দিল্লীয়ে প্ৰথমবাৰৰ বাবে বিনোদনমূলক যমুনা ক্ৰুজ সেৱা লাভ কৰিব

যমুনাৰ কাষত এক বিনোদনমূলক নদী ক্ৰুজ সেৱা আৰম্ভ কৰাৰ যোগেদি দিল্লীয়ে ইয়াৰ পৰ্যটন দৃশ্যপটত এক নতুন আকৰ্ষণ সংযোগ কৰিবলৈ সাজু হৈছে। কেন্দ্ৰীয় বন্দৰ, জাহাজ আৰু জলপথ মন্ত্ৰী সৰ্বানন্দ সোণোৱালে উপ ৰাজ্যপাল চৰ্দাৰ তৰনজিৎ সিং সান্ধু আৰু দিল্লীৰ মুখ্যমন্ত্ৰী শ্ৰীমতী ৰেখা গুপ্তাৰ উপস্থিতিত কাইলৈ (মঙলবাৰ, ১০ নৱেম্বৰ, ২০২৬) ছোনিয়া বিহাৰত এই সেৱা উদ্বোধন কৰিব। নদীখনৰ ছোনিয়া বিহাৰ-জগতপুৰ অংশৰ সমীপত বিকশিত এই পদক্ষেপৰ লক্ষ্য হৈছে নদী-আধাৰিত পৰ্যটনৰ প্ৰচাৰ কৰা আৰু পৰ্যটকসকলক ৰাষ্ট্ৰীয় ৰাজধানীত এক নতুন মনোৰঞ্জনৰ অভিজ্ঞতা প্ৰদান কৰা।

উদ্বোধনী অনুষ্ঠানত বন্দৰ, জাহাজ আৰু জলপথ বিভাগৰ ৰাজ্য মন্ত্ৰী শ্ৰী শান্তনু ঠাকুৰ আৰু পথ পৰিবহণ তথা ঘাইপথ বিভাগৰ ৰাজ্য মন্ত্ৰী শ্ৰী হৰ্ষ মালহোত্ৰা উপস্থিত থাকিব। দিল্লী চৰকাৰৰ মন্ত্ৰীসকলৰ ভিতৰত ৰাজহুৱা নিৰ্মাণ বিভাগ আৰু জলসিঞ্চন তথা বান নিয়ন্ত্ৰণ মন্ত্ৰী শ্ৰী পৰবেশ চাহিব সিং আৰু পৰ্যটন মন্ত্ৰী শ্ৰী কপিল মিশ্ৰৰ লগতে আন আন মন্ত্ৰীসকল আৰু সাংসদ শ্ৰী মনোজ তিৱাৰীসহ কেন্দ্ৰ আৰু দিল্লী চৰকাৰৰ জ্যেষ্ঠ বিষয়াসকল এই আনুষ্ঠানত উপস্থিত থাকিব।

ৰাষ্ট্ৰীয় জলপথ আইন, ২০১৬ৰ অধীনত যমুনা নদীক ৰাষ্ট্ৰীয় জলপথ-১১০ হিচাপে মনোনীত কৰা হৈছে। দিল্লীৰ যমুনা নদীৰ ছোনিয়া বিহাৰ-জগতপুৰ অংশৰ সৈতে বিনোদনমূলক নদী ক্ৰুজ জাহাজ সেৱাৰ বিকাশে মনোৰঞ্জনমূলক নৌ চলাচল আৰু নদী-আধাৰিত পৰ্যটনৰ বাবে এই ৰাষ্ট্ৰীয় জলপথৰ সম্ভাৱনীয়তা ব্যৱহাৰ কৰাৰ দিশত এক গুৰুত্বপূৰ্ণ পদক্ষেপ চিহ্নিত কৰে। উদ্বোধনৰ পূৰ্বে যোৱা মাহত আইডব্লিউএআই আৰু দিল্লী চৰকাৰৰ জ্যেষ্ঠ বিষয়াসকলৰ উপস্থিতিত ক্ৰুজখনৰ পৰীক্ষণ সফলতাৰে সম্পন্ন কৰা হৈছিল।

ভাৰত চৰকাৰৰ বন্দৰ, জাহাজ চলাচল আৰু জলপথ মন্ত্ৰালয়ৰ অধীনত ভাৰতীয় আভ্যন্তৰীণ জলপথ প্ৰাধিকৰণৰ (আইডব্লিউএআই) নেতৃত্বত এই প্ৰচেষ্টাই বহনক্ষম আভ্যন্তৰীণ জল পৰিবহণত উদগনি দিয়া আৰু নগৰ চলাচল তথা পৰ্যটন আন্তঃগাঁথনিৰ এক অপৰিহাৰ্য উপাদান হিচাপে জলপথ বিকশিত কৰাৰ ক্ষেত্ৰত কৰ্তৃপক্ষৰ প্ৰতিশ্ৰুতি প্ৰতিফলিত কৰে।

এই পদক্ষেপে দিল্লীৰ বাসিন্দা আৰু পৰ্যটকসকলক এক অনন্য অভিজ্ঞতা প্ৰদান কৰাৰ লগতে যমুনাৰ সৈতে অধিক ৰাজহুৱা সম্পৰ্ক বৃদ্ধি কৰিব বুলি আশা কৰা হৈছে । বৈদ্যুতিক ক্ৰুজ জাহাজৰ ব্যৱহাৰে পৰিষ্কাৰ আৰু বহনক্ষম গতিশীলতা প্ৰচাৰ কৰাত আভ্যন্তৰীণ জলপথৰ সম্ভাৱনীয়তাও প্ৰদৰ্শন কৰিব, লগতে ৰাষ্ট্ৰীয় ৰাজধানী অঞ্চলত এক নতুন মনোৰঞ্জনৰ আকৰ্ষণ সংযোগ কৰিব।

দিল্লী উন্নয়ন প্ৰাধিকৰণ (ডিডিএ), দিল্লী পৰ্যটন আৰু পৰিবহণ উন্নয়ন নিগম (ডিটিটিডিচি), দিল্লী জল ব'ৰ্ড (ডিজেবি)আৰু দিল্লী চৰকাৰৰ জলসিঞ্চন তথা বান নিয়ন্ত্ৰণ বিভাগৰ সহযোগত বন্দৰ, জাহাজ চলাচল আৰু জলপথ মন্ত্ৰালয়ৰ অধীনত ভাৰতীয় আভ্যন্তৰীণ জলপথ প্ৰাধিকৰণ (আইডব্লিউএআই)ৰ দ্বাৰা বিনোদনমূলক যমুনা নদী ক্ৰুজ সেৱা বিকশিত কৰা হৈছে।

***

MI/Sachin/MK