પોસ્ટેડ ઓન:
23 OCT 2026 3:13PM by PIB Ahmedabad
રેલવે અને જલ શક્તિ કેન્દ્રીય રાજ્ય મંત્રી અને તુમકુરુના સાંસદ શ્રી વી. સોમન્નાના નેતૃત્વમાં આજે નવી દિલ્હીમાં સંસદ પરિસરમાં આવેલા પ્રેરણા સ્થળ ખાતે કિત્તૂર રાણી ચેન્નમ્માની જન્મજયંતી અને 202મા વિજયોત્સવની ખૂબ જ ભવ્યતા સાથે ઉજવણી કરવામાં આવી હતી.
આ કાર્યક્રમમાં લોકસભા અધ્યક્ષ શ્રી ઓમ બિરલા, કેન્દ્રીય જલ શક્તિ મંત્રી શ્રી સી.આર. પાટીલ, સાંસદ શ્રી પી.સી. મોહન, ડૉ. સુધાકર, પૂર્વ મંત્રીઓ શ્રી મુરુગેશ નિરાણી, શ્રી બસનગૌડા પાટીલ યતનાલ, નવી દિલ્હીમાં કર્ણાટકના પૂર્વ વિશિષ્ટ પ્રતિનિધિ શ્રી શંકરગૌડા પાટીલ, કુડાલસંગમના પૂજ્ય શ્રી બસવ મૃત્યુંજય સ્વામીજી, આલુરુ, બીદરના શ્રી સિદ્ધારૂઢ મઠના શ્રી શંકરાનંદ સ્વામીજી, કક્કામારીના શ્રી ગુરુદેવ આશ્રમના શ્રી આત્મારામ સ્વામીજી, ચાલકાપુરના શ્રી સિદ્ધારૂઢ મઠના શ્રી વિનાયક સ્વામીજી અને કર્ણાટકના વિવિધ જિલ્લાઓમાંથી તેમજ દિલ્હીથી મોટી સંખ્યામાં ઉપસ્થિત કન્નડિગા લોકોએ રાણી ચેન્નમ્માને પુષ્પાંજલિ અર્પણ કરી હતી.
સભાને સંબોધતા કેન્દ્રીય મંત્રી વી. સોમન્નાએ દેશના અજોડ મહિલા યોદ્ધા, કિત્તૂરના વીર રાણી, રાણી ચેન્નમ્માની જન્મજયંતી અને અંગ્રેજો સામેની તેમની 202મી વિજય ઉજવણી પ્રસંગે દેશના લોકોને હૃદયપૂર્વક શુભેચ્છાઓ પાઠવી હતી.
તેમણે આ પ્રસંગે ઉપસ્થિત રહી કાર્યક્રમની શોભા વધારવા બદલ તમામ કન્નડિગાઓ વતી લોકસભા અધ્યક્ષ શ્રી ઓમ બિરલા અને કેન્દ્રીય મંત્રી શ્રી સી.આર. પાટીલનો આભાર વ્યક્ત કર્યો હતો.
"કિત્તૂર રાણી ચેન્નમ્મા માત્ર યુદ્ધ લડનારા રાણી ન હતા; તેમણે એક સામ્રાજ્યવાદી શક્તિને પડકારી હતી અને ઇતિહાસમાં પ્રતિકારના અમર પ્રતીક તરીકે અમર રહ્યા છે. તે ખૂબ જ આનંદની વાત છે કે આપણને આવા વીર મહિલાની સિદ્ધિઓની ઉજવણી કરવાનો અવસર મળ્યો છે," તેમ મંત્રીએ જણાવ્યું હતું.
"ભારતીય સંસદના આ પવિત્ર સ્થળ પર વીર વનિતા રાણી ચેન્નમ્માની શૂરવીરતા, સાહસ અને જ્વાળા આજે દેશનું રક્ષણ કરતા વીર જવાનો માટે પ્રેરણાસ્ત્રોત છે. આપણી માતૃભૂમિ અને ભાષા પ્રત્યે પ્રેમ ધરાવતા આપણા સૌ માટે આ ગૌરવની વાત છે. ચાલો આપણે સૌ દર વર્ષે અહીં એકઠા થઈએ અને આ મહાન વિભૂતિઓને યાદ કરીએ," તેમણે અપીલ કરી હતી.
તેમણે દર વર્ષે આ કાર્યક્રમ યોજવાની મંજૂરી આપવા અને દરેક માટે પ્રેરણાબળ બનવા બદલ રાજ્યના લોકો વતી આદરણીય પ્રધાનમંત્રી શ્રી નરેન્દ્ર મોદીનો આભાર માન્યો હતો.
તેમણે મંજૂરી અને સહયોગ આપવા બદલ લોકસભા અધ્યક્ષ શ્રી ઓમ બિરલા, લોકસભા અને રેલવે મંત્રાલયના અધિકારીઓ અને રેલવે મંત્રી શ્રી અશ્વિની વૈષ્ણવનો પણ આભાર માન્યો હતો.
આ પ્રસંગે બોલતા પૂજ્ય શ્રી બસવ મૃત્યુંજય સ્વામીજીએ સંસદના પ્રેરણા સ્થળ ખાતે દર વર્ષે આવા કાર્યક્રમનું આયોજન કરવાની કેન્દ્રીય મંત્રી વી. સોમન્નાની પહેલ બદલ ખૂબ આનંદ વ્યક્ત કર્યો હતો.
SM/BS/JD