ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ಅವರಿಂದ ಭಾರತ್ ನವೀಕರಿಸಬಹುದಾದ ಇಂಧನ ಶೃಂಗಸಭೆ ಮತ್ತು ಎಕ್ಸ್‌ಪೋ 2026 ಉದ್ಘಾಟನೆ

ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ಅವರು ಇಂದು ನವದೆಹಲಿಯ ಭಾರತ್ ಮಂಟಪದಲ್ಲಿ 'ಭಾರತ್ ನವೀಕರಿಸಬಹುದಾದ ಇಂಧನ ಶೃಂಗಸಭೆ ಮತ್ತು ಎಕ್ಸ್‌ಪೋ 2026' ಅನ್ನು ಉದ್ಘಾಟಿಸಿದರು. ಭಾರತ ಮತ್ತು ವಿದೇಶಗಳ ಉದ್ಯಮ ನಾಯಕರು, ಹೂಡಿಕೆದಾರರು, ಸ್ಟಾರ್ಟ್‌ಅಪ್ ಪ್ರತಿನಿಧಿಗಳು ಮತ್ತು ಹಿರಿಯ ಅಧಿಕಾರಿಗಳ ಸಭೆಯನ್ನು ಉದ್ದೇಶಿಸಿ ಮಾತನಾಡಿದ ಪ್ರಧಾನಮಂತ್ರಿಯವರು, ದಿನನಿತ್ಯದ ಜೀವನದಲ್ಲಿ ಮತ್ತು ರಾಷ್ಟ್ರೀಯ ಅಭಿವೃದ್ಧಿಯಲ್ಲಿ ನವೀಕರಿಸಬಹುದಾದ ಇಂಧನದ ಪ್ರಮುಖ ಮಹತ್ವವದ ಬಗ್ಗೆ ಒತ್ತಿ ಹೇಳಿದರು ಹಾಗೂ ಜಾಗತಿಕ ಇಂಧನ ಆಘಾತಗಳ ವಿಶೇಷ ಪರಿಸ್ಥಿತಿಗಳ ನಡುವೆ ಈ ವರ್ಷದ ಶೃಂಗಸಭೆಯು ನಡೆಯುತ್ತಿದೆ ಎಂದು ಉಲ್ಲೇಖಿಸಿದರು. ಈ ವರ್ಷದ ಕಾರ್ಯಕ್ರಮದ ವ್ಯಾಪ್ತಿಯು ಅತ್ಯಂತ ವಿಶಾಲವಾಗಿದ್ದು, ಇದು ಅಂತಾರಾಷ್ಟ್ರೀಯ ಸೌರ ಒಕ್ಕೂಟದ ಒಂಬತ್ತನೇ ಸಮಾವೇಶದೊಂದಿಗೆ ಸೇರಿಕೊಂಡಿದೆ ಮತ್ತು ಗ್ರೀನ್ ಹೈಡ್ರೋಜನ್ ಕುರಿತ 4 ನೇ ಸಮಾವೇಶದ ಪ್ರತಿನಿಧಿಗಳನ್ನು ಒಳಗೊಂಡಿದೆ ಎಂದು ಅವರು ಒತ್ತಿ ಹೇಳಿದರು.

ಇತ್ತೀಚಿನ ಜಾಗತಿಕ ಅಡಚಣೆಗಳು, ಇಂಧನ ಭದ್ರತೆ ಮತ್ತು ಆರ್ಥಿಕ ಭದ್ರತೆಯ ನಡುವಿನ ನೇರ ಸಂಪರ್ಕವನ್ನು ತಿಳಿಸಿಕೊಟ್ಟಿವೆ ಎಂದು ಹೇಳಿದ ಪ್ರಧಾನಮಂತ್ರಿಯವರು, ಪಳೆಯುಳಿಕೆ ಇಂಧನಗಳ ಮೇಲಿನ ನಿರಂತರ ಅತಿಯಾದ ಅವಲಂಬನೆಯು ವಿಶ್ವ ಆರ್ಥಿಕತೆಯನ್ನು ಪದೇ ಪದೇ ಅಡ್ಡಿಪಡಿಸುತ್ತದೆ, ಏಕೆಂದರೆ ಪಳೆಯುಳಿಕೆ ನಿಕ್ಷೇಪಗಳು ಸೀಮಿತವಾಗಿವೆ ಮತ್ತು ಕೆಲವು ಪ್ರದೇಶಗಳಲ್ಲಿ ಮಾತ್ರ ಕೇಂದ್ರೀಕೃತವಾಗಿವೆ ಎಂದು ಎಚ್ಚರಿಸಿದರು. ಈ ಅಸ್ಥಿರತೆಯನ್ನು ಅವರು ಶುದ್ಧ ಇಂಧನದ ಮಿತಿಯಿಲ್ಲದ, ಜಾಗತಿಕವಾಗಿ ಲಭ್ಯವಿರುವ ಸಾಮರ್ಥ್ಯಕ್ಕೆ ಹೋಲಿಸಿದರು. “ಮತ್ತು ನಮಗೆಲ್ಲರಿಗೂ ತಿಳಿದಿರುವಂತೆ, ಇಂಧನ ಭದ್ರತೆಯ ಭವಿಷ್ಯವು ಶುದ್ಧ ಇಂಧನದಲ್ಲಿದೆ” ಎಂದು ಶ್ರೀ ಮೋದಿ ಅವರು ಪ್ರತಿಪಾದಿಸಿದರು.

ಸೌರ ಕ್ರಾಂತಿಯ ಹೊಸ ಯುಗವು ಅಳವಡಿಕೆಯಷ್ಟೇ ಆವಿಷ್ಕಾರವನ್ನೂ ನೆಚ್ಚಿಕೊಂಡಿದೆ ಎಂದು ಹೇಳಿದ ಪ್ರಧಾನಮಂತ್ರಿಯವರು, ಆಮದು ಮಾಡಿಕೊಳ್ಳುವ ಅನಿಲದ ಮೇಲಿನ ಅವಲಂಬನೆಯನ್ನು ಕಡಿಮೆ ಮಾಡಲು ಮೇಲ್ಛಾವಣಿ ಸೌರ ಅಡುಗೆ ಮತ್ತು ಎಲೆಕ್ಟ್ರಿಕ್ ದ್ವಿಚಕ್ರ ವಾಹನಗಳು ಹಾಗೂ ಕಾರುಗಳಿಗೆ ಗೃಹ ಸೌರ ಚಾರ್ಜಿಂಗ್ ಸೇರಿದಂತೆ ಮನೆಯ ಗರಿಷ್ಠ ಅಗತ್ಯಗಳನ್ನು ಪೂರೈಸುವ ಸಾಮರ್ಥ್ಯವಿರುವ 24/7, ಎಲ್ಲಾ ಹವಾಮಾನಕ್ಕೂ ಸೂಕ್ತವಾದ ಸೌರ ಮಾದರಿಗಳನ್ನು ವಿನ್ಯಾಸಗೊಳಿಸಲು ಸ್ಟಾರ್ಟ್‌ಅಪ್‌ಗಳು, ಐಐಟಿಗಳು, ಆವಿಷ್ಕಾರಕರು ಮತ್ತು ಉದ್ಯಮಿಗಳಿಗೆ ಆಗ್ರಹಿಸಿದರು. “ಇದರ ಮೂಲಕ, ದೇಶದ ಮಧ್ಯಮ ವರ್ಗದ ಕುಟುಂಬಗಳು ಪ್ರತಿ ವರ್ಷ ಸಾವಿರಾರು ರೂಪಾಯಿಗಳನ್ನು ಉಳಿಸಬಹುದು,” ಎಂದು ಶ್ರೀ ಮೋದಿ ಅವರು ಉಲ್ಲೇಖಿಸಿದರು.

ಕಾರ್ಯಕ್ರಮವನ್ನು ಉದ್ದೇಶಿಸಿ ಮಾತನಾಡಿದ ನೂತನ ಮತ್ತು ನವೀಕರಿಸಬಹುದಾದ ಇಂಧನ, ಶಿಕ್ಷಣ ಹಾಗೂ ಗ್ರಾಹಕ ವ್ಯವಹಾರಗಳು, ಆಹಾರ ಮತ್ತು ಸಾರ್ವಜನಿಕ ವಿತರಣಾ ಕೇಂದ್ರ ಸಚಿವರಾದ ಶ್ರೀ ಪ್ರಲ್ಹಾದ್ ಜೋಶಿ, ನವೀಕರಿಸಬಹುದಾದ ಇಂಧನ ವಲಯದಲ್ಲಿ ಭಾರತದ ಗಮನಾರ್ಹ ಪ್ರಗತಿ ಮತ್ತು ದೇಶದ ಇಂಧನ ಪರಿಕಲ್ಪನೆಯನ್ನು ರೂಪಿಸುವಲ್ಲಿ ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ಅವರ ನಾಯಕತ್ವದ ಪರಿವರ್ತನಾತ್ಮಕ ಪಾತ್ರದ ಕುರಿತು ಒತ್ತಿ ಹೇಳಿದರು.

ಪ್ರಾರಂಭದಲ್ಲಿ, ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ಅವರ ದೂರದರ್ಶಿ ನಾಯಕತ್ವಕ್ಕೆ ಕೇಂದ್ರ ಸಚಿವರು ಕೃತಜ್ಞತೆ ವ್ಯಕ್ತಪಡಿಸಿದರು, ಅವರು ಭಾರತದ ಇಂಧನ ವಲಯಕ್ಕೆ ಹೊಸ ಶಕ್ತಿ, ದಿಕ್ಸೂಚಿ ಮತ್ತು ಆತ್ಮವಿಶ್ವಾಸವನ್ನು ನೀಡಿದ್ದಾರೆ ಎಂದು ಹೇಳಿದರು.

ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ಅವರು ₹5,000 ಕೋಟಿಗೂ ಹೆಚ್ಚಿನ ವೆಚ್ಚದಲ್ಲಿ 'ಪ್ರಧಾನ ಮಂತ್ರಿ ಸೂರ್ಯ ಸರೋವರ ಯೋಜನೆ'ಯನ್ನು ಅನುಮೋದಿಸಿದ್ದಾರೆ, ಇದರ ಅಡಿಯಲ್ಲಿ 5,000 ಮೆಗಾವ್ಯಾಟ್ ಸಾಮರ್ಥ್ಯದ ಫ್ಲೋಟಿಂಗ್ ಸೋಲಾರ್ ಅಭಿವೃದ್ಧಿಪಡಿಸಲಾಗುವುದು ಎಂದು ಅವರು ಎತ್ತಿಹಿಡಿದರು. ಪ್ರಧಾನಮಂತ್ರಿಯವರು ಇತ್ತೀಚೆಗೆ ₹1.86 ಲಕ್ಷ ಕೋಟಿ ಹೂಡಿಕೆಯೊಂದಿಗೆ ಗ್ರೀನ್ ಎನರ್ಜಿ ಕಾರಿಡಾರ್ ಹಂತ-III ಅನ್ನು ಅನುಮೋದಿಸಿದ್ದಾರೆ ಎಂದೂ ಅವರು ಉಲ್ಲೇಖಿಸಿದರು.

ಗುಜರಾತ್‌ನಲ್ಲಿ ಪರೀಕ್ಷಿಸಲ್ಪಟ್ಟ ಮತ್ತು ಸಾಬೀತಾದ ವಿಚಾರಗಳನ್ನು ಶ್ರೀ ನರೇಂದ್ರ ಮೋದಿ ಅವರು ಪ್ರಧಾನಿಯಾದ ನಂತರ ರಾಷ್ಟ್ರೀಯ ಮಟ್ಟದಲ್ಲಿ ವಿಸ್ತರಿಸಲಾಯಿತು, ಇದು ಭಾರತದ ನವೀಕರಿಸಬಹುದಾದ ಇಂಧನ ಪಯಣಕ್ಕೆ ಹೊಸ ದಿಕ್ಸೂಚಿ ಮತ್ತು ವೇಗವನ್ನು ನೀಡಿತು ಎಂದು ಕೇಂದ್ರ ಸಚಿವರು ತಿಳಿಸಿದರು.

ಭಾರತದ ಆರ್ಥಿಕ ಬೆಳವಣಿಗೆ ಮತ್ತು ಹೆಚ್ಚುತ್ತಿರುವ ಇಂಧನ ಅಗತ್ಯಗಳ ಕುರಿತು ಒತ್ತಿ ಹೇಳಿದ ಶ್ರೀ ಜೋಶಿ ಅವರು, ಭಾರತ ಇಂದು ವಿಶ್ವದಲ್ಲಿ ಅತ್ಯಂತ ವೇಗವಾಗಿ ಬೆಳೆಯುತ್ತಿರುವ ಪ್ರಮುಖ ಆರ್ಥಿಕತೆಗಳಲ್ಲಿ ಒಂದಾಗಿದೆ ಎಂದು ಹೇಳಿದರು. ಅಂತಾರಾಷ್ಟ್ರೀಯ ಹಣಕಾಸು ನಿಧಿ (IMF) 2026-27 ಕ್ಕೆ ಭಾರತದ ಬೆಳವಣಿಗೆಯ ಮುನ್ನೋಟವನ್ನು ಶೇಕಡಾ 7 ಕ್ಕೆ ಪರಿಷ್ಕರಿಸಿದೆ. ಈ ಆರ್ಥಿಕ ಬೆಳವಣಿಗೆಯ ಜೊತೆಗೆ ಹೆಚ್ಚುತ್ತಿರುವ ಇಂಧನ ಬೇಡಿಕೆಯೂ ಇದೆ, ಇದು ದೇಶದ ಅಗತ್ಯಗಳನ್ನು ಸುಸ್ಥಿರವಾಗಿ ಪೂರೈಸಲು ನವೀಕರಿಸಬಹುದಾದ ಇಂಧನವನ್ನು ಅಗತ್ಯಗೊಳಿಸುತ್ತದೆ ಎಂದು ಅವರು ಒತ್ತಿಹೇಳಿದರು.

ಸೆಪ್ಟೆಂಬರ್ 2024 ರಲ್ಲಿ ಭಾರತದ ಪಳೆಯುಳಿಕೆಯೇತರ ಇಂಧನ ಆಧಾರಿತ ಸ್ಥಾಪಿತ ಸಾಮರ್ಥ್ಯವು 200 ಗಿಗಾವ್ಯಾಟ್ ದಾಟಿದೆ ಎಂದು ಶ್ರೀ ಪ್ರಲ್ಹಾದ್ ಜೋಶಿ ತಿಳಿಸಿದರು. ಅಂದಿನಿಂದ ಈ ಸಾಮರ್ಥ್ಯವು 310 ಗಿಗಾವ್ಯಾಟ್‌ಗೆ ತಲುಪಿದ್ದು, ಎರಡು ವರ್ಷಗಳಲ್ಲಿ 110 ಗಿಗಾವ್ಯಾಟ್‌ಗಿಂತಲೂ ಹೆಚ್ಚಿನ ಸೇರ್ಪಡೆಯನ್ನು ಪ್ರತಿನಿಧಿಸುತ್ತದೆ ಎಂದು ಅವರು ಎತ್ತಿಹಿಡಿದರು. ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ಅವರ ಮಾರ್ಗದರ್ಶನದಲ್ಲಿ, ಪಿಎಂ ಸೂರ್ಯ ಘರ್ (PM Surya Ghar) 65 ಲಕ್ಷಕ್ಕೂ ಹೆಚ್ಚು ಸ್ಥಾಪನೆಗಳನ್ನು ಮೀರಿದ್ದು, ಪ್ರತಿ ಆರು ದಿನಗಳಿಗೊಮ್ಮೆ ಒಂದು ಲಕ್ಷಕ್ಕೂ ಹೆಚ್ಚು ಸ್ಥಾಪನೆಗಳು ನಡೆಯುತ್ತಿವೆ ಎಂದು ಅವರು ತಿಳಿಸಿದರು.

ನವೀಕರಿಸಬಹುದಾದ ಇಂಧನ ವಲಯದಲ್ಲಿನ ಹೂಡಿಕೆಯ ಬಗ್ಗೆ ಒತ್ತಿ ಹೇಳಿದ ಶ್ರೀ ಜೋಶಿ ಅವರು, ಕಳೆದ ಎರಡು ವರ್ಷಗಳಲ್ಲಿ ಒಟ್ಟು ಹೂಡಿಕೆಯು 67 ಬಿಲಿಯನ್ ಅಮೆರಿಕನ್ ಡಾಲರ್ ಮೀರಿದ್ದು, ಇದು ಯಾವುದೇ ವಲಯದಲ್ಲೂ ಆದ ಅತಿದೊಡ್ಡ ಹೂಡಿಕೆಯಾಗಿದೆ ಎಂದು ಹೇಳಿದರು. ಈ ವಲಯವು ಕಳೆದ ಎರಡು ವರ್ಷಗಳಲ್ಲಿ 6.2 ಬಿಲಿಯನ್ ಅಮೆರಿಕನ್ ಡಾಲರ್ ನೇರ ವಿದೇಶಿ ಹೂಡಿಕೆಯನ್ನು (FDI) ಆಕರ್ಷಿಸಿದೆ ಎಂದೂ ಅವರು ಉಲ್ಲೇಖಿಸಿದರು. ಇದು ಈ ವಲಯದಲ್ಲಿ ಹೂಡಿಕೆದಾರರ ಬೆಳೆಯುತ್ತಿರುವ ವಿಶ್ವಾಸವನ್ನು ಪ್ರತಿಫಲಿಸುತ್ತದೆ ಎಂದು ಅವರು ತಿಳಿಸಿದರು.

ಕಳೆದ 12 ವರ್ಷಗಳಲ್ಲಿ ನವೀಕರಿಸಬಹುದಾದ ಇಂಧನ ವಲಯದಲ್ಲಿ ಭಾರತದ ಪ್ರಗತಿಯನ್ನು ಒತ್ತಿಹೇಳಿದ ಸಚಿವರು, ದೇಶದ ಪಳೆಯುಳಿಕೆಯೇತರ ಇಂಧನ ಆಧಾರಿತ ಸ್ಥಾಪಿತ ಸಾಮರ್ಥ್ಯವು 80.3 ಗಿಗಾವ್ಯಾಟ್‌ನಿಂದ 310 ಗಿಗಾವ್ಯಾಟ್‌ಗೂ ಹೆಚ್ಚಾಗಿದ್ದು, ಶೇಕಡಾ 280 ರಷ್ಟು ಬೆಳವಣಿಗೆಯನ್ನು ನೋಂದಾಯಿಸಿದೆ ಎಂದು ತಿಳಿಸಿದರು. ಸೌರ ಸಾಮರ್ಥ್ಯವು 2.8 ಗಿಗಾವ್ಯಾಟ್‌ನಿಂದ 171 ಗಿಗಾವ್ಯಾಟ್‌ಗೆ ಏರಿಕೆಯಾಗಿದ್ದು, ಶೇಕಡಾ 5,800 ರಷ್ಟು ಹೆಚ್ಚಳವನ್ನು ದಾಖಲಿಸಿದೆ, ಆದರೆ ಪವನ ಸಾಮರ್ಥ್ಯವು 21 ಗಿಗಾವ್ಯಾಟ್‌ನಿಂದ 60 ಗಿಗಾವ್ಯಾಟ್‌ಗೆ ಬೆಳೆದಿದ್ದು, ಶೇಕಡಾ 176 ರಷ್ಟು ಬೆಳವಣಿಗೆಯನ್ನು ನೋಂದಾಯಿಸಿದೆ.

ಭಾರತದ ಸೋಲಾರ್ ಮಾಡ್ಯೂಲ್ ಉತ್ಪಾದನಾ ಸಾಮರ್ಥ್ಯವು 2 ಗಿಗಾವ್ಯಾಟ್‌ನಿಂದ 225 ಗಿಗಾವ್ಯಾಟ್‌ಗೆ ಹೆಚ್ಚಾಗಿದ್ದು, ಶೇಕಡಾ 11,150 ರಷ್ಟು ಬೆಳವಣಿಗೆಯನ್ನು ನೋಂದಾಯಿಸಿದೆ, ಆದರೆ ಸೋಲಾರ್ ಸೆಲ್ ಉತ್ಪಾದನಾ ಸಾಮರ್ಥ್ಯವು ಶೂನ್ಯದಿಂದ 45 ಗಿಗಾವ್ಯಾಟ್‌ಗೆ ಏರಿದೆ ಎಂದು ಅವರು ಒತ್ತಿ ಹೇಳಿದರು. ಪವನ ಟರ್ಬೈನ್ ಉತ್ಪಾದನಾ ಸಾಮರ್ಥ್ಯವೂ 10 ಗಿಗಾವ್ಯಾಟ್‌ನಿಂದ 24 ಗಿಗಾವ್ಯಾಟ್‌ಗೆ ಹೆಚ್ಚಾಗಿದೆ.

ನವೀಕರಿಸಬಹುದಾದ ಇಂಧನ ವೆಚ್ಚಗಳ ಕಡಿತದ ಬಗ್ಗೆ ಒತ್ತಿ ಹೇಳಿದ ಶ್ರೀ ಜೋಶಿ ಅವರು, ಸೌರ ದರಗಳು 2011-12 ರಲ್ಲಿ ಯೂನಿಟ್‌ಗೆ ₹10-11 ರಷ್ಟಿದ್ದುದ್ದು 2024-25 ರಲ್ಲಿ ಯೂನಿಟ್‌ಗೆ ₹2.15 ಕ್ಕೆ ಕುಸಿದಿದೆ ಎಂದು ತಿಳಿಸಿದರು. ಗ್ರೀನ್ ಹೈಡ್ರೋಜನ್ ಜಾಗತಿಕವಾಗಿ ಅತ್ಯಂತ ಕಡಿಮೆ ಬೆಲೆಯಾದ ಕೆಜಿಗೆ ₹279 ಕ್ಕೆ ಲಭ್ಯವಿದೆ, ಆದರೆ ಗ್ರೀನ್ ಅಮೋನಿಯಾ ಕೆಜಿಗೆ ₹49.75 ಕ್ಕೆ ತಲುಪಿದ್ದು, ಇದು ಸಹ ಜಾಗತಿಕವಾಗಿ ಅತ್ಯಂತ ಕಡಿಮೆ ಬೆಲೆಯಾಗಿದೆ ಎಂದು ಅವರು ಉಲ್ಲೇಖಿಸಿದರು. ಜಾಗತಿಕ ಗ್ರೀನ್ ಹೈಡ್ರೋಜನ್ ವಲಯದಲ್ಲಿ ಭಾರತದ ನಾಯಕತ್ವವನ್ನು ಎತ್ತಿಹಿಡಿದ ಶ್ರೀ ಜೋಶಿ, ಗ್ರೀನ್ ಹೈಡ್ರೋಜನ್ ಆಫ್‌ಟೇಕ್ ಬದ್ಧತೆಗಳಲ್ಲಿ ಭಾರತವು ಪ್ರಪಂಚದಲ್ಲೇ ಮೊದಲ ಸ್ಥಾನದಲ್ಲಿದೆ ಎಂದು ತಿಳಿಸಿದರು.

ಭಾರತದ ಸಾಧನೆಗಳ ಪ್ರಮಾಣ ಮತ್ತು ವೇಗದ ಬಗ್ಗೆ ಒತ್ತಿ ಹೇಳಿದ ಕೇಂದ್ರ ಸಚಿವರು, "ಇದು ವಿಸ್ತರಣೆ. ಇದು ವೇಗ. ಇದು ಸ್ವಾವಲಂಬನೆ ಮತ್ತು ಇದು ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ಅವರ ಶಕ್ತಿ," ಎಂದು ಹೇಳಿದರು.

ಬಿಆರ್‌ಇ ಶೃಂಗಸಭೆ ಮತ್ತು ಎಕ್ಸ್‌ಪೋ 2026 (BRE Summit and Expo 2026) ಈ ಹೂಡಿಕೆ ವ್ಯವಸ್ಥೆಯನ್ನು ಬಲಪಡಿಸಲು ಒಂದು ಪ್ರಮುಖ ವೇದಿಕೆಯಾಗಿದೆ ಎಂದು ಶ್ರೀ ಜೋಶಿ ತಿಳಿಸಿದರು. ಭಾರತದ ನವೀಕರಿಸಬಹುದಾದ ಇಂಧನ ಪಯಣದಲ್ಲಿ ಭಾಗವಹಿಸಲು ಪ್ರಪಂಚದಾದ್ಯಂತದ ಹೂಡಿಕೆದಾರರನ್ನು ಆಹ್ವಾನಿಸಿದ ಅವರು, "ಭಾರತದಲ್ಲಿ ಹೂಡಿಕೆ ಮಾಡಿ. ಭಾರತದಲ್ಲಿ ಆವಿಷ್ಕರಿಸಿ. ಭಾರತದೊಂದಿಗೆ ಬೆಳೆಯಿರಿ," ಎಂದು ಹೇಳಿದರು.

*****