કેન્દ્રીય વાણિજ્ય અને ઉદ્યોગ મંત્રી શ્રી પીયૂષ ગોયલ વ્યૂહાત્મક આર્થિક ભાગીદારીને ગાઢ બનાવવા, દ્વિપક્ષીય વેપારનો વિસ્તાર કરવા અને ઔદ્યોગિક તથા તકનીકી સહયોગને આગળ ધપાવવા માટે જર્મની (22–24 ઓક્ટોબર 2026) અને નેધરલેન્ડ્સ (24–27 ઓક્ટોબર 2026) ની સત્તાવાર મુલાકાત લેશે.

મુલાકાતના બર્લિન તબક્કા દરમિયાન, શ્રી પીયૂષ ગોયલ બર્લિન ગ્લોબલ ડાયલોગમાં ભાગ લેશે, અને ભારતીય મેક્રોઇકોનોમિક સ્થિરતા, ઉત્પાદન ક્ષમતાઓ અને સ્થિતિસ્થાપક વૈશ્વિક પુરવઠા શૃંખલાના નિર્માણમાં મહત્વપૂર્ણ ભૂમિકાને રેખાંકિત કરવા માટે આંતરરાષ્ટ્રીય નીતિ નિર્માતાઓ અને વૈશ્વિક વ્યાપારી નેતાઓ સાથે સંવાદ સાધશે. આ સમિટથી અલગ, મંત્રીશ્રી જર્મન ફેડરલ આર્થિક બાબતો અને ઊર્જા મંત્રી (BMWE) અને ફેડરલ ચાન્સેલરી ઓફ જર્મનીના આર્થિક તથા નાણાકીય નીતિ સલાહકાર અને G7/G20 શેરપા સાથે ઉચ્ચ સ્તરીય દ્વિપક્ષીય બેઠકો યોજશે. આ બેઠકો દ્વિપક્ષીય વેપાર અને રોકાણ કોરિડોરને મજબૂત કરવા, એડવાન્સ્ડ એન્જિનિયરિંગ, ગ્રીન મોબિલિટી અને ક્લીન ટેકનોલોજીમાં તકનીકી તથા ઔદ્યોગિક સહયોગને વેગ આપવા, અને ચાલી રહેલી ભારત-EU મુક્ત વેપાર કરાર (FTA) વાટાઘાટોમાંથી ઉદ્ભવતી બજાર પહુંચ અને રોકાણના માર્ગો શોધવા પર કેન્દ્રિત હશે.

નેધરલેન્ડ્સ તરફ આગળ વધતા, શ્રી પીયૂષ ગોયલ હેગ ખાતે વ્યાપક સરકાર-થી-સરકાર (G2G) સંવાદોનું નેતૃત્વ કરશે, જેમાં વિસ્તૃત વેપાર માર્ગો અને હરિત સંક્રમણ (ગ્રીન ટ્રાન્ઝિશન) પહેલોની શોધ કરવા માટે આર્થિક બાબતોના મંત્રી અને વિદેશી વેપાર તથા વિકાસ સહયોગ મંત્રી સાથે દ્વિપક્ષીય મંત્રી સ્તરની બેઠકો યોજાશે. આ મુલાકાતમાં ઉત્તર હોલેન્ડના કિંગ્સ કમિશનર અને ડચ સંસદની વિદેશી વેપાર તથા યુરોપિયન બાબતોની સમિતિઓના સભ્યો સાથેની મુખ્ય ચર્ચાઓ પણ સામેલ હશે.

શ્રી પીયૂષ ગોયલની સાથે જર્મની અને નેધરલેન્ડ્સમાં લગભગ 100 વ્યવસાયો અને સ્ટાર્ટઅપ્સનું પ્રતિનિધિમંડળ પણ રહેશે. મંત્રીશ્રી સાથેનું ભારતીય વ્યાપારી પ્રતિનિધિમંડળ બર્લિનમાં એક સમાંતર કાર્યક્રમ યોજશે, જેમાં જર્મન સીઈઓ અને ભારતીય વ્યાપારી પ્રતિનિધિઓ સાથે ક્ષેત્રીય ગોળમેજી (સેક્ટોરલ રાઉન્ડટેબલ) બેઠકો સામેલ છે. આ ગોળમેજી બેઠકો ઓટોમોટિવ, એડવાન્સ્ડ મેન્યુફેક્ચરિંગ, ઈન્ફ્રાસ્ટ્રક્ચર અને એનર્જી; માહિતી તકનીક, આર્ટિફિશિયલ ઈન્ટેલિજન્સ અને સેવાઓ; એગ્રી-ફૂડ, ઉપભોક્તા વસ્તુઓ અને કાપડ, આરોગ્ય સંભાળ, ફાર્માસ્યુટિકલ્સ અને વેલનેસને આવરી લેશે. પ્રતિનિધિમંડળ જર્મનીમાં રોકાણ કરવા અને કામગીરી સ્થાપિત કરવા અંગે જર્મની ટ્રેડ એન્ડ ઈન્વેસ્ટ (GTAI) સાથે ભારત-જર્મની ઇન્વેસ્ટમેન્ટ રાઉન્ડટેબલમાં પણ ભાગ લેશે. તે ઔદ્યોગિક પરિવર્તન, ડીપટેક, માઇક્રોઇલેક્ટ્રોનિક્સ, કૌશલ્ય વિકાસ, અને ભારત-જર્મની વેપાર, રોકાણ અને સ્થિતિસ્થાપક પુરવઠા શ્રંખલાઓ પર જર્મન નવીનતા અને સંશોધન સંસ્થાઓ તથા થિંક ટેન્ક્સ સાથે પણ વાર્તાલાપ કરશે.

ભારતીય વ્યાપારી પ્રતિનિધિમંડળ 25 ઓક્ટોબર 2026ના રોજ પોર્ટની લોજિસ્ટિક્સ અને સપ્લાય ચેઈન ઈન્ફ્રાસ્ટ્રક્ચર જોવા માટે પોર્ટ ઓફ રોટરડમની મુલાકાત પણ લેશે. 26 ઓક્ટોબર 2026ના રોજ, શ્રી પીયૂષ ગોયલ હેગ ખાતે ભારત-નેધરલેન્ડ્સ બિઝનેસ ફોરમમાં ડચ વિદેશી વેપાર અને વિકાસ સહયોગ મંત્રી સાથે બંને દેશોના વ્યવસાયોને સંબોધિત કરશે. બિઝનેસ ફોરમ પછી છ સમાંતર ક્ષેત્રીય ગોળમેજી બેઠકો અને B2B નેટવર્કિંગ યોજાશે, જે એગ્રી-ફૂડ અને ફૂડ પ્રોસેસિંગ; હાઈ ટેકનોલોજી અને નવીનતા; ટકાઉપણું અને પુનઃપ્રાપ્ય ઊર્જા; લોજિસ્ટિક્સ અને સપ્લાય ચેઈન કનેક્ટિવિટી; ઉત્પાદન, ફાર્માસ્યુટિકલ્સ, ટેક્સટાઈલ અને એન્જિનિયરિંગ સામાન; અને સેવાઓ તથા સંલગ્ન ક્ષેત્રોને આવરી લેશે.

SM/IJ/JD

(રીલીઝ આઈડી: 2326078) મુલાકાતી સંખ્યા : 11