କୋଭିଡ-19 ସଂକ୍ରମଣ ଓ 25 ମାର୍ଚ୍ଚରୁ ଦେଶବ୍ୟାପୀ ଲକଡାଉନ ଯୋଗୁଁ କଲେଜ ତଥା ଛାତ୍ରାବାସ ବନ୍ଦ ଯୋଗୁଁ କିଛି ଛାତ୍ରଛାତ୍ରୀଙ୍କୁ ସମସ୍ୟାର ସମ୍ମୁଖୀନ ହେବାକୁ ପଡିଛି । ଏହି ଛାତ୍ରଛାତ୍ରୀଙ୍କୁ ସାହାଯ୍ୟ ଓ ସହାୟତା ପ୍ରଦାନ କରିବା ପାଇଁ ଏଆଇସିଟିଇ (ଅଖିଳ ଭାରତୀୟ ବୈଷୟିକ ଶିକ୍ଷା ପରିଷଦ) ପକ୍ଷରୁ ଏକ ନିଆରା ଏମଏଚଆରଡି ଏଆଇସିଟିଇ କୋଭିଡ-19 ଷ୍ଟୁଡେଣ୍ଟ ହେଲ୍ପଲାଇନ ପୋର୍ଟାଲ ଲଞ୍ଚ୍ କରାଯାଇଛି । ଏହା ମାଧ୍ୟମରେ ସେମାନଙ୍କ ସମସ୍ୟାର ନିରାକରଣ କରାଯିବ ।

ମାନବ ସମ୍ବଳ ବିକାଶ ମନ୍ତ୍ରୀ ଶ୍ରୀ ରମେଶ ପୋଖରିଆଲ ‘ନିଶଙ୍କ’ ଦ୍ୱାରା ଏହି ୱେବସାଇଟ୍ ଯାହାର ୟୁଆରଏଲ https://helpline.aicte-india.org ଲଞ୍ଚ୍ ହୋଇଛି । ଏହି ଲଞ୍ଚିଙ୍ଗ୍ ଏଆଇସିଟିଇ ଅଧ୍ୟକ୍ଷ ପ୍ରଫେସର ଅନିଲ ସହସ୍ରବୁଦ୍ଧେ, ଏଆଇସିଟିଇ ଉପାଧ୍ୟକ୍ଷ ଶ୍ରୀ ଏମପି ପୁନିଆ, ଏଆଇସିଟିଇ ମୁଖ୍ୟ ସମନ୍ୱୟ ଅଧିକାରୀ ଶ୍ରୀ ବୁଦ୍ଧ ଚନ୍ଦ୍ରଶେଖର ଓ ରେକର୍ଡ ସମୟ ଦିନକ ମଧ୍ୟରେ ପୋର୍ଟାଲ ବିକାଶ କରିଥିବା ଗ୍ରାଫିକ ଏରା ବିଶ୍ୱବିଦ୍ୟାଳୟର ଇଣ୍ଟର୍ଣ୍ଣ ଶିବାଂଶୁ ଓ ଆକାଶଙ୍କ ଉପସ୍ଥିତିରେ ହୋଇଥିଲା ।

ଏହି ଅବସରରେ ମନ୍ତ୍ରୀ କହିଥିଲେ ଯେ, ଏହି ପୋର୍ଟାଲ ନିଶ୍ଚିତ ଭାବେ ସହାୟତା ପ୍ରଦାନ କରୁଥିବା ବ୍ୟକ୍ତିଙ୍କୁ ସାହାଯ୍ୟ ଚାହୁଁଥିବା ଛାତ୍ରଛାତ୍ରୀଙ୍କ ସହ ଯୋଡ଼ିବ । ଏହା ମାଧ୍ୟମରେ ଆବାସ, ଖାଦ୍ୟ, ଅନଲାଇନ କ୍ଲାସରୁମ୍, ଉପସ୍ଥିତି, ପରୀକ୍ଷା, ଛାତ୍ରବୃତ୍ତି, ସ୍ୱାସ୍ଥ୍ୟ, ପରିବହନ, ଉତ୍ପୀଡ଼ନରୁ ମୁକ୍ତି ଭଳି ସାହାଯ୍ୟ ମିଳିପାରିବ ।

ମନ୍ତ୍ରୀ କହିଛନ୍ତି ଏପରି ବିଷମ ପରିସ୍ଥିତିରେ ଆବଶ୍ୟକ ସହଯୋଗ ପ୍ରଦାନ କରିବା ପାଇଁ 6500ରୁ ଅଧିକ କଲେଜ ଆଗେଇ ଆସିଛନ୍ତି । ବିଭିନ୍ନ ସମସ୍ୟାର ସମ୍ମୁଖୀନ ହେଉଥିବା ଛାତ୍ରଛାତ୍ରୀମାନଙ୍କୁ ଏହି ପୋର୍ଟାଲ ମାଧ୍ୟମରେ ଯୋଡି ହେବାକୁ ପ୍ରୋତ୍ସାହିତ କରାଯିବ । ଏହି ନିଆରା ପ୍ଲାଟଫର୍ମ ବିକଶିତ କରିଥିବା ଦୁଇ ଛାତ୍ରଙ୍କୁ ଏହି ଅବସରରେ ଶ୍ରୀ ନିଶଙ୍କ ପ୍ରଶଂସା କରିଥିଲେ ।

ବହୁ ଉଚ୍ଚ ଶିକ୍ଷା ସଂସ୍ଥାନ ମଧ୍ୟ ନିଜ ଗବେଷଣା ମାଧ୍ୟମରେ ସ୍ୱାସ୍ଥ୍ୟ ସେବାକୁ ସଶକ୍ତ କରି ସରକାରଙ୍କୁ ଆବଶ୍ୟକ ସହଯୋଗ ଯୋଗାଇ ଦେବାକୁ ଆଗେଇ ଆସିଥିବାରୁ ମନ୍ତ୍ରୀ ବେଶ ଖୁସି ବ୍ୟକ୍ତ କରିଥିଲେ । ଏଆଇସିଟିଇର ଅଧ୍ୟକ୍ଷ ପ୍ରଫେସର ଅନିଲ ସହସ୍ରବୁଦ୍ଧେ ମଧ୍ୟ ସ୍ୱେଚ୍ଛାସେବୀ ସଂଗଠନ, ବେସରକାରୀ ସଂଗଠନ, ସାମାଜିକ ସଂଗଠନ ଓ ବଦାନ୍ୟ ବ୍ୟକ୍ତିମାନଙ୍କୁ ଅପିଲ କରି କହିଛନ୍ତି ଯେ ସେମାନେ ମଧ୍ୟ 6500 କଲେଜ ଭଳି ଆଗେଇ ଆସନ୍ତୁ ଓ ନିଜ ପକ୍ଷରୁ ଯଥାସମ୍ଭବ ସହଯୋଗ ପ୍ରଦାନ କରନ୍ତୁ । ଇଚ୍ଛୁକ ସାମାଜିକ ସଂଗଠନ, ବେସରକାରୀ ସଂଗଠନ, ସାମାଜିକ ସଂଗଠନ ଓ ବଦାନ୍ୟ ବ୍ୟକ୍ତିମାନେ ଏଆଇସିଟିଇ ସହ ଏହି ଲିଙ୍କ (cconeat@aicte-india.org)ରେ ଯୋଗାଯୋଗ କରିପାରିବେ ।

**********