മോദി ഗവൺമെന്റിന്റെ ലഹരിവിരുദ്ധ പോരാട്ടത്തിന് കരുത്തേകി നാർക്കോട്ടിക്സ് കൺട്രോൾ ബ്യൂറോ (NCB) ‘ഓപ്പറേഷൻ ട്രൈഡൻ്റ് ' ആരംഭിച്ചു. ഇതിൻ്റെ ഭാഗമായി അസം, മിസോറം, മണിപ്പൂർ എന്നിവിടങ്ങളിലെ 38 കേന്ദ്രങ്ങളിൽ 38 സംഘങ്ങൾ ഒരേസമയം മിന്നൽ പരിശോധന നടത്തി. ലഹരിക്കെതിരായ മോദി ഗവൺമെന്റിന്റെ വർത്തമാനം പറയാൻ വിട്ടുവീഴ്ചയില്ലാത്ത നയത്തിനും, ലഹരിമരുന്നുകൾ പിടിച്ചെടുക്കുന്നതിൽ മാത്രം ശ്രദ്ധ കേന്ദ്രീകരിച്ചിരുന്ന സമീപനത്തിൽനിന്ന് അവയുടെ വിതരണ-പ്രവർത്തന ശൃംഖലകളെ ലക്ഷ്യമിട്ട് തകർക്കുന്ന സമീപനത്തിലേക്കുള്ള തന്ത്രപരമായ മാറ്റത്തിനും അനുസൃതമായാണ് ഈ നടപടി.
അസം, മിസോറം, മണിപ്പൂർ എന്നീ മൂന്ന് സംസ്ഥാനങ്ങളിലായി അതിർത്തി കടന്ന് പ്രവർത്തിക്കുന്ന സംഘടിത ലഹരി ശൃംഖലകൾക്കെതിരെ വിവിധ ഏജൻസികളെ ഏകോപിപ്പിച്ച് വിപുലമായ സംയുക്ത പരിശോധനകളാണ് നടത്തിയത്. ലഹരിമരുന്ന് നിയന്ത്രണത്തിനായുള്ള 2026–2029 ലെ വിഷൻ ഡോക്യുമെൻ്റിന് അനുസൃതമായി, അതിർത്തി കടന്ന് പ്രവർത്തിക്കുന്ന ഇത്തരം സംഘടിത ലഹരി ശൃംഖലകളെ വേരോടെ പിഴുതെറിയുന്നതിനായി, ലഹരിമരുന്നുകൾ പിടിച്ചെടുക്കുന്നതിൽ മാത്രം ഒതുങ്ങാതെ അവയുടെ ശൃംഖലകളെയും സാമ്പത്തിക സ്രോതസ്സുകളെയും തകർക്കുന്ന സമീപനത്തിലേക്കുള്ള മാറ്റം ഈ ഓപ്പറേഷൻ വ്യക്തമാക്കുന്നു.
കേന്ദ്ര ആഭ്യന്തര, സഹകരണ മന്ത്രി ശ്രീ അമിത് ഷാ സമൂഹമാധ്യമമായ എക്സിൽ പങ്കുവെച്ച കുറിപ്പിൽ ഇങ്ങനെ വ്യക്തമാക്കി: “ലഹരിക്കെതിരായ മോദി ഗവൺമെന്റിന്റെ ശക്തമായ നടപടികൾ തുടരുകയാണ്... ഒക്ടോബർ 23-ന് അസം, മിസോറം, മണിപ്പൂർ എന്നിവിടങ്ങളിലെ 38 കേന്ദ്രങ്ങളിൽ നമ്മുടെ ഏജൻസികൾ ഒരേസമയം നടത്തിയ ശക്തമായ മിന്നൽ പരിശോധനകളിലൂടെ ഒരു അന്താരാഷ്ട്ര ലഹരിക്കടത്ത് ശൃംഖല തകർത്തു. ഈ ഓപ്പറേഷനിലൂടെ 100 കോടി രൂപയുടെ ഹവാല ഇടപാടുകൾ കണ്ടെത്തുകയും, 1,424 ബാങ്ക് അക്കൗണ്ടുകൾ മരവിപ്പിക്കുകയും, 17.82 കോടി രൂപ വിലമതിക്കുന്ന സ്വത്തുക്കൾ കണ്ടുകെട്ടുകയും ചെയ്തു. കൂടാതെ, 500 ഡിറ്റണേറ്ററുകളും 12 ലക്ഷം രൂപയും പിടിച്ചെടുത്തു. 18 പേരെ അറസ്റ്റ് ചെയ്യുകയും ചെയ്തു.
'ഡെത്ത് ട്രയാംഗിൾ കോറിഡോർ' വഴി ഇന്ത്യ, മ്യാൻമർ, ബംഗ്ലാദേശ് എന്നീ രാജ്യങ്ങളുടെ അതിർത്തികൾ കടന്നാണ് ഈ ശൃംഖല ലഹരിമരുന്നുകൾ കടത്തിയിരുന്നത്. 2029 ഡിസംബർ 31-ഓടെ എല്ലാ ലഹരി ശൃംഖലകളെയും പൂർണമായി തുടച്ചുനീക്കുക എന്ന ലക്ഷ്യം കൈവരിക്കാനുള്ള ഇന്ത്യയുടെ അചഞ്ചലമായ ദൃഢനിശ്ചയത്തിൻ്റെ തെളിവാണ് ഈ ശക്തമായ നടപടി. ലഹരിമരുന്ന് മാഫിയകളുടെ ശവപ്പെട്ടിയിൽ അവസാനത്തെ ആണിയും അടിക്കുന്നതുവരെ ഇന്ത്യയുടെ നടപടികൾ തുടരും. കേന്ദ്ര ഏജൻസികളിലെയും മൂന്ന് സംസ്ഥാനങ്ങളിലെ പൊലീസ് സേനകളിലെയും അംഗങ്ങൾ ഉൾപ്പെടുന്ന ലഹരിവിരുദ്ധ സംഘത്തിന് എൻ്റെ ഹൃദയം നിറഞ്ഞ അഭിനന്ദനങ്ങൾ.”
ഓപ്പറേഷൻ ട്രൈഡൻ്റ്
2026 ഒക്ടോബർ 23-ന് പുലർച്ചെ നാർക്കോട്ടിക്സ് കൺട്രോൾ ബ്യൂറോയുടെ (NCB) നേതൃത്വത്തിൽ ‘ഓപ്പറേഷൻ ട്രൈഡൻ്റ്’ ആരംഭിച്ചു. വിവിധ ഏജൻസികൾ തമ്മിലുള്ള മികച്ച ഏകോപനത്തോടെ, മിസോറം പോലീസിൻ്റെയും എൻഫോഴ്സ്മെൻ്റ് ഡയറക്ടറേറ്റിൻ്റെയും (ED) സഹകരണത്തോടെ, ഒരു പ്രധാന അന്താരാഷ്ട്ര ലഹരിക്കടത്ത് ശൃംഖലയുടെ പ്രവർത്തനപരവും സാമ്പത്തികവുമായ അടിത്തറ തകർക്കുന്നതിനായി എൻസിബി വിപുലമായ മിന്നൽ പരിശോധനകൾ ഒരേസമയം നടത്തി. സൂക്ഷ്മമായ സംയുക്ത ആസൂത്രണത്തിലൂടെയും ഏകോപിത നിർവ്വഹണത്തിലൂടെയും മിസോറമിലെ ലഹരിക്കടത്ത് ശൃംഖലയുടെ തലവന്മാരെയും അവരുടെ കൂട്ടാളികളെയും ലക്ഷ്യമിട്ട്, രഹസ്യവിവരങ്ങൾ പങ്കുവെക്കുന്നതിലും പ്രവർത്തനങ്ങൾ ആസൂത്രണം ചെയ്യുന്നതിലും അന്വേഷണ ഏജൻസികൾ തമ്മിലുള്ള മികച്ച ഏകോപനത്തിൻ്റെ മാതൃകയാണ് 'ഓപ്പറേഷൻ ട്രൈഡൻ്റ്'. കേന്ദ്ര-സംസ്ഥാന ഏജൻസികൾ തമ്മിൽ ദിവസങ്ങളോളം നീണ്ട രഹസ്യവിവര ശേഖരണം, പരിശോധനാ കേന്ദ്രങ്ങൾ സംയുക്തമായി കണ്ടെത്തൽ, ഉന്നതതല തന്ത്രപരമായ കൂടിയാലോചനകൾ എന്നിവയ്ക്ക് ശേഷമാണ് ഈ ഓപ്പറേഷൻ ആരംഭിച്ചത്. ലഹരിക്കടത്ത് ശൃംഖലകളുടെ വിതരണ കേന്ദ്രങ്ങളെയും അനധികൃത സാമ്പത്തിക സ്രോതസ്സുകളെയും ഒരേസമയം ലക്ഷ്യമിട്ട് തകർക്കുന്ന രീതിയിലാണ് ഈ നീക്കം സൂക്ഷ്മമായി ആസൂത്രണം ചെയ്തത്.
ഏകീകൃത കമാൻഡ് സംവിധാനത്തിന് കീഴിൽ അതിസൂക്ഷ്മമായ കൃത്യതയോടെ അസം, മിസോറം, മണിപ്പൂർ എന്നീ മൂന്ന് വടക്കുകിഴക്കൻ സംസ്ഥാനങ്ങളിലായി മുൻകൂട്ടി കണ്ടെത്തിയ 38 കേന്ദ്രങ്ങളിൽ വിവിധ ഏജൻസികളിലെ അംഗങ്ങൾ ഉൾപ്പെട്ട 38 സംയുക്ത സംഘങ്ങളെ ഒരേസമയം വിന്യസിച്ചു. പ്രധാന നഗരകേന്ദ്രങ്ങളും തന്ത്രപ്രധാന അതിർത്തി ഇടനാഴികളും കേന്ദ്രീകരിച്ചായിരുന്നു ഈ ഏകോപിത പരിശോധനകൾ നടത്തിയത്. മിസോറമിലെ ഐസ്വാൾ, ചംഫായ്, ഇന്ത്യ-മ്യാൻമർ അതിർത്തിയിലെ തന്ത്രപ്രധാന വ്യാപാരനഗരമായ സോഖാവ്തർ എന്നിവിടങ്ങളിലും മണിപ്പൂരിലെ ചുരാചന്ദ്പൂരിലും അസമിലെ കച്ചാർ ട്രാൻസിറ്റ് ഇടനാഴിയിലും പ്രവർത്തിച്ചിരുന്ന അനുബന്ധ കേന്ദ്രങ്ങളിലും പരിശോധന നടത്തി. ദുർഘടമായ ഭൂപ്രകൃതിയും വിശാലമായ ഭൂമിശാസ്ത്രപരമായ വ്യാപ്തിയും ഉണ്ടായിരുന്നിട്ടും, വിവിധ വകുപ്പുകൾ തമ്മിലുള്ള മികച്ച ഏകോപനത്തിലൂടെ എല്ലാ പരിശോധനകളും അന്വേഷണങ്ങളും സാമ്പത്തിക ഓഡിറ്റുകളും ഒരേസമയം നടത്താൻ സാധിച്ചു. ഇതിലൂടെ പ്രതികൾ രക്ഷപ്പെടുന്നതും അനധികൃത സ്വത്തുക്കൾ ഒളിപ്പിക്കുന്നതും തടയാൻ കഴിഞ്ഞു.
പശ്ചാത്തലം ചുരുക്കത്തിൽ: അന്താരാഷ്ട്ര ലഹരിക്കടത്ത് ശൃംഖലയുടെ ചുരുളഴിയുന്നു
വിവിധ ലഹരിക്കടത്ത് ശൃംഖലകളെക്കുറിച്ച് എൻസിബി, മിസോറം പൊലീസ്, എൻഫോഴ്സ്മെൻ്റ് ഡയറക്ടറേറ്റ് എന്നിവ സംയുക്തമായി നടത്തിയ സമഗ്രമായ അന്വേഷണങ്ങളുടെയും രഹസ്യവിവരങ്ങളുടെ അടിസ്ഥാനത്തിൽ ശൃംഖലയുടെ മുൻകാല ബന്ധങ്ങളും തുടർബന്ധങ്ങളും കണ്ടെത്തുന്നതിനായി നടത്തിയ നിരന്തര അന്വേഷണങ്ങളുടെയും ഫലമായാണ് വിവിധ സംസ്ഥാനങ്ങൾ ഉൾപ്പെട്ടുള്ള ഈ ഓപ്പറേഷൻ. തുടർച്ചയായ അന്വേഷണങ്ങളിലൂടെ, മ്യാൻമർ കേന്ദ്രീകരിച്ച് പ്രവർത്തിക്കുന്ന ലഹരിക്കടത്ത് ശൃംഖലയുടെ തലവനായ
താങ്‌സിന്തുവാങ് എന്ന ചിന്തുവാങ് എന്ന ത്ലുവാംഗ നയിച്ചിരുന്ന വിപുലമായ അന്താരാഷ്ട്ര ശൃംഖലയെക്കുറിച്ചുള്ള വിവരങ്ങൾ പുറത്തുകൊണ്ടുവന്നു. എൻസിബി, ചംഫായ് പൊലീസ്, മിസോറം എക്സൈസ് വകുപ്പ് എന്നിവയുടെ പരിധിയിൽ വരുന്ന പത്തിലധികം എൻഡിപിഎസ് കേസുകളിൽ ഇയാൾ പിടികിട്ടാപ്പുള്ളിയാണ്. മ്യാൻമർ–മിസോറം–മണിപ്പൂർ–അസം–ത്രിപുര ഇടനാഴിയിലൂടെ മെത്താംഫെറ്റമിൻ, ഹെറോയിൻ തുടങ്ങിയ ലഹരിമരുന്നുകൾ ഇന്ത്യയുടെ മറ്റ് ഭാഗങ്ങളിലേക്കും ബംഗ്ലാദേശിലേക്കും കടത്തിയിരുന്നത് ഇയാളുടെ നേതൃത്വത്തിലായിരുന്നു. അന്വേഷണത്തിൻ്റെ മുൻഘട്ടങ്ങളിൽ ഈ ലഹരിക്കടത്ത് ശൃംഖലയുടെ പ്രധാന കണ്ണികളെ വിജയകരമായി പിടികൂടാൻ സാധിച്ചു:
താങ്‌സിന്തുവാങ് എന്ന ചിന്തുവാങ് എന്ന ത്ലുവാംഗ ( ശൃംഖലയുടെ തലവൻ): വിവിധ സംസ്ഥാനങ്ങളിലായി നടത്തിയ നിരീക്ഷണങ്ങൾക്കും രഹസ്യവിവര ശേഖരണത്തിനും തുടർച്ചയായ നീക്കങ്ങൾക്കും ഒടുവിൽ ഡൽഹിയിൽ നിന്ന് അറസ്റ്റിലായി.
വുങ്ഖാൻതാവ്ന (പ്രധാന ഇടനിലക്കാരൻ): മ്യാൻമറിൽ നിന്നുള്ള ലഹരിമരുന്നുകളുടെ നീക്കവും വിതരണവും ഏകോപിപ്പിച്ചിരുന്ന ഇയാൾ ശൃംഖലയുടെ അടുത്ത കൂട്ടാളിയായിരുന്നു. ഇയാളെ അറസ്റ്റ് ചെയ്തശേഷം കർശനമായ PITNDPS നിയമപ്രകാരം കരുതൽ തടങ്കലിലാക്കി.
ലാൽറാംപാരി (പ്രധാന ഹവാല ഇടപാടുകാരി): 2024 ഓഗസ്റ്റ് 8-ന് എൻസിബി ഇവരെ അറസ്റ്റ് ചെയ്തു. ഈ ശൃംഖലയുമായി ബന്ധപ്പെട്ട് ഏകദേശം 100 കോടി രൂപയുടെ അനധികൃത ഹവാല ഇടപാടുകൾ നടന്നതായി അന്വേഷണത്തിൽ കണ്ടെത്തി. തുടർന്ന് എൻഫോഴ്സ്മെൻ്റ് ഡയറക്ടറേറ്റുമായി ചേർന്ന് സംയുക്ത നടപടി സ്വീകരിക്കുകയും അനധികൃതമായി സമ്പാദിച്ച സ്വത്തുക്കൾ മരവിപ്പിക്കുകയും ചെയ്തു.
അബു സാലിഹ് എന്ന സൈഫുദ്ദീൻ (അസം ഇടനാഴിയിലെ ഗതാഗത-വിതരണ പ്രവർത്തനങ്ങളുടെ തലവൻ): അസം ഇടനാഴിയിലൂടെയുള്ള ലഹരിമരുന്ന് കടത്ത് ഏകോപിപ്പിച്ചിരുന്ന ഇന്ത്യയിലെ പ്രധാന പ്രവർത്തകനും ഒന്നിലധികം എൻഡിപിഎസ് കേസുകളുമായി ബന്ധപ്പെട്ടയാളുമായ ഇയാളെ 2025 നവംബർ 20-ന് അസമിലെ കച്ചാറിൽനിന്ന് അറസ്റ്റ് ചെയ്തു.
ഈ അന്വേഷണങ്ങളിലൂടെ ലഭിച്ച നിർണായക വിവരങ്ങളുടെ അടിസ്ഥാനത്തിൽ നടത്തിയ വിശദമായ സാമ്പത്തിക പരിശോധനകളും ഡിജിറ്റൽ ഫോറൻസിക് വിശകലനങ്ങളും വഴി, ഇടനിലക്കാർ, കടലാസ് കമ്പനികൾ, മറ്റുള്ളവരുടെ പേരിൽ പണമിടപാടുകൾ നടത്തുന്നവർ എന്നിവ ഉൾപ്പെട്ട വിപുലമായൊരു ശൃംഖലയെക്കുറിച്ചുള്ള വിവരങ്ങൾ പുറത്തുകൊണ്ടുവന്നു. ഇതിൻ്റെ അടിസ്ഥാനത്തിലാണ് ‘ഓപ്പറേഷൻ ട്രൈഡൻ്റ്’ എന്ന പേരിൽ വിപുലമായ സംയുക്ത പരിശോധനകൾ ഒരേസമയം നടത്തിയത്.