Ha ka:
31 OCT 2026 2:09PM by PIB Shillong
U myntri ki kam pohïing bad ka tnat Corporation ka sorkar pdeng, u Amit Shah ula plie ïa ka jingïamareh 'Run for Unity' ha New Delhi hynne ka sngi, ba la pynlong kum shi bynta jong ka 'Rashtriya Ekta Diwas' - ha ka sngi rakhe ïa ka lyngkhuh sngikha ba 151 jong u Sardar Vallabhbhai Patel. Ha kane ka sngi, u myntri ki kam poh ïing ka ri ula shim ruh ïa ka jingkular jong ka 'Unity Pledge' sha ki paidbah jong ka ri. Ha kane ka sngi la wan ruh ban ïadonlang da bun ngut ki kynrem ki lyndan, ba kynthup ïa u lat ka Delhi, u Lieutenant Taranjit Singh Sandhu, u myntri ka sorkar pdeng, u Dr. Mansukh Mandaviya, ka myntri rangbah ka Delhi, ka Rekha Gupta, bad ki myntri khynnah ka tnat ki kam pohïing ka ri, u Nityanand Rai bad u Bandi Sanjay Kumar.
Ha ka jingkren jong u ha kane ka sngi, u myntri ki kam pohïing bad Cooperation ka sorkar pdeng, u Amit Shah ula ong ba naduh ba u Narendra Modi ula long u myntri rangbahduh jong ka ri, ngi la ju rakhe ïa ka lyngkhuh sngikha jong u Sardar Vallabhbhai Patel kum ka 'Rashtriya Ekta Diwas'. Mynta ka sngi ka dei ka lyngkhuh sngikha ba 151 jong u Sardar Sahab. U long u riewkhraw uba la pynkylla ym tang ïa ka khana pateng jong ka India hynrei ula pynwandur ruh ïa ka jinglong ka dur ka dar jong ka. Da kaba shim ïa ka jingkit bakhia ha ka ban pynïatylli ïa ki ba bun tylli ki jylla ba la synshar da ki khun syiem, u Sardar Sahab ula thaw ïa ka map jong ka India kaba ngi lah ban ïohi kumba ka long mynta. Ula ong ba u Sardar Sahab ym tang ba u la lah ban pynwandur ïa ka jinglong jingman jong ka jaka, ki kam saiñ pyrthei, bad ka jingpynïasoh ïa ka kolshor jong ka India hynrei ula lah ruh ban wanrah lang hajuh ïa ka ri, kaba ïatyllilang kum kawei.
U Amit Shah ula ong ba ha ka por ba ka ri ka ïoh ïa ka jinglaitluid, ka pyrthei kala dep ban ïathuh lypa ba ka India kan sa saphret. Tang ha ki 1,218 sngi hadien ba la ïoh ïa ka jinglaitluid, u Sardar Patel ula lah ban pynurlong ïa kaba kiwei ki ong ka bym lah da kaba pynlong ïa ka India ka ïatylli. Mynta, ka India ba la mutdur da u Sardar Patel ka ïeng da ka jingsngew sarong hakhmat jong ka pyrthei.
U myntri ki kam pohïing ka ri ula ïathuh ba ha ka 31 tarik u Lber mynta u snem, ka ri ka la lah ban pynduhnoh ïa ki kam lehnoh bad mynta ka la kiew shaphrang ha ka lynti ban long ka ri kaba lait na u drok. Ula banjur ba ka jingthaw ïa ka ri kaba lait na u drok ka dei ka nongrim sha ka jingïohi jngai jong ka 'Viksit Bharat 'jong u myntri rangbahduh ka ri, u Modi. Ula ïathuh ba shibun tylli ki mawmer ba kongsan la ïohpdiang ha ka por ka jinglong myntri rangbahduh ka ri, jong u Modi- kum ka jingpynduhnoh ïa ka Article 370, kaba pynïasoh shyrta ïa ka Kashmir sha ka India; ka jingpynduh jait ïa ki kam lehnoh;bad ka jingpyntreikam ïa ka unified tax system. U Shah u la ïathuh ba ka jingsngewthuh ïa ka India kaba lait na u drok kan long ka jingjop kaba khraw jong baroh- kawei kaban long shisha ka jingmyntoi na ka bynta ki samla jong ka ri bad ïa ka lawei jong ka.
U Amit Shah u la ong ba ka jingïapher ha ka ktien ka thylliej, ka kolshor, bad ka riti tynrai jong ka ri jong ngi kam dei ka jingtlot jong ngi, hynrei ka jingkhlaiñ. U la ong ba kane ka dei ka khubor jong u Sardar Patel, bad kadei ka lynti kaba ngi hap ban ïaibuddien. Ka jingïapher jong ngi ha ka ktien ka thylliej, ka kolshor, bad ha ka jingngeit kadei ka bor jong ngi. Lyngba ka jingïakren, ka jingshañiah, bad ka jingmut jingpyrkhat kaba kynthuplang ïa baroh, ngi la tei ïa ka jinglong kawei ha kine ki 80 snem ba la leit. Watla ngi don ka jingïapher ha ka ktien ka thylliej, ka riam ka beit, ki jingngeit tynrai, bad ki jingngeit ñiam, ka ri jong ngi ka ïailong tylli kawei.
U Myntri ki kam poh ïing bad Cooperation ka sorkar pdeng ula ong ba ka jingshna thymmai ïa ka jaka mane blei ka Somnath Temple ka long kum ka jingïohmad ïa ka jingshai bad ka jingwanphai biang jong ka ri sa shisien pat. Dei u Sardar Patel uba la mutdur ïa ka jingtei jong kane ka jaka mane blei ha Somnath. Mynta, hapoh ka jingïalam jong u Myntri Rangbahduh ka ri, u Narendra Modi, ka sienjam jong ka 'Make in India ' bad ka 'Atmanirbhar Bharat ' ki ïalam lynti ïa ngi na ka bynta ban poi sha kliar ha ka ïoh ka kot hapdeng ki ri jong ka pyrthei.
U Amit Shah ula ong ba u Sardar Sahab u khlem ïoh ïa ka jingithuh kaba u dei hok ban ïoh na ka bynta ka jingnohsynñiang jong u la bun bun snem. Ka liang pyrshah barabor ka pyrshang ban pynduh pyndam ïa ka jingkynmaw ïa u Sardar Sahab, hynrei kum ka jingshai jong ka sngi ki khlem lah satia ban buhrieh, ka nam jong u khlem lah satia ban pynduh. Ula ong ba mynba u Narendra Modi ula long u Myntri Rangbah jong ka Gujarat, ula sdang ban tei ïa une u motdur 'Statue of Unity '- u mot uba jrong- u ba pyni ïa ka jingjrong jong u Sardar Sahab bad ïa ka jingkhraw ka jinglong jong u sha ka ri hi baroh kawei. U Shah ula ong ba mynta ka sngi, na kane ka jaka, u Myntri Rangbahduh ka ri un sa shim ïa ka jing salute ha ka jingïaid parade jong ki kynhun pulit na kylleng ka ri, kaba long ruh ka khubor jong ka jingïatylli jong ka ri.
*****