ಪ್ರಸಿದ್ಧ ನಟ ಶಿವಾಜಿ ಗಣೇಶನ್ ಅಭಿನಯದ ಮತ್ತು ಎ. ಪಿ. ನಾಗರಾಜನ್ ನಿರ್ದೇಶನದ ಮೂರು 35mm ತಮಿಳು ಚಲನಚಿತ್ರದ ಕ್ಲಾಸಿಕ್‌ಗಳನ್ನು ಭಾರತೀಯ ಚಲನಚಿತ್ರ ಮತ್ತು ಕಿರುತೆರೆ ಸಂಸ್ಥೆಯ (FTII) ಫಿಲ್ಮ್ ರಿಸರ್ಚ್ ಆಫೀಸರ್ ಅಪರ್ಣಾ ಸುಬ್ರಮಣಿಯನ್ ಅವರು ಸ್ವಾಧೀನಪಡಿಸಿಕೊಂಡು, ಪುಣೆಯ ಎನ್‌ಎಫ್‌ಡಿಸಿ-ಭಾರತೀಯ ರಾಷ್ಟ್ರೀಯ ಚಲನಚಿತ್ರ ಸಂಗ್ರಹಾಲಯಕ್ಕೆ (NFDC–NFAI) ಹಸ್ತಾಂತರಿಸಿದ್ದಾರೆ.

ಈ ಸ್ವಾಧೀನತೆಯು ತಿರುವರುಟ್ಸೆಲ್ವರ್ (1967), ತಿಲ್ಲಾನ ಮೋಹನಾಂಬಾಳ್ (1968) ಮತ್ತು ತಿರುವಿಲಾಯಾಡಲ್ (1965) ಚಿತ್ರಗಳನ್ನು ರಾಷ್ಟ್ರೀಯ ಸಂಗ್ರಹಕ್ಕೆ ಸೇರಿಸುತ್ತದೆ. ತಿರುವರುಟ್ಸೆಲ್ವರ್ ಚಿತ್ರವು ಎನ್‌ಎಫ್‌ಎಐನಲ್ಲಿ ಈ ಹಿಂದೆ ಯಾವುದೇ ರೂಪದಲ್ಲಿ ಇರಲಿಲ್ಲವಾದ್ದರಿಂದ, ಈ ಸೇರ್ಪಡೆಯು ಪ್ರಮುಖ ಕೊರತೆಯನ್ನು ನೀಗಿಸುತ್ತದೆ. ಈ ಸ್ವಾಧೀನತೆಯು ತಿಲ್ಲಾನ ಮೋಹನಾಂಬಾಳ್ ಮತ್ತು ತಿರುವಿಲಾಯಾಡಲ್ ಚಿತ್ರಗಳ ಉಳಿದುಕೊಂಡಿರುವ ಎರಡನೇ ರಿಲೀಸ್ ಪ್ರಿಂಟ್ ಅನ್ನು ಸೇರಿಸುತ್ತದೆ, ಇದು ತಮಿಳು ಸಿನಿಮಾದ ಎರಡು ಪ್ರಮುಖ ಕೃತಿಗಳ ಆರ್ಕೈವಲ್ ಸಂರಕ್ಷಣೆಯನ್ನು ಬಲಪಡಿಸುತ್ತದೆ.

ಈ ಸ್ವಾಧೀನತೆಯ ಮಹತ್ವವು ಸಂಗ್ರಹಕ್ಕೆ ಮೂರು ಶೀರ್ಷಿಕೆಗಳ ಸೇರ್ಪಡೆಯನ್ನು ಮೀರಿ ವಿಸ್ತರಿಸುತ್ತದೆ. ಉಳಿದುಕೊಂಡಿರುವ ಎರಡನೇ ಪ್ರತಿಯ ಲಭ್ಯತೆಯು ಎನ್‌ಎಫ್‌ಎಐಗೆ ಈ ಚಲನಚಿತ್ರಗಳ ಸಂರಕ್ಷಣೆ ಮತ್ತು ಬಳಕೆಯನ್ನು ನಿರ್ವಹಿಸುವಲ್ಲಿ ಹೆಚ್ಚಿನ ನಮ್ಯತೆಯನ್ನು ನೀಡುತ್ತದೆ, ಇದು ಒಂದು ಪ್ರತಿಯನ್ನು ಸುರಕ್ಷಿತವಾಗಿರಿಸಲು ಅನುವು ಮಾಡಿಕೊಡುತ್ತದೆ ಮತ್ತು ಇನ್ನೊಂದನ್ನು ಉಲ್ಲೇಖ, ತಾಂತ್ರಿಕ ಮೌಲ್ಯಮಾಪನ, ಡಿಜಿಟಲೀಕರಣ ಮತ್ತು ತೌಲನಿಕ ಪರೀಕ್ಷೆಯಂತಹ ಚಟುವಟಿಕೆಗಳಿಗೆ ಬೆಂಬಲಿಸಲು ಬಳಸಬಹುದು.

ಶ್ರೀಮತಿ ಅಪರ್ಣಾ ಸುಬ್ರಮಣಿಯನ್ ಅವರು, ಫಿಲ್ಮ್ ರೀಲ್ ಅನ್ನು ಎನ್‌ಎಫ್‌ಡಿಸಿ ವ್ಯವಸ್ಥಾಪಕ ನಿರ್ದೇಶಕರಾದ ಶ್ರೀ ಪ್ರಕಾಶ್ ಮಗ್ದುಮ್ ಹಾಗೂ ಎನ್‌ಎಫ್‌ಡಿಸಿ-ಎನ್‌ಎಫ್‌ಎಐ ಅಧಿಕಾರಿಗಳಾದ ಶ್ರೀ ಭವೇಶ್ ಪ್ರತಾಪ್ ಸಿಂಗ್ ಮತ್ತು ಶ್ರೀಮತಿ ಲೀನಾಲಿ ಖೈರ್ನಾರ್ ಅವರಿಗೆ ದೇಣಿಗೆಯಾಗಿ ನೀಡುತ್ತಿರುವುದು

ರಾಷ್ಟ್ರೀಯ ಚಲನಚಿತ್ರ ಅಭಿವೃದ್ಧಿ ನಿಗಮದ (NFDC) ವ್ಯವಸ್ಥಾಪಕ ನಿರ್ದೇಶಕ ಶ್ರೀ ಪ್ರಕಾಶ್ ಮಗ್ದುಮ್ ಮಾತನಾಡಿ: “ಭಾರತದ ಚಲನಚಿತ್ರ ಪರಂಪರೆಯ ಸಂರಕ್ಷಣೆಯು ಕೇವಲ ಸಾಂಸ್ಥಿಕ ಸಂಗ್ರಹಗಳನ್ನಷ್ಟೇ ಅಲ್ಲದೆ, ಉಳಿದುಕೊಂಡಿರುವ ಚಲನಚಿತ್ರ ಸಾಮಗ್ರಿಗಳನ್ನು ರಕ್ಷಿಸುವ ಮಹತ್ವವನ್ನು ಗುರುತಿಸುವ ವ್ಯಕ್ತಿಗಳು ಮತ್ತು ಸಂಸ್ಥೆಗಳ ಪ್ರಯತ್ನಗಳನ್ನು ಅವಲಂಬಿಸಿದೆ. ಭಾರತೀಯ ರಾಷ್ಟ್ರೀಯ ಚಲನಚಿತ್ರ ಸಂಗ್ರಹಾಲಯಕ್ಕೆ ಈ ಮೂರು ಪ್ರಮುಖ ತಮಿಳು ಚಲನಚಿತ್ರಗಳ ಸೇರ್ಪಡೆಯು ರಾಷ್ಟ್ರೀಯ ಸಂಗ್ರಹವನ್ನು ಬಲಪಡಿಸುತ್ತದೆ ಮತ್ತು ಭಾರತೀಯ ಸಿನಿಮಾದ ಪ್ರಮುಖ ಕೃತಿಗಳು ಭವಿಷ್ಯದ ಪೀಳಿಗೆಗೆ ಲಭ್ಯವಿರುವುದನ್ನು ಖಚಿತಪಡಿಸಿಕೊಳ್ಳಲು ಸಹಾಯ ಮಾಡುತ್ತದೆ. ಈ ಪ್ರಿಂಟ್‌ಗಳನ್ನು ಪತ್ತೆಹಚ್ಚಲು ಮತ್ತು ಅವುಗಳನ್ನು ರಾಷ್ಟ್ರೀಯ ಆರ್ಕೈವ್‌ನ ರಕ್ಷಣೆಗೆ ವರ್ಗಾಯಿಸಲು ಪಟ್ಟ ಶ್ರಮವನ್ನು ನಾವು ಶ್ಲಾಘಿಸುತ್ತೇವೆ.” ಎಂದು ಹೇಳಿದರು.

ಈ ದೇಣಿಗೆಯ ಬಗ್ಗೆ ಮಾತನಾಡಿದ ಅಪರ್ಣಾ ಸುಬ್ರಮಣಿಯನ್, “ಕಳೆದ ಮೂರೂವರೆ ವರ್ಷಗಳಿಂದ, ನಾನು ಫಿಲ್ಮ್ ಪ್ರಿಂಟ್‌ಗಳನ್ನು ಸಂರಕ್ಷಿಸುವ ಮತ್ತು ಸಂಗ್ರಹಿಸುವ ಕೆಲಸ ಮಾಡುತ್ತಿದ್ದೇನೆ. ಈ ವರ್ಷದ ಆರಂಭದಲ್ಲಿ, ಜನವರಿ 2026 ರಲ್ಲಿ, ನಾನು ರಕ್ತಕಣ್ಣೀರು (1954) ಚಿತ್ರದ ಪ್ರಿಂಟ್ ಅನ್ನು ಎನ್‌ಎಫ್‌ಎಐಗೆ ದೇಣಿಗೆಯಾಗಿ ನೀಡಿದ್ದೆ. ನನ್ನ ಸಂಗ್ರಹದಿಂದ ಆಯ್ಕೆ ಮಾಡಿದ ಶೀರ್ಷಿಕೆಗಳ ಹಸ್ತಾಂತರವು ಆ ಪ್ರಯತ್ನವನ್ನು ಮುಂದುವರಿಸುತ್ತದೆ. ಸೂಕ್ತ ಸಂರಕ್ಷಣಾ ಸೌಲಭ್ಯಗಳನ್ನು ಹೊಂದಿರುವ ಸಾರ್ವಜನಿಕ ಆರ್ಕೈವ್‌ನ ರಕ್ಷಣೆಯಲ್ಲಿ ಈ ಪ್ರಿಂಟ್‌ಗಳನ್ನು ಇಡುವುದು ನನ್ನ ಉದ್ದೇಶವಾಗಿದೆ.” ಎಂದರು.

ಎನ್‌ಎಫ್‌ಎಐ ಸಂಗ್ರಹವು ತಿಲ್ಲಾನ ಮೋಹನಾಂಬಾಳ್ ಚಿತ್ರದ ಬಹು ಸಂರಕ್ಷಣಾ ಅಂಶಗಳನ್ನು ಹೊಂದಿದ್ದರೂ, ತಿರುವಿಲಾಯಾಡಲ್ ಚಿತ್ರದ ಒಂದೇ ಒಂದು ಸಂರಕ್ಷಣಾ ಅಂಶವು ಪ್ರಸ್ತುತ ಸಂಗ್ರಹದಲ್ಲಿ ಲಭ್ಯವಿದೆ. ದೇಣಿಗೆಯಾಗಿ ನೀಡಲಾದ ತಿರುವಿಲಾಯಾಡಲ್ ಪ್ರಿಂಟ್ ಸಿನೆಮಾಸ್ಕೋಪ್ (CinemaScope) ಸ್ವರೂಪದಲ್ಲಿ ಆಪ್ಟಿಕಲ್ ಆಗಿ ಮಾರ್ಪಡಿಸಿದ ಆವೃತ್ತಿಯಂತೆ ಕಂಡುಬರುತ್ತದೆ.

ಸಾಂಸ್ಥಿಕ ಸಂಗ್ರಹಣೆಯಲ್ಲಿ ಚಲನಚಿತ್ರದ ಒಂದು ಸಂರಕ್ಷಣಾ ಅಂಶ ಮಾತ್ರ ಉಳಿದುಕೊಂಡಾಗ, ಮತ್ತಷ್ಟು ಭೌತಿಕ ಹಾನಿಯ ಅಪಾಯವನ್ನು ಕಡಿಮೆ ಮಾಡಲು ಅದರ ಬಳಕೆಯನ್ನು ಜಾಗರೂಕತೆಯಿಂದ ನಿಯಂತ್ರಿಸಬೇಕಾಗುತ್ತದೆ. ಉಳಿದುಕೊಂಡಿರುವ ಎರಡನೇ ಅಂಶವನ್ನು ಹೊಂದಿರುವುದು ಆರ್ಕೈವ್‌ಗೆ ಉಲ್ಲೇಖ, ತಾಂತ್ರಿಕ ಮೌಲ್ಯಮಾಪನ, ಡಿಜಿಟಲೀಕರಣ ಮತ್ತು ತೌಲನಿಕ ಪರೀಕ್ಷೆಯಂತಹ ಚಟುವಟಿಕೆಗಳಿಗೆ ಹೆಚ್ಚಿನ ನಮ್ಯತೆಯನ್ನು ನೀಡುತ್ತದೆ, ಅದೇ ಸಮಯದಲ್ಲಿ ಇತರ ಅನಲಾಗ್ ಫಿಲ್ಮ್ ಅಂಶವನ್ನು ಸಂರಕ್ಷಿಸಲು ಅನುವು ಮಾಡಿಕೊಡುತ್ತದೆ. ಆದ್ದರಿಂದ ಬಹು ಉಳಿದುಕೊಂಡಿರುವ ಅಂಶಗಳ ಲಭ್ಯತೆಯು ಆರ್ಕೈವಲ್ ಸಂರಕ್ಷಣೆಯ ದೃಷ್ಟಿಕೋನದಿಂದ ಅತ್ಯಂತ ಮೌಲ್ಯಯುತವಾಗಿದೆ.

ತಿಲ್ಲಾನ ಮೋಹನಾಂಬಾಳ್ (1968) ಚಿತ್ರದ ಫ್ರೇಮ್‌ಗಳು

ಹೊಸದಾಗಿ ಸ್ವಾಧೀನಪಡಿಸಿಕೊಂಡ ಮೂರೂ ಪ್ರಿಂಟ್‌ಗಳು ಮೆಜೆಂಟಾ ಬಣ್ಣ ಮಸುಕಾಗಿರುವುದನ್ನು ಮತ್ತು ಲಂಬವಾದ ಪ್ರೊಜೆಕ್ಟರ್ ಗೀರುಗಳನ್ನು ತೋರಿಸುತ್ತವೆ, ಇದು ಉಷ್ಣವಲಯದ ಮತ್ತು ಅನುಕೂಲಕರವಲ್ಲದ ಪರಿಸ್ಥಿತಿಗಳಲ್ಲಿ ದಶಕಗಳ ಬಳಕೆ ಮತ್ತು ಸಂಗ್ರಹಣೆಯ ಪರಿಣಾಮಗಳನ್ನು ಪ್ರತಿಫಲಿಸುತ್ತದೆ. ಅವುಗಳ ಸ್ಥಿತಿಯು ಸಾಂಸ್ಥಿಕ ಆರ್ಕೈವಲ್ ಸಂಗ್ರಹಗಳ ಒಳಗೆ ಉಳಿದುಕೊಂಡಿರುವ ಫಿಲ್ಮ್ ಅಂಶಗಳನ್ನು ಭದ್ರಪಡಿಸುವ ಮಹತ್ವವನ್ನು ಮತ್ತಷ್ಟು ಎತ್ತಿಹಿಡಿಯುತ್ತದೆ.

ಪ್ರಿಂಟ್‌ಗಳ ಮರುಪಡೆಯುವಿಕೆಯು ಆಗಸ್ಟ್ 2026 ರಲ್ಲಿ ಲಭ್ಯವಾದ ಸುಳಿವುಗಳೊಂದಿಗೆ ಪ್ರಾರಂಭವಾಯಿತು. ತಿಲ್ಲಾನ ಮೋಹನಾಂಬಾಳ್ ಅನ್ನು ಚೆನ್ನೈನಲ್ಲಿ ಪತ್ತೆಹಚ್ಚಲಾಯಿತು ಮತ್ತು ಪುಣೆಗೆ ಸಾಗಿಸುವ ಮೊದಲು ಎಫ್‌ಟಿಐಐ ಹಳೆಯ ವಿದ್ಯಾರ್ಥಿ ಸಾಯಿ ಸಂಜಯ್ ಅವರ ನೆರವಿನಿಂದ ಸಂಗ್ರಹಿಸಲಾಯಿತು. ಹೆಚ್ಚಿನ ಸುಳಿವುಗಳು ತಿರುವಿಲಾಯಾಡಲ್ ಮತ್ತು ತಿರುವರುಟ್ಸೆಲ್ವರ್ ಚಿತ್ರಗಳ ಮರುಪಡೆಯುವಿಕೆಗೆ ಕಾರಣವಾದವು. ಎನ್‌ಎಫ್‌ಎಐ ಬಳಿ ತಿರುವರುಟ್ಸೆಲ್ವರ್‌ನ ಪ್ರತಿ ಇಲ್ಲದಿರುವುದು ತಿಳಿದ ಬಂದ ನಂತರ, ಸುಬ್ರಮಣಿಯನ್ ಅವರು ಆರ್ಕೈವ್‌ಗಾಗಿ ಪ್ರಿಂಟ್ ಅನ್ನು ಭದ್ರಪಡಿಸಲು ಆದ್ಯತೆ ನೀಡಿದರು. ಈ ಮೂರು ಪ್ರಿಂಟ್‌ಗಳನ್ನು 13 ಸೆಪ್ಟೆಂಬರ್ 2026 ರಂದು ಚೆನ್ನೈನಿಂದ ಸಂಗ್ರಹಿಸಿ ತದನಂತರ ಎನ್‌ಎಫ್‌ಎಐಗೆ ಹಸ್ತಾಂತರಿಸಲಾಯಿತು.

ಈ ಸ್ವಾಧೀನತೆಯು ಉಳಿದುಕೊಂಡಿರುವ ಫಿಲ್ಮ್ ಅಂಶಗಳನ್ನು ಗುರುತಿಸುವ, ಸಂಗ್ರಹಿಸುವ ಮತ್ತು ಸಂರಕ್ಷಿಸುವ NFDC–NFAI ನ ನಡೆಯುತ್ತಿರುವ ಪ್ರಯತ್ನಗಳಿಗೆ ಸೇರ್ಪಡೆಯಾಗುತ್ತದೆ ಮತ್ತು ಭಾರತದ ಚಲನಚಿತ್ರ ಪರಂಪರೆಯ ರಾಷ್ಟ್ರೀಯ ಸಂಗ್ರಹವನ್ನು ಬಲಪಡಿಸುತ್ತದೆ. ಪ್ರಿಂಟ್‌ಗಳು ಭವಿಷ್ಯದ ಸಂರಕ್ಷಣೆ, ಸಂಶೋಧನೆ, ಡಿಜಿಟಲೀಕರಣ ಮತ್ತು ಪ್ರವೇಶವನ್ನು ಬೆಂಬಲಿಸುತ್ತವೆ, ಈ ಪ್ರಮುಖ ಕೃತಿಗಳು ಭಾರತದ ಚಲನಚಿತ್ರ ಇತಿಹಾಸದ ಭಾಗವಾಗಿ ಲಭ್ಯವಿರುವುದನ್ನು ಖಚಿತಪಡಿಸುತ್ತವೆ.

ಮೂಲ- NFDC - ಭಾರತೀಯ ರಾಷ್ಟ್ರೀಯ ಚಲನಚಿತ್ರ ಸಂಗ್ರಹಾಲಯ| ಎಡ್ಗರ್ ಕೊಯೆಲೊ/ ಪ್ರೀತಿ ಮಲಾಂಡ್ಕರ್

*****