गोंय, 22 नोव्हेंबर 2026
संवसारीक पांवड्याचेर चित्रपट चित्रीकरण आनी निर्मिती केंद्र म्हण भारताची वाडपी तांक 57व्या भारतीय आंतरराष्ट्रीय चित्रपट महोत्सवांत (इफ्फी) चर्चेचो विषय जालो. देशाची आंतरराष्ट्रीय चित्रपट निर्मिती क्षेत्रांतली स्थिती आनी प्रतिष्ठा बळिश्ट करपाखातीर आशिल्ल्या संदींचेर धोरण रचपी आनी उद्देग क्षेत्रांतल्या म्हत्वाच्या व्यक्तीमत्वानी विचारमंथन केलें.
"सुलभ चित्रीकरण : संवसारीक चित्रीकरण आनी निर्मिती केंद्र म्हूण भारताची वाडटी वळख" ह्या विषयाचेर पॅनेल चर्चा आयोजीत केल्ली. हातूंत म्हायती आनी वितरावण मंत्रालयाचे जोड सचिव श्री पृथुल कुमार, स्क्रिन ऑस्ट्रेलियाच्यो मुखेल संचालन अधिकारी श्रीमती ग्रेने ब्रंडसन आनी म्हालगडे अभिनेते, दिग्दर्शक आनी निर्माते श्री अनुपम खेर हांणी वांटो घेतलो.
_20261122164754_cb1b73.jpeg)
म्हायती आनी वितरावण मंत्रालयाच्या फुडारपणाखाला सुरू केल्लें आनी राष्ट्रीय चित्रपट उदरगत म्हामंडळा वरवीं चलणुकेंत आशिल्लें एकूच सुवातेर डिजिटल माची दिवपी इंडिया सिने हब, भारतांत चित्रपट निर्मिती सुटसुटीत करता, हाचेर ह्या चर्चेंत भासाभास जाली. चित्रपट समीक्षक आनी पत्रकार राजीव मसंद हांणी चर्चेचें संचालन केलें.
चर्चेची सुरवात करताना श्री कुमार हांणी इंडिया सिने हब पोर्टलाचेर राज्य सरकारांचो समावेश करप हे चित्रीकरणाचे परवाने मेळोवपाची प्रक्रिया सुलभ करपाच्या दिकेन एक म्हत्त्वाचें पावल आसा, अशें नमुद केलें. आतां चित्रपट निर्माते एकाच डिजिटल माचयेच्या माध्यमांतल्यान एक अर्ज भरून नगरपालिका, येरादारी विभाग, भारतीय रेल्वे आनी भारतीय पुरातत्त्व सर्वेक्षण विभाग सारकेल्या वेगवेगळ्या सरकारी यंत्रणांकडल्यान परवाने मेळोवंक शकता.
ह्या माचयेचेर सुमार 32 सेवांचो आस्पाव आसा, अशें तांणी सांगलें. अर्जदार आपल्या अर्जांची वस्तुस्थिती डॅशबोर्डाच्या माध्यमांतल्यान पळोवपाक शकतात आनी गरजे प्रमाण सुरक्षित पेमेंट लिंकांच्या माध्यमांतल्यान शुल्क भरपाची सोय लेगीत उपलब्ध आसा. डिजीटल स्कायच्या माध्यमांतल्यान ड्रोन चित्रीकरणाखातीर लेगीत परवाने मेळोवपाची प्रक्रिया सुरू करपाचो यत्न चालू आसा.

भारतांत चित्रीकरण करपाच्या सुलभतायेचेर उजवाड घालताना श्री कुमार हांणी, आंतरराष्ट्रीय चित्रपट चित्रीकरणाचे परवाने मेळोवपाखातीर अधिकृत प्रक्रिया पूर्ण करपाची मुजत 28 दिस आशिल्ली, ती 2015 सावन आतां फकत 18 दिसांनी जाता, अशें सांगून तांणी, मध्य प्रदेश सरकाराच्या गृहीत मंजुरी तरतुदीचोय उल्लेख करतना अर्ज सादर केल्यार 15 दिसां भितर निर्णय कळयलो ना, जाल्यार तो अर्ज मंजूर जालो अशें मानूं येता, अशें मुखार सांगलें.
चित्रीकरण आनी सहनिर्मिती केंद्र म्हूण भारताच्या वाडपी लोकप्रियतेचेर उलयतना श्री कुमार हांणी अश्यो संदीं सोदत, भारताक संपर्क करपी आंतरराष्ट्रीय चित्रपट निर्मिती प्रकल्पांची संख्या दरवर्सा 25 ते 30 सावन वाडून आतां 100 ते 200 मेरेन पावल्या, अशी म्हायती दिली. संवसारांतल्या चित्रपट निर्मात्यांक भारतांतली निर्मिती संसाधनां सोदपाक आनी तांचो वापर करपाक सुलभ जावचें, हे खातीर तांणी निर्मिती क्षेत्रांतल्या वेवसायिकांक आनी सेवा पुरवपी संस्थांक India Cine Hub पोर्टलाचेर नोंदणी करपाचें आवाहन केलें.
भारत आनी ऑस्ट्रेलिया हांचेमदीं सहकार्याच्या संदींविसीं उलयताना सुश्री ब्रंडसन हांणी सांगलें की, भारतांतली विविध चित्रीकरण स्थळां, चित्रपट निर्मिती क्षेत्रांतली प्रतिभा आनी प्रेक्षकांकडेन आशिल्लो भावनिक संबंध हाका लागून भारत आंतरराष्ट्रीय भागीदारीखातीर एक आकर्षक केंद्र जाला. ऑस्ट्रेलियात भारतीय सिनेमाची लोकप्रियता वाडटा, हाचेर तांणी भर दिलो. फाटल्या वर्सा ऑस्ट्रेलियात, ऑस्ट्रेलियन चित्रपटापरस लोकांनी भारतीय चित्रपट चड पळयलो, अशें तांणी नमूद केलें. भारतवंशी लोकसंख्येंतली वाड आनी दोन देशांमदले मजबूत सांस्कृतिक, शैक्षणिक, क्रीडा आनी वेपार संबंध हाका लागून एकठांय येवन कथा सांगपाखातीर मोठ्यो संदी उपलब्ध जातात, अशेंय तांणी सांगलें.

चित्रपट निर्मितीखातीर सरकारी सहाय्याचें म्हत्त्व अधोरेखित करताना सुश्री ब्रंडसन हाणी म्हळें, “दर एक चित्रपट हो एका नव्या स्टार्टअप सारको आनी एका चमत्कारासारको आसता. ताची सुरवात एका सपनान वा कल्पनेन जाता. ती प्रत्यक्षांत उतरपाखातीर समर्पण, आवड आनी हेरांचो पाठिंबो गरजेचो आसता.”
यशस्वी सहनिर्मिती म्हळ्यार केवळ आर्थिक सहकार्य आनी जोखीम वांटून घेणें न्हय, तर तातूंत सर्जनशील विचारांची देवाणघेवाण करपाच्योय संदी आसतात, अशें तांणी सांगलें. भारतीय आनी ऑस्ट्रेलियन चित्रपट निर्मात्यांक एकामेकांच्या कथाकथन परंपरेंतल्यान शिकपाची आनी दोनूय देशांमदल्या भारतीय वंशाच्या लोकांच्या अनुभवांसारख्या समान अनुभवांचेर आधारित कथा तयार करपाची मोठी संद आसा. अश्यो कथ दोनूय देशांतल्या प्रेक्षकांच्या काळजाक हात घालूंक शकतात, अशें तांणी नमूद केलें.
भारत सरकारान India Cine Hub व्यासपीठ स्थापन करपाक घेतिल्ल्या फुडाकाराची तोखणाय करताना श्री अनुपम खेर हांणी सांगलें की, चित्रपट चित्रीकरणाखातीर परवानग्यो मेळोवपाची प्रक्रिया आतां खूब सोपी जाल्या. भारतांतली विविध भौगोलिक स्थळां, खाद्यसंस्कृती, वेशभूषा आनी सांस्कृतिक वातावरण चित्रपट निर्मात्यांक सर्जनशीलतेखातीर असामान्य संदी उपलब्ध करून दिता, अशें तांणी सांगलें. चित्रपट ही कला भौगोलिक सीमा ओलांडटा, हाचेर भर दिताना श्री खेर हाणी सांगले, “भावनांक वेगवेगळ्यो राष्ट्रीयताय आसना. तुमकां फकत चित्रीकरण करपाची संद मेळुक जाय.”

एकाच सुवातेर परवानगी व्यवस्थेचो लाव केवळ प्रस्थापित निर्मात्यांकच न्हय, तर नव्या निर्मात्यांक, लेखकांक, चित्रपट निर्मिती क्षेत्रांतल्या वेवसायिकांक आनी महत्त्वाकांक्षी दिग्दर्शकांकय जाता, अशें श्री खेर हांणी नमूद केलें. परवानग्यो मेळोवन दिवपाच्या नावाखाला चित्रपट निर्मात्यांचो गैरफायदो घेवंक मध्यस्थ निर्माण जावपाची शक्यताय आसा ताकालागून हेविशीं सादूर रावचे, अशे तांणी सांगलें.
ह्या चर्चेंतल्यान सुलभ परवानगी प्रक्रिया, तरेकवार चित्रीकरण स्थळां आनी सर्जनशील सहकार्याच्यो संदी हांच्या बळाचेर आंतरराष्ट्रीय चित्रपट निर्मितीखातीर भारत एक पसंतीचें केंद्र जावपाची वाडपी शक्यताय अधोरेखित जाली. संवसारीक चित्रपट क्षेत्रांत विचारांची आनी कलात्मक देवाणघेवाण घडोवन हाडपी माची म्हूण इफ्फी ची भूमिका लक्षांत घेतल्यार, अशा सत्रांच्या माध्यमांतल्यान उद्देग क्षेत्रांतली म्हत्वाची भागीदारी आनी चित्रपट निर्मितीखातीर पोषक वातावरण भारताच्या चित्रपटसृष्टीखातीर संवसारीक पांवड्याचेर नव्यो संदी कश्यो निर्माण करूंक शकता, हें कळटा.
Read IFFILOID here: https://www.pib.gov.in/iffi/57/iffiLoid.aspx?yr=2026&lang=1®=48
* * *
पीआयबी मुंबई | मनाली प्रभूगांवकर/प्रियंका वेलिंगकर/दर्शना राणे