তামিল নাদুগী রাজ্যপাল শ্রী রজেন্দ্র অরলেকার জি, দোক্তর এল. মুরুগান জি, তিরু রাজমোহন জি, তিরু নাইনার নগেন্দ্রন জি, দোক্তর গিরিজা সেসাদ্রি অম্মা জি, তিরু আর.আর. গোপাল জি, ঐগী নহা ওইরিবা মরুপশিং, ওজাশিং অমসুং মপা-মপাশিং- ঐগী তামিলগী ইনাওশিং অমসুং ইচলশিং-খুরুমজরি।

মরুপশিং,

ঙসি, নবরাত্রিগী অহানবা নুমিত্ত, সিবা অমসুং শক্তিগী শেংলবা লমদম তামিল নাদুনা লাকপা অসি লাইবক ফবনি অমসুং লৌশিং অমসুং কলাগীদমক কৎথোক্লবা মীওইশিংগা উনবগী খুদোংচাবা অমা ফংবা অসিনা ঐগীদমক অঙকপা অমা ওইনা নবরাত্রি হৌরে। মফম অসিদা তিল্লিবা নহারোলশিংগী থৱায় য়াওবসু ঐনা উবা ফংলে। ঐ শক্তি অমসুং হরাওবা ফাওই। অদোমগী মীৎশিংদা ভারতকী তুংলমচৎকী মমি তাবা ঐনা উরে।

ঐগী ৱারোল হৌদ্রিঙৈদা, ঐ করিগুম্বা অমা হায়গে মদুদি ঐ মিনিত ১০ ঙনখৎনা চেন্নাইদা থুংলখি, থৌরমশিংগী মতম লেপ্পদা খর থেংখি, মরম অদুনা ঐনা মফম অসিদা থেংনা থুংলবনি। ময়াম পুম্নমক্ত খুদোংচাদবা থোকহনবগীদমক ঙাকপীনবা ঐনা হায়জরি।

মরুপশিং,

ঙসিগী নহারোলশিংগী অপাম্বা অসিনা বিকসিত ভারত অমগী শাফু অমা ওইরগনি। বিকসিত ভারত অমগী অনৌবা ৱাখল্লোনশিং অমসুং পাম্বৈশিংনা ঐখোয়গী লৈবাক খক্তগী নত্তনা মালেম শীনবা থুংবগী তুংলমচৎ শেমগনি। ঙসিদি, মালেম্না পাম্বৈশিং থিরি। হায়রিবা পাম্বৈশিং অদু পুথোক্নবা অদোমগী থৌনা লৈরে।

মরুপশিং,

ঙসি ভারত্ত লৈরিবা মপান নাইদ্রবা খুদোংচাবশিংগী কেনভাসতা নহারোল খুদিংমক্না মখোয়গী তুংগী ফিবমগী থাজবা থম্বা ঐনা পাম্মী। মরমদি হৌজিক অসি অদোমগী মতম্নি। মসি অদোমগী মতম্নি, মসি অদোমগী খুদোংচাবনি। ঐখোয়গী মঙলানশিং শোইদনা মঙফাওনগনি হায়না ঐনা থাজৈ। অমতা ওইনা, ঐখোয়না মসি পাংথোক্কনি!

অমতা ওইনা, ঐখোয়না মসি পাংথোক্কনি!

অমতা ওইনা, ঐখোয়না মসি পাংথোক্কনি!

অমতা ওইনা, ঐখোয়না মসি পাংথোক্কনি!

মরুপশিং,

অদোম ময়ামগা উন্নবা ঐনা মফম অসিদা লাকপগী নুংঙাইরবা ৱারি অমা লৈরি। থা খরগী মমাঙদা, নগরকোইলদা ঐগা গিরিজা অম্মাগা উনখি, মদুদা অঙাং খর য়াওখি। লৈবাক্কী তুংগীদমক মহাক্কী কৎথোকপা, মশানা মশাবু থাজবা অমসুং ভক্তি অদুনা ঐ অঙকপা ফাওহনখি। উনবা অদুদা গোল্দন জুব্লি থৌরমদা শরুক য়ানবা মহাক্না ঐঙোন্দা চেপাউ পীরকখি। মহাক্কী মীনুংশি অমসুং পুৱারি ওইরবা মহৈলোয়শঙ অসিদা ঐনা ইকায়খুম্নবা উৎপা ওইনা, থৌরম অসি ঐ শোইদনা শরুক য়াগনি হায়না মতম অদুদা ঐনা ৱারেপ লৌখি। থৌরম অসিদা, বিশ্ব হিন্দু বিদ্যা কেন্দ্র অমসুং চহি ৫০ গী অপুনবা হিন্দু বিদ্যালয় ইমুং-মনুংগী খোঙচৎ অসিদা ঐনা থাগৎপা ফোঙদোকচরি।

মরুপশিং,

ঙসি বিশ্ব হিন্দু বিদ্যা কেন্দ্রগী গোল্দন জুব্লি পাংথোক্লি। খুমাঙচাউশিনবা অসি পুক্নিং থৌগৎনিঙাই ওইরবা খোঙচৎ অমনি। মহৈলোয়শঙ অসি চেন্নাইগী ৱেষ্ট মম্বালামদা ১৯৭৫ দা অপীকপা স্কুল অমা ওইনা হৌদোকখি। মতম অদুদা মহৈরোয় ৭ খক তমখি। অনৌবা খুদোংচাবশিং অমতা লৈতে, বিল্দিং লৈতে অমসুং শেন-থুম খর খক্তনি। অদুবু, পোৎশক অমা খক্তদি য়াম্না মরাংকাইনা লৈখি: অচেৎপা ফিরেপ অমসুং মীয়ামগী থবক তৌনবা নিংহন্নবা লৈতবা থৌনা! মরম অদুনা খুদোংচাদবা কয়া থেংনরবসু মহৈলোয়শঙ অসি মাঙলোমদা চঙশিল্লিবনি। মতমগী মতুংইন্না, অপীকপা থবক অসি মহৈ-মশিংগী অচৌবা ইহৌ অমা ওইরক্লে। ঙসিদি, তামিল নাদুগী তোঙান তোঙানবা মফমশিংদা মহৈলোয়শঙ ১৫ লৈরে।

মরুপশিং,

থৌরম অসিদা, ঐনা শ্রী জয়গোপাল গরোদিয়া জিগী থবকশিং ইকায়খুম্নবা উৎলি। স্কুল বিল্দিং অসি শাবদা মহাক্না মরুওইবা থৌদাং অমা লৌখি। হিন্দু বিদ্যালয়গী খোঙচৎ মাইপাকহনবগীদমক ঐনা ওজাশিং, ষ্টাফ মেম্বরশিং, মমা-মপাশিং অমসুং এলুম্নাই ইকায়খুম্নবা উৎচরি। চহি ৫০ গী কৎথোকপনি। চহি ৫০ গী থবক্নি। নহারোলশিংগী পুন্সি শেমগৎনবা চহি ৫০ নি।

মরুপশিং,

কমদৌনা মহৈলোয়শঙ অমনা লাইরিক তম্বীবগা লোয়ননা মরৈবাক নুংশিবা মীওইশিং পুথোকপা ঙম্বগে হায়বগী খুদম অমা মফম অসিদা লৈরে। কমদৌনা গিরিজা অম্মানা অঙাংশিংদা অনৌবা ৱাখল্লোনশিং ফংহনবগে; অঙাং খুদিংমক নুমিৎ খুদিংগী লুপা ১ তুংশিনগদবনি অমসুং মদু লৈবাক্কী লান্মীশিংদা কৎথোক্কদবনি হায়খিবা অদু ঐগী মন কি বাত থৌরমদা ঐনা ফাওবা পনখি। অঙাং লিশিং কয়ানা থবক অসি পাংথোকপা মতমদা, চাউরাক্না লুপা লাখ ৪০ রোম খোমগৎখি। তশেংনা মসি পুক্নিং থৌগৎনিঙাই ওইরবা খুদম অমনি!

মরুপশিং,

অপীকপা মতেংশিংনা অচৌবা থবক অমা পাংথোকপা ঙম্মী। অপীকপা থবক অমা ফাওবনা অচৌবা কান্নবা অমা পীবা ঙম্মী। মসি অমাং-অতা অমা থোকপদা লায়রবশিংগী মতেং পাংবা নত্ত্রগা লু-নানবগী থবকশিং ওইবা য়াই, হায়রিবা গুনশিং অসি হিন্দু বিদ্যালয় ইমুং-মনুংগী মমাংঙৈদগী পাংথোক্তুনা লাক্লবা থবক্নি।

মরুপশিং,

থৌরম অসিদা, শক্নাইরবা সাধু তিরুবাল্লুবার নিংশিংবা ঐনা পাম্মী। মহাক্কী পাউতাকশিং মহৈরোয় অদোম ময়ামগী য়াম্না মরুওই। হন্দক, ঐনা রুসিয়াগী রাষ্ট্রপতিদা রুসিয়ান্দা হন্দোকপা ‘তিরুক্কুরাল’ অমা পীখ্রে। মখোয়গী পুন্সিদা  করিগুম্বা অনৌবা খর তম্নিংবা কনাগুম্বা মীওই অমদা ‘তিরুক্কুরাল’ লমজিংলি। মহাক্কী মমিং চৎলবা “কুরাল” ৱাহৈ পরেংশিংদা, করিগুম্বা খর তম্বা খক নত্তনা মদু ঐখোয়গী পুন্সিগা মরী লৈনহনবা অসি তঙাইফদে হায়না তিরুবাল্লুবারনা ঐখোয়দা তম্বীখি। মসি অদোম মহৈরোয়শিংগীসু মরুওইবা পারা অমনি।

মরুপশিং,

অদোম মহাকবি ভারতিয়ারগী লাইরিক মপুংফানা পারম্লগনি। মহাক্কী পুন্সিদা কাসি সহরনা য়াম্না মরুওইবা থৌদাং অমা লৌখি। অধ্যাতিক অমসুং লৈবাক অসি মিকপ থোকপনা থনখিবা কাসিগী ফিবম অসিদা মহাক্কী ৱাখল্লোন্না অকনবা ইথিল অমা পীখি।

মরুপশিং,

ঐ কাসিগী এম.পি অমনি। ঙসি ফাওবা, কাসিগী মীয়াম্না মহাকবি ভারতিয়ার নিংশিংলি। মহাক্কী ৱাহৈশিং, “অচামিল্লাই, অচামিল্লাই” (অকিবা লৈতে, অকিবা লৈতে) না অকিবা য়াওদনা হিংনবা ঐখোয়দা ইথিল পীরি। মরম অদুনা মফম অসিদা তিল্লিবা নহারোলশিংদা ঐনা হায়নিংবদি: অকিবা য়াওদনা নশামক্ত খুদোংচাবা অমা পীয়ু। অদোমগী অনৌবা ৱাখলশিংদা থবক পাংথোকউ। অচৌবা মঙ মঙউ। তোখায়না খল্লু। অমসুং অকিবা লৈগনু।

মরুপশিং,

ঐনা ভারতকী তোঙান তোঙানবা মফমশিংদা চৎখিবা অমসুং ঐনা মফম অদুগী মীয়ামগা উনবদগী খঙলকখিবা অদুনা ঐনা ভারত মশক খঙবা ঙমখিবনি। ১৯৯০ গী অঙনবা শরুক্ত, ঐ কন্যাকুমারিদগী কাস্মির ফাওবগী এক্ত যাত্র শরুক য়াখি। খোঙচৎ অদুদা ঐনা অহানবা ওইনা গিরিজা অম্মাগা থেংনখি। মতম অদুদগী হৌনা, ঐখোয় মখা তানা পুন্দুনা লাক্লি।

মরুপশিং,

ঐগী খোঙচৎশিং অদুনা ভারতকী খেন্নবশিং মশক খঙনবা ঐঙোন্দা খুদোংচাবা পীখি। থেংনরকপশিং অদুদগী ঐনা তামিল লোল অমসুং তামিলগী নাৎ খঙনবা ঐঙোন্দা খুদোংচাবা পীখি।

মরুপশিং,

মরম অদুনা ভারত মশক খঙদোক্নবা ঐনা অদোমগী পুক্নিং থৌগৎলিবনি। অদোম্না চৎপা মফম খুদিংমক্ত, অদোমগা লোয়ননা তামিলগী চৎনবী পুগদবনি। অদোমগী মরুপশিংদা তামিলগী শৈরেং, ৱারিশিং অমসুং চৎনবীশিং লিগদবনি। অদোম ইশাদগী তোঙানবা মীওইশিংগা মরুপ ওইগদবনি। অদোম্না শেম্লিবা মরুপশিং অদুআন ঐখোয়গী লৈবাক্কী অপুনবগী শক্তম শেমগৎলি।

মরুপশিং,

ঙসিগী অনৌবা মীরোলশিংনা মখোয়গী মঙলানশিং মঙফাওনবা ঙম্নবা মমাঙদা অমুক্ত ফংখিদ্রিবা খুদোংচাবশিং ফংলি। ঙসি লৈবাক অসিদা কমদৌনা লাইরিক-লাইশুগী থবকশিং অহোংবা লৈরবগে হায়বা য়েংসি। ২০১৪ দা, ভারতকী য়ুনিভর্সিতি ৭৫০ রোম লৈখি। ঙসিদি ‌১,৩০০ হেন্না লৈরে। কোলেজ মশিং ৩৮,০০০ দগী ৫২,০০০ দা হেনগৎলে। চহি খর অসিদা, লৈবাক অসিদা অনৌবা আই.আই.তিশিং, আই.আই.এমশিং, আই.আই.আই.তিশিং অমসুং এ.আই.আই.এম.এসশিং লৈরে।

মরুপশিং,

ঙসিদি, অনৌবা ইজুকেসন পোলিসনা লৈবাক অসিদা মগুন লৈবা লাইরিক-লাইশুগী থবক হেনগৎহল্লে। ভারতকী মহৈলোয়শঙশিং মালেম্না মশক খঙবা মখা তানা হেনগৎলক্লি। ২০১৫ গী ক্বিউ.এস রেঙ্কিংসদা ভারতকী য়ুনিভর্সিতি ১৪ খক য়াওখি। খ্বাইদগী নৌবা রেঙ্কিংদা য়ুনিভর্সিতি ৫২ য়াওরে। মশিংশিং অসিনা করি তাক্লি হায়বা নাখৈ শেংলে। মহৈলোয়শঙ মশি য়াম্না লৈরে। অপাম্বা য়াম্না খনবা য়ারে। অদোমগী খুদোংচাবশিং মরাংকাইরে। 

মরুপশিং,

নহারোল খুদিংমক তোঙানবা মঙালানশিং অমসুং তোঙানবা হৈথোই-শিংথোইবশিং লৈরি। খুদম ওইনা, অদোম অয়াম্বা শান্নবনা অদোমগী শীনফম অমা ওইনবা খল্লমগনি। মরম অদুনা, লৈবাক অসিনা শান্নবা অসি হরাও-কুহ্মৈ খক্তগী ওইনা লৌদ্রে। মরম অদদুনা ঙসিদি ভারত শীনবা থুংনা শান্নবগী অনৌবা খুদোংচাবশিং শেমগৎলি। নহা ওইরিবা শান্নরোয়শিং ফজনা ত্রেনিং পীরে অমসুং মতেং পাংলে। মালেমগী শান্নবগী লমদা ভারতকী ফিবমসু ফগৎলক্লি।

মরুপশিং,

ভারতনা ২০৩০ কম্মনৱেল্থ গেমস য়ুম্বু ওইনবা শেম-শারি। ২০৩৬ ওলেম্পিক্স য়ুম্বু ওইনবসু মঙ মঙবগা লোয়ননা ঐখোয় মাঙলোমদা চঙশিল্লি। লাক্লিবা চহিশিংদা, ভারত্ত মালেমগী অচৌবা শান্নবগী থৌরমশিং পাংথোকপা মতমদা, মখোয়গী হৈথোই-শিংথোইবশিং উৎনবা ঐখোয়গী নহারোলশিংগী মফম অমসুং খুদোংচাবা অনিমক ফংগনি। মরম অদুনা, হৌজিক ভারতকী নহারোলশিং মফম লৈরে, থৌনা লৈরে অমসুং মতেং ফংলে। মসিনা তাক্লিবদি খুদোংচাবশিং লোইবা নাইদে হায়বনি। শান্নবগী তাইবংদা অদোমগী মীরোলনা ভারত অনৌবা থাকশিংদা পুখৎকনি হায়না ঐনা থাজৈ।

মরুপশিং,

ঙসি অদোম ময়ামগী মরক্ত তিল্লবা অমসুং অদোমগী মঙলানশিং খঙলবা মতুংদা, ঐগী থাজবা অমুক্ক হেন্না হেনগৎলক্লে। ভারতকী তুংলমচৎ অফবা ওইগনি হায়না ঐনা শোইদনা হায়বা ঙম্মী। তুংলমচৎ অদুগী খ্বাইদগী ফবা হিরোশিংদা অদোম ময়াম্নি। অদোমগী হৈথোই-শিংথোইবদা ঐনা থাজবা থম্লি। অদোমগী থাজবদা ঐনা থাজরি। অদোমগী তৌবা ঙম্বদা ঐনা থাজরি। মরম অদুনা, ঙসি ঐনা অদোম ময়ামগা লোয়ননা মরুওইবা ৱারেপ খর অমুক হন্না লৌবা পাম্লি। ঐনা হায়রবা মতুংদা, অদোম হঞ্জিন্না হায়বীয়ু: মসি ঐখোয়না পাংথোক্কনি। মসি অদোম হঞ্জিন্না হায়গদরা? শোইদনা?

২০৪৭ দা বিকসিত ভারত।

২০৪৭ দা বিকসিত ভারত। মসি ঐখোয়না পাংথোক্কনি।

মসি ঐগা লোয়ননা হায়মিন্নসি: মসি ঐখোয়না পাংথোক্কনি।

২০৪৭ দা বিকসিত ভারত, মসি ঐখোয়না পাংথোক্কনি!

অহুমশুবা খ্বাইদগী চাউবা ইকোনোমি, মসি ঐখোয়না পাংথোক্কনি!

অত্মনির্ভর ভারত, মসি ঐখোয়না পাংথোক্কনি!

মালেমগী মেনুফেকচরিংগী মফম, মসি ঐখোয়না পাংথোক্কনি!

ওলেম্পিক্স য়ুম্বু ওইবা, মসি ঐখোয়না পাংথোক্কনি!

ভারতমচা অমা থাদা চৎপা, মসি ঐখোয়না পাংথোক্কনি!

হোই, মসি ঐখোয়না পাংথোক্কনি! মসি ঐখোয়না পাংথোক্কনি!

বিকসিত তামিল নাদু, মসি ঐখোয়না পাংথোক্কনি!

বিকসিত তামিল নাদু, মসি ঐখোয়না পাংথোক্কনি!

বিকসিত ভারত, মসি ঐখোয়না পাংথোক্কনি!

অদোম থাগৎচরি।

নন্দ্রি বানাক্কম! (অদোম থাগৎচরি, খুরুমজরি)

দিসক্লেমর : মসি প্রধান মন্ত্রীগী ৱারোলদগী চাউরাকপা হন্দোকপনি। অশেংবা ৱারোল হিন্দীদা ঙাংখি।

*****

(রিলিজ আই.দি.: 2322048) ভিজিতর কাউন্তর : 5