প্রধান মন্ত্রী শ্রী নরেন্দ্র মোদীনা ঙসি ভিদিও কনফরেন্সিংগী খুত্থাংদা লদাখতা লুপা করোর ৩,৩৫০ রোমগী মরুওইবা চাওখৎ-থৌরাংগী প্রোজেক্ত মঙা লৈবাক মীয়ামদা কত্থোকখ্রে। ভর্চুএল ওইনা শরুক য়ারদুনা লমদম অসিগী চাওখৎ-থৌরাংগী অনৌবা তাঙ্কক অমগীদমক হরাও-তয়াম্বা ফোঙদোক্লদুনা, চৎথোক-চৎশিন লায়হনবা, মৈ অমসুং ঈশিংগী ফীভম ফগৎহনবা অমসুং অরিবা হেরিতেজ য়োককখৎনবগীদমক শেম-শাবা মরুওইবা প্রোজেক্ত কয়া প্রধান মন্ত্রীনা মীয়ামদা কত্থোকখি। শিংনবনা থল্লবা থবকশিং অসি পাঙথোকখিবা ইঞ্জিনিয়রশিং, শিন্মীশিং, লমদম অদুগী শিন্মীশিং অমসুং বি.আর.ও.গী থৌমীশিংগী মফমদা মহাক্না তৌবীমল খঙবা ফোঙদোকপগা লোয়ননা, জংস্কারদা অনৌবা উন তারকপা মরক্তা লৈবাক্কী ফিরাল পায়রদুনা মীয়াম্না উৎখিবা পুক্নিং থৌগৎপগী শক্তমদুসু মহাক্না নুংঙাইবা ফোঙদোকখি। প্রোজেক্তশিং অসিগীদমক লদাখকী মীয়াম পুম্নমক্তা ঐহাক্না থম্মোয় শেংনা য়াইফ-পাউজেল পীজরি,” হায়না শ্রী মোদীনা ফোঙদোকখি।

লেহদা কুশোক বকুলা রিনপোচে এয়রপোর্ত তর্মিনেলগী উরেপ-উয়ুং মহাক্না হান্না তমখিবা অদুবু নীংশিংলদুনা, ফ্লাইত কেপাসিতী শরুক অহুম হেনগৎহল্লবা অমসুং চহিগী ওইবা পেসেঞ্জর হেন্দলিং লাখ ১০ দগী লাখ ৩৫ দা হেনগৎহল্লবা লুপা করোর ৬৫০ গী ফেসিলিতী অসি মীয়ামদা কত্থোকপদা প্রধান মন্ত্রীনা নুংঙাইবা ফোঙদোকখি। লমদম অসিগী তুরিজমবু মপাঙ্গল কনখৎহনবা অমসুং ইনফ্রাস্ত্রকচরগী চাওখৎপগা ইকোলোজিকেল কেয়রগা খল চান্নহনবগা লোয়ননা, শাথিবা ঈশিং নুংশিৎগী ফীভমগা লোয়ননা সোলার ইনর্জী শীজিন্নদুনা জিওথর্মেল হীতিং য়াওবা ভারতকী অহানবা তর্মিনেলনি হায়বসু মহাক্না পনখি। “ঐখোয়না হোৎনরিবা অসি লমদম অদুগী অকোয়বগী ফীভমবু মপুং ফানা চেকশিন্না থম্বগা লোয়ননা লদাখতা মতমগা চুনবা ইনফ্রাস্ত্রকচর চাওখৎহন্নবনি,” হায়না শ্রী মোদীনা ফোঙদোকখি।

লমদম অসিগী কনেক্তিবিতীগী স্ত্রেতেজিক অমসুং শেল-থুমগী কান্নবশিং পল্লদুনা, চৎথোক-চৎশিনগী মতম পুং ১২ দগী পুং ৩ খক্তদা হন্থহল্লে হায়নসু ফোঙদোক্লদুনা, লুপা করোর ২,৫০০ গী নিম্মু-পদুম-দর্চা লম্বী অসি প্রধান মন্ত্রীনা মীয়ামদা কত্থোকখি। চৎথোক-চৎশিন তৌবশিংগী মতম মাঙহন্দবগী মথক্তা, মরুওইবা লম্বী অসিনা লমদম অদুগী ললোন-ইতিক্তা চাউনা মপাঙ্গল কনখৎহনগনি হায়বসু মহাক্না ফোঙদোকখি। “লম্বী অসিনা ললোন-ইতিক অমসুং বিজিনেসতসু য়াম্না মতেং পাংগনি,” হায়না শ্রী মোদীনা পনখি।

শ্রীনগর-লেহ ত্রান্সমিসন লাইন হান্না মীয়ামদা কত্থোকখিবা অদুগী মথক্তা, পুগা ভেলীদা হৌজিক চত্থরিবা মোদর্ন পাৱর পুথোকপগী থৌরাং কয়া পনবগা লোয়ননা, প্রধান মন্ত্রীনা হনু হাইদ্রোইলেক্ত্রিক প্রোজেক্ত অমসুং মসিবু শম্নহল্লিবা ত্রান্সমিসন নেতৱার্ক মীয়ামদা কত্থোকখি। মহাক্না শন্দোক্না তাক্লদুনা হায়খি মদুদি থাজবা য়াবা মৈ ফংহন্বনা য়ুমশিংদা মঙাল পীবগা লোয়ননা অঙাংশিংগী মহৈ-মশিং তম্বা, হকশেলগী সর্বিস ফংহনবা অমসুং অপীকপা ললোন-ইতিকশিংদা মপাঙ্গল হাপ্তুনা খুঙ্গংগী পুন্সিদা অহোংবা পুরক্কনি। “সেক্তর খুদিংমক মসিনা কান্নবা ফংহনগনি,” হায়না শ্রী মোদীনা ফোঙদোকখি।

অৱাংবা চিংগী লমদম অসি শিনবা থুংনা লৌউ-শিংউগী ফিভম চাওখৎহনবা অমসুং ঈশিং য়োকশিনবদা পুক্নিং ঙলদুনা, প্রধান মন্ত্রীনা প্রোজেক্ত অমৃৎ হিম সরোবরগী মখাদা অনৌবা ওইনা শাখিবা রিজার্ভর ৪০ লমদম অদুগী মীয়ামদা কত্থোকখি। মহাক্না ফোঙদোকখি মদুদি ঈশিং তুংফমশিং অসি মহৈ-মরোং থাবগী মরুওইবা মতমশিংদা লৌউ-শিংউগী শেল-থুমগী ফিভমদা মতেং পাংনবগীদমক শেম্লবনি। “মসিগা মরী লৈননা মথৌ তাবা মতমদা লৌমীশিংদা ঈথৈ-লৌখোংগী ঈশিং ফংহনবদা মতেং পাংগনি,” হায়না শ্রী মোদীনা পনখি।

২০১৯ দা লদাখ অসি য়ুনিয়ন তেরিতোরী অমা ওইরকপদগী হৌনা শেমগৎলকখিবা পাক-চাউরবা ইনফ্রাস্ত্রকচরগী কান্নবশিংগী মতাঙদা প্রধান মন্ত্রীনা ময়েক শেংনা ফোঙদোকখি। লম্বী-থোংগী নেতৱার্ক অসি কিলোমিতর ১,৮০০ দগী কিলোমিতর ৪,০০০ হেনবদা পাকথোক-চাউথোক্লে, মরুওইবা থোংশিং অসি ১৯ দগী ৭৫ রোমদা হেনগৎলে, হেলিপেদ মশিং ৭ তগী ৪০ হেনবদা হেনগৎলে, তোতি ঈশিং ফংহনবগী কভরেজ অসি অপুনবা ইমুংশিংগী চাদা ৩.৫ দগী চাদা ৯৯ রোম ফাওবা হেনগৎখ্রে, হোস্পিতালগী ফমুংশিং শরুক অনি হেনগৎলে, অমসুং চত্থরিবা জোজিলা তনেলনা মতম পুম্নমক্তা লৈবাক অসিগী অতৈ মফমশিংগা শম্নহনগনি হায়না মহাক্না পনখি। “ঙসিদি, কেন্দ্র লৈঙাক্কী মফমদা লদাখ চাওখৎহনবা অসি খ্বায়দগী মাঙজিল থাবা প্রাইওরিতী অমনি,” হায়না শ্রী মোদীনা ফোঙদোকখি।

লমদম অসিগী চাওখৎ-থৌরাংগী অনৌবা লম্বীশিং হাংদোক্নবা মীৎয়েঙ থম্লিবশিং ফোঙদোক্লদুনা, তেরিতোরী অসি শিনবা থুংনা নিংথমথা অমসুং এদভেঞ্চর তুরিজমবু মপাঙ্গল কন্না য়োকখৎপগী মতাঙদা প্রধান মন্ত্রীনা পনখি। মহাক্না মখা তানা ফোঙদোকখি মদুদি ভারতকী য়াম্না মরুওইবা শেল-থুমগী থবক-থৌরমশিং পুক্নিং থৌগৎনবগীদমক হৌজিক ভাইব্রেন্ত ভিলেজেস প্রোগ্রামগী মখাদা ঙমখৈগী খুঙ্গং ৪০ হেন্না ফগৎহল্লি। “মসিনা য়াম্না লাপ্না লৈবা খুঙ্গংশিংদসু থবক ফংবগী খুদোংচাবশিং শেম্লি,” হায়না শ্রী মোদীনা পনখি।

হোসপিতালিতী অমসুং মতমগা চুনবা লৌউ-শিংউগী থৌওং খোঙজেল য়াঙনা পাকথোক-চাউথোরকপগী মতাঙদা পল্লদুনা, মফম অদুগী হোমস্তেশিংগী মশিং ১৫০ রোমদগী ৩,০০০ দা শরুক কয়া হেনগৎলে হায়না প্রধান মন্ত্রীনা ফোঙদোকখি। মহাক্না প্রোতেক্তেদ কাল্তিভেসনবু লেপ্পা লৈতনা য়োকখৎপগী ৱাফমসু পনখি, অমসুং মসিনা লমদম অসি শিনবা থুংনা চলাইরিবা গ্রীনহাউস মশিং ১১,০০০ শুহল্লে হায়খি। “মসিগা মরী লৈননা লৌমীশিংগী শেন্থোক হেনগৎহন্নবগী অনৌবা ওইথোকপা য়াবশিং শেম্লে,” হায়না শ্রী মোদীনা ফোঙদোকখি।

ৱায়েলগী খুদোংচাবশিং নক্না ফংহন্নবা লমদম অসিনা কুইনা তান্দুনা লাক্লিবা ৱাফম অমবু য়েংশিল্লদুনা, চহিসিগী ওগস্ত থাদা লৈঙাক্না লদাখকীদমক হায় কোর্ত বেঞ্চ অমা শেমগৎপদা ওফিসিএল ওইনা অয়াবা পীখ্রে হায়না প্রধান মন্ত্রীনা লাউথোকখি। মরুওইবা ইন্সতিত্যুসনেলগী মথৌ তাবা অসি মপুং ফাহন্নবা মীয়ামগীদমক লৈঙাক্লোন অমসুং আইনগী পাম্বৈ পুম্নমক শেম-শাদুনা চত্থহনগনি হায়না মহাক্না ফোঙদোকখি। “মসিনা এদমিনিস্ত্রেসনগা লোয়ননা ৱায়েল পথাপ অসি লায়না ফংহনবা ঙমহনগনি,” হায়না শ্রী মোদীনা ফোঙদোকখি।

হোতেলশিং, রেস্তোরেন্তশিং, হোমস্তেশিং অমসুং মফম অদুগী খুৎহৈবগী থবকশিংগীদমক মতমগা চুনবা ললোন-ইতিক চলাইবদা দিজিতেল কনেক্তিবিতীগী থৌদাং অদুবু পল্লদুনা, তেরিতোরী অসিগী য়াম্না লাপ্না লৈবা মফমশিংদা ভারতনেত অমসুং হায়-স্পীদ ইন্তরনেত পাকথোক-চাউথোকহনবগী মতাঙদা প্রধান মন্ত্রীনা মচা খায়না ফোঙদোকখি। মহাক্না শন্দোক্না তাক্লদুনা হায়খি মদুদি ই-গভর্নেন্স, নহারোলশিংগী ওনলাইন মহৈ-মশিং তম্বা অমসুং লমদম অদুগী ওন্ত্রপ্রিন্যুরশিং অয়েৎ অপন লৈতনা মালেমগী কৈথেলগা শম্নহনবা ঙম্নবগীদমক লেপ্পা লৈতনা হোৎনরি। “ঙসি ওনলাইন বিজিনেসনা শেন্থোক লাক্নবগী অনৌবা লম্বীশিং হাংদোক্লি,” হায়না শ্রী মোদীনা পনখি।

নহারোলশিংনা অতোপ্পা সহরশিংদা তাংদুনা চৎহন্দনবগীদমক অনৌবা মীরোলগী মহৈ-মশিংগী মপাঙ্গল হাপ্পদা মাঙজিল থারদুনা, আই.আই.তি. জম্মু অমসুং আই.আই.এম. জম্মুগী সেতলাইত কেম্পসশিং শেমগৎনবগী প্রপোজলশিং মাঙলোমদা চঙশিনবগা লোয়ননা প্রধান মন্ত্রীনা লেহদা অচৌবা সেন্তর ওফ এক্সেলেন্স অমা শাগৎপগী ৱাফম ফোঙদোকখি। মহাক্না ফোঙদোকখি মদুদি অচৌবা ইন্সতিত্যুসনশিং অসিনা লমদম অদুগী মহৈরোইশিংদা মখোয়গী য়ুমথোংদা খুমাঙ চাওশিল্লবা থিজিন-হুমজিনবগী খুদোংচাবা অমসুং মোদর্ন তেক্নোলোজী স্কিলশিং পীনবা শেম-শাগনি। “লদাখকী নহারোলশিংনা মখোয়গী মশাগী লমদম অসিদা অৱাংবা থাক্কী মহৈ-মশিং তম্বা, থিজিনবা অমসুং অনৌবা স্কিলশিংগী তম্নবগী হেন্না ফবা খুদোংচাবশিং ফংবা ঙম্লগনি,” হায়না শ্রী মোদীনা ফোঙদোকখি।

লমদম অসিগী নহারোলশিংনা আইস হোকী, নিংথমথাগী মশান্নশিং অমসুং চীং কাবদা শেমগৎলক্লিবা তোপ-তোপ্পা শান্ন-খোৎনবগী শক্তম অদু শকখঙলদুনা, লমদম অসিগী হৈথোই-শিংথোইবশিংবু য়োকখৎনবা লদাখকী অনৌবা শান্ন-খোৎনবগী পোলিসী চৎনহনববু প্রধান মন্ত্রীনা তরাম্না ওকখি। লমদম অসিগী শান্নরোয়শিংনা মালেমগী থাক্তা হেন্না ফবা পর্ফোর্মেন্স উৎপা ঙম্নবা মালেমগী থাক্কী ত্রেনিংগী খুদোংচাবশিং পীনবা এদমিনিস্ত্রেসন্না লেপ্লিবা ৱাফম অদু মহাক্না অমুক হন্না ফোঙদোকখি। “লমদম অসিগী নহারোলশিংনা লৈবাক্কী অমসুং মালেমগী থাকশিংদা হেন্না ৱাংবা থাক্তা য়ৌবা ঙম্নবগীদমক মখোয়দা হেন্না ফবা ত্রেনিং অমসুং খুদোংচাবশিং ফংহন্নবা ঐখোয়না হোৎনরি,” হায়না শ্রী মোদীনা ফোঙদোকখি।

লমদম অদুগী মখুৎ মশা হৈবা মীওইশিং অমসুং লৌমীশিংগী তোপ-তোপ্পা খুৎ-হৈবগী মতৌ অদুবু থাগৎলদুনা, জর্মনগী চান্সেলর, স্বীদেনগী প্রাইম মিনিস্তর অমসুং কিরগিজস্তানগী প্রেসিদেন্ততা খুদোল ওইনা পীখিবা য়াওনা লদাখকী পোত্থোকশিং মহাক্না তোয়না খুদোল ওইনা পীবগী মতাংদা প্রধান মন্ত্রীনা পাউদমখি, লোয়ননা সী-বকথোর্ন, খুৎশা-হৈবগী পোৎলমশিং, জি.আই-তেগ তৌরবা চুমব্রৈ, অৱাংবা চীংদা ললোন-ইতিক্কীদমক থারিবা লৈশিং, অমসুং চাংপা কাঙলুপনা শাবা হান্নদগী চৎনরকপা পশমিনা অসিনা চাউনা ললোন-ইতিক্কীদমক কান্নগদবা খুদোংচাবশিং মহাক্না পনখি। লৈঙাক্না পশমিনাগী মালেমগী ওইবা মশকবু মপাঙ্গল কনখৎহল্লি অমসুং লমদম অসিগী পোৎলমশিংগী কৈথেলগী ব্রান্দ শেমগৎপদা পাকথোক-চাউথোকহল্লি হায়নসু মহাক্না ফোঙদোকখি। “মফম অসিগী পোত্থোকশিং অনৌবা কৈথেলশিংদা ফংহনবা, হেন্না ফবা ব্রান্দ শেমগৎপা, অমসুং মসিগী কান্নবশিং অসিনা পোত্থোক পুথোক্লিবশিংগী মফমদা হকথেংননা য়ৌহনবা ঙম্নবনি ঐখোয়গী হোৎনরিবা অসি!” হায়না শ্রী মোদীনা ফোঙদোকখি।

অরিবা মোনাস্ত্রীশিংগী মমল য়াম্লবা নাৎকী হেরিতেজ, বৌদ্ধ চৎনবীশিং অমসুং ইকায়খুম্নজরবা কুশোক বকুলা রিনপোচেনা ইথিল পীরিবা কুহ্মৈশিংবু ইকায়খুম্নবা উৎলদুনা, পুৱারীগী ওইবা নুংদা হকপশিং ঙাক-শেন্নবগীদমক প্রধান মন্ত্রীনা ভারতকী অহানবা পেত্রোগ্লিফ কনজার্ভেসন পার্ক লেহদা মীয়ামদা কত্থোকখি। মহাক্না ফোঙদোকখি মদুদি হেরিতেজ অসি য়োকখৎপনা তুংগী মীরোলশিং লোয়ননা মালেমগী চৎথোক-চৎশিন তৌবশিংদা লমদম অসিগী কুইরবা পুৱারীগা থম্মোয় শেংনা শম্নহনবা ঙমহনগনি। “লৈবাক অসিদগী অমসুং মালেমদগী লাকপা মীয়াম্নসু লদাখকী ইনাক খুল্লবা পুৱারীবু হেন্না খঙবা ঙমহনগনি,” হায়না শ্রী মোদীনা ফোঙদোকখি।

তেরিতোরী অসিগী চাওখৎ-খোঙথাংগী মতাঙদা থম্মোয় শেংনা থাজবা থম্বগা লোয়ননা মহাক্কী ৱারোল লোইশিল্লদুনা, লমদম অসিবু মমাঙদা অমুক্তা ওইখিদ্রিবা চাওখৎপগী মায়কৈশিংদা পুখৎনবগীদমক অমত্তা ওইনা হোৎনমিন্নবদা মহাক্না থম্লিবা থাজবা অদু প্রধান মন্ত্রীনা অমুক হন্না ফোঙদোকখি। অনৌবা ওইনা হৌদোকখিবা ইনফ্রাস্ত্রকচরগী থবকশিংগীদমক মহাক্না লৈবাক মীয়ামদা মহাক্কী য়াইফ-পাউজেল অমসুং চৎনবীগী ওইবা ইকায়খুম্নবা উৎখি। “ঐখোয় পুম্নমক পুনশিন্দুনা লদাখপু চাওখৎপগী অনৌবা অৱাংবা থাকশিংদা পুরক্কনি,” হায়না শ্রী মোদীনা ফোঙদোকখি।

A big day for Ladakh! Projects worth around Rs. 3,350 crore are set to give the region's development fresh momentum. https://t.co/ADbqwCGmiS

— Narendra Modi (@narendramodi) October 15, 2026

आज लद्दाख में कई अहम development projects का लोकार्पण हुआ है। इन परियोजनाओं से कहीं लोगों का सफर आसान होगा, कहीं बिजली की सुविधाएं बेहतर होंगी, कहीं पानी की उपलब्धता बढ़ेगी और हमारी प्राचीन विरासत के संरक्षण को भी नई ताकत मिलेगी: PM @narendramodi

— PMO India (@PMOIndia) October 15, 2026

हमारा विशेष ध्यान लद्दाख की नई पीढ़ी पर है। यहां के युवाओं को अच्छी शिक्षा मिले, नई technology सीखने का अवसर मिले और उन्हें दूसरे शहरों पर निर्भर न रहना पड़े। लेह में इसलिए एक बड़ा centre of excellence बन रहा है: PM @narendramodi

— PMO India (@PMOIndia) October 15, 2026

लद्दाख में नई sports policy के माध्यम से खेल प्रतिभाओं को आगे बढ़ाने का प्रयास किया जा रहा है। हमारा प्रयास है कि यहां के युवाओं को बेहतर training और सुविधाएं मिलें और वो राष्ट्रीय तथा अंतरराष्ट्रीय स्तर पर नई उपलब्धियां हासिल करें: PM @narendramodi

— PMO India (@PMOIndia) October 15, 2026

*****