નેશનલ ફિલ્મ ડેવલપમેન્ટ કોર્પોરેશન (NFDC) અને સોની પિક્ચર્સ નેટવર્ક્સ ઇન્ડિયા (SPNI) એ આજે 57મા ભારતીય આંતરરાષ્ટ્રીય ફિલ્મ મહોત્સવ (IFFI), ગોવા ખાતે WAVES બઝાર × SPNI કન્ટેન્ટ ક્રિએટર સબમિશન પહેલ શરૂ કરવા માટે એક સમજૂતી કરાર (MoU) પર હસ્તાક્ષર કર્યા હતા.
આ પહેલ સમગ્ર ભારતના લેખકો, સર્જકો અને પ્રોડક્શન હાઉસને હિન્દી, અંગ્રેજી, તમિલ, તેલુગુ અને બંગાળીમાં SPNI સમક્ષ મૌલિક ફિક્શન અને નોન-ફિક્શન કોન્સેપ્ટ્સ રજૂ કરવાની તક પૂરી પાડશે.

ફિક્શન સિરીઝ, પ્રીમિયમ TV+ કન્ટેન્ટ, રિયાલિટી શો, ગેમ અને સ્પર્ધાના ફોર્મેટ્સ, પ્રતિભા-આધારિત કાર્યક્રમો અને અન્ય અનસ્ક્રિપ્ટેડ કોન્સેપ્ટ્સ સહિત વિવિધ ફોર્મેટ્સમાં સબમિશન આમંત્રિત કરવામાં આવ્યા છે. પસંદ કરાયેલા અરજદારોને વિચારણા અને સંભવિત વિકાસ માટે SPNI સમક્ષ તેમના કોન્સેપ્ટ્સ રજૂ કરવા માટે આમંત્રિત કરવામાં આવશે.
માહિતી અને પ્રસારણ મંત્રાલયના નેજા હેઠળ, NFDC નું ઉદ્યોગ મંચ, WAVES બઝાર, સર્જનાત્મક પ્રતિભાને ભારતની મીડિયા અને મનોરંજન ઇકોસિસ્ટમના હિસ્સેદારો સાથે જોડે છે. આ સહયોગનો ઉદ્દેશ્ય મૌલિક વાર્તાકથન માટે, ખાસ કરીને પ્રાદેશિક બજારોમાંથી તકોનો વિસ્તાર કરવાનો અને વૈવિધ્યસભર અવાજો તથા દ્રષ્ટિકોણોને વ્યાપક પ્રેક્ષકો સુધી પહોંચાડવાનો છે.
MoU પર હસ્તાક્ષર પ્રસંગે બોલતા, NFDCના અધ્યક્ષ જી. કૃષ્ણકુમારે કહ્યું, “IFFI એ સિનેમા અને તેને શક્ય બનાવનારા લોકોની ઉજવણી છે. તે વિશ્વભરની વાર્તાઓ, સંસ્કૃતિઓ અને સર્જનાત્મક અવાજોને એકસાથે લાવે છે. ફિલ્મો અને અવાજોની વિવિધતા જ આ આવૃત્તિને વિશેષ બનાવે છે. થીમ, સ્ટોરીઝ વિધાઉટ બોર્ડર્સ, સિનેમાની ભાવનાને સુંદર રીતે રજૂ કરે છે.”

NFDCના મેનેજિંગ ડિરેક્ટર ધીરજ સિંહે કહ્યું, “WAVES બઝાર સર્જનાત્મક પ્રતિભા અને ઉદ્યોગ વચ્ચે અર્થપૂર્ણ જોડાણો બનાવવાનું ચાલુ રાખે છે. સોની પિક્ચર્સ નેટવર્ક્સ ઇન્ડિયા સાથેનો આ સહયોગ લેખકો, સર્જકો અને પ્રોડક્શન હાઉસ માટે વિવિધ ભાષાઓ અને ફોર્મેટ્સમાં મૌલિક કોન્સેપ્ટ્સ રજૂ કરવાના નવા માર્ગો ખોલે છે.”
સોની પિક્ચર્સ નેટવર્ક્સ ઇન્ડિયાના મેનેજિંગ ડિરેક્ટર અને CEO ગૌરવ બેનર્જીએ કહ્યું, “સમગ્ર દેશમાં અપાર સર્જનાત્મક પ્રતિભા છે, એવા વિચારો સાથે જેમને હંમેશા સ્થાપિત પ્લેટફોર્મ સુધી પહોંચવાનો માર્ગ મળતો નથી. WAVES બઝાર દ્વારા NFDC સાથેની અમારી ભાગીદારી લેખકો અને સર્જકો માટે વિવિધ ભાષાઓ અને ફોર્મેટ્સમાં તેમના મૌલિક કોન્સેપ્ટ્સ અમારી સમક્ષ લાવવા માટે વધુ માર્ગો બનાવવા તરફનું એક પગલું છે. અમે પ્રેક્ષકો માટે નવા દ્રષ્ટિકોણો અને આકર્ષક વિચારો શોધવા માટે ઉત્સુક છીએ.”
NFDC WAVES બઝાર પોર્ટલ (https://wavesbazaar.com) દ્વારા સબમિશનનું સંચાલન કરશે અને પરસ્પર સંમત માપદંડોના આધારે એન્ટ્રીઓને શોર્ટલિસ્ટ કરશે. પસંદ કરાયેલા અરજદારોને SPNI સમક્ષ તેમના કોન્સેપ્ટ્સ રજૂ કરવા માટે આમંત્રિત કરવામાં આવશે.

IFFILOID અહીં વાંચો: https://www.pib.gov.in/iffi/57/iffiLoid.aspx?yr=2026&lang=1®=48
SM/IJ/JD