પ્રખ્યાત ફિલ્મ નિર્માતા અલીના શેરબન દ્વારા લિખિત અને નિર્દેશિત બહુભાષી ડ્રામા આઈ મેટર (Eu Contez)નું 57મા ઇન્ટરનેશનલ ફિલ્મ ફેસ્ટિવલ ઓફ ઇન્ડિયા (IFFI) માં મિડ-ફેસ્ટ ફિલ્મ તરીકે ભારતીય પ્રીમિયર યોજાશે. રોમાનિયા, જર્મની અને બેલ્જિયમના સહ-નિર્માણથી બનેલી 101-મિનિટની આ ફિલ્મ ઓળખ, પરિવાર, પોતીકાપણું અને વ્યક્તિના ભૂતકાળની પરિસ્થિતિઓથી પર ભવિષ્યની શોધની વાત રજૂ કરે છે. રોમાનિયન અને રોમાની ભાષામાં સંવાદો ધરાવતી આ ફિલ્મ ફેસ્ટિવલમાં એક વિશિષ્ટ યુરોપિયન સિનેમેટિક દ્રષ્ટિકોણ લાવે છે.
આ ફિલ્મ રેબેકા નામની એક યુવાન રોમા મહિલાની કહાની છે, જેણે અનાથાશ્રમને પોતાનું ઘર માન્યું હતું તેને છોડવાની તૈયારી કરી રહી છે. જેલમાંથી તેના પિતાની સંભવિત મુક્તિ સાથે, તેને આશા છે કે તે હંમેશા જે પરિવારની ઝંખના કરતી હતી તે તેને મળશે અને તે પોતાના જીવનનો એક નવો અધ્યાય શરૂ કરશે. અભિનયનો અભ્યાસ કરવા માટે યુનિવર્સિટીમાં તેનો પ્રવેશ નવી આશા અને પોતાનું ભવિષ્ય જાતે ઘડવાની શક્યતા લાવે છે. જો કે, જેમ જેમ તે એક અજાણી દુનિયામાં આગળ વધે છે, તેમ તેમ તેના ભૂતકાળના વણઉકેલાયેલા અનુભવો ફરી સામે આવે છે, જે તેને મુશ્કેલ પસંદગીઓનો સામનો કરાવે છે.
રેબેકાની સફર દ્વારા, આઈ મેટર સ્થિર પારિવારિક વાતાવરણ વિના મોટા થવાના ભાવનાત્મક પડકારો, સ્વીકૃતિની શોધ અને સમાજમાં પોતાનું સ્થાન શોધવાના નિશ્ચયને ઉજાગર કરે છે. એક યુવાન રોમા મહિલાના અનુભવોની પૃષ્ઠભૂમિ પર આધારિત આ ફિલ્મ સામાજિક સમાવેશ, ગરિમા અને વ્યક્તિગત સ્વતંત્રતાના પ્રશ્નો સાથે પણ જોડાય છે.
આ ફિલ્મ પ્રતિષ્ઠિત અભિનેત્રી અને નાટ્યકાર અલીના શેરબનના ફીચર-દિગ્દર્શન ક્ષેત્રે પદાર્પણને ચિહ્નિત કરે છે. બુકારેસ્ટની નેશનલ યુનિવર્સિટી ઓફ થિયેટર એન્ડ ફિલ્મમાંથી સ્નાતક થયેલા તેમણે ટિશ સ્કૂલ ઓફ ધ આર્ટ્સ, ન્યુયોર્ક યુનિવર્સિટી અને રોયલ એકેડેમી ઓફ ડ્રામેટિક આર્ટ, લંડન ખાતે પણ તાલીમ લીધી છે. તેમની અગાઉની કૃતિઓમાં અલોન એટ માય વેડિંગ, જેનું પ્રીમિયર કાન્સ ફિલ્મ ફેસ્ટિવલમાં થયું હતું, અને જિપ્સી ક્વીન નો સમાવેશ થાય છે, જેના માટે તેમને શ્રેષ્ઠ અભિનેત્રીના અનેક સન્માનો મળ્યા હતા. તેઓ વેનિસ ફિલ્મ ફેસ્ટિવલમાં પ્રદર્શિત થયેલી હાઉસકીપિંગ ફોર બિગિનર્સ માં પણ જોવા મળ્યા હતા.
આઈ મેટર નું પ્રીમિયર સપ્ટેમ્બર 2026 માં 83મા વેનિસ ઇન્ટરનેશનલ ફિલ્મ ફેસ્ટિવલના વેનિસ સ્પોટલાઇટ વિભાગમાં થયું હતું, જ્યાં તેને પ્રતિષ્ઠિત અરમાની બ્યુટી ઓડિયન્સ એવોર્ડ મળ્યો હતો. આ ફિલ્મમાં રેબેકાની ભૂમિકામાં ડેનિસા ફાર્કાસ અભિનય કરી રહી છે, તેમની સાથે સોરિન મિહાઈ, એન્જેલિના પાવેલ, વેનેસા ડાન્સિયા, રાયસા મિહાઈ, એલેક્ઝાન્ડ્રુ સ્ટેન્કુ, અલીના બર્ઝુન્ટિઆનુ અને નતાલિયા કેલિન પણ છે.
IFFI 2026 માં મિડ-ફેસ્ટ પ્રસ્તુતિ તરીકે, આઈ મેટર 24 નવેમ્બર, 2026 ના રોજ સાંજે 4:30 વાગ્યે PVR INOX પણજી (ઓડી 1) અને PVR INOX પોર્વોરિમ (ઓડી 1) ખાતે એકસાથે પ્રદર્શિત કરવામાં આવશે. દિગ્દર્શક અલીના શેરબન અને મુખ્ય અભિનેત્રી ડેનિસા ફાર્કાસ વિશેષ અતિથિ તરીકે ફેસ્ટિવલમાં ઉપસ્થિત રહેશે. સ્ક્રીનિંગના દિવસે PVR INOX પણજી ખાતે ફિલ્મના મહેમાનો સાથે રેડ-કાર્પેટ ઇવેન્ટનું પણ આયોજન કરવામાં આવ્યું છે.
ગોવામાં વિવિધ સ્થળોએ 20 થી 28 નવેમ્બર દરમિયાન આયોજિત, 57મો ઇન્ટરનેશનલ ફિલ્મ ફેસ્ટિવલ ઓફ ઇન્ડિયા 86 દેશોની 150 થી વધુ આંતરરાષ્ટ્રીય ફિલ્મો પ્રદર્શિત કરશે. આ ફેસ્ટિવલ તેના સ્પર્ધાત્મક અને બિન-સ્પર્ધાત્મક વિભાગો, ક્યુરેટેડ પેકેજો, રેટ્રોસ્પેક્ટિવ્સ, શ્રદ્ધાંજલિઓ અને થીમેટિક શોકેસ દ્વારા વિવિધ શૈલીઓ, દેશો અને ભાષાઓની ફિલ્મોને એકસાથે લાવશે, જે આંતર-સાંસ્કૃતિક આદાનપ્રદાન અને સિનેમેટિક શ્રેષ્ઠતા માટે એક પ્લેટફોર્મ પૂરું પાડશે.
SM/NP/JD