2 ಅಕ್ಟೋಬರ್ 2026 ರಂದು ಸ್ವಚ್ಛ ಭಾರತ ದಿವಸ್ ಅಂಗವಾಗಿ, ಗುಜರಾತ್ ನ ನವಸಾರಿ ಜಿಲ್ಲೆಯ ಚಿಖ್ಲಿ ಬ್ಲಾಕ್ ನ ಮಜಿಗಾಮ್ ಗ್ರಾಮದಲ್ಲಿ ನಡೆದ ವಿಶೇಷ ಗ್ರಾಮ ಸಭೆಯಲ್ಲಿ ಕೇಂದ್ರ ಸಚಿವರಾದ ಶ್ರೀ ಸಿ.ಆರ್. ಪಾಟೀಲ್ ಭಾಗವಹಿಸಿದರು. ಈ ವಿಶೇಷ ಗ್ರಾಮ ಸಭೆಯಲ್ಲಿ ಗುಜರಾತ್ ಸರ್ಕಾರದ ಸಚಿವರಾದ ಶ್ರೀ ನರೇಶ್ ಪಟೇಲ್, ಸ್ವಚ್ಛ ಭಾರತ ಮಿಷನ್ (ಗ್ರಾಮೀಣ) ನ ಜಂಟಿ ಕಾರ್ಯದರ್ಶಿ ಹಾಗೂ ಮಿಷನ್ ನಿರ್ದೇಶಕರಾದ ಶ್ರೀಮತಿ ಐಶ್ವರ್ಯ ಸಿಂಗ್, ಜಿಲ್ಲಾಧಿಕಾರಿ ಮತ್ತು ಜಿಲ್ಲಾ ಅಭಿವೃದ್ಧಿ ಅಧಿಕಾರಿ ಹಾಗೂ ರಾಜ್ಯ ಮತ್ತು ಜಿಲ್ಲಾಡಳಿತದ ಹಿರಿಯ ಅಧಿಕಾರಿಗಳು ಉಪಸ್ಥಿತರಿದ್ದರು.

ಈ ವಿಶೇಷ ಗ್ರಾಮ ಸಭೆಯಲ್ಲಿ, ಕೇಂದ್ರ ಸಚಿವರು ನೈರ್ಮಲ್ಯ ಕಾರ್ಯಕರ್ತರನ್ನು ಸನ್ಮಾನಿಸಿದರು. ಸ್ವಚ್ಛತೆಯನ್ನು ಕೇವಲ ಒಂದು ದಿನದ ಅಭಿಯಾನವಾಗಿ ನೋಡದೆ, ಅದನ್ನು ಸಾಮೂಹಿಕ ಬದ್ಧತೆಯನ್ನಾಗಿ ಹಾಗೂ ನಮ್ಮ ದೈನಂದಿನ ಜೀವನ, ನಡವಳಿಕೆ ಮತ್ತು ಸಾಮೂಹಿಕ ಜವಾಬ್ದಾರಿಯ ಅವಿಭಾಜ್ಯ ಅಂಗವನ್ನಾಗಿ ಮಾಡಿಕೊಳ್ಳುವಂತೆ ಎಲ್ಲರಿಗೂ ಕರೆ ನೀಡಿದರು. ನಾವು ಸ್ವತಃ ಕಸವನ್ನು ಎಸೆಯುವುದಿಲ್ಲ ಮತ್ತು ಇತರರು ಹಾಗೆ ಮಾಡಲು ಬಿಡುವುದಿಲ್ಲ ಎಂದು ದೃಢಸಂಕಲ್ಪ ಮಾಡಬೇಕು ಎಂದು ಅವರು ಒತ್ತಿ ಹೇಳಿದರು.

ಮಹಾತ್ಮ ಗಾಂಧೀಜಿಯವರು 'ಸ್ವಾತಂತ್ರ್ಯ'ದ ಜೊತೆಗೆ 'ಸ್ವಚ್ಛತೆ'ಗೆ ನೀಡಿದ ಮಹತ್ವವನ್ನು ಕೇಂದ್ರ ಸಚಿವರು ತಮ್ಮ ಭಾಷಣದಲ್ಲಿ ಸ್ಮರಿಸಿಕೊಂಡರು. ಸ್ವಾತಂತ್ರ್ಯಾನಂತರದ ಅವಧಿಯಲ್ಲಿ ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ಅವರ ನೇತೃತ್ವದಲ್ಲಿ ಸ್ವಚ್ಛತೆಗಾಗಿ ಅತ್ಯಂತ ಮಹತ್ವದ ಪ್ರಯತ್ನಗಳನ್ನು ಕೈಗೊಳ್ಳಲಾಗಿದೆ. ಇದರ ಅಡಿಯಲ್ಲಿ, ಸ್ವಚ್ಛ ಭಾರತ ಮಿಷನ್ ರೂಪದಲ್ಲಿ ನಡೆದ ರಾಷ್ಟ್ರವ್ಯಾಪಿ 'ಜನ ಆಂದೋಲನ'ವು ಗ್ರಾಮೀಣ ನೈರ್ಮಲ್ಯದ ಚಿತ್ರಣವನ್ನೇ ಬದಲಾಯಿಸಿದೆ. ಸ್ವಚ್ಛ ಭಾರತಕ್ಕಾಗಿನ ಈ 'ಜನರ ಸಹಭಾಗಿತ್ವ(ಜನಭಾಗಿದಾರಿ)ʼ ತಳಮಟ್ಟದಲ್ಲಿ ಈ ಮಿಷನ್ ಅನ್ನು ಮುನ್ನಡೆಸುವುದನ್ನು ಮುಂದುವರಿಸಿದೆ” ಎಂದು ಅವರು ಈ ಸಂದರ್ಭದಲ್ಲಿ ಉಲ್ಲೇಖಿಸಿದರು.

ಇತರ ವಿಷಯಗಳ ಜೊತೆಗೆ, ವಿಶೇಷ ಗ್ರಾಮ ಸಭೆಯಲ್ಲಿ 'ಸ್ವಚ್ಛತಾ ಹೀ ಸೇವಾ' (ಎಸ್.ಎಚ್.ಎಸ್) 2026ರ ಸಾಧನೆಗಳು, 'ಘನತ್ಯಾಜ್ಯ ನಿರ್ವಹಣಾ ನಿಯಮಗಳು 2026' ಮತ್ತು ಗ್ರಾಮ ಪಂಚಾಯತ್ ಮಟ್ಟದ ವಾರ್ಷಿಕ ಡಿಜಿಟಲ್ ಸ್ವಯಂ-ಮೌಲ್ಯಮಾಪನ ಚೌಕಟ್ಟಾದ 'ಸ್ವಚ್ಛ ಸೇವಾ ಆಕಲನ್' ಕುರಿತು ಚರ್ಚೆಗಳು ನಡೆದವು; ಈ ಕುರಿತು ಜಂಟಿ ಕಾರ್ಯದರ್ಶಿ ಹಾಗೂ ಮಿಷನ್ ನಿರ್ದೇಶಕರು (ಜೆ ಎಸ್ & ಎಂ ಡಿ) ವಿಶೇಷ ಪ್ರಸ್ತುತಿಯನ್ನು ನೀಡಿದರು.

ಇದಕ್ಕೂ ಮುನ್ನ, ಕೇಂದ್ರ ಸಚಿವರು ಗ್ರಾಮ ಪಂಚಾಯತ್ ನ "ತ್ಯಾಜ್ಯದಿಂದ ಕಲೆ (ವೇಸ್ಟ್ ಟು ಆರ್ಟ್)” ಪ್ರದರ್ಶನಕ್ಕೆ ಭೇಟಿ ನೀಡಿದರು. ಈ ಪ್ರದರ್ಶನವು ತ್ಯಜಿಸಿದ ವಸ್ತುಗಳ ಸೃಜನಶೀಲ ಮರುಬಳಕೆಯನ್ನು ಉಲ್ಲೇಖಿಸುವ ಮೂಲಕ ಸಮುದಾಯದಲ್ಲಿ ಜವಾಬ್ದಾರಿಯುತ ತ್ಯಾಜ್ಯ ನಿರ್ವಹಣಾ ಪದ್ಧತಿಗಳನ್ನು ಉತ್ತೇಜಿಸಿತು.

'ತಾಯಿಯ ಹೆಸರಿನಲ್ಲಿ ಒಂದು ಮರ (ಏಕ್ ಪೇಡ್ ಮಾ ಕೆ ನಾಮ್)ʼ ಅಭಿಯಾನದಡಿ ಸಸಿ ನೆಡುವ ಕಾರ್ಯಕ್ರಮವನ್ನು ಹಮ್ಮಿಕೊಳ್ಳಲಾಗಿತ್ತು. ಈ ಸಂದರ್ಭದಲ್ಲಿ ಜಲ ಶಕ್ತಿ ಸಚಿವಾಲಯದ ಗೌರವಾನ್ವಿತ ಕೇಂದ್ರ ಸಚಿವರಾದ ಶ್ರೀ ಸಿ.ಆರ್. ಪಾಟೀಲ್ ಹಾಗೂ ಎಸ್.ಬಿ.ಎಂ. (ಗ್ರಾಮೀಣ) ವಿಭಾಗದ ಜಂಟಿ ಕಾರ್ಯದರ್ಶಿ ಮತ್ತು ವ್ಯವಸ್ಥಾಪಕ ನಿರ್ದೇಶಕರು ಸಸಿಗಳನ್ನು ನೆಟ್ಟರು. ಎಲ್ಲಾ ಗಣ್ಯರು ಮತ್ತು ಗ್ರಾಮ ಸಭೆಯ ಭಾಗವಹಿಸುವವರು ಒಟ್ಟಾಗಿ ಸ್ವಚ್ಛತಾ ಪ್ರತಿಜ್ಞೆಯನ್ನು ಸ್ವೀಕರಿಸಿದರು.

2 ಅಕ್ಟೋಬರ್ 2026 ರಂದು ಆಚರಿಸಲಾದ 'ಸ್ವಚ್ಛ ಭಾರತ ದಿವಸ'ದ ಅಂಗವಾಗಿ, 'ಸ್ವಚ್ಛತಾ ಹೀ ಸೇವಾ' (ಎಸ್.ಎಚ್.ಎಸ್) 2026ರ ಪ್ರಮುಖ ಚಟುವಟಿಕೆಯಾಗಿ ಗ್ರಾಮೀಣ ಭಾರತದಾದ್ಯಂತ ವಿಶೇಷ ಗ್ರಾಮ ಸಭೆಗಳನ್ನು ಆಯೋಜಿಸಲಾಗಿತ್ತು. ಈ ಗ್ರಾಮ ಸಭೆಗಳು, ಗ್ರಾಮ ಪಂಚಾಯಿತಿಗಳು ಮತ್ತು ಗ್ರಾಮೀಣ ಸಮುದಾಯಗಳಿಗೆ ಸ್ಥಳೀಯ ನೈರ್ಮಲ್ಯ ಮತ್ತು ತ್ಯಾಜ್ಯ ನಿರ್ವಹಣಾ ಪ್ರಯತ್ನಗಳನ್ನು ಪರಿಶೀಲಿಸಲು; SHS 2026ರ ಫಲಿತಾಂಶಗಳನ್ನು ಚರ್ಚಿಸಲು; ಘನ ತ್ಯಾಜ್ಯ ನಿರ್ವಹಣಾ ನಿಯಮಗಳು, 2026 ರ ಪ್ರಕಾರ ತ್ಯಾಜ್ಯವನ್ನು ಮೂಲದಲ್ಲೇ ನಾಲ್ಕು ಬಗೆಗಳಲ್ಲಿ ಪ್ರತ್ಯೇಕಿಸುವಿಕೆಯ ಸ್ಥಿತಿಗತಿಯನ್ನು ಪರಿಶೀಲಿಸಲು; ಹೆಚ್ಚಿನ ಪ್ರಮಾಣದಲ್ಲಿ ತ್ಯಾಜ್ಯ ಉತ್ಪಾದಿಸುವವರನ್ನು ಗುರುತಿಸಿ ನೋಂದಾಯಿಸಲು; ಹಾಗೂ ಒಡಿಎಫ್ ಪ್ಲಸ್ (ಮಾದರಿ) ಗ್ರಾಮ ಪಂಚಾಯಿತಿಗಳಲ್ಲಿ 'ಸ್ವಚ್ಛ ಸೇವಾ ಆಕಲನ್' (ಸ್ವಚ್ಛತಾ ಸೇವಾ ಮೌಲ್ಯಮಾಪನ) ಕುರಿತು ಚರ್ಚಿಸಲು ವೇದಿಕೆಯನ್ನು ಒದಗಿಸಿದವು.

ಈ ವಿಶೇಷ ಗ್ರಾಮ ಸಭೆಯು ಕೊರತೆಗಳ ಮೌಲ್ಯಮಾಪನವನ್ನು ಕೈಗೊಳ್ಳಲು ಮತ್ತು ತಳಮಟ್ಟದಲ್ಲಿ ಸಮನ್ವಯದ ಅನುಷ್ಠಾನಕ್ಕಾಗಿ ಪಂಚಾಯಿತಿ ಅಭಿವೃದ್ಧಿ ಯೋಜನೆಗಳಲ್ಲಿ (ವಿಶೇಷವಾಗಿ ಜಿಪಿಡಿಪಿ ಗಳಲ್ಲಿ) ಸೂಕ್ತ ಕ್ರಮಗಳನ್ನು ಸಂಯೋಜಿಸಲು ಅವಕಾಶ ಹಾಗೂ ವೇದಿಕೆಯನ್ನು ಕಲ್ಪಿಸಿಕೊಟ್ಟಿತು.

ವಿವಿಧ ರಾಜ್ಯಗಳು ಮತ್ತು ಕೇಂದ್ರಾಡಳಿತ ಪ್ರದೇಶಗಳಲ್ಲಿ ನಡೆದ ವಿಶೇಷ ಗ್ರಾಮ ಸಭೆಗಳು ಹಾಗೂ ನೈರ್ಮಲ್ಯ ಚಟುವಟಿಕೆಗಳಲ್ಲಿ ಕೇಂದ್ರ ಕುಡಿಯುವ ನೀರು ಮತ್ತು ನೈರ್ಮಲ್ಯ ಇಲಾಖೆ (ಡಿಡಿಡಬ್ಲ್ಯೂಎಸ್) ನ ಹಿರಿಯ ಅಧಿಕಾರಿಗಳು ಭಾಗವಹಿಸಿದರು

• ದಾದ್ರಾ ಮತ್ತು ನಗರ ಹವೇಲಿಯಲ್ಲಿ, ಡಿಡಿಡಬ್ಲ್ಯೂಎಸ್ ನ ಉಪ ಕಾರ್ಯದರ್ಶಿಯವರು ಸೈಲಿ ಗ್ರಾಮ ಪಂಚಾಯಿತಿಯಲ್ಲಿ ನಡೆದ ವಿಶೇಷ ಗ್ರಾಮ ಸಭೆಯಲ್ಲಿ ಭಾಗವಹಿಸಿದರು. ಈ ಸಭೆಯಲ್ಲಿ 'ಸ್ವಚ್ಛತಾ ಹೀ ಸೇವಾ' 2026 ಮತ್ತು ಎಸ್ ಡಬ್ಲ್ಯೂ ಎಂ ನಿಯಮಗಳು 2026ರ ಕುರಿತ ಚರ್ಚೆಗಳು, ಸ್ವಚ್ಛತಾ ಪ್ರತಿಜ್ಞೆ ಹಾಗೂ ನೈರ್ಮಲ್ಯ ಕಾರ್ಯಕರ್ತರ ಸನ್ಮಾನ ಕಾರ್ಯಕ್ರಮಗಳು ನಡೆದವು. ಅಲ್ಲದೆ, ಎಸ್ ಟಿ ಪಿ (ತ್ಯಾಜ್ಯನೀರು ಸಂಸ್ಕರಣಾ ಘಟಕ) ಗೆ ಭೇಟಿ ಮತ್ತು 'ಏಕ್ ಪೇಡ್ ಮಾ ಕೆ ನಾಮ್' ಅಭಿಯಾನದಡಿ ಸಸಿ ನೆಡುವ ಕಾರ್ಯಕ್ರಮವನ್ನೂ ನಡೆಸಲಾಯಿತು.
• ಜಾರ್ಖಂಡ್ ನಲ್ಲಿ, ಡಿಡಿಡಬ್ಲ್ಯೂಎಸ್ ನ ಉಪ ಕಾರ್ಯದರ್ಶಿಯವರು ರಾಂಚಿ ಜಿಲ್ಲೆಯ ನಾಮ್ಕುಮ್ ಬ್ಲಾಕ್ ನ ಸಿಥಿಯೊ ಗ್ರಾಮ ಪಂಚಾಯಿತಿಯ ಪಿಂಡಾರ್ಕೋಮ್ ಗ್ರಾಮದಲ್ಲಿ ನಡೆದ ವಿಶೇಷ ಗ್ರಾಮ ಸಭೆಯಲ್ಲಿ ಭಾಗವಹಿಸಿದರು. ಈ ಗ್ರಾಮ ಸಭೆಯಲ್ಲಿ 'ಸ್ವಚ್ಛ ಸೇವಾ ಆಕಲನ್'ನ ಕರಡು ಹಾಗೂ ಗುರುತಿಸಲಾದ ಕೊರತೆಗಳನ್ನು ನಿವಾರಿಸುವ ಪ್ರಕ್ರಿಯೆಯ ಕುರಿತು ಚರ್ಚೆ, ನೈರ್ಮಲ್ಯ ಕಾರ್ಯಕರ್ತರ ಸನ್ಮಾನ, ಸ್ವಚ್ಛತಾ ಪ್ರತಿಜ್ಞೆ, 'ಏಕ್ ಪೇಡ್ ಮಾ ಕೆ ನಾಮ್' ಅಡಿಯಲ್ಲಿ ಸಸಿ ನೆಡುವಿಕೆ ಮತ್ತು ನೈರ್ಮಲ್ಯ ಮೂಲಸೌಕರ್ಯಗಳ ಪರಿಶೀಲನೆ ಮುಂತಾದ ಚಟುವಟಿಕೆಗಳನ್ನು ನಡೆಸಲಾಯಿತು.
• ಹರಿಯಾಣದಲ್ಲಿ, ಡಿಡಿಡಬ್ಲ್ಯೂಎಸ್ ನ ಉಪ ಕಾರ್ಯದರ್ಶಿಯವರು ಪಲ್ವಾಲ್ ಜಿಲ್ಲೆಯ ಪಲ್ವಾಲ್ ಬ್ಲಾಕ್ ನ ರಾಟಿಪುರ ಗ್ರಾಮದಲ್ಲಿ ನಡೆದ ವಿಶೇಷ ಗ್ರಾಮ ಸಭೆಯಲ್ಲಿ ಭಾಗವಹಿಸಿದರು. ಈ ಭೇಟಿಯ ಸಂದರ್ಭದಲ್ಲಿ ಸಸಿ ನೆಡುವ ಕಾರ್ಯಕ್ರಮ, ತ್ಯಾಜ್ಯ ವಿಂಗಡಣಾ ಘಟಕದ ಪರಿಶೀಲನೆ ಹಾಗೂ 'ಸ್ವಚ್ಛ ಸೇವಾ ಆಕಲನ್', 'ಘನ ತ್ಯಾಜ್ಯ ನಿರ್ವಹಣಾ ನಿಯಮಗಳು-2026' ಮತ್ತು ಸ್ಥಳೀಯ ನೈರ್ಮಲ್ಯ ಪ್ರಯತ್ನಗಳ ಕುರಿತು ಸಮುದಾಯದೊಂದಿಗೆ ಸಂವಾದ ನಡೆಸಲಾಯಿತು.
• ಮಧ್ಯಪ್ರದೇಶದಲ್ಲಿ, ಡಿಡಿಡಬ್ಲ್ಯೂಎಸ್ ನ ಸಹಾಯಕ ಸಲಹೆಗಾರರು ಭೋಪಾಲ್ ಜಿಲ್ಲೆಯ ಫಂಡಾ ಬ್ಲಾಕ್ನ ಮುಗಲಿಯಾ ಹಾಟ್ ಮತ್ತು ಜಿರ್ನಿಯಾ ಗ್ರಾಮ ಪಂಚಾಯಿತಿಗಳಲ್ಲಿ ನಡೆದ ವಿಶೇಷ ಗ್ರಾಮ ಸಭೆಗಳಲ್ಲಿ ಪಾಲ್ಗೊಂಡರು. ಗ್ರಾಮ ಸಭೆಗಳ ವೇಳೆ, ಭಾಗವಹಿಸುವವರು 'ಸ್ವಚ್ಛತಾ ಪ್ರತಿಜ್ಞೆ' ಸ್ವೀಕರಿಸಿದರು ಹಾಗೂ 'ಸ್ವಚ್ಛತಾ ಹೀ ಸೇವಾ-2026', 'ಘನ ತ್ಯಾಜ್ಯ ನಿರ್ವಹಣಾ ನಿಯಮಗಳು-2026' ಮತ್ತು 'ಸ್ವಚ್ಛ ಸೇವಾ ಆಕಲನ್' ಕುರಿತು ಚರ್ಚಿಸಿದರು. ಈ ಭೇಟಿಯು ಸಸಿ ನೆಡುವ ಕಾರ್ಯಕ್ರಮ ಮತ್ತು ತ್ಯಾಜ್ಯ ವಿಂಗಡಣಾ ಘಟಕದ ಪರಿಶೀಲನೆಯನ್ನೂ ಒಳಗೊಂಡಿತ್ತು.

*****