ভাৰত চৰকাৰৰ বস্ত্ৰ মন্ত্ৰালয়ে ইয়াৰ অধীনস্থ ৰাজহুৱা খণ্ডৰ প্ৰতিষ্ঠান কটন কৰ্প’ৰেচন অব্ ইণ্ডিয়া লিমিটেড (চিচিআই)-ৰ জৰিয়তে ‘ৰিফৰ্ম উৎসৱ ২০২৬’-ৰ অংশ হিচাপে ২০২৬ চনৰ ৬ অক্টোবৰত তেলেংগানাৰ হায়দৰাবাদত এক বিশেষ প্ৰদৰ্শনী অনুষ্ঠানৰ আয়োজন কৰিব। কপাহ ক্ৰয় পৰিৱেশতন্ত্ৰক অধিক কৃষককেন্দ্ৰিক, স্বচ্ছ, প্ৰযুক্তিনিৰ্ভৰ আৰু দক্ষ কৰি তুলিবলৈ বস্ত্ৰ মন্ত্ৰালয়ৰ সমন্বয়ত চিচিআইয়ে হাতত লোৱা বৈপ্লৱিক সংস্কাৰসমূহ এই অনুষ্ঠানত দাঙি ধৰা হ'ব।

এই অনুষ্ঠানত জ্যেষ্ঠ চৰকাৰী বিষয়া, তেলেংগানা চৰকাৰৰ প্ৰতিনিধি, নীতি নিৰ্ধাৰক, খেতিয়ক, উদ্যোগ সংস্থা আৰু কপাহ তথা বস্ত্ৰ খণ্ডৰ অন্যান্য অংশীদাৰসকলে অংশগ্ৰহণ কৰিব। তৃণমূল পৰ্যায়ত সংস্কাৰসমূহৰ প্ৰভাৱ আলোকপাত কৰাৰ লগতে কপাহ মূল্য শৃংখলৰ প্ৰধান অংশীদাৰসকলৰ মাজত অভিজ্ঞতাৰ আদান প্ৰদানৰ বাবে ই এক উপযুক্ত মঞ্চ প্ৰদান কৰিব।

বিগত কেইবছৰমানত চিচিআইয়ে কপাহ ক্ৰয়, খেতিয়কৰ পঞ্জীয়ন, ডিজিটেল শ্লট বুকিং, প্ৰত্যক্ষ ধন পৰিশোধ, গুণগত মান নিৰ্ণয়, অনুসন্ধানযোগ্যতা, কপাহ বিক্ৰী আৰু অংশীদাৰসকলৰ সৈতে সংযোগকে ধৰি বিভিন্ন দিশ সামৰি কেইবাটাও প্ৰযুক্তিনিৰ্ভৰ তথা প্ৰাতিষ্ঠানিক সংস্কাৰ হাতত লৈছে। এই পদক্ষেপসমূহৰ উদ্দেশ্য হৈছে ব্যৱসায়ৰ সুচলতা বৃদ্ধি কৰা, স্বচ্ছতা আৰু দায়বদ্ধতা সুদৃঢ় কৰা, আৰু কপাহ খেতিয়কসকলক অধিক দক্ষভাৱে সেৱা প্ৰদান নিশ্চিত কৰা।

অনুষ্ঠানটোৰ এটি মুখ্য আকৰ্ষণ হ'ব চিচিআইৰ প্ৰধান সংস্কাৰ আৰু পদক্ষেপসমূহৰ এক উপস্থাপন, যাৰ পাছত ইয়াৰ ৰূপায়ণ তথা প্ৰভাৱ তুলি ধৰি এখন চুটি ছবি প্ৰদৰ্শন কৰা হ'ব। এই প্ৰদৰ্শনীয়ে স্পষ্ট কৰি তুলিব যে ডিজিটেল প্ৰযুক্তি আৰু প্ৰক্ৰিয়া পুনৰ্গঠনে কেনেকৈ পৰম্পৰাগত ব্যৱস্থাসমূহক ৰূপান্তৰিত কৰি খেতিয়ক, চিচিআই, জিনিং মিল আৰু বস্ত্ৰ উদ্যোগৰ মাজত এক অধিক সুচল আৰু মসৃণ সম্পৰ্ক গঢ়ি তুলিছে।

অনুষ্ঠানটোত কপাহ খেতিয়ক আৰু উদ্যোগৰ অংশীদাৰসকলৰ অভিজ্ঞতাৰ আদান প্ৰদানো অন্তৰ্ভুক্ত থাকিব, যাৰ জৰিয়তে এই সংস্কাৰসমূহত অংশগ্ৰহণ কৰি উপকৃত হোৱাসকলৰ পৰা প্ৰত্যক্ষভাৱে অভিজ্ঞতা শুনাৰ এক সুযোগ লাভ কৰা যাব। আলোচনাসমূহত কপাহৰ গুণগত মানৰ উন্নয়ন, হাই-ডেনচিটি প্লেন্টিং চিষ্টেম (এইচডিপিএছ), কস্তুৰী কটন ভাৰত, কপাহ ক্ৰয়ৰ ডিজিটেলাইজেচন আৰু কপাহ মূল্য শৃংখল শক্তিশালী কৰাৰ অন্যান্য পদক্ষেপসমূহৰ দৰে গুৰুত্বপূৰ্ণ বিষয়সমূহ সামৰি লোৱা হ'ব।

প্ৰদৰ্শন কৰিবলগীয়া মূল পদক্ষেপসমূহৰ ভিতৰত ‘কাপাচ কিষাণ’ ডিজিটেল প্লেটফৰ্ম অন্যতম হ'ব। এই প্লেটফৰ্মখনে খেতিয়কৰ পঞ্জীয়ন, শ্লট বুকিং, ক্ৰয় সম্পৰ্কীয় যোগাযোগ আৰু আধাৰসংযুক্ত ধন পৰিশোধকে ধৰি ডিজিটেল প্ৰক্ৰিয়াৰ জৰিয়তে কপাহ ক্ৰয়ৰ বিভিন্ন পৰ্যায়ক একত্ৰিত কৰিছে। এনে পদক্ষেপসমূহৰ উদ্দেশ্য হৈছে স্বচ্ছতা বৃদ্ধি কৰা, প্ৰক্ৰিয়াগত জটিলতা হ্ৰাস কৰা আৰু ক্ৰয় প্ৰক্ৰিয়াৰ ওপৰত খেতিয়কসকলক অধিক স্পষ্টতা তথা নিৰীক্ষণৰ সুবিধা প্ৰদান কৰা।

অনুষ্ঠানটোত ভাৰতীয় কপাহৰ গুণগত মানৰ উন্নয়ন আৰু অনুসন্ধানযোগ্যতাৰ দিশত চিচিআইৰ প্ৰচেষ্টাসমূহকো তুলি ধৰা হ'ব; যাৰ ভিতৰত প্ৰদূষণ/অপমিশ্ৰণ নিয়ন্ত্ৰণ, ডিজিটেল অনুসন্ধানযোগ্যতা আৰু ‘কস্তুৰী কটন ভাৰত’ পদক্ষেপৰ অধীনত উৎকৃষ্ট মানৰ কপাহৰ প্ৰচাৰৰ বাবে হাতত লোৱা পদক্ষেপসমূহ অন্তৰ্ভুক্ত হৈ আছে। এই ব্যৱস্থাসমূহে ভাৰতীয় কপাহৰ স্বকীয় পৰিচয়, গুণগত মান আৰু বজাৰ স্থিতি উন্নত কৰাৰ লগতে ঘৰুৱা আৰু আন্তঃৰাষ্ট্ৰীয় বজাৰত ইয়াৰ গ্ৰহণযোগ্যতা সুদৃঢ় কৰাৰ লক্ষ্য ৰাখিছে।

এই প্ৰদৰ্শনীয়ে প্ৰাসংগিক কৃষি প্ৰতিষ্ঠানসমূহৰ সহযোগত প্ৰচাৰ কৰা হাই-ডেনচিটি প্লেন্টিং চিষ্টেম (এইচডিপিএছ) আৰু উৎপাদনশীলতা-কেন্দ্ৰিক অন্যান্য পদক্ষেপসমূহৰ প্ৰতিও বিশেষ মনোযোগ আকৰ্ষণ কৰিব। এই পদক্ষেপসমূহে ভাৰতীয় কপাহৰ উৎপাদনশীলতাৰ ব্যৱধান দূৰ কৰাৰ লগতে খেতিৰ পৰ্যায়ত লাভ বৃদ্ধি কৰা আৰু সমগ্ৰ ভাৰতীয় কপাহ খণ্ডৰ সামগ্ৰিক প্ৰতিযোগিতামূলক সক্ষমতা বৃদ্ধিত অৰিহণা যোগোৱাৰ লক্ষ্য নিৰ্ধাৰণ কৰিছে।

ভাৰত চৰকাৰৰ বস্ত্ৰ মন্ত্ৰালয়ৰ অধীনস্থ চেন্ট্ৰেল ছিল্ক ব’ৰ্ড (চিএছবি)-য়ে ডিজিটেল সেৱা প্ৰদান, মিছনমোড প্ৰযুক্তি হস্তান্তৰ আৰু অভিনৱ প্ৰচাৰৰ জৰিয়তে বৈপ্লৱিক সংস্কাৰ ত্বৰান্বিত কৰিছে, যাৰ ফলত ভাৰতীয় ৰেচম শিল্প অধিক সুচল, দক্ষ আৰু অংশীদাৰকেন্দ্ৰিক হৈ পৰিছে।

১. ছিল্ক মাৰ্ক সেৱাসমূহৰ ডিজিটেলাইজেচন – ব্যৱসায়ৰ সুচলতা: ২০০৪ চনৰ পৰা ছিল্ক মাৰ্ক আঁচনি ৰূপায়ণ কৰি অহা ছিল্ক মাৰ্ক অৰ্গেনাইজেচন অব্ ইণ্ডিয়া (এছএমঅ’আই)-য়ে ছিল্ক মাৰ্কৰ জৰিয়তে বিশুদ্ধ ৰেচমৰ প্ৰামাণিকতা নিশ্চিত কৰে। ২০২২-২৩ বৰ্ষৰ পৰা এছএমঅ’আই-য়ে পঞ্জীয়ন, নৱীকৰণ, নথিপত্ৰ প্ৰক্ৰিয়াকৰণ, প্ৰাক-পৰিদৰ্শন, ধন পৰিশোধ, লেবেলৰ চাহিদা আৰু বিতৰণ, নথি ব্যৱস্থাপনা তথা অভিযোগ নিবাৰণ ব্যৱস্থা ক্ৰমান্বয়ে ডিজিটেলাইজ কৰি তুলিছে।

এই ব্যৱস্থাই বৰ্তমান ৭,০০০-তকৈ অধিক কৰ্তৃত্বপ্ৰাপ্ত ব্যৱহাৰকাৰীলৈ সেৱা আগবঢ়াইছে, য’ত প্ৰতি বছৰে ৫০০-তকৈ অধিক নতুন অন্তৰ্ভুক্তি ঘটিছে। নিৰ্ধাৰিত প্ৰয়োজনীয়তাসমূহ পূৰণ হোৱাৰ সাপেক্ষে আবেদনসমূহ সাধাৰণতে ১-২টা কৰ্মদিনৰ ভিতৰত প্ৰক্ৰিয়াকৰণ কৰিব পৰা যায়। এই সংস্কাৰে কাৰ্যালয়লৈ শাৰীৰিক উপস্থিতি আৰু কাগজ-কলমৰ কাম-কাজ হ্ৰাস কৰাৰ লগতে স্বচ্ছতা, অনুসন্ধানযোগ্যতা আৰু প্ৰশাসনিক দক্ষতা বৃদ্ধি কৰিছে; যাৰ দ্বাৰা বিশেষভাৱে এমএছএমই আৰু ৰেচম খণ্ডৰ অংশীদাৰসকল উপকৃত হৈছে।

২. মেৰা ৰেচম মেৰা অভিমান – এক বৃহৎ ৰেচম প্ৰযুক্তি হস্তান্তৰ অভিযান: চেন্ট্ৰেল ছিল্ক ব’ৰ্ড (চিএছবি)-য়ে ২০২৫ চনত ১০০ দিনীয়া এক বৃহৎ ৰেচম প্ৰযুক্তি হস্তান্তৰ অভিযান হিচাপে ‘মেৰা ৰেচম মেৰা অভিমান’ (এমআৰএমএ) আৰম্ভ কৰে। এই অভিযানে ২৬ খন ৰাজ্য/কেন্দ্ৰীয়শাসিত অঞ্চলৰ ১২৯ খন জিলাত খেতিয়কৰ সৈতে প্ৰত্যক্ষ সংযোগ, প্ৰদৰ্শন, প্ৰশিক্ষণ আৰু ক্ষেত্ৰভিত্তিক পদক্ষেপৰ জৰিয়তে প্ৰমাণিত প্ৰযুক্তি “পৰীক্ষাগাৰৰ পৰা পথাৰলৈ” লৈ যায়। এমআৰএমএ ১.০-য়ে ১,৪০০-তকৈ অধিক কাৰ্যসূচীৰ জৰিয়তে ৭৫,০০০ খেতিয়কৰ কাষ চাপিবলৈ সক্ষম হয়।

এমআৰএমএ ১.০-ৰ সফলতা আৰু অভিজ্ঞতাৰ ওপৰত ভিত্তি কৰি এমআৰএমএ ২.০-ক অধিক উন্নত, শৃংখলাবদ্ধ আৰু প্ৰভাৱশালী অভিযান হিচাপে প্ৰস্তুত কৰা হয়। ই ভাৰতৰ ৯৫%-তকৈ অধিক কেঁচা ৰেচম উৎপাদনত অৰিহণা যোগোৱা ২১৮ খন প্ৰধান ৰেচম জিলাক সামৰি লৈছে। এই অভিযানত প্ৰাথমিক সমীক্ষা, অংশীদাৰসকলৰ সৈতে আলোচনা, জিলা ৰেচম উন্নয়ন পৰিকল্পনা, লক্ষ্যভিত্তিক আৰু প্ৰয়োজনীয়তা অনুসৰি কাৰ্যপৰিকল্পনা তথা এক গতিশীল ইন্টাৰেক্টিভ এমআৰএমএ ৱেব পৰ্টেল সন্নিৱিষ্ট কৰা হৈছে। বৰ্তমানলৈকে ১,৭০০-তকৈ অধিক কাৰ্যসূচী ৰূপায়ণ কৰা হৈছে, যাৰ জৰিয়তে ৭৩,০০০-তকৈ অধিক খেতিয়ক আৰু ডিজিটেল মাধ্যমসমূহৰ জৰিয়তে প্ৰায় এক লাখ অংশীদাৰৰ সৈতে প্ৰত্যক্ষ যোগাযোগ সম্ভৱ হৈ উঠিছে।

৩. চেৰি-টুৰিজম – পথাৰৰ পৰা সূতালৈ এক অনন্য অভিজ্ঞতা: ৰেচম শিল্প, পৰ্যটন, শিক্ষা আৰু স্থানীয় অৰ্থনৈতিক উন্নয়নক একত্ৰিত কৰাৰ উদ্দেশ্যে চিএছবি-য়ে চেৰি-টুৰিজমৰ পৰিকল্পনা কৰিছে; য’ত সংগ্ৰহালয়, প্ৰত্যক্ষ প্ৰদৰ্শন, পোষক উদ্ভিদ আৰু পখিলা উদ্যান, প্ৰযুক্তি প্ৰদৰ্শন তথা উৎপাদিত সামগ্ৰীৰ বিপণীৰ জৰিয়তে "মাটিৰ পৰা পাট-মুগালৈ" সমগ্ৰ যাত্ৰাটো দাঙি ধৰা হ'ব।

জম্মু আৰু কাশ্মীৰৰ মানসবালস্থিত চিএছবি-পি৪ মৌলিক বীজ পাম আৰু অসমৰ টপাতলীস্থিত চিএছবি-এৰী মৌলিক বীজ পামক চেৰি-টুৰিজম হাব হিচাপে গঢ়ি তোলা হৈছে; যিয়ে ৰেচমৰ বৈচিত্ৰ্য, জিনীয় সম্পদ সংৰক্ষণ, পলু পালন, লেটা উৎপাদন, সূতা কটা, কাপোৰ বোৱা, ৰং কৰা আৰু ছিল্ক মাৰ্ক সম্পৰ্কীয় সজাগতা প্ৰদৰ্শন কৰিব।

এক নতুন আৰ্হি

একত্ৰিতভাৱে, এই সংস্কাৰসমূহে এক আধুনিক, প্ৰযুক্তি-নিৰ্ভৰ আৰু অংশীদাৰকেন্দ্ৰিক ৰেচম পৰিৱেশতন্ত্ৰ গঢ়ি তুলিছে—য’ত সেৱাসমূহ ডিজিটেল, প্ৰযুক্তিয়ে প্ৰান্তীয় পৰ্যায়লৈকে ঢুকি পায় আৰু ভাৰতৰ ৰেচম ঐতিহ্য এক অভিজ্ঞতাভিত্তিক সম্পদলৈ ৰূপান্তৰিত হৈ খেতিয়ক, এমএছএমই, শিপিনী, উদ্যোগী তথা স্থানীয় সম্প্ৰদায়সমূহৰ বাবে নতুন সুযোগৰ সৃষ্টি কৰিছে।

‘ৰিফৰ্ম উৎসৱ ২০২৬’-ত প্ৰদৰ্শিত সংস্কাৰসমূহে চৰকাৰৰ এক ব্যাপক দূৰদৰ্শিতাক প্ৰতিফলিত কৰে, যাৰ উদ্দেশ্য হৈছে অধিক শক্তিশালী আৰু একত্ৰিত বস্ত্ৰ মূল্য শৃংখল গঢ়ি তোলা — পথাৰৰ পৰা সূতালৈ, সূতাৰ পৰা কাৰখানালৈ, কাৰখানাৰ পৰা ফেশ্বনলৈ আৰু ফেশ্বনৰ পৰা বিদেশলৈ।

হায়দৰাবাদৰ এই অনুষ্ঠানে নীতিগত তথা প্ৰতিষ্ঠানিক পদক্ষেপৰ সংস্কাৰ যাত্ৰাক ক্ষেত্ৰভিত্তিক ফলাফললৈ লৈ যোৱাৰ এক গুৰুত্বপূৰ্ণ মঞ্চ প্ৰদান কৰিব; লগতে ই খেতিয়ক, উদ্যোগ, চৰকাৰী সংস্থা আৰু জ্ঞান প্ৰতিষ্ঠানসমূহৰ মাজত ব্যাপক অংশগ্ৰহণ আৰু সহযোগিতাক উৎসাহিত কৰিব।

এই সংস্কাৰসমূহৰ জৰিয়তে চিচিআই-য়ে খেতিয়কসকলক সহায় আগবঢ়োৱা, ক্ৰয় ব্যৱস্থাৰ উন্নতি সাধন কৰা, গুণগত মান বৃদ্ধিৰ সুবিধা কৰি দিয়া আৰু অধিক স্বচ্ছ, দক্ষ, বহনক্ষম তথা বিশ্বব্যাপী প্ৰতিযোগিতামূলক কপাহ আৰু বস্ত্ৰ পৰিৱেশতন্ত্ৰ গঢ়ি তোলাত অৰিহণা যোগাই ভাৰতৰ কপাহ অৰ্থনীতিৰ এক প্ৰধান প্ৰতিষ্ঠানিক স্তম্ভ হিচাপে নিজৰ ভূমিকা শক্তিশালী কৰি গৈছে।

‘ৰিফৰ্ম উৎসৱ ২০২৬’ হৈছে বস্ত্ৰ মন্ত্ৰালয়ৰ এক পদক্ষেপৰ অংশ, যাৰ লক্ষ্য হৈছে ইয়াৰ অধীনস্থ সংস্থা তথা প্ৰতিষ্ঠানসমূহে হাতত লোৱা বৈপ্লৱিক সংস্কাৰসমূহ প্ৰদৰ্শন কৰা আৰু নাগৰিক, খেতিয়ক, উদ্যোগ তথা সমগ্ৰ বস্ত্ৰ পৰিৱেশতন্ত্ৰৰ ওপৰত ইয়াৰ প্ৰভাৱ তুলি ধৰা।

MAM/VN/MM