દિલ્હી પ્રથમ મનોરંજક યમુના ક્રૂઝ સેવા મેળવવા માટે સજ્જ

યમુના નદીના કિનારે મનોરંજક રિવર ક્રૂઝ સેવાનો પ્રારંભ કરીને દિલ્હી તેના પ્રવાસન ક્ષેત્રમાં એક નવું આકર્ષણ ઉમેરવા માટે સજ્જ છે. કેન્દ્રીય બંદરો, જહાજ અને જળમાર્ગ મંત્રી સર્બાનંદ સોનોવાલ, ઉપરાજ્યપાલ સરદાર તરનજીત સિંહ સંધૂ અને દિલ્હીના મુખ્યમંત્રી શ્રીમતી રેખા ગુપ્તાની ઉપસ્થિતિમાં આવતીકાલે (મંગળવાર, 10 નવેમ્બર 2026) સોનિયા વિહાર ખાતે આ સેવાનું ઉદ્ઘાટન કરશે. નદીના સોનિયા વિહાર-જગતપુર પટ્ટા પર વિકસાવવામાં આવેલી આ પહેલનો ઉદ્દેશ્ય નદી આધારિત પ્રવાસનને પ્રોત્સાહન આપવાનો અને રાષ્ટ્રીય રાજધાનીમાં મુલાકાતીઓને એક નવો મનોરંજક અનુભવ પૂરો પાડવાનો છે.

ઉદ્ઘાટન સમારોહમાં કેન્દ્રીય બંદરો, જહાજ અને જળમાર્ગ રાજ્ય મંત્રી શ્રી શાંતનૂ ઠાકુર; માર્ગ વાહનવ્યવહાર અને રાજમાર્ગ રાજ્ય મંત્રી શ્રી હર્ષ મલ્હોત્રા ઉપસ્થિત રહેશે. જાહેર બાંધકામ વિભાગ (PWD) અને સિંચાઈ તથા પૂર નિયંત્રણ મંત્રી શ્રી પ્રવેશ સાહિબ સિંહ, અને પ્રવાસન મંત્રી શ્રી કપિલ મિશ્રા સહિત દિલ્હી સરકારના મંત્રીઓ, સંસદ સભ્ય શ્રી મનોજ તિવારી અને કેન્દ્ર તથા દિલ્હી સરકારના વરિષ્ઠ અધિકારીઓ પણ આ કાર્યક્રમમાં હાજરી આપશે.

યમુના નદીને રાષ્ટ્રીય જળમાર્ગ કાયદા, 2016 હેઠળ રાષ્ટ્રીય જળમાર્ગ-110 તરીકે નિયુક્ત કરવામાં આવી છે. દિલ્હીમાં યમુના નદીના સોનિયા વિહાર-જગતપુર પટ્ટા પર મનોરંજક રિવર ક્રૂઝ સેવાનો વિકાસ મનોરંજક નેવિગેશન અને રિવર-બેઝ્ડ પ્રવાસન માટે આ રાષ્ટ્રીય જળમાર્ગની ક્ષમતાનો ઉપયોગ કરવા તરફનું એક મહત્વપૂર્ણ પગલું દર્શાવે છે. પ્રારંભ પહેલા, આઈડબલ્યુએઆઈ (IWAI) અને દિલ્હી સરકારના વરિષ્ઠ અધિકારીઓની હાજરીમાં ગયા મહિને ક્રૂઝ જહાજના ટ્રાયલ રન સફળતાપૂર્વક હાથ ધરવામાં આવ્યા હતા.

ભારત સરકારના બંદરો, જહાજ અને જળમાર્ગ મંત્રાલય હેઠળના ભારતીય અંતર્દેશીય જળમાર્ગ પ્રાધિકરણ (IWAI) દ્વારા આગેવાની લેવામાં આવેલી આ પહેલ, ટકાઉ અંતર્દેશીય જળ વાહનવ્યવહારને પ્રોત્સાહન આપવા અને શહેરી ગતિશીલતા તથા પ્રવાસન માળખાના એક અભિન્ન અંગ તરીકે જળમાર્ગોનો વિકાસ કરવા માટે પ્રાધિકરણની પ્રતિબદ્ધતાને દર્શાવે છે.

આ પહેલથી દિલ્હીના રહેવાસીઓ અને પ્રવાસીઓને એક અનોખો અનુભવ મળવાની સાથે સાથે યમુના નદી સાથે જનતાનું જોડાણ વધવાની અપેક્ષા છે. ઇલેક્ટ્રિક સંચાલિત ક્રૂઝ જહાજોનો ઉપયોગ સ્વચ્છ અને ટકાઉ ગતિશીલતાને પ્રોત્સાહન આપવામાં અંતર્દેશીય જળમાર્ગોની ક્ષમતા પણ દર્શાવશે, સાથે જ રાષ્ટ્રીય રાજધાની ક્ષેત્રમાં એક નવું મનોરંજક આકર્ષણ ઉમેરશે.

આ મનોરંજક યમુના રિવર ક્રૂઝ સેવા દિલ્હી વિકાસ પ્રાધિકરણ (DDA), દિલ્હી ટુરિઝમ એન્ડ ટ્રાન્સપોર્ટેશન ડેવલપમેન્ટ કોર્પોરેશન (DTTDC), દિલ્હી જલ બોર્ડ (DJB), અને સિંચાઈ તથા પૂર નિયંત્રણ વિભાગ, દિલ્હી સરકારના સહયોગથી બંદરો, જહાજ અને જળમાર્ગ મંત્રાલય (MoPSW) હેઠળના ભારતીય અંતર્દેશીય જળમાર્ગ પ્રાધિકરણ (IWAI) દ્વારા વિકસાવવામાં આવી રહી છે.

SM/DK/JD