નેશનલ ઇન્સ્ટિટ્યૂટ ઓફ ફેશન ટેકનોલોજી (NIFT) એ 48મી વર્લ્ડસ્કિલ્સ સ્પર્ધા, શાંઘાઈ 2026માં નોંધપાત્ર સિદ્ધિ નોંધાવી છે, જેમાં NIFTના વિદ્યાર્થીઓ અને નિષ્ણાતોએ ફેશન ટેકનોલોજી, ડિજિટલ ઇન્ટરેક્ટિવ મીડિયા ડિઝાઇન, રિટેલ સેલ્સ અને વિઝ્યુઅલ મર્ચેન્ડાઇઝિંગ સહિતના મુખ્ય ફેશન અને સર્જનાત્મક કૌશલ્ય ક્ષેત્રોમાં ભારતનું પ્રતિનિધિત્વ કર્યું છે.

23 થી 26 સપ્ટેમ્બર 2026 દરમિયાન ચીનના શાંઘાઈ ખાતે યોજાયેલ વર્લ્ડસ્કિલ્સ શાંઘાઈ 2026માં 64 કૌશલ્યોમાં આશરે 68 દેશો અને પ્રદેશોમાંથી 1,400 થી વધુ યુવા સ્પર્ધકો એકત્રિત થયા હતા. ભારતે 63 કૌશલ્યોમાં 70 સ્પર્ધકોની તેની અત્યાર સુધીની સૌથી મોટી ટુકડી સાથે ભાગ લીધો હતો, જેમાં 6 સિલ્વર મેડલ અને 20 મેડલ ફોર એક્સલન્સ સાથે 10મું સ્થાન મેળવ્યું હતું.

આ ઇવેન્ટમાં, NIFT એ ચાર કૌશલ્ય ક્ષેત્રો—ફેશન ટેકનોલોજી, વિઝ્યુઅલ મર્ચેન્ડાઇઝિંગ, રિટેલ સેલ્સ અને ડિજિટલ ઇન્ટરેક્ટિવ મીડિયા ડિઝાઇનમાં પ્રતિનિધિત્વ કર્યું હતું. આ સહભાગિતા સર્જનાત્મક, ડિજિટલ અને રિટેલ-લક્ષી કૌશલ્ય ક્ષેત્રોમાં ફેશન શિક્ષણની વિસ્તરતી ભૂમિકાને પ્રતિબિંબિત કરે છે. NIFTની સહભાગિતાએ આ સિદ્ધિમાં નોંધપાત્ર યોગદાન આપ્યું હતું, જેમાં તેના સહભાગીઓએ ત્રણ કૌશલ્ય શ્રેણીઓમાં 2 સિલ્વર મેડલ અને એક મેડલ ફોર એક્સલન્સ પ્રાપ્ત કર્યો હતો.

વર્લ્ડસ્કિલ્સમાં ફેશન ટેકનોલોજી એ NIFTની સહભાગિતાનું લાંબા સમયથી ચાલતું ક્ષેત્ર રહ્યું છે, જેમાં સંસ્થાન 2011 થી આ કૌશલ્યમાં ભાગ લઈ રહ્યું છે. શાંઘાઈ 2026માં, NIFT ગાંધીનગરના ફેશન ડિઝાઇન ગ્રેજ્યુએટ સુશ્રી વિધિ નીરવકુમાર સુથારે ફેશન ટેકનોલોજીમાં ભારતનું પ્રતિનિધિત્વ કર્યું હતું અને મેડલ ફોર એક્સલન્સ પ્રાપ્ત કર્યો હતો.

સુશ્રી વિધિએ ભારતીય નિષ્ણાત પ્રો. (ડૉ.) મોનિકા ગુપ્તા અને NIFT ટ્રેનિંગ ટીમ માર્ગદર્શન હેઠળ NIFT નવી દિલ્હી ખાતે ચાર મહિનાના સઘન તાલીમ કાર્યક્રમમાંથી પસાર થઈ હતી. ફેશન ડિઝાઇન અને વર્લ્ડસ્કિલ્સમાં વ્યાપક અનુભવ ધરાવતા પ્રો. ગુપ્તાએ સમગ્ર તાલીમ સમયગાળા દરમિયાન ગહન તૈયારી, માર્ગદર્શન અને દોરવણી પૂરી પાડી હતી. આ કાર્યક્રમ તકનીકી પ્રવીણતા, ચોકસાઈ, આંતરરાષ્ટ્રીય ધોરણોનું પાલન અને વર્લ્ડસ્કિલ્સ સ્પર્ધાની સ્થિતિ હેઠળ કામગીરી કરવાની ક્ષમતાને મજબૂત કરવા પર કેન્દ્રિત હતો.

ડિજિટલ ઇન્ટરેક્ટિવ મીડિયા ડિઝાઇનમાં, NIFT મુંબઈના શ્રી કોવિદ અજય ગંગરાડેએ સિલ્વર મેડલ જીત્યો હતો, જ્યારે NIFT પંચકુલાના સુશ્રી સાનિયા જોશીએ રિટેલ સેલ્સમાં સિલ્વર મેડલ જીત્યો હતો. તેમની સિદ્ધિઓ ખાસ કરીને નોંધપાત્ર છે કારણ કે રિટેલ સેલ્સ અને ડિજિટલ ઇન્ટરેક્ટિવ મીડિયા ડિઝાઇન એ વર્લ્ડસ્કિલ્સ શાંઘાઈ 2026માં હાઇલાઇટ કરવામાં આવેલી નવી અને ઉભરતી કૌશલ્ય શ્રેણીઓમાં સામેલ છે, જે ફેશન અને સર્જનાત્મક ઉદ્યોગોના બદલાતા સ્વરૂપ અને આ ક્ષેત્ર સાથે ટેકનોલોજી, ડિજિટલ પ્લેટફોર્મ્સ અને ગ્રાહક અનુભવના વધતા એકીકરણને પ્રતિબિંબિત કરે છે.

NIFTની સહભાગિતા વિઝ્યુઅલ મર્ચેન્ડાઇઝિંગ સુધી પણ વિસ્તરેલી હતી, જેમાં NIFT બેંગલુરુના સુશ્રી અનુજા અજય વારે આ કૌશલ્યમાં ભારતનું પ્રતિનિધિત્વ કર્યું હતું.

NIFT માટે, વર્લ્ડસ્કિલ્સની સફર આંતરરાષ્ટ્રીય સ્પર્ધામાં ભાગ લેવા કરતાં વધુ દર્શાવે છે. તે વિદ્યાર્થીઓને વૈશ્વિક વ્યાવસાયિક ધોરણો, ઉભરતી ટેકનોલોજી, આંતરરાષ્ટ્રીય બેંચમાર્ક અને ઉદ્યોગની અપેક્ષાઓનો સંપર્ક પૂરો પાડે છે. આ અનુભવ NIFT ને તેની તાલીમ પદ્ધતિઓને સતત મજબૂત કરવા અને તેના શૈક્ષણિક અને કૌશલ્ય-વિકાસ ઇકોસિસ્ટમમાં વૈશ્વિક શ્રેષ્ઠ પદ્ધતિઓને એકીકૃત કરવા માટે પણ સક્ષમ બનાવે છે.

વર્લ્ડસ્કિલ્સ શાંઘાઈ 2026માં NIFT સહભાગીઓની સફળતા ફેશન, ટેકનોલોજી, સર્જનાત્મકતા, રિટેલ અને ડિજિટલ કૌશલ્યોને એકસાથે લાવવાની સાથે ઉચ્ચતમ આંતરરાષ્ટ્રીય સ્તરે સ્પર્ધા કરવા માટે સજ્જ વ્યાવસાયિકોને વિકસાવવાની સંસ્થાનની સતત પ્રતિબદ્ધતા દર્શાવે છે.

NIFT એ તેના વિદ્યાર્થીઓ, નિષ્ણાતો, ટ્રેનર્સ, અધિકારીઓ, કાપડ મંત્રાલય અને વર્લ્ડસ્કિલ્સ શાંઘાઈ 2026માં તેમની તૈયારી અને સહભાગિતામાં સામેલ તમામ લોકોને અભિનંદન પાઠવ્યા હતા.

SM/DK/GP/JT

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad