பிரதமர் திரு நரேந்திர மோடி தலைமையில் நடைபெற்ற மத்திய அமைச்சரவையில் தேசிய சுகாதார இயக்கத்தின் முன்னேற்றம் மற்றும் இந்த இயக்கத்தின் அதிகாரமளிக்கப்பட்ட திட்டக்குழு, இயக்க வழிகாட்டுதல் குழு ஆகியவற்றின் முடிவுகள் பற்றி எடுத்துரைக்கப்பட்டது.

இதன் முக்கிய அம்சங்கள்:

தேசிய சுகாதார இயக்கம் / தேசிய ஊரக சுகாதார இயக்கம் தொடங்கப்பட்ட பின், தாய் மரண விகிதம், சிசு மரண விகிதம், ஐந்து வயதுக்கு உட்பட்ட குழந்தை மரண விகிதம் குறைவது அதிகரித்துள்ளது. தற்போதைய குறைவு விகிதப்படி, நீடித்த வளர்ச்சி இலக்குகளை,  நிர்ணயிக்கப்பட்ட 2030-க்கு முன்பாகவே இந்தியா அடைந்துவிடும்.

திருத்தியமைக்கப்பட்ட தேசிய காசநோய் கட்டுப்பாட்டுத் திட்டம் குறிப்பிடத்தக்க அளவு வலுப்பட்டுள்ளது; தீவிரமடைந்துள்ளது. காசநோயைத் துல்லியமாகக் கண்டறியும் 1,180 சிபிஎன்ஏஏடி கருவிகள் அனைத்து மாவட்டங்களிலும் நிறுவப்பட்டுள்ளன. இதன்மூலம், இத்தகைய கருவிகளின் பயன்பாடு கடந்த ஆண்டு மூன்று மடங்கு அதிகரித்துள்ளது. தீவிரமாக்கப்பட்ட முயற்சிகள் காரணமாகவே ஒரே ஆண்டில் காசநோய் கண்டறிதல் 16% அதிகரித்துள்ளது.

2018-19-ல் 52,744 ஆரோக்கிய மையங்களுக்கு ஒப்புதல் அளிக்கப்பட்டது. இலக்கு அளவான 15,000 என்பதைக் கடந்து, 17,149 ஆரோக்கிய மையங்கள் செயல்பாட்டுக்கு வந்துள்ளன. 2018-19-ல் ஆஷா ஊழியர்கள், பன்நோக்கு சுகாதார ஊழியர்கள், செவிலியர்கள், பொது சுகாதார மையங்களின் ஊழியர்கள் உட்பட 1,81,267 சுகாதார ஊழியர்களுக்கு தொற்று அல்லாத நோய்கள் குறித்த பயிற்சி அளிக்கப்பட்டுள்ளது.

2018-ல் தட்டம்மைக்கான தடுப்பூசி இயக்கம் கூடுதலாக 17 மாநிலங்களில் நடத்தப்பட்டது. இதில் மார்ச் 2019 வரை 30.50 கோடி குழந்தைகளுக்கு தடுப்பூசி போடப்பட்டுள்ளது.

2018-19-ல் ரோட்டா வைரஸ் தடுப்பூசி மேலும் இரண்டு மாநிலங்களில் அறிமுகம் செய்யப்பட்டது. இப்போது அனைத்து மாநிலங்கள் / யூனியன் பிரதேசங்களில் தடுப்பூசி போடப்பட்டுள்ளது.

ரத்தசோகை ஒழிப்புத் திட்டம் 2018 ஏப்ரலில் ஊட்டச்சத்துத் திட்டத்தின்கீழ் தொடங்கிவைக்கப்பட்டது.

வரும்முன் காத்தல், நோய் அறிதல், சிகிச்சை அளித்தல் ஆகியவற்றுக்கான தேசிய மஞ்சள் காமாலை கட்டுப்பாட்டுத் திட்டம் தொடங்கப்பட்டுள்ளது. இதன்மூலம் 5 கோடி பேர் பயனடைவார்கள் என்று மதிப்பிடப்பட்டுள்ளது.

                                        ********