કેન્દ્રીય ગૃહ મંત્રી અને સહકારિતા મંત્રી શ્રી અમિત શાહે જણાવ્યું છે કે પંજાબ આજે ડ્રગ્સ, ગેંગસ્ટરવાદ અને સંગઠિત અપરાધના વધતા ખતરા સામે ઝઝૂમી રહ્યું છે.

કેન્દ્રીય ગૃહ મંત્રી શ્રી અમિત શાહે X પરની એક પોસ્ટમાં જણાવ્યું હતું કે પંજાબ આજે ડ્રગ્સ, ગેંગસ્ટરવાદ અને સંગઠિત અપરાધના વધતા ખતરા સામે ઝઝૂમી રહ્યું છે. પંજાબ સરકાર સામે સૌથી મોટો પ્રશ્ન એ છે કે - પંજાબના લોકોની સુરક્ષાની અંતિમ જવાબદારી કોણ લેશે? દિરબામાં દબાણ હેઠળ આવીને એક પિતા દ્વારા વિષપાન કરવું, અને માનસામાં ડ્રગ્સ સામે અવાજ ઉઠાવનાર પરવિંદર સિંહ ઝોટાની ધોળા દિવસે થયેલી હત્યાએ પંજાબમાં કાયદો અને વ્યવસ્થા સામે ગંભીર પ્રશ્નો ઊભા કર્યા છે. પરવિંદરના પિતાએ પંજાબ સરકાર અને તેમના ધારાસભ્ય પર ગંભીર આક્ષેપો કર્યા છે. ગૃહ મંત્રાલય આ બંને ઘટનાઓ અંગે પંજાબ સરકાર પાસે જવાબ પણ માંગશે. પંજાબમાં ડ્રગ્સનો વેપાર ફાલી-ફૂલી રહ્યો છે, સંગઠિત અપરાધનો ખતરો વધી રહ્યો છે, અને ડ્રગ્સ સામે અવાજ ઉઠાવનારાઓની સુરક્ષા સામે પ્રશ્નો ઊભા થઈ રહ્યા છે. મુખ્યમંત્રીજી, પંજાબના લોકો પ્રચાર નથી ઇચ્છતા - તેઓ જવાબો ઇચ્છે છે; જાહેરાતો નહીં, પણ પરિણામો ઇચ્છે છે; ડ્રગ્સ નેટવર્ક સામે નિર્ણાયક કાર્યવાહી, અને ગુનેગારોને આપવામાં આવતા કોઈપણ રાજકીય સંરક્ષણની નિષ્પક્ષ તપાસ ઇચ્છે છે. અમારો ધ્યેય સ્પષ્ટ છે – ડ્રગ્સના વેપાર સામે કાર્યવાહી, આપણા યુવાનોના ભવિષ્યનું રક્ષણ, ગુનેગારો સામે કડક પગલાં અને કાયદાનું શાસન એ રીતે જેથી કોઈ નાગરિકને ડરના ઓછાયા હેઠળ જીવવાની ફરજ ન પડે.