ನು ನೀಡಲಾಗಿದೆ.

ಈ ಅವಧಿಯಲ್ಲಿ ಆಹಾರ ಧಾನ್ಯವನ್ನು ಲೋಡ್ ಮತ್ತು ಅನ್ ಲೋಡ್ ವಿವರಗಳಿಗಾಗಿ ಈ ಕೆಳಗಿನ ಲಿಂಕ್‌ಗಳ ಮೇಲೆ ಕ್ಲಿಕ್ ಮಾಡಿ:

1. Statewise details of rakes loaded during lockdown period
2. Statewise details of rakes unloaded during lockdown period

***