Ka jingkylla bad jingroi jong ka kam pynbyrngia digital ha India kan sa long ka mat pdeng ha ka tamasa International Film Festival of India (IFFI) kaba 57, kaba la buh ban pynlong ha Goa naduh ka 20 tarik haduh ka 28 tarik u Naiwieng, 2026. Ha kane ka tamasa, san tylli ki web series kiba don ïa ki jinglong kyrpang kin ïakhun na ka bynta ka khusnam Best Web Series Award, hapoh ka kyrdan jong ki OTT Awards. Da kaba wanrah lang ïa ki jingïathuhkhana kiba shong nongrim ha ki jingshisha jong ka imlang sahlang, ki dustur tynrai, ki jingjia kiba kongsan ha ka histori bad ki jingïadei hapdeng ki briew, kine ki jingjied kyrpang ki pynpaw ïa ka jingbun jait bad ka jingangnud kaba ïai pyrkhat thymmai kaba la nangroi stet ha ka rukom treikam OTT ha India.
To ngin ïa peit ïa ki web series kiba la shah jied ban ïakhun na ka bynta ka khusnam:
Adarsh Baal Vidyalaya

Ka phlim Adarsh Baal Vidyalaya ba la ring da u Himank Gaur ka wanrah ïa ka biria bad ka jingïakren ha ka imlang sahlang ba ïadei bad ka jingshisha jong ka tnat pule puthi paidbah ha India. Kaba la ringdur ha kawei ka skul sorkar ha Delhi, kane ka series ka ïathuh ïa ka khana shaphang uwei u headmaster uba kyrteng u Gyaneshwar Tripathi, kaba ka jingangnud jong u ban leit sha Cambridge ka shong tang lada ki khynnah pule jong u ki ïaleh bha ha ki eksamin. Wat hapdeng ki jingeh ba kynthup ïa ka jingbym myllen jong ki khynnah pule ha ki jingpule jong ki, ki jingduna ha ki rukom treikam jong ka skul bad ka jingeh ba ïadei bad ka sawdong sawkun ha ka liang ka pule puthi, ka jingwan jong uwei u nonghikai pat uba don ïa ki jingangnud bad ki jingthmu kiba bha ka la pynmih ïa ka jingpyrshang ban wanrah ïa ka jingkylla ha katei ka skul.
Da kaba khleh lang ïa ka buit biria ha ryngkat ka jingpashat ïa ki jingeh jong ka pule puthi, kane ka series ka kdew ïa ka bynta jong ki nonghikai kiba aiti met bad mynsiem bad ka jinglah ban wanrah ïa ka jingkylla hapoh ki shlem treikam paidbah.
Devkhel

Ba ïoh mynsiem na ki khanatang bad ki jingngeit tynrai, ka phlim Devkhel, kaba la ring da u Chandrakant Lata Gaikwad, ka ïalam ïa ki nongpeit phlim sha ka pyrthei ba maïa jong ka shnong Devtali, ha kaba ka ju don beit ka jingkhlad briew man la u snem ha ka miet jong ka sngi rakhe Holi. Ki nongshong shnong ki pynïadei ïa kine ki jingjia ba man la ka por bad u Shankasur, uwei u ksuid uba don ha ki khana myllung bad uba ïadei bad ki dustur tynrai jong katei ka thaiñ. Haba kawei ka jingïap kaba phylla, kaba la jia biang, u Inspector Vishwas u la mih ban leit wad ban lap ïa ka jingshisha kaba don hadien jong kane ka jingjia kaba pynkhuslai. Katba ka jingtohkit ka nang ïaid shakhmat, kawei pa kawei ka jingshisha ba la buhrieh jong ka shnong, ki jingthmu kiba rieh bad ki jingkylli kiba ïadei bad ka jingngeit ki sdang ban paw shabar.
Da kaba khleh lang ïa ki bynta jong ki kam runar, ka sorsa, bad ki khanatang, kane ka series ka pyni ïa ka jingïakhleh ba rah mynsiem hapdeng ka jingngeit biej, ki dustur tynrai bad ka jingshisha.
Made in India: A Titan Story

Ba la ring da u Robbie Grewal, kane ka series Made in India: A Titan Story ka buddien ïa ka jingangnud ha ka kam khaii pateng kaba la tei ïa kawei na ki brand tynrai jong ka India kaba la pawnam tam. Da kaba ringdur ïa ka jingïathuhkhana ha ka por shwa ban plie lad ïa ka ïew India sha ka pyrthei (pre-liberalisation era), kane ka series ka pyni ïa ka jingïaid lynti jong u Xerxes Desai bad ka jingpyrshang kaba khraw jong u ban seng ïa ka brand shna baje jong ka India kaba lah ban ïaryngkat bad ki brand ha ka pyrthei, ha ka ïew kaba ki mar kiba nabar ri bad ki baje ba la shalan beaiñ ki ïaid ïew bha. Da ka jingïalam lynti jong u J.R.D. Tata bad ka jingkyrshan na ka kynhun kaba shitrhem, u Desai u ïakhun ban wad lad ban jop ïa ki jingeh kiba mih na ki jingtreikam ki tnat sorkar, ka jingeh ha ka laiñ pisa bad ki jingeh ha ka liang ka teknoloji.
Kane ka khana ka pynpaw ïa ka jingkut jingmut, ka jingpyrkhat thymmai bad ka mynsiem ba ïalam lynti kaban pynkylla ïa ka jingthmu ban tei ïa ki karkhana kaba heh sha ka jingpynurlong bashisha, kaban kylla long kawei na ki bynta ba kongsan ha ka histori jong ka kam karkhana bad ka khaii pateng ha India.
Mayasabha: The Rise of the Titans

Kaba la pynwandur na ka jingjia ba dap da ka jingïakynad bad jingïapher jingmut ha ka saiñpyrthei jong ka Jylla Andhra Pradesh ha ki snem 1970 eiei, kane ka phlim Mayasabha: The Rise of the Titans ba la ring da u Deva Katta ka pyni ïa ka jingïaidlynti jong u Kakarla Krishnama Naidu (KKN) uwei na ki nongïalam jong ki samla pule uba don ïa ki jingangnud bad ki jingthmu kiba bha bad u M.S. Rami Reddy, uwei u samla lud uba wan na ka longïing kaba khlaiñbor.
Watla ki sdang kum ki paralok kiba jan bha bad ki don la ki jingïapher ha ka longïing longsem jong ki, ki don pat ïa kawei ka jingthmu kaba pynïasnoh lang ïa ki, kata ka jingangnud ban wanrah ïa ka jingkylla ha ka imlang sahlang bad ha ka saiñ pyrthei. Hynrei, katba ki ïaid lyngba ki jingshisha kiba kthang jong ka jingim saiñpyrthei, ka jingïadei paralok jong ki ka sdang ban tlot. Ki hap ban ïakynduh ïa ki jingeh bapher bapher, kiba kynthup ïa ka jingïapher ha ka kyrdan jaitbynriew (caste), ka bor jong ka pisa, ka bamsap, ka jingïaknieh bor bad ki jingkylla ha ka rukom jingïadei hapdeng ki briew. Kane ka jingkylla ha ka jingïadei jong ki na ka jinglong paralok kiba ju ïatreilang sha ki nongïaleh pyrshah iwei ïa iwei ha ka saiñpyrthei ka kylla long ka pdengduh jong kane ka jingïathuhkhana, kaba bishar bniah ïa ki rukom pynïaid ha ki kam saiñ pyrthei, ka jingkylla jong ka jinglong ba ïaineh bad ka jingeh jong ki jingïadei hapdeng ki briew hapoh ki jaka treikam jong ka bor synshar.
Musafir Café

Da kaba wanrah ïa ka rukom ïathuhkhana kaba kham jan bad ka jingsngew jong ki briew, ka phlim Musafir Café, kaba la ring da u Ruchir Arun, ka wad bniah ïa ki bynta bapher bapher jong ka jingieit, ka jingïadon ryngkat bad ka jingshem ïalade. Da kaba pynleit jingmut ha u Chander Mohan Sharma bad ki jingïadei jong u bad ka Sudha bad ka Preeti, kane ka series ka pyni ïa ka jingïaidlynti jong u ha ka liang ki jingsngew, katba u ïakynduh ïa ki jingkylla ha ki jinglong jingman, ki rai kiba u shim ha la ka jingim bad ki jingeh kiba mih na ki jingïadei bapher bapher hapdeng ki briew. Da kaba ringdur ïa ka jingïathuhkhana ha ki sawdong sawkun kiba itynnad jong ka Bhopal bad ka Mussoorie, kane ka phlim ka pynphalang ïa ki jingsngew kiba ïadei bad ka jingieit, ki kabu kiba la duh noh, ka jingpdiang ïa kiei kiei bad ki jingkylla kiba wan kynsan ha ka jingim, kiba pynkylladur ïa ka jingïaid lynti jong uwei pa uwei u briew. Ka pyni ïa ki jingïadei kum ki jingïaidlynti jong ka jingheh jingsan bad ka jingshem ïalade, ha kaba man ki jingïakynduh ki pynsahdak ha ka jingsahkynmaw jong u briew.
Ha kajuh ka rukom, kine ki san tylli ki jingjied ba kyrpang ki pyni ïa ki jinglah ban nang thaw thymmai kiba nang ïar ha ka rynsan pyni ïa ki prokram OTT ha India, ha kaba ki jingïathuhkhana na ki thaiñ, ki kolshor bad ki sawdong sawkun ha ka imlang sahlang bapher bapher ki ïoh lad ban pynpaw ïa lade lyngba ka rynsan digital. Na ki jingeh kiba ha ki kamra klas jong ki skul sorkar bad ki jingmaïa kiba don ha ki khana pateng jong ki shnong, shaduh ka jingïaidlynti jong ka India ha ka kam khaii pateng, ki jingïaleh pyrshah ha ka saiñpyrthei bad ki bynta bapher bapher jong ka jingieit, kine ki series kiba la shah jied ki pyni ïa ka jingbun jait jong ki phang kiba ki nongïathuhkhana jong ka India ha kane ka juk mynta ki dang ïai wad bniah bad pyni lyngba ki kam thaw phlim.
Kane ka khusnam Best Web Series (OTT) Award kaban sa pynkup ha ka tamasa pyni phlim kaba 57 kata ka International Film Festival of India (IFFI), naduh ka 20 haduh ka 28 tarik u Naiwieng, 2026, ha Goa ka ai jingithuh bad jingburom ïa ka jinglong ba kyrpang bad ka jingtrei ba kynsai ha ki kam pynmih prokram kiba shisha, bad ka rakhe ïa ka jingïar jingmut bad ki jingnoh synñiang jong ki nongthoh, ki nongpynmih phlim, ki nongthaw prokram, ki tyngshop-puron bad ki kynhun pynmih phlim, kiba la don bynta ha kaban pynwandur bad kyntiew ïa ka kam pynbyrngia digital jong ka India. Kine ki jingjied kyrpang ki pynskhem sa shisien ïa ka jingkordor kaba nang ïai kiew jong ki rynsan OTT kum ki lad kiba kongsan ban wanrah ïa ki rukom ïathuhkhana kiba thymmai bad ki rukom pyni kiba itynnat.
***