امور داخلہ اور امداد باہمی کے مرکزی وزیر جناب امت شاہ نے آج جاری ’سیوا سنکلپ ابھیان‘ کے تحت معذور افراد، بشمول نکسل تشدد سے متاثرہ افراد، میں معاون آلات تقسیم کرنے کی تقریب سے ویڈیو کانفرنسنگ کے ذریعے خطاب کیا۔ یہ مہم وزیر اعظم جناب نریندر مودی کے سیوا اور سمرپن کے  25 سال مکمل ہونے  کے  موقع پر منعقد کی جا رہی ہے۔

اجتماع سے خطاب کرتے ہوئے امور داخلہ اور امداد باہمی کے مرکزی وزیر جناب امت شاہ نے کہا کہ آج ’سیوا سنکلپ ابھیان‘ کے حصے کے طور پر معذور افراد کی خدمت کے لیے خصوصی کیمپ کے دوسرے مرحلے کا آغاز کیا جا رہا ہے۔ وزیر اعظم جناب نریندر مودی کی پہلے ایک ریاست کے وزیر اعلیٰ اور اس کے بعد ہندوستان کے وزیر اعظم کی حیثیت سے ’سیوا‘ اور ’سمَرپن‘ کے 25 سال مکمل ہونے کے موقع پر ملک بھر میں اس مہم کے تحت مختلف اقدامات کیے جا رہے ہیں۔ اس مہم کے تحت چھتیس گڑھ میں نکسل تشدد کے نتیجے میں متاثر ہونے والے قبائلی معذور افراد کی زندگی آسان بنانے کے لیے مصنوعی اعضا اور دیگر معاون آلات فراہم کیے جا رہے ہیں۔

جناب امت شاہ نے کہا کہ یہ پروگرام 5 سے 7 اکتوبر 2026 تک جگدل پور میں منعقد کیا گیا تھا، جس سے 3,600 سے زیادہ معذور افراد کو فائدہ پہنچا۔ ان میں صرف بستر کے 1,570 سے زیادہ مستفیدین شامل تھے، جو اس خطے میں لوگوں کی تکالیف کی شدت کو ظاہر کرتا ہے۔ انہوں نے کہا کہ نکسلزم کے پانچ دہائیوں کے دور نے بستر کی غریب قبائلی برادریوں کو بے پناہ تکالیف پہنچائی ہیں۔ انہوں نے کہا کہ سیاسی مقاصد کے حصول کے لیے آئی ای ڈی دھماکوں کے ذریعے معصوم شہریوں کو معذور بنانا انسانی حقوق کی سنگین ترین خلاف ورزی ہے۔ جناب شاہ نے کہا کہ مودی حکومت 31 مارچ 2026 سے پہلے پورے ملک سے نکسلزم کے خاتمے کے لیے پوری طرح پُرعزم تھی اور اب نکسلزم کا خاتمہ ہو چکا ہے۔ تاہم، انہوں نے اس بات پر زور دیا کہ صرف نکسلزم کے خاتمے سے پانچ دہائیوں کی تکالیف ختم نہیں ہو جائیں گی۔ ہمیں ان تکالیف سے لگنے والے زخموں پر مرہم رکھنا ہوگا، متاثرین کو دوبارہ اپنے پیروں پر کھڑا ہونے میں مدد دینی ہوگی اور یہ یقینی بنانا ہوگا کہ وہ عزت و وقار کے ساتھ زندگی گزار سکیں۔

مرکزی وزیر داخلہ نے کہا کہ چھتیس گڑھ حکومت، ضلعی انتظامیہ، ریاست کے سماجی بہبود کا  محکمہ، بھگوان مہاویر وِکلانگ سہایتا سمیتی، جے پور، بھارتیہ جین سنگھٹن  اور کئی دیگر ادارے اس نیک کام میں تعاون کر رہے ہیں۔ انہوں نے کہا کہ مودی حکومت ہر معذور شخص اور ہر متاثرہ فرد کو بازآبادکاری کا موقع فراہم کرنے کے لیے پُرعزم ہے۔ انہوں نے مزید کہا کہ  حکومت ہند  ان کوششوں میں چھتیس گڑھ حکومت کے ساتھ مضبوطی سے کھڑی ہے۔ جناب امت شاہ نے کہا کہ نکسلزم کے ہر نشان کو مٹانا اور بستر کو ایک بار پھر ایک سرگرم اور خوشحال خطہ بنانا ضروری ہے۔ انہوں نے کہا کہ اس سمت میں پہلے ہی اہم کام کیا جا چکا ہے اور بستر کے علاقے میں قبائلی روایتی قیادت نے بھی نمایاں تعاون دیا ہے۔ معذور افراد کو وہیل چیئر، ٹرائی سائیکل، بیساکھیاں، سماعت کے آلات، اسمارٹ چھڑیاں، مصنوعی اعضا اور دیگر معاون آلات فراہم کرکے حکومت بستر میں امید اور خوشی کے ایک نئے دور کی شروعات میں مدد کر سکتی ہے۔

جناب امت شاہ نے کہا کہ چھتیس گڑھ حکومت نے تشدد سے متاثرہ بستر کو ایک بار پھر سرگرم اور خوشحال خطہ بنانے کے لیے بستر اولمپکس، بستر پندوم، نیاد نیلانار اور وزیر اعلیٰ اجتماعی بس اسکیم سمیت کئی اقدامات کیے ہیں۔ انہوں نے کہا کہ بستر میں جہاں کبھی گولیوں اور بم دھماکوں کی آوازوں سے خوف کا ماحول پیدا ہوتا تھا، آج وہاں ہزاروں نوجوان کھیلوں میں حصہ لے رہے ہیں اور اپنی روایات کو زندہ رکھے ہوئے ہیں۔ انہوں نے کہا کہ جس خطے میں کبھی گولیوں اور بم دھماکوں کی آوازیں گونجتی تھیں اور خوف عام تھا، وہاں آج ہزاروں نوجوان کھیلوں میں حصہ لے رہے ہیں اور اپنی روایات کو برقرار رکھے ہوئے ہیں۔ انہوں نے کہا کہ بستر پندوم قبائلی فن اور ثقافت کو دوبارہ زندہ کرنے کی ایک اہم پہل ثابت ہوا ہے۔ نیاد نیلانار اسکیم کے تحت بنیادی ڈھانچے کو وسعت دینے اور بستر تک ضروری خدمات پہنچانے کے لیے بھی نمایاں کوششیں کی گئی ہیں، جو اپوزیشن حکومتوں کے دور میں پانچ دہائیوں تک ان سہولتوں سے محروم رہا تھا۔

مرکزی وزیر داخلہ اورامدادباہمی کے وزیر نے کہا کہ تقریباً 8,526 نکسلیوں نے خودسپردگی کی ہے۔ ان میں سے 7,328 افراد کے بینک کھاتے کھولے گئے ہیں، جن کے پہلے بینک کھاتے نہیں تھے۔ مجموعی طور پر 1,620 افراد کو انعامی رقم دی گئی ہے، 7,882 افراد کو مراعات فراہم کی گئی ہیں، 455 افراد کو ملازمتیں دی گئی ہیں اور 129 افراد کو زمین الاٹ کی گئی ہے۔ اس کے علاوہ، پردھان منتری آواس یوجنا کے تحت 4,014 مستفیدین کو مکانات فراہم کیے گئے ہیں اور 2,308 سے زیادہ قبائلی افراد کو ہنرمندی کی تربیت دی گئی ہے۔ انہوں نے مزید بتایا کہ 6,763 نئے راشن کارڈ جاری کیے گئے ہیں، 2,808  کنبوں کو مفت بجلی فراہم کی گئی ہے اور سڑکوں کے 372 نئے منصوبوں پر کام شروع ہو چکا ہے۔ 670 چھوٹے پلوں کی تعمیر جاری ہے، 48,526 افراد کے آدھار کارڈ بنائے گئے ہیں اور’الواد پنچایت ایوارڈز‘ کے تحت  44 گرام پنچایتوں کو سلیم کیا گیا ہے۔

جناب امت شاہ نے کہا کہ 500 سے زیادہ سکیورٹی کیمپ قائم کیے گئے ہیں، جن میں سے 200 سے زیادہ کو ’شہید ویر گنڈادھر سیوا ڈیرا‘ میں تبدیل کیا جائے گا۔ حکومت  ہند اور چھتیس گڑھ حکومت کے افسران اب انہی کیمپوں سے کام کریں گے جہاں کبھی سکیورٹی اہلکار لوگوں کی حفاظت کے لیے تعینات رہتے تھے۔ اس طرح ترقی یافتہ بستر کی بنیاد رکھی جائے گی۔ انہوں نے کہا کہ یہ عوامی خدمت کے مراکز حکومت کے ترقی یافتہ بستر کے وژن  کو حقیقت میں بدلنے میں مددگار ثابت ہوں گے۔

****

ش ح۔ م ع۔ خ م

U.NO.6157