વાણિજ્ય અને ઉદ્યોગ મંત્રી શ્રી પીયૂષ ગોયલે 2047 સુધીમાં ભારતને વિકસિત રાષ્ટ્ર બનાવવા તરફની સફરનું નેતૃત્વ કરવા યુવાનોને આહ્વાન કર્યું

કેન્દ્રીય વાણિજ્ય અને ઉદ્યોગ મંત્રી શ્રી પીયૂષ ગોયલે આજે કિરોડીમલ કોલેજ, નવી દિલ્હી ખાતે યંગ લીડર્સ ડિસ્કોર્સ ફોરમમાં કીનોટ એડ્રેસ આપતી વખતે યુવાનોને મહત્વાકાંક્ષી બનવા, પરિવર્તનને અપનાવવા અને રાષ્ટ્ર નિર્માણમાં યોગદાન આપવા આહ્વાન કર્યું હતું.

તેમણે ભારપૂર્વક જણાવ્યું હતું કે 2047 સુધીમાં વિકસિત ભારતનું લક્ષ્ય પ્રાપ્ત કરવું એ નોન-નેગોશિયેબલ (બિન-સમજૂતીપાત્ર) હતું અને આ માઇલસ્ટોન તરફ દેશની સફરના આર્કિટેક્ટ્સ આજના યુવાનો બનશે. તેમણે અવલોકન કર્યું હતું કે જ્યારે ભારત સ્વતંત્રતાના 100 વર્ષની ઉજવણી કરશે ત્યારે વિદ્યાર્થીઓ તેમની ચાલીસી (forties) માં હશે, અને તેમની પસંદગીઓ, આકાંક્ષાઓ અને યોગદાન દેશના ભવિષ્યને વ્યાખ્યાયિત કરશે.

ભારતના નિકાસ પ્રદર્શનને હાઇલાઇટ કરતા, શ્રી ગોયલે જણાવ્યું હતું કે દેશે ગત વર્ષે USD 863 બિલિયનની તેની અત્યાર સુધીની સર્વોચ્ચ નિકાસ નોંધાવી હતી. તેમણે નોંધ્યું હતું કે જ્યારે આંતરરાષ્ટ્રીય નાણાંકીય ભંડોળ (IMF) એ, આ વર્ષના એપ્રિલ-મે મહિનાના તેના પ્રોજેક્શન્સમાં, વૈશ્વિક વેપાર વૃદ્ધિ 1.9 ટકા રહેવાનો અંદાજ મૂક્યો હતો, ત્યારે ભારતે ચાલુ વર્ષ માટે USD 1 ટ્રિલિયનનો મહત્વાકાંક્ષી નિકાસ લક્ષ્યાંક નક્કી કરવાનું પસંદ કર્યું હતું, જે 16 ટકાની વૃદ્ધિ દર્શાવે છે.

તેમણે જણાવ્યું હતું કે ભારત USD 900 બિલિયનનો નિકાસ લક્ષ્યાંક નક્કી કરી શક્યું હોત, જે અગાઉના વર્ષની નિકાસ કરતાં 5 ટકાની વૃદ્ધિ દર્શાવે છે, જે વૈશ્વિક વેપારમાં અંદાજિત વૃદ્ધિને ધ્યાનમાં લેતાં પોતે એક નોંધપાત્ર સિદ્ધિ હોત. USD 900 બિલિયનનો લક્ષ્યાંક અંદાજિત વૈશ્વિક વેપાર વૃદ્ધિ દર કરતાં બમણાં કરતાં વધુ વૃદ્ધિ દર્શાવે છે. જો કે, ભારતે USD 1 ટ્રિલિયનનો વધુ મહત્વાકાંક્ષી લક્ષ્યાંક નક્કી કરવાનું પસંદ કર્યું. શ્રી ગોયલે વિશ્વાસ વ્યક્ત કર્યો હતો કે દેશ આ માઇલસ્ટોન પ્રાપ્ત કરશે, અને નોંધ્યું હતું કે નાણાંકીય વર્ષના પ્રથમ છ મહિના (એપ્રિલ-સપ્ટેમ્બર) દરમિયાન નિકાસમાં અગાઉથી જ 14 ટકાની વૃદ્ધિ નોંધાઈ છે, જે USD 480 બિલિયન સુધી પહોંચી છે. તેમણે કહ્યું કે વાર્ષિક લક્ષ્યાંક પૂરો કરવા માટે ભારતે બાકીના છ મહિનામાં USD 520 બિલિયનની નિકાસ હાંસલ કરવાની જરૂર પડશે અને અવલોકન કર્યું કે ઓક્ટોબર પણ એક સારો મહિનો રહ્યો છે.

તેમણે વધુમાં નોંધ્યું હતું કે IMF એ તાજેતરમાં વૈશ્વિક વેપાર વૃદ્ધિ માટેના તેના અંદાજને સુધારીને લગભગ 3.5 ટકા કર્યો છે, અને એવું અવલોકન કર્યું કે ભારતનું નિકાસ પ્રદર્શન આ સુધારા પાછળના પરિબળોમાંનું એક હોઈ શકે છે.

વૈશ્વિક અર્થતંત્રમાં ભારતના વધતા કદ પર ભાર મૂકતાં, શ્રી ગોયલે જણાવ્યું હતું કે દેશ ફ્રેજાઇલ ફાઇવ અર્થતંત્રમાંથી વિશ્વના અગ્રણી અર્થતંત્રોમાંના એક અને સૌથી ઝડપથી વિકસતા મોટા અર્થતંત્ર બનવા સુધી ખૂબ લાંબી મજલ કાપી ચૂક્યો છે. વિશ્વ બેંકના તાજેતરના અહેવાલનો ઉલ્લેખ કરતા તેમણે નોંધ્યું હતું કે ભારતમાં લગભગ 50 કરોડ લોકો અતિશય ગરીબીમાંથી બહાર આવ્યા છે અને સખત મહેનત દ્વારા તેમના જીવનમાં સુધારો કરવા તરફ પ્રગતિ કરી રહ્યા છે.

તેમણે ભારતના વિકાસનો શ્રેય તેના ટેલેન્ટ પૂલ, તેની યુવા વસ્તીની કુશળતા, તેની લોકશાહી પ્રણાલી, 30 વર્ષથી ઓછી સરેરાશ ઉંમર સાથેની યુવા વસ્તી વિષયક પ્રોફાઇલ, નિર્ણાયક નેતૃત્વ અને ગુણવત્તાયુક્ત ચીજવસ્તુઓ અને સેવાઓ માટે 140 કરોડ ભારતીયો દ્વારા ઉત્પન્ન કરવામાં આવતી માંગ સહિતના વિવિધ પરિબળોને આપ્યો હતો. તેમણે કહ્યું કે આ શક્તિઓ સામૂહિક રીતે ભારતના વિકાસની વાર્તાને વેગ આપે છે.

શ્રી ગોયલે જણાવ્યું હતું કે ભારતે વિશ્વનો વિશ્વાસ જીત્યો છે, જેમાં લગભગ દરેક પ્રદેશના દેશો તેની સાથે પ્રેફરન્શિયલ ટ્રેડ એગ્રીમેન્ટ્સ અને ફ્રી ટ્રેડ એગ્રીમેન્ટ્સ કરવા ઉત્સુક છે. તેમણે અવલોકન કર્યું કે ભારતને વધુને વધુ એક વિશ્વસનીય ભાગીદાર તરીકે જોવામાં આવી રહ્યું છે, જેમાં તેની યુવા વસ્તી, ટેલેન્ટ, સખત મહેનત કરવાની ઈચ્છા અને વૈશ્વિક વિકાસમાં યોગદાન આપવાની પ્રતિબદ્ધતા તેના આંતરરાષ્ટ્રીય સ્થાનને મજબૂત બનાવે છે.

મુશ્કેલ સમયમાં દેશોને ભારતના સમર્થનને યાદ કરતા તેમણે જણાવ્યું હતું કે ભારતે દરેક ભારતીય માટે મફત રસીકરણ સુનિશ્ચિત કરવાની સાથે COVID-19 દરમિયાન વિશ્વને રસી પૂરી પાડી હતી. તેમણે સંકટ સમયે દવાઓ અને રાહત તથા પુનર્વસન સહાય પૂરી પાડવા દ્વારા ભારતના યોગદાન પર પણ પ્રકાશ પાડ્યો હતો, પછી ભલે તે સંબંધિત દેશો વિકસિત હોય કે ઓછા વિકસિત. તેમણે કહ્યું કે સમગ્ર વિશ્વમાં ભારતને જે માન્યતા અને સન્માન મળ્યું છે તે તેના કાર્યો દ્વારા બનાવેલા વિશ્વાસને પ્રતિબિંબિત કરે છે.

વિદ્યાર્થીઓને મહત્વાકાંક્ષી દ્રષ્ટિકોણ અપનાવવાનું આહ્વાન કરતા, શ્રી ગોયલે તેમને પૂછ્યું કે શું તેઓ સામાન્ય લક્ષ્યાંકોથી સંતોષ માનવાનું પસંદ કરશે કે વધુ સારા ભવિષ્યની આકાંક્ષા રાખશે. તેમણે કહ્યું કે પરિવર્તન માટે લોકો જે રીતે વિચારે છે, કામ કરે છે અને જીવે છે તેમાં ફેરફાર કરવાની જરૂર છે. તેમણે યુવાનોને સતત પોતાને પુનઃશોધવા, બદલાતા સંજોગો માટે ખુલ્લા રહેવા અને જીવનભર જ્ઞાન મેળવવા વિનંતી કરી.

વ્યક્તિ ઘડતરમાં શૈક્ષણિક સંસ્થાઓના મહત્વ પર ભાર મૂકતા, શ્રી ગોયલે જણાવ્યું હતું કે કોલેજો એકેડેમિક ગ્રોમિંગ પૂરું પાડે છે અને સાથે ચારિત્ર્ય, સ્થિતિસ્થાપકતા, આત્મવિશ્વાસ અને સખત મહેનત કરવાની ઈચ્છા પણ બનાવે છે. તેઓ યુવાનો તેમના ભવિષ્યને કેવી રીતે જુએ છે તેને આકાર આપવામાં મદદ કરે છે અને તેમને દેશના ભાગ્યમાં મહત્વપૂર્ણ ભૂમિકા ભજવવા માટે તૈયાર કરે છે. પોતાના અનુભવમાંથી ઉદાહરણ આપતા તેમણે કહ્યું કે વિદ્યાર્થીઓ અવારનવાર જ્યારે તેમની શાળા અને કોલેજના વર્ષોમાંથી પસાર થઈ રહ્યા હોય છે ત્યારે તેના યોગદાનની પૂરેપૂરી કદર કરતા નથી. જ્યારે તેઓ વાસ્તવિક દુનિયામાં પ્રવેશ કરે છે ત્યારે જ તેઓ ઓળખે છે કે કેવી રીતે શિક્ષકો, શૈક્ષણિક વાતાવરણ અને આ રચનાત્મક વર્ષો દરમિયાન પ્રાપ્ત થયેલા એકંદર ગ્રોમિંગે તેમના જીવનને આકાર આપ્યો છે અને તેમને જવાબદાર નાગરિક બનવા માટે તૈયાર કર્યા છે. આખરે, તેમણે કહ્યું, સફળતા વ્યક્તિના પોતાના હાથમાં છે.

તેમણે વિદ્યાર્થીઓના જીવન અને ભવિષ્યને આકાર આપવામાં શિક્ષકોના યોગદાનનો પણ સ્વીકાર કર્યો હતો અને નોંધ્યું હતું કે વ્યક્તિ જીવનમાં પ્રગતિ કરે છે તેમ તેમના માર્ગદર્શન અને શૈક્ષણિક વાતાવરણની અસર વધુ સ્પષ્ટ થાય છે.

પોતાની શૈક્ષણિક સફર શેર કરતા, શ્રી ગોયલે નેશનલ એજ્યુકેશન પોલિસી દ્વારા રજૂ કરવામાં આવેલી રાહત (ફ્લેક્સિબિલિટી) વિશે વાત કરી હતી, જે વિદ્યાર્થીઓને કોર્સ બદલવા, તેમના એકેડેમિક વર્ક માટે ક્રેડિટ મેળવવા અને એક સ્ટ્રીમમાંથી બીજી સ્ટ્રીમમાં જવાની મંજૂરી આપે છે. તેમણે કહ્યું કે આજના વિદ્યાર્થીઓ ભાગ્યશાળી છે કે તેમને વધુ સુગમતા પ્રદાન કરતા વાતાવરણમાં તેમના સપના પૂરા કરવાની તક મળી રહી છે.

શ્રી ગોયલે કહ્યું કે આજના વિદ્યાર્થીઓ ભાગ્યશાળી છે કારણ કે તેમની પાસે તકોની વિશાળ શ્રેણી છે અને તેઓ તેમની પસંદગીની કારકિર્દી બનાવી શકે છે. લગભગ સમગ્ર દેશ ડિજિટલાઇઝ્ડ થવા સાથે અને 1.1 બિલિયન ઇન્ટરનેટ યુઝર્સ સાથે, યુવાનો વિશ્વ સાથે જોડાયેલા હતા અને ઓનલાઇન તેમના જ્ઞાન અને અનુભવોના નોંધપાત્ર ભાગ સુધી પહોંચ ધરાવતા હતા. તેમણે આને વિદ્યાર્થીઓ માટે શીખવાની, વિકાસ કરવાની અને ભારતના વિકાસમાં યોગદાન આપવાની એક નોંધપાત્ર તક તરીકે વર્ણવી હતી.

તેમના સંબોધનનું સમાપન કરતાં, શ્રી ગોયલે પરંપરાઓને જીવંત રાખવા અને સંસ્થાઓમાં શિસ્ત જાળવવાના મહત્વ પર ભાર મૂક્યો હતો. તેમણે કહ્યું કે શિસ્ત અને પરંપરા પ્રત્યેનો આદર એ સંસ્થાનો પાયો છે. તેમણે વિદ્યાર્થીઓને શિસ્ત સાથે પોતાનું જીવન જીવવા, ધ્યાનમાં મોટું લક્ષ્ય રાખવા અને ક્યારેય આત્મવિશ્વાસ કે હિંમત ન ગુમાવવા માટે પ્રોત્સાહિત કર્યા હતા અને ભારપૂર્વક જણાવ્યું હતું કે જેઓ હિંમત દર્શાવે છે તેઓ આખરે સફળ થાય છે.

IJ/DK/GP

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964[at]gmail[dot]com