പോസ്റ്റഡ് ഓണ്‍:
01 NOV 2026 5:43PM by PIB Thiruvananthpuram
പ്രധാനമന്ത്രി ശ്രീ നരേന്ദ്ര മോദി 2026 നവംബർ 2-ന് വൈകുന്നേരം 4:30-ഓടെ ന്യൂഡൽഹിയിലെ ഭാരത് മണ്ഡപത്തിൽ വെച്ച് 'ഭാരത് റിന്യൂവബിൾ എനർജി സമ്മിറ്റ് & എക്സ്പോ 2026 ഉദ്ഘാടനം ചെയ്യും. ചടങ്ങിൽ അദ്ദേഹം സദസ്സിനെ അഭിസംബോധന ചെയ്യുകയും ചെയ്യും.
നാല് ദിവസം നീണ്ടുനിൽക്കുന്ന ഈ ഉച്ചകോടി 2026 നവംബർ 2 മുതൽ 5 വരെ നടക്കും. നിക്ഷേപിക്കുക. നവീകരിക്കുക. പ്രചോദിപ്പിക്കുക എന്നതാണ് ഉച്ചകോടിയുടെ പ്രമേയം.
ഭാരത് റിന്യൂവബിൾ എനർജി 2026 -ൽ 130-ലധികം രാജ്യങ്ങളിൽ നിന്നുള്ള പ്രതിനിധികൾ പങ്കെടുക്കും. ഇതിൽ 40-ലധികം മന്ത്രിമാർ, നയരൂപീകരണ വിദഗ്ധർ, നിക്ഷേപകർ, ധനകാര്യ സ്ഥാപനങ്ങൾ, വ്യവസായ പ്രമുഖർ എന്നിവർ ഉൾപ്പെടുന്നു. ശുദ്ധ ഊർജ്ജ മേഖലയിലെ നിക്ഷേപം, വ്യവസായ സഹകരണം, സാങ്കേതിക പങ്കാളിത്തം എന്നിവയ്ക്കായുള്ള ഒരു ആഗോള വേദിയായി ഇത് വർത്തിക്കും. ഓസ്‌ട്രേലിയ, ഡെൻമാർക്ക്, യൂറോപ്യൻ യൂണിയൻ, ഫ്രാൻസ്, ജർമ്മനി, നെതർലാൻഡ്‌സ്, നോർവേ, സ്വീഡൻ, യുണൈറ്റഡ് കിംഗ്ഡം എന്നിവ 'പങ്കാളിത്ത രാജ്യങ്ങളായി ഈ ഉച്ചകോടിയിൽ പങ്കുചേരും.
ആന്ധ്രാപ്രദേശ്, അസം, ബീഹാർ, ഛത്തീസ്ഗഢ്, ഡൽഹി, ഗുജറാത്ത്, കർണാടക, മധ്യപ്രദേശ്, മഹാരാഷ്ട്ര, ഒഡീഷ, രാജസ്ഥാൻ, ഉത്തർപ്രദേശ്, പശ്ചിമ ബംഗാൾ എന്നീ 13 സംസ്ഥാനങ്ങളും കേന്ദ്രഭരണ പ്രദേശങ്ങളും തങ്ങളുടെ പുനരുപയോഗ ഊർജ്ജ സാധ്യതകൾ, നിക്ഷേപ അവസരങ്ങൾ, ഉൽപ്പാദന ശേഷി എന്നിവ പ്രദർശിപ്പിക്കും.
ഇന്റർനാഷണൽ സോളാർ അലയൻസ് (ISA) അസംബ്ലിയുടെ 9-ാമത് സമ്മേളനത്തോടും, ഗ്രീൻ ഹൈഡ്രജനെക്കുറിച്ചുള്ള 4-ാമത് അന്താരാഷ്ട്ര സമ്മേളനത്തോടും (ICGH) ചേർന്നാണ് ഈ ഉച്ചകോടി നടക്കുന്നത്. ഭാരത് റിന്യൂവബിൾ എനർജി ശുദ്ധ ഊർജ്ജ മേഖലയിലെ നിക്ഷേപം, വ്യവസായ സഹകരണം, സാങ്കേതിക പങ്കാളിത്തം എന്നിവയിൽ ശ്രദ്ധ കേന്ദ്രീകരിക്കുമ്പോൾ, ഐ.എസ്.എ അസംബ്ലി സൗരോർജ്ജ മേഖലയിലെ അന്താരാഷ്ട്ര സഹകരണം, ധനസഹായം, സ്ഥാപനപരമായ ശേഷി വർദ്ധിപ്പിക്കൽ എന്നിവയിൽ ഊന്നൽ നൽകും. ഐ.സി.ജി.എച്ച് ഗ്രീൻ ഹൈഡ്രജൻ സാങ്കേതികവിദ്യകൾ, നിക്ഷേപം, ഈ മേഖലയുടെ വിപുലീകരണം എന്നിവയിൽ ശ്രദ്ധ കേന്ദ്രീകരിക്കും. ഈ മൂന്ന് വേദികളും ഒത്തുചേരുന്നതിലൂടെ അന്താരാഷ്ട്ര സഹകരണം ശക്തിപ്പെടുകയും, ശുദ്ധ ഊർജ്ജത്തിന്റെ ഉപയോഗം വേഗത്തിലാകുകയും ചെയ്യും. ഇന്ത്യയുടെ മുൻനിര പുനരുപയോഗ ഊർജ്ജ നിക്ഷേപ ഉച്ചകോടിയായ RE-INVEST ന്റെ പാരമ്പര്യത്തെ അടിസ്ഥാനമാക്കി, ഭാരത് റിന്യൂവബിൾ എനർജി 2026 ശുദ്ധമായ ഊർജ്ജ മേഖലയിലുടനീളമുള്ള ആഗോള ഇടപെടലിനുള്ള വിപുലമായ ഒരു വേദി നൽകും. നിക്ഷേപം, പങ്കാളിത്തം, പദ്ധതി വികസനം എന്നിവ പ്രോത്സാഹിപ്പിക്കുന്നതിനായി ബിസിനസ്-ടു-ബിസിനസ്, ബിസിനസ്-ടു-ഗവൺമെന്റ്, ഗവൺമെന്റ്-ടു-ഗവൺമെന്റ് ഇടപെടലുകൾക്കൊപ്പം പ്ലീനറി സെഷനുകൾ, മന്ത്രിതല ചർച്ചകൾ, സിഇഒ വട്ടമേശ സമ്മേളനങ്ങൾ, രാജ്യ-സംസ്ഥാന സെഷനുകൾ എന്നിവയും ഉച്ചകോടിയിൽ നടക്കും. നൂതന സാങ്കേതികവിദ്യകൾ, ഇന്ത്യൻ ഉൽപ്പാദന ശേഷികൾ, സൗരോർജ്ജം, കാറ്റിൽ നിന്നുള്ള ഊർജ്ജം, ഗ്രീൻ ഹൈഡ്രജൻ, ഊർജ്ജ സംഭരണം, മറ്റ് ഉയർന്നുവരുന്ന മേഖലകൾ എന്നിവയിലുടനീളം സംശുദ്ധ ഊർജ്ജ പരിഹാരങ്ങൾ പ്രദർശിപ്പിക്കുന്ന 400-ലധികം പ്രദർശകർ എക്സ്പോയിൽ പങ്കെടുക്കും.
***
SK