ভাৰত নৱীকৰণযোগ্য শক্তি সন্মিলন আৰু এক্সপো ২০২৬ উদ্বোধন প্ৰধানমন্ত্ৰী শ্ৰী নৰেন্দ্ৰ মোদীৰ

প্ৰধানমন্ত্ৰী শ্ৰী নৰেন্দ্ৰ মোদীয়ে আজি নতুন দিল্লীৰ ভাৰত মণ্ডপমত ভাৰত নৱীকৰণযোগ্য শক্তি সন্মিলন আৰু এক্সপো ২০২৬ উদ্বোধন কৰে। উদ্যোগটোৰ নেতৃস্থানীয়সকল, বিনিয়োগকাৰী, ষ্টাৰ্টআপ প্ৰতিনিধি আৰু ভাৰত তথা বিদেশৰ জ্যেষ্ঠ বিষয়াসকলৰ সমাৱেশক সম্বোধন কৰি প্ৰধানমন্ত্ৰীয়ে উল্লেখ কৰে যে এই বছৰৰ সন্মিলন গোলকীয় শক্তি সংকটৰ দ্বাৰা প্ৰভাৱিত বিশেষ পৰিস্থিতিৰ মাজত অনুষ্ঠিত হৈছে যিয়ে দৈনন্দিন জীৱন আৰু ৰাষ্ট্ৰীয় উন্নয়নত নৱীকৰণযোগ্য শক্তিৰ গুৰুত্ব দাঙি ধৰে। তেওঁ উল্লেখ কৰে যে এই বছৰৰ অনুষ্ঠানৰ পৰিসৰ ব্যতিক্ৰমীভাৱে বিস্তৃত কিয়নো ই আন্তঃৰাষ্ট্ৰীয় সৌৰ মিত্ৰতাৰ নৱম অধিবেশনৰ সৈতে একে সময়তে অনুষ্ঠিত হৈছে আৰু ইয়াত গ্ৰীণ হাইড্ৰ’জেন সম্পৰ্কীয় চতুৰ্থ সন্মিলনৰ প্ৰতিনিধিসকলো অন্তৰ্ভুক্ত হৈছে।

শেহতীয়া গোলকীয় প্ৰতিবন্ধকসমূহে শক্তি সুৰক্ষা আৰু অৰ্থনৈতিক সুৰক্ষাৰ মাজত পোনপটীয়া সম্পৰ্ক আঙুলিয়াই দিছে বুলি উল্লেখ কৰি প্ৰধানমন্ত্ৰীগৰাকীয়ে সতৰ্ক কৰি দিয়ে যে জীৱাশ্ম ইন্ধনৰ ওপৰত অত্যধিক নিৰ্ভৰশীলতা অব্যাহত থাকিলে বিশ্ব অৰ্থনীতিত বাৰে বাৰে বাধাগ্ৰস্ত হ’ব কিয়নো জীৱাশ্ম ইন্ধনৰ ভাণ্ডাৰ সীমিত আৰু কেতবোৰ নিৰ্দিষ্ট অঞ্চলত ই কেন্দ্রীভূত হৈ আছে। তেওঁ এই দুৰ্বলতাক পৰিষ্কাৰ শক্তিৰ সীমাহীন, সাৰ্বজনীনভাৱে উপলব্ধ সম্ভাৱনাৰ সৈতে তুলনা কৰে।"আমি সকলোৱে জানো, শক্তি সুৰক্ষাৰ ভৱিষ্যৎ পৰিষ্কাৰ শক্তিৰ ওপৰত নিৰ্ভৰশীল", শ্ৰী মোদীয়ে দৃঢ়তাৰে কয়।

সৌৰ শক্তিৰ ক্ষেত্ৰত হোৱা বিপ্লৱৰ নতুন যুগটো গ্ৰহণৰ দৰে উদ্ভাৱনৰ ওপৰতো নিৰ্ভৰশীল বুলি উল্লেখ কৰি প্ৰধানমন্ত্ৰীয়ে ষ্টাৰ্টআপ, আই আই টি, উদ্ভাৱক আৰু উদ্যমীসকলক ঘৰুৱাভাবে প্ৰয়োজন হোৱা সৰ্বাধিক চাহিদা পূৰণ কৰিব পৰাকৈ সকলো বতৰৰ বাবে উপযোগী সৌৰ শক্তিৰ আৰ্হি প্ৰস্তুত কৰিবলৈ আহ্বান জনায়, যাৰ ভিতৰত আছে আমদানি কৰা গেছৰ ওপৰত নিৰ্ভৰশীলতা হ্ৰাস কৰিবলৈ ছাদৰ ওপৰত সৌৰ ৰন্ধন আৰু বৈদ্যুতিক দুচকীয়া বাহন তথা গাড়ীৰ বাবে ঘৰুৱা সৌৰ চাৰ্জিং ব্যৱস্থা। "ইয়াৰ জৰিয়তে দেশৰ মধ্যবিত্ত পৰিয়ালে প্ৰতি বছৰে হাজাৰ হাজাৰ টকা ৰাহি কৰিব পাৰিব", শ্ৰী মোদীয়ে উল্লেখ কৰে।

নতুন আৰু নৱীকৰণযোগ্য শক্তি, শিক্ষা আৰু উপভোক্তা পৰিক্ৰমা, খাদ্য আৰু ৰাজহুৱা বিতৰণ দপ্তৰৰ কেন্দ্ৰীয় মন্ত্ৰী শ্ৰী প্ৰহ্লাদ যোশীয়ে অনুষ্ঠানত ভাষণ প্ৰদান কৰি নৱীকৰণযোগ্য শক্তি খণ্ডত ভাৰতৰ উল্লেখযোগ্য অগ্ৰগতি আৰু দেশৰ শক্তিৰ দৃশ্যপট গঢ়াত প্ৰধানমন্ত্ৰী শ্ৰী নৰেন্দ্ৰ মোদীৰ নেতৃত্বৰ পৰিৱৰ্তনশীল ভূমিকাৰ ওপৰত আলোকপাত কৰে।

আৰম্ভণিতে কেন্দ্ৰীয় মন্ত্ৰীগৰাকীয়ে প্ৰধানমন্ত্ৰী শ্ৰী নৰেন্দ্ৰ মোদীৰ দূৰদৃষ্টিসম্পন্ন নেতৃত্বৰ প্ৰশংসা কৰি কয় যে তেওঁ ভাৰতৰ শক্তি খণ্ডক  নতুন শক্তি, নিৰ্দেশনা আৰু আত্মবিশ্বাস প্ৰদান কৰিছে।

তেওঁ লগতে উল্লেখ কৰে যে প্ৰধানমন্ত্ৰী শ্ৰী নৰেন্দ্ৰ মোদীয়ে ৫,০০০ কোটি টকাৰো অধিক ব্যয়ৰে প্ৰধানমন্ত্ৰী সূৰ্য সৰোবৰ যোজনাত অনুমোদন জনাইছে, যাৰ অধীনত ৫,০০০ মেগাৱাট ভাসমান সৌৰ ক্ষমতাৰ বিকাশ সাধন কৰা হ'ব। তেওঁ লগতে উল্লেখ কৰে যে প্ৰধানমন্ত্ৰীয়ে শেহতীয়াকৈ ১.৮৬ লাখ কোটি টকা বিনিয়োগৰ সৈতে সেউজ শক্তি কৰিডৰৰ তৃতীয় পৰ্যায়ত অনুমোদন জনাইছে।

কেন্দ্ৰীয় মন্ত্ৰীগৰাকীয়ে উল্লেখ কৰে যে গুজৰাটত পৰীক্ষা কৰা আৰু প্ৰমাণিত ধাৰণাসমূহ শ্ৰী নৰেন্দ্ৰ মোদী প্ৰধানমন্ত্ৰী হোৱাৰ পিছত ৰাষ্ট্ৰীয় পৰ্যায়লৈ সম্প্ৰসাৰণ কৰা হৈছে, যিয়ে ভাৰতৰ নৱীকৰণযোগ্য শক্তি যাত্ৰাক নতুন দিশ আৰু গতি প্ৰদান কৰিছে।

ভাৰতৰ অৰ্থনৈতিক বিকাশ আৰু শক্তিৰ বৰ্ধিত প্ৰয়োজনীয়তাত আলোকপাত কৰি শ্ৰী যোশীয়ে কয় যে ভাৰত আজি বিশ্বৰ দ্ৰুততম বিকাশশীল মুখ্য অৰ্থনীতিসমূহৰ অন্যতম। আন্তঃৰাষ্ট্ৰীয় মুদ্ৰা নিধিয়ে (আইএমএফ) ভাৰতৰ বিকাশৰ পূৰ্বানুমান ২০২৬-২৭-ৰ পৰা ৭শতাংশলৈ সংশোধন কৰিছে। তেওঁ গুৰুত্ব আৰোপ কৰি কয় যে এই অৰ্থনৈতিক বিকাশৰ সৈতে শক্তিৰ চাহিদাও বৃদ্ধি পাইছে, যাৰ ফলত দেশৰ প্ৰয়োজনীয়তা বহনক্ষমভাৱে পূৰণ কৰিবলৈ নৱীকৰণযোগ্য শক্তিৰ প্ৰয়োজন।

শ্ৰী প্ৰহ্লাদ যোশীয়ে উল্লেখ কৰে যে ২০২৪ চনৰ ছেপ্টেম্বৰ মাহত ভাৰতৰ অজীৱাশ্ম ইন্ধন ভিত্তিক প্ৰতিষ্ঠিত ক্ষমতা ২০০ গিগাৱাট অতিক্ৰম কৰিছে। তেওঁ উল্লেখ কৰে যে তেতিয়াৰ পৰা ক্ষমতা ৩১০ গিগাৱাটত উপনীত হৈছে, অৰ্থাৎ দুবছৰত ১১০  গিগাৱাটতকৈ অধিক সংযোজন হৈছে। তেওঁ লগতে কয় যে প্ৰধানমন্ত্ৰী শ্ৰী নৰেন্দ্ৰ মোদীৰ নিৰ্দেশনাত প্ৰধানমন্ত্ৰী সূৰ্য ঘৰে প্ৰতি ছদিনত এক লাখৰো অধিক স্থাপনৰ সৈতে ৬৫ লাখ স্থাপন অতিক্ৰম কৰিছে।

পুনৰ নৱীকৰণযোগ্য শক্তি খণ্ডত বিনিয়োগৰ ওপৰত আলোকপাত কৰি শ্ৰী যোশীয়ে কয় যে যোৱা দুবছৰৰ ভিতৰত মুঠ বিনিয়োগে ৬৭ বিলিয়ন আমেৰিকান ডলাৰ অতিক্ৰম কৰিছে, যাৰ জৰিয়তে ই সৰ্ববৃহৎ বিনিয়োগ হোৱা খণ্ড হিচাপে পৰিগণিত হৈছে। তেওঁ লগতে উল্লেখ কৰে যে এই খণ্ডটোৱে যোৱা দুবছৰত প্ৰত্যক্ষ বিদেশী বিনিয়োগ (এফডিআই)ত ১ বিলিয়ন আমেৰিকান ডলাৰ আকৰ্ষণ কৰিছে। তেওঁ কয় যে ইয়ে খণ্ডটোৰ ওপৰত বিনিয়োগকাৰীসকলৰ বৰ্ধিত আত্মবিশ্বাস প্ৰতিফলিত কৰে।

যোৱা ১২  বছৰত নৱীকৰণযোগ্য শক্তি খণ্ডত ভাৰতৰ অগ্ৰগতিত গুৰুত্ব আৰোপ কৰি মন্ত্ৰীগৰাকীয়ে কয় যে দেশৰ অজীৱাশ্ম ইন্ধন-আধাৰিত প্ৰতিষ্ঠিত ক্ষমতা ২৮০ শতাংশ বৃদ্ধিৰে ৮০.৩ গিগাৱাটৰ পৰা ৩১০  গিগাৱাটৰো অধিকলৈ বৃদ্ধি পাইছে। সৌৰ ক্ষমতা ৫,৮০০ শতাংশ বৃদ্ধিৰে ২.৮ গিগাৱাটৰ পৰা ১৭১ গিগাৱাটলৈ বৃদ্ধি পাইছে। আনহাতে বতাহৰ জৰিয়তে শক্তি উৎপাদন ক্ষমতা ১৭৬ শতাংশ বৃদ্ধিৰে ২১ গিগাৱাটৰ পৰা ৬০ গিগাৱাটলৈ বৃদ্ধি হৈছে।

তেওঁ লগতে উল্লেখ কৰে যে ভাৰতৰ সৌৰ মডিউল নিৰ্মাণ ক্ষমতা ১১,১৫০ শতাংশ বৃদ্ধিৰে ২ গিগাৱাটৰ পৰা ২২৫ গিগাৱাটলৈ বৃদ্ধি পাইছে। আনহাতে সৌৰ কোষ নিৰ্মাণ ক্ষমতা শূন্যৰ পৰা ৪৫ গিগাৱাটলৈ বৃদ্ধি পাইছে। বায়ু টার্বাইন উৎপাদন ক্ষমতাও ১০ গিগাৱাটৰ পৰা ২৪ গিগাৱাটলৈ বৃদ্ধি পাইছে।

নৱীকৰণযোগ্য শক্তিৰ ক্ষেত্ৰত ব্যয় হ্ৰাসৰ ওপৰত আলোকপাত কৰি শ্ৰী যোশীয়ে কয় যে সৌৰ শুল্ক ২০১১-১২ত প্ৰতি ইউনিটত ১০-১১ টকাৰ পৰা ২০২৪-২৫ত প্ৰতি ইউনিট ২.১৫ টকালৈ হ্ৰাস পাইছে। তেওঁ লগতে উল্লেখ কৰে যে সেউজ হাইড্ৰ’জেন ২৭৯ টকা প্ৰতি কিলোগ্ৰামত উপলব্ধ, যিটো গোলকীয়ভাবে সৰ্বনিম্ন মূল্য, আনহাতে সেউজ এমোনিয়াৰ দৰ ৪৯.৭৫ টকা প্ৰতি কিলোগ্ৰামত উপনীত হৈছে, যি হৈছে গোলকীয়ভাবে সৰ্বনিম্ন মূল্য। গোলকীয় সেউজ হাইড্ৰ’জেন খণ্ডত ভাৰতৰ নেতৃত্বৰ ওপৰত আলোকপাত কৰি শ্ৰী যোশীয়ে কয় যে সেউজ হাইড্ৰ’জেন আহৰণৰ প্ৰতিশ্ৰুতিত ভাৰত বিশ্বৰ ভিতৰতে প্ৰথম স্থানত আছে।

ভাৰতৰ সাফল্যৰ পৰিসৰ আৰু গতিৰ ওপৰত গুৰুত্ব আৰোপ কৰি কেন্দ্ৰীয় মন্ত্ৰীগৰাকীয়ে কয়, "এয়া হৈছে পৰিসৰ। এয়া হৈছে গতি। এয়া হৈছে আত্ম নিৰ্ভৰতা। আৰু এয়া হৈছে প্ৰধানমন্ত্ৰী শ্ৰী নৰেন্দ্ৰ মোদীৰ শক্তি।"

শ্ৰী যোশীয়ে কয় যে বি আৰ ই সন্মিলন আৰু এক্সপো ২০২৬ এই বিনিয়োগ পৰিৱেশ তন্ত্ৰক শক্তিশালী কৰাৰ বাবে এখন গুৰুত্বপূৰ্ণ মঞ্চ। তেওঁ সমগ্ৰ বিশ্বৰ বিনিয়োগকাৰীসকলক ভাৰতৰ নৱীকৰণযোগ্য শক্তি যাত্ৰাত অংশগ্ৰহণ কৰিবলৈ আমন্ত্ৰণ জনাই কয়, "ভাৰতত বিনিয়োগ কৰক। ভাৰতত উদ্ভাৱন কৰক। ভাৰতৰ সৈতে আগবাঢ়ক। "

***

NS/LL/HS