'പ്രഹാര്‍  ഭീകരവിരുദ്ധ നയവും തന്ത്രവും' സംബന്ധിച്ച സമ്മേളനം കേന്ദ്ര ആഭ്യന്തര, സഹകരണ മന്ത്രി ശ്രീ. അമിത് ഷാ ഇന്ന് ന്യൂഡല്‍ഹിയില്‍ ഉദ്ഘാടനം ചെയ്തു. പ്രതിരോധം, പ്രതികരണം, ആഭ്യന്തര ശേഷികളുടെ ഏകോപനം, മനുഷ്യാവകാശങ്ങള്‍, ഭീകരവാദത്തിനുള്ള സാഹചര്യങ്ങള്‍ ലഘൂകരിക്കല്‍, അന്താരാഷ്ട്ര ശ്രമങ്ങളെ ഏകോപിപ്പിക്കല്‍, വീണ്ടെടുക്കലും അതിജീവനശേഷിയും ഉള്‍പ്പെടെയുള്ള പ്രഹാറിന്റെ ഏഴ് സ്തംഭങ്ങളെക്കുറിച്ച് സമൂഹം ഒന്നാകെ പങ്കാളികളാകുന്ന സമഗ്ര സമീപനത്തിലൂടെ സമ്മേളനത്തില്‍ ചര്‍ച്ച ചെയ്തു. കേന്ദ്ര ആഭ്യന്തര സെക്രട്ടറി, വിദേശകാര്യ സെക്രട്ടറി, സിഎപിഎഫ്/സിപിഒ മേധാവികള്‍, 15 സംസ്ഥാനങ്ങളില്‍ നിന്നുള്ള ഡിജിപിമാര്‍, എല്ലാ സംസ്ഥാനങ്ങളിലെയും കേന്ദ്രഭരണ പ്രദേശങ്ങളിലെയും എടിഎസ് മേധാവികള്‍ എന്നിവര്‍ നേരിട്ടും, മറ്റ് സംസ്ഥാനങ്ങളിലെ ഡിജിപിമാരും മുന്‍നിര പോലീസ് ഉദ്യോഗസ്ഥരും വെര്‍ച്വലായും സമ്മേളനത്തില്‍ പങ്കെടുത്തു.

പ്രധാനമന്ത്രി ശ്രീ. നരേന്ദ്ര മോദിയുടെ നേതൃത്വത്തില്‍ ഭീകരവാദത്തിന്റെ എല്ലാ രൂപങ്ങള്‍ക്കും പ്രകടനങ്ങള്‍ക്കുമെതിരെ കേന്ദ്ര സര്‍ക്കാര്‍ 'സീറോ ടോളറന്‍സ്' നയമാണ് സ്വീകരിച്ചിരിക്കുന്നതെന്ന് കേന്ദ്ര ആഭ്യന്തര മന്ത്രി തന്റെ പ്രസംഗത്തില്‍ പറഞ്ഞു. ഭീകരാക്രമണങ്ങളെക്കുറിച്ചുള്ള  തുടര്‍ച്ചയായ വിശകലനത്തിലൂടെ പ്രഹാര്‍ തന്ത്രം ശക്തിപ്പെടുത്തുന്നതിനും മെച്ചപ്പെടുത്തുന്നതിനുമുള്ള നിരന്തരമായ  ശ്രമങ്ങളുടെ ആവശ്യകതയും, അടുത്ത 10 വര്‍ഷത്തേക്ക് ശക്തവും സുദൃഢവുമായ പ്രഹാര്‍ സംവിധാനം സ്ഥാപിക്കേണ്ടതിന്റെ ആവശ്യകതയും അദ്ദേഹം ഊന്നിപ്പറഞ്ഞു. പ്രഹാറിന്റെ തത്വങ്ങള്‍ താഴെത്തട്ടിലുള്ള പോലീസ് സ്‌റ്റേഷന്‍ തലം വരെ എത്തിക്കുന്നതില്‍ ശ്രദ്ധ കേന്ദ്രീകരിച്ചുകൊണ്ട്, പ്രഹാര്‍ സംരംഭത്തിന്റെ എല്ലാ വശങ്ങളിലും മുന്‍കൈയെടുത്തുള്ള സമീപനം സ്വീകരിക്കണമെന്ന് അദ്ദേഹം നിര്‍ദ്ദേശിച്ചു. ഭീകരവാദ ഭീഷണികള്‍ ലഘൂകരിക്കുന്നതിനായി കൈക്കൊണ്ട വിവിധ നടപടികളെക്കുറിച്ച്  പരാമര്‍ശിച്ച അദ്ദേഹം, ഈ ചട്ടക്കൂടിന്റെ എല്ലാ തലങ്ങളിലും ഒരു ഓട്ടോമേറ്റഡ് ഭീകരവിരുദ്ധ പ്രതികരണ സംവിധാനം സ്ഥാപനവല്‍ക്കരിക്കണമെന്ന് ആവശ്യപ്പെട്ടു. പ്രഹാറിന്റെ ഓരോ സ്തംഭത്തിലും ഫലാധിഷ്ഠിതമായ സമീപനം സ്വീകരിക്കേണ്ടതിന്റെ ആവശ്യകത ഊന്നിപ്പറഞ്ഞുകൊണ്ട്, നടപടികളില്‍ കാലതാമസം ഒഴിവാക്കാന്‍ പങ്കാളികള്‍ക്കിടയില്‍ ഏകോപനം ഉറപ്പാക്കണമെന്ന് അദ്ദേഹം ആഹ്വാനം ചെയ്തു. 2019 മുതല്‍ 2026 വരെ മോദി സര്‍ക്കാര്‍ 36 രാജ്യങ്ങളില്‍ നിന്നായി 288 പിടികിട്ടാപ്പുള്ളികളായ കുറ്റവാളികളെ ഇന്ത്യയിലേക്ക് വിജയകരമായി തിരിച്ചെത്തിച്ചതായി കേന്ദ്ര ആഭ്യന്തര മന്ത്രി ശ്രീ. അമിത് ഷാ പറഞ്ഞു. ഏജന്‍സികള്‍ തമ്മിലുള്ള മികച്ച ഏകോപനത്തിന്റെ ഫലമായി, അതിര്‍ത്തി കടന്നുള്ള ആയുധങ്ങള്‍, സ്‌ഫോടകവസ്തുക്കള്‍, മയക്കുമരുന്ന് എന്നിവ കടത്തുന്നതില്‍ ഏര്‍പ്പെട്ടിരുന്ന ഷെഹ്‌സാദ് ഭാട്ടി ശൃംഖലയുടെ 40ലധികം മൊഡ്യൂളുകള്‍ തകര്‍ത്തതായി അദ്ദേഹം പറഞ്ഞു. 15 സംസ്ഥാനങ്ങളിലായി 100ലധികം എഫ്.ഐ.ആറുകള്‍ രജിസ്റ്റര്‍ ചെയ്യുകയും 350 പേരെ അറസ്റ്റ് ചെയ്യുകയും ചെയ്തു. ഇതോടൊപ്പം മോദി സര്‍ക്കാര്‍ ഷെഹ്‌സാദ് ഭാട്ടി ശൃംഖലയെ യു.എ.പി.എ പ്രകാരം ഭീകര സംഘടനയായി പ്രഖ്യാപിച്ചതായും ശ്രീ ഷാ പറഞ്ഞു.

വിദേശത്തുനിന്ന് പിടികിട്ടാപ്പുള്ളികളെ തിരിച്ചെത്തിക്കാനുള്ള ശ്രമങ്ങള്‍ ഏകോപിപ്പിക്കുകയും വേഗത്തിലാക്കുകയും ചെയ്യുന്ന പുതിയ എക്‌സ്ട്രാഡിഷന്‍ പോര്‍ട്ടലും കേന്ദ്ര ആഭ്യന്തര മന്ത്രി ഉദ്ഘാടനം ചെയ്തു. വിദേശത്തുനിന്ന് പിടികിട്ടാപ്പുള്ളികളെ തിരിച്ചെത്തിക്കുന്നതിനായി കേന്ദ്ര ഏജന്‍സികളുമായി ഏകോപിച്ച് പ്രവര്‍ത്തിക്കാന്‍ പ്രത്യേക സംഘങ്ങള്‍ രൂപീകരിക്കണമെന്ന് അദ്ദേഹം സംസ്ഥാന പോലീസ് സേനകളോട് ആവശ്യപ്പെട്ടു.

***