گیارہواں یوم آیوروید 23 ستمبر کو ’’صحت مند کل کے لیے آیوروید‘‘ کے موضوع کے تحت بھارت اور دنیا کے متعدد ممالک میں منایا گیا۔ اس موقع پر عوام کی بڑے پیمانے پر شرکت دیکھنے میں آئی اور آیوروید ڈے کی سرکاری ویب سائٹ کے ذریعے 22,000 سے زیادہ سرگرمیوں کے انعقاد کی اطلاع درج کی گئی۔

ملک گیر تقریبات کے ایک حصے کے طور پر مجموعی طور پر 13,10,690 شرکا نے رجسٹریشن کرایا، جبکہ 1,32,47,311 شہریوں نے آیوروید ڈے کے سرکاری ڈیجیٹل پلیٹ فارم کے ذریعے آیوروید کے تئیں اپنی حمایت کا اظہار کیا۔ تقریبات کے دوران سرگرمیوں اور عوامی شرکت کی عکاسی کرنے والی 90,000 سے زیادہ تصاویر بھی جمع کرائی گئیں۔

آیوروید ڈے 2026 کے ڈیجیٹل پلیٹ فارم (ayurvedaday.org.in) نے شہریوں، اداروں، برادریوں اور تنظیموں کو تقریبات کے تحت اپنی شرکت درج کرانے اور منعقد کی گئی سرگرمیوں کی تفصیلات پیش کرنے کے لیے ایک مشترکہ پلیٹ فارم فراہم کیا۔

مہاراشٹر، اوڈیشہ اور اتر پردیش سمیت مختلف ریاستوں میں بڑے پیمانے پر عوامی شرکت دیکھنے میں آئی، جہاں آیوروید کے بارے میں بیداری اور سمجھ کو فروغ دینے کے لیے مختلف برادریوں اور اداروں میں سرگرمیوں کا انعقاد کیا گیا۔

گیارہویں یوم آیوروید کے موقع پر بین الاقوامی سطح پر بھی شرکت دیکھنے میں آئی اور 38 سے زائد ممالک سے آیوروید ڈے کی سرگرمیوں کی اطلاع ملی۔ ان ممالک میں برطانیہ، ریاستہائے متحدہ امریکہ، چین، جاپان، فن لینڈ، افغانستان، گھانا، نیوزی لینڈ، روس، جارجیا اور البانیہ سمیت دیگر ممالک شامل ہیں۔ اس شرکت سے آیوروید ڈے کی بڑھتی ہوئی عالمی رسائی اور دنیا کے مختلف حصوں میں آیوروید سے متعلق بیداری اور صحت و تندرستی پر مرکوز سرگرمیوں میں برادریوں اور تنظیموں کی شمولیت کا اظہار ہوتا ہے۔

تقریبات میں مختلف نوع کی سرگرمیوں کا انعقاد کیا گیا، جن میں آیوروید سے متعلق بیداری پروگرام، صحت و تندرستی کے کیمپ، عوامی رابطہ مہمات، تعلیمی پروگرام، ادویاتی پودوں کی شجرکاری اور تحفظ کی مہمات، آیورویدک غذا اور صحت بخش غذائی طریقوں کے فروغ کے ساتھ ساتھ شہریوں کی شمولیت پر مبنی مہمات شامل تھیں۔

گیارہویں یوم آیوروید کی ملک گیر اور بین الاقوامی سطح پر شرکت سے آیوروید کے ساتھ عوامی وابستگی کے بڑھتے ہوئے دائرہ کار اور صحت مند کل کے لیے آیوروید سے متعلق بیداری کو فروغ دینے کی سمت میں اداروں، تنظیموں اور شہریوں کی اجتماعی کوششوں کی عکاسی ہوتی ہے۔

********

ش ح ۔ ش ت ۔ م الف

U NO-4084

(ریلیز آئی ڈی: 2314872) وزیٹر کاؤنٹر : 9