প্ৰতিৰক্ষা মন্ত্ৰী শ্ৰী ৰাজনাথ সিঙে জাপানত সদ্যসমাপ্ত এছিয়ান গেমছত ৬টা স্বৰ্ণ, ১১টা ৰূপ আৰু ১০টা ব্ৰঞ্জৰ পদক সহ ২৭ টা পদক লাভ কৰা প্ৰতিৰক্ষা বাহিনীৰ খেলুৱৈসকলক ২০২৬ চনৰ ১২ অক্টোবৰত সম্বৰ্ধনা জনায়। এই আন্তঃৰাষ্ট্ৰীয় ক্ৰীড়া অনুষ্ঠানত প্ৰতিৰক্ষা বাহিনীৰ খেলুৱৈসকলৰ সৰ্বশ্ৰেষ্ঠ প্ৰদৰ্শন উদযাপনৰ বাবে আয়োজিত অনুষ্ঠানত গ্ৰাহক পৰিক্ৰমা, খাদ্য আৰু ৰাজহুৱা বিতৰণ মন্ত্ৰী শ্ৰী প্ৰহ্লাদ যোশীয়েও অংশগ্ৰহণ কৰে। তিনিওটা সেৱাৰ মুঠ ৯২ গৰাকী খেলুৱৈয়ে ১৯ টা শাখাত অংশগ্ৰহণ কৰাৰ লগতে ভাৰতে চতুৰ্থ স্থান লাভ কৰাত গুৰুত্বপূৰ্ণ অৱদান আগবঢ়ায়। সামগ্ৰিকভাৱে ভাৰতীয় দলটোৱে ২১টা স্বৰ্ণ, ২৭টা ৰূপ আৰু ৩৭টা ব্ৰঞ্জ সহ ৮৫ টা পদক লাভ কৰে। নতুন দিল্লীত অনুষ্ঠিত এই অনুষ্ঠানত খেলুৱৈসকলৰ সৈতে মত বিনিময় কৰি প্ৰতিৰক্ষা মন্ত্ৰীগৰাকীয়ে তেওঁলোকৰ সফলতাৰ আঁৰত অনুশাসন, কঠোৰ পৰিশ্ৰম, দলীয় মনোভাৱ আৰু ক্ৰীড়া উৎকৃষ্টতা আছে বুলি মত প্ৰকাশ কৰে। তেওঁ কয় যে পদক জয়ৰ যাত্ৰাত অপৰিসীম নিষ্ঠা, পুৱা সোনকালে কৰা প্ৰশিক্ষণ, জিমত অনুশীলন, আঘাত, আৰোগ্য লাভ আৰু ধাৰাবাহিক প্ৰচেষ্টাৰ প্ৰয়োজন, যাৰ লগতে পৰিয়ালৰ পৰা আঁতৰত থাকি ক্ৰীড়া প্ৰস্তুতিৰ সৈতে নিজৰ কৰ্তব্যৰ ভাৰসাম্য ৰক্ষা কৰিবলগীয়া হয়।

এছিয়ান গেমছত অংশগ্ৰহণ কৰি সফল নোহোৱা খেলুৱৈসকলক সম্বোধন কৰি শ্ৰী ৰাজনাথ সিঙে দৃঢ়তাৰে কয় যে প্ৰকৃত পৰাজয় হৈছে ত্যাগ কৰা। তেওঁ কয় যে প্ৰতিগৰাকী অংশগ্ৰহণকাৰীয়ে দেশ আৰু প্ৰতিৰক্ষা বাহিনীক কিবা নহয় কিবা ধৰণে সন্মান অৰ্জন কৰাত অৰিহণা যোগাইছে। প্ৰতিৰক্ষা বাহিনীৰ খেলুৱৈসকলৰ সামৰ্থ্যৰ ওপৰত আস্থা প্ৰকাশ কৰি তেওঁ কয় যে তেওঁলোকৰ সাফল্যই ভৱিষ্যত প্ৰজন্মক অনুপ্ৰাণিত কৰি থাকিব। প্ৰতিভাশালী খেলুৱৈসকলক চিনাক্ত কৰা, তেওঁলোকৰ সামৰ্থ্যৰ প্ৰতিপালন কৰা, বৈজ্ঞানিক প্ৰশিক্ষণ আৰু বিশ্বমানৰ ক্ৰীড়া সুবিধা প্ৰদান কৰা তথা তেওঁলোকক আন্তঃৰাষ্ট্ৰীয় প্ৰতিযোগিতাৰ বাবে প্ৰস্তুত কৰাৰ ক্ষেত্ৰত মিছন অলিম্পিক উইঙে পালন কৰা গুৰুত্বপূৰ্ণ ভূমিকাৰ ওপৰত প্ৰতিৰক্ষা মন্ত্ৰীয়ে আলোকপাত কৰে। তেওঁ লগতে প্ৰশিক্ষক, সহযোগী কৰ্মচাৰী, ফিজিঅ’থেৰাপিষ্ট, পুষ্টি বিশেষজ্ঞ আৰু খেলুৱৈসকলৰ পৰিয়ালৰ অৱদানক স্বীকাৰ কৰি কয় যে এগৰাকী চেম্পিয়ন কেতিয়াও অকলে গঢ়ি নুঠে। শ্ৰী ৰাজনাথ সিঙে আন্তঃগাঁথনি, আধুনিক প্ৰশিক্ষণ সুবিধা আৰু খেলুৱৈসকলৰ বাবে উন্নত সুযোগৰ ওপৰত নিৰন্তৰ গুৰুত্ব দি ভাৰতৰ ক্ৰীড়া পৰিৱেশ তন্ত্ৰ শক্তিশালী কৰাৰ বাবে প্ৰধানমন্ত্ৰী শ্ৰী নৰেন্দ্ৰ মোদী নেতৃত্বাধীন চৰকাৰৰ প্ৰতিশ্ৰুতি  দোহাৰে। তেওঁ উল্লেখ কৰে যে ইয়াৰ উদ্দেশ্য কেৱল অংশগ্ৰহণ বৃদ্ধি কৰাই নহয়, বিশ্ব ক্ৰীড়া জগতত ভাৰতক এক আগশাৰীৰ শক্তি হিচাপে প্ৰতিষ্ঠা কৰা।

ভাৰতীয় ক্ৰীড়াত প্ৰতিৰক্ষা বাহিনীৰ খেলুৱৈসকলৰ গুৰুত্বপূৰ্ণ অৱদান সন্দৰ্ভত প্ৰতিৰক্ষা মন্ত্ৰীগৰাকীয়ে দৃঢ়তাৰে কয় যে প্ৰতিৰক্ষা বাহিনীয়ে নিৰন্তৰভাৱে খেলুৱৈসকলক কেৱল তেওঁলোকৰ শাৰীৰিক দক্ষতাৰ বাবেই নহয় বৰঞ্চ অনুশাসন, ধৈৰ্য্য, নেতৃত্ব আৰু প্ৰত্যাহ্বানপূৰ্ণ পৰিস্থিতিত তেওঁলোকৰ লক্ষ্যৰ প্ৰতি অটল  স্থিতিৰ বাবেও বিশিষ্ট কৰি তুলিছে। শ্ৰী ৰাজনাথ সিঙে ২০২৮ চনৰ লছ এঞ্জেলেছ অলিম্পিকৰ প্ৰতি এক কেন্দ্ৰীভূত আৰু প্ৰণালীবদ্ধ দৃষ্টিভংগীৰ আহ্বান জনাই প্ৰশিক্ষক আৰু সহায়ক কৰ্মচাৰীসকলক নিষ্ঠা আৰু পেছাদাৰী মনোভাৱৰে খেলুৱৈসকলক পথ প্ৰদৰ্শন অব্যাহত ৰাখিবলৈ আহ্বান জনায়। তেওঁ তেওঁলোকক উচ্চ লক্ষ্য নিৰ্ধাৰণ কৰিবলৈ আৰু ২০২৮ চনৰ লছ এঞ্জেলেছ অলিম্পিকত অধিক উন্নত প্ৰদৰ্শন আগবঢ়াবলৈ আহ্বান জনায়। এই অনুষ্ঠানত সেনা প্ৰধান জেনেৰেল ধীৰাজ শেঠ আৰু অন্যান্য জ্যেষ্ঠ বিষয়াসকল উপস্থিত থাকে।

২০২৬ চনৰ এছিয়ান গেমছত প্ৰতিৰক্ষা বাহিনীৰ খেলুৱৈসকল

প্ৰতিৰক্ষা বাহিনীৰ খেলুৱৈসকলে ভাৰতৰ মুঠ পদকৰ ৩২ শতাংশ আৰু ইয়াৰ স্বৰ্ণ পদকৰ ২৮.৫৭ শতাংশ অৰিহণা যোগায়। উৎকৃষ্ট প্ৰদৰ্শনকাৰীসকলৰ ভিতৰত দুটা স্বৰ্ণ আৰু এটা ৰূপৰ পদক লাভ কৰা নাইব সুবেদাৰ নীৰু ধাণ্ডা অন্যতম । তেওঁ গেমছত ব্যক্তিগত মহিলা ট্ৰেপ ইভেণ্টত স্বৰ্ণ জয় কৰা প্ৰথমগৰাকী ভাৰতীয় মহিলা হিচাপে পৰিগণিত হৈছে। নায়েব সুবেদাৰ গুলবীৰ সিঙে দুটা ৰূপ আৰু এটা ব্ৰঞ্জৰ পদক লাভ কৰি এছিয়ান গেমছৰ এটা সংস্কৰণত তিনিটা ব্যক্তিগত পদক লাভ কৰা প্ৰথমগৰাকী ভাৰতীয় পুৰুষ ট্ৰেক-এণ্ড-ফিল্ড খেলুৱৈ হিচাপে পৰিগণিত হয়। হাবিলদাৰ সাৱান বৰৱালে পুৰুষৰ মাৰাথনত ২:১১:৩৭ ৰ ৰাষ্ট্ৰীয় অভিলেখ সময়ৰ সৈতে ৰূপৰ পদক লাভ কৰি এছিয়ান গেমছৰ মাৰাথন পদকৰ বাবে ভাৰতৰ ৪৪ বছৰৰ অপেক্ষাৰ অন্ত পেলায়। নাইব সুবেদাৰ সৰ্বেশ কুশাৰেও ভাৰতৰ বাবে ৫৬ বছৰৰ ব্যৱধানৰ পাছত পুৰুষৰ হাই জাম্পত এক ঐতিহাসিক পদক লাভ কৰে।

***

SR/Savvy/DD