મધ્ય પ્રદેશમાં બંદૂકના છરાથી ઇજાગ્રસ્ત ચિત્તાના મોતની તપાસ માટે કેન્દ્ર સરકારે ઉચ્ચ સ્તરીય ટીમ મોકલી

કેન્દ્ર સરકારે મધ્ય પ્રદેશના કૂનો નેશનલ પાર્કના 19 મહિનાના નર ચિત્તા (KNG22) ની બંદૂકના છરાથી ઈજાના કારણે થયેલા મોતની ગંભીર નોંધ લીધી છે. આ બાબતને અત્યંત ગંભીરતાથી લઈને, પ્રોજેક્ટ ચિત્તાના નિર્ણાયક મહત્વ અને પુનઃસ્થાપિત કરાયેલા ચિત્તાના રક્ષણ માટે સર્વોચ્ચ ધોરણો સુનિશ્ચિત કરવાની જરૂરિયાતને ધ્યાનમાં રાખીને કેન્દ્રે આ ઘટનાની સ્થળ પર તપાસ માટે એક ઉચ્ચ સ્તરીય ટીમ મોકલી છે.

કેન્દ્રીય ટીમમાં નેશનલ ટાઈગર કન્ઝર્વેશન ઓથોરિટી (NTCA) ના ઇન્સ્પેક્ટર જનરલ ઓફ ફોરેસ્ટ્સ, વાઇલ્ડલાઇફ ક્રાઇમ કંટ્રોલ બ્યુરો (WCCB) ના એડિશનલ ડાયરેક્ટર અને WCCB ના રીજિયોનલ ડેપ્યુટી ડાયરેક્ટરનો સમાવેશ થાય છે. આ ટીમને ચિત્તાના મોત તરફ દોરી જતી પરિસ્થિતિઓની સંપૂર્ણ તપાસ કરવાની, ઉપલબ્ધ તમામ પુરાવાઓની તપાસ કરવાની અને આ બાબતમાં સખત અને ઝડપી કાર્યવાહી સુનિશ્ચિત કરવા મધ્ય પ્રદેશ વન વિભાગ સાથે નજીકથી તાલમેલ સાધવાની જવાબદારી સોંપવામાં આવી છે.

ચિત્તો, જે ચિત્તા નિર્વાનો બચ્ચુ હતો, તે 25 ઓક્ટોબર 2026 ના રોજ કૂનો નેશનલ પાર્કના સુરક્ષિત વિસ્તારની બહાર મોરેનાના પ્રાદેશિક જંગલોમાં ઘાયલ હાલતમાં મળી આવ્યો હતો. મધ્ય પ્રદેશ વન વિભાગ દ્વારા જણાવ્યા અનુસાર, તેને તે જ દિવસે શ્યોપુર પ્રાદેશિક વન વિભાગમાંથી રેસ્ક્યુ કરવામાં આવ્યો હતો અને જબલપુર ખાતેની વેટરનરી ફેસિલિટી ખાતે સઘન પશુચિકિત્સા સંભાળ અને ઇમરજન્સી સર્જરી પૂરી પાડવામાં આવી હતી. સર્જરી દરમિયાન તેના શરીરમાંથી બંદૂકના પાંચ છરા મળી આવ્યા હતા. તબીબી સારવાર આપવા છતાં, ચિત્તાએ 27 ઓક્ટોબર 2026 ના રોજ ઈજાના કારણે દમ તોડ્યો હતો. તબીબી તપાસમાં મળી આવેલા બંદૂકના છરા સાથે સંકળાયેલી બહુવિધ આંતરિક ઈજાઓની પુષ્ટિ થઈ હતી.

રાજ્ય સરકારે આ ઘટનાની તપાસ માટે વન અને પોલીસ અધિકારીઓનો સમાવેશ કરતી એક સ્પેશિયલ ટાસ્ક ફોર્સ (STF) ની રચના કરી દીધી છે. MoEFCC દ્વારા નિયુક્ત કરવામાં આવેલી કેન્દ્રીય ટીમ રાજ્યના તંત્ર સાથે તાલમેલમાં કામ કરશે. તે ભવિષ્યમાં આવી કોઈપણ ઘટનાને રોકવા માટે સુરક્ષા પ્રોટોકોલના અમલીકરણ તેમજ હાથ ધરવામાં આવી રહેલા મોનિટરિંગ અને રક્ષણાત્મક પગલાંની પણ તપાસ કરશે. કેન્દ્રીય ટીમ તેના તારણો અને ભલામણો મંત્રાલયને સુપ્રત કરશે જેથી રાજ્ય સરકાર અને ફિલ્ડ અધિકારીઓને આગળના નિર્દેશો આપી શકાય.

SM/DK/GP

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964[at]gmail[dot]com