Hapoh ka jingïalam jong u Myntri Rangbahduh ka ri, u Narendra Modi, ka sorkar ka la pynkhlaiñ shuh shuh ïa ki kyndon treikam ban khmih ïa ki briew kiba wan na shabar ri lyngba ka jingpynïar shuh shuh ïa ki office treikam jong ka Foreigners Regional Registration Offices (FRROs)

Hapoh ka jingïalam jong u Myntri Rangbahduh ka ri, u Narendra Modi, ka sorkar ka la pynkhlaiñ shuh shuh ïa ki kyndon treikam na ka bynta ka jingpeit bad khmih ïa ki briew kiba wan na shabar ri lyngba ka jingpynïar shuh shuh ïa ki office treikam jong ka Foreigners Regional Registration Offices (FRROs).

Ka  la don ka jingkiewstet ha ka jingdon jong ki briew kiba na shabar ka ri kiba wan na ka bynta ki kam jngohkai pyrthei, ka jingshah sumar bad na ka bynta ka jingpule bad kala donkam ban buh ïa ki FRRO ha baroh ki jylla. Kane kan pynthikna ïa ka jinglah ban ioh ia ka jingshakri, kan kyntiew ia ka jingiaidbeit iaid ryntih bad kyntiew ia ka kum kawei na ki thain kaba khring bha. Da kaba ithuh ia kane ka jindonkam, u myntri ki kam pohiing bad Cooperation ka sorkar pdeng, u Amit Shah ula bthah ban buh ia ki FRRO ha baroh ki nongbah jong ki jylla ha lane shwa ka snem 2027.

Ha kaba iadei bad katei kajingbthah jong u myntri ki kam pohiing ka ri, u Amit Shah, san tylli ki office treikam ba thymmai jong ka FRRO la dep bah wanrah hapoh ki nongbah jong ki san tylli ki jylla naduh naduh ka snem 2025. Lai tylli ki office treikam jong ka FRRO la dep ban buh ha Jaipur, Chandigarh bad hapoh Guwahati ha ka snem 2025. Kham hashwa, kine ki hap hapoh ka jingpeit jingkhmih jong ki office treikam jong ka FRRO kiba don hapoh Delhi, ha Amritsar bad ha Kolkata.

Mynta ka snem artylli ki office treikam jong ka FRRO la dep ban wanrah hapoh ki nongbah jong ka jylla Aizawl (Mizoram), bad ha Amravati (Andhra Pradesh). Kham hashwa, ka Aizawl ka hap hapoh ka jingkhmih jong ka FRRO, Kolkata katba ka Amravati pat ka hap hapoh ka jingkhmih jong ka FRRO, Hyderabad. Dangshen la ithuh ia ki lai tylli ki office treikam jong ka FRRO kata ha Kohima (Nagaland), ha Agartala (Tripura) bad ha Bhubaneshwar (Odisha). Kham hashwa ka Kohima bad ka Agartala ki hap hapoh ka jingpeit jingkhmih jong ka FRRO, Kolkata katba ka Bhubaneshwar pat ka hap hapoh ka jingpeit jingkhmih jong ka FRRO, Hyderabad. 

Ka jingdon jong ki office treika, jong ka FRRO hapoh ka ri ki la kiew mynta sha ka (20) tylli, bad kine ki don ha Ahmedabad, ha Amravati, ha Amritsar, ha Aizawl, ha Agartala, ha Bengaluru, ha Bhubaneswar, ha Calicut, ha Chennai, ha Cochin, ha Chandigarh, ha Delhi, ha Guwahati, ha Hyderabad, ha Kolkata, ha Kohima, ha Kozhikode, ha Lucknow, ha Mumbai bad ha Trivandrum.

Ka sorkar India ka dang pyrshang ban iakren ia kane ka mat ha ka ban wanrah ia ki office trikam jong ka FRRO sa ha kiwei pat ki jylla ba dangsah kum ha Bihar, ha Goa, ha Himachal Pradesh, ha Jharkhand, ha Madhya Pradesh, ha Uttarakhand, ha Arunachal Pradesh, ha Manipur bad hapoh ka jylla Meghalaya. Kane kan iarap ia ki briew kiba wan na Shabar rib a kin ioh ia ki ba bun jait ki jingdonkam kum ka jingpynjlan ia ka por treikam jong ka visa, ka jingpynkylla, ki jingdonkam ba iadei bad ka jingwanlong nongshong shnong ba pura bad ka jingshngain jong ka ain. Kane ka jingpyniar ia ki office treikam jong ka FRRO kan pynkhlain shuh shuh ia ka rukom treikam jong ki jaka treikam kiba don ha ki shnong, kan kyntiew ia ka jingiatreilag bad ki bor pyniaid jong ka jylla, ban pynsuk ia ki nongwan jngohkai ba na bar ri kiba dei hok bad ban pynkhlain shuh shuh ia ka jingpyntreikam ba pura ia ki ain jong ki briew kiba wan phetwir bad ki jingdonkam na ka bynta ka jingshngain jong ka ri.

Ka jingpyniar ia ki office treikam jong ka Foreigners Regional Registration Offices (FRROs) ka don artylli ki jingthmu kata ban pynsuk ia ka jingleit jingwan bad ka jingsah jong ki briew kiba wan na shabar ri hapoh India bad ban pynthikna ia ka jingpyntreikam pura ia ki ain na ka bynta ki nong phetwir bad ki jingdonkam na ka bynta ka jingshngain. Ka Immigration bad Foreigners Act, 2025, kaba la wanrah lang hajuh ia ki saw tylli ki ain kiba kham hashwa kiba iadei bad ki phetwir bad ki briew kiba wan na Shabar ri, ki wanrah ia ki kyndon treikam kaba iatylli na ka bynta ban tehlakam ia ka jingrung, ka jingsah, ka jingleit jingwan bad ka jingmih jong ki briew kiba na Shabar ri. Katkum kana ka ain, ka Bureau jong ka Immigration, kaba ju pyntreikam ia ki ain na ka bynta ki phetwir, kan pyntreikam ia ki kamram jong ka, ia kaba yn iaraplang napdeng kiwei pat, da u kumba la aibor da ka sorkar India.

Ka office treikam jong ka Foreigners Regional Registration Office tehlakam, ka buddien bad ka pyntyllun ia ka kam ba iadei bad ka jingsah jong ki briew ba na bar ri kiba wan ban jngoh bad sah hapoh India. Ka iarap ruh ia ka jingpynrung kyrteng jong ki briew kiba wan na shabar ri hashwa ba kin wan poi bad ai ruh ia ka syrnod jingpynrungkyrteng ne ka Registration Certificate (RC) ne ka Residential Permit ha ka por ba pynrungkyrteng. Ka buh ruh ia ki jingtip ba bniah halor ki jingkylla jong ki briew kiba wan na Shabar ri, kum ki jingkylla ha kaba iadei bad ka jaka shong jaka sah, ki jingtip babniah halor ka passport lane ki jingthmu jong ka jingleit jingwan hapoh ka ri, bad ai ruh ia ka jingbit na ka bynta ban leit sha ki jaka bala iada kyrpang bad ki jaka bala pyrkhing. Ki jingbit na ka bynta ban mih la ai sha ki briew kiba wan na bar ri ha kaba ki visa jong ki kila kut ka por treikam, kiba la sah palat ia ki sngi ba la buh, lane kiba donkam ia ka jingbit hashwa ba kin mih noh napoh India. Khatduh eh ka FRRO ka khmih ia ka jingbud ryntih ia ki ain phetwir, ka shimti ia ki jingjia kiba iadei bad ka jingsah palat ia ka por ba la buh bad ka jigpynkhein ia ki ain ba iadei bad ka visa, bad ka wanrah ka jingiatreilang ha kaba iadei bad ka ain lane ki jingpynshitom ha kano kano ka por ba donkam. 

*****