மேற்கு வங்கத்தில் அன்னபூர்ணா திட்டத்தின் கீழ் நிதியுதவித் தொகையை விடுவிக்கும் நிகழ்வில், காணொலி வாயிலாகப் பங்கேற்று பிரதமர் திரு நரேந்திர மோடி இன்று உரையாற்றினார். இந்தச் சிறப்புமிக்க தருணத்தில் மக்களுடன் இணைவதில் மிகுந்த மகிழ்ச்சியை வெளிப்படுத்திய பிரதமர், மேற்கு வங்கத்தின் தாய்மார்களுக்கும் சகோதரிகளுக்கும் தனது ஆழ்ந்த மரியாதையைத் தெரிவித்துக் கொண்டார். அவர்களின் அசைக்க முடியாத நம்பிக்கையும் பிணைப்பும் தமக்கு மிகப்பெரிய தனிப்பட்ட வலுவூட்டும் சக்தியாகத் திகழ்கின்றன என்று அவர் கூறினார். "உங்கள் நம்பிக்கையே எனது வலிமை!" என்று திரு மோடி குறிப்பிட்டார்.

பெண்களின் தன்னம்பிக்கையை வலுப்படுத்துவதில் அன்னபூர்ணா திட்டம் ஒரு முக்கிய நடவடிக்கையாக அமைந்திருப்பதாகக் குறிப்பிட்ட பிரதமர், மாதந்தோறும் வழங்கப்படும் உத்தரவாதமான வைப்புத்தொகை எவ்வாறு அவர்களுக்குப் பெரும் வாழ்வாதார ஆதரவை அளிக்கிறது என்பதை விளக்கினார். யாரிடமும் கையேந்தாமல் இந்தத் தொகையைப் பெறுவது பெண்களுக்கு நிதி ரீதியான கண்ணியத்தை உறுதி செய்கிறது என்று அவர் குறிப்பிட்டார். "இது அவர்களின் வாழ்க்கைக்கு ஒரு மிகப்பெரிய ஆதரவு; இது ஒரு பெரும் உதவி!" என்று திரு மோடி கூறினார்.

பெண்களுக்கு வலுவான முடிவெடுக்கும் அதிகாரத்தையும் முன்னேறிச் செல்வதற்கான துணிச்சலையும் அளிப்பதில் தனக்குள்ள உறுதியான நம்பிக்கையை பிரதமர் வெளிப்படுத்தினார். இந்த அதிகாரமளித்தல் உத்தியில் அன்னபூர்ணா திட்டம் வகிக்கும் முக்கிய பங்கை மீண்டும் வலியுறுத்திய அவர், பயனாளிகளுக்குத் தனது வாழ்த்துகளைத் தெரிவித்தார்.

முழுமையான உள்ளடக்கிய தன்மையை உறுதி செய்வதில் தங்கள் நிர்வாகத்தின் அர்ப்பணிப்பை வலியுறுத்திய பிரதமர், மாநிலம் முழுவதும் இந்தத் திட்டத்தின் பலன்கள் முழுமையாகச் சென்றடைவதை உறுதி செய்வதற்கான துரித நடவடிக்கைகள் மேற்கொள்ளப்பட்டு வருவதாக உறுதியளித்தார். "தகுதியுள்ள எந்தவொரு பெண்ணும் அன்னபூர்ணா திட்டத்தின் பலன்களிலிருந்து விடுபடக்கூடாது என்பதே எங்கள் அரசின் நோக்கமாகும்," என்று திரு மோடி உறுதிபடக் கூறினார்.

பிராந்திய முன்னேற்றத்தை நாட்டின் தொலைநோக்குப் பார்வையுடன் இணைத்து, வளர்ச்சியடைந்த இந்தியா என்ற இலக்கை நோக்கிய வளர்ச்சிப் பயணத்தை உள்ளூர் பெண்கள் தொடர்ந்து துரிதப்படுத்துவார்கள் என்று பிரதமர் தமது நம்பிக்கையை  வெளிப்படுத்தினார். ஒரு மாநிலத்தின் வளர்ச்சியும் அதன் திறன்களும் நாட்டின் ஒட்டுமொத்த லட்சிய உறுதிப்பாட்டை அடிப்படையிலேயே வலுப்படுத்துகின்றன என்று அவர் கூறினார். "வளர்ச்சியடைந்த மேற்கு வங்கத்தின் வலிமையுடன், வளர்ச்சியடைந்த இந்தியாவின் லட்சிய உறுதிப்பாடு இன்னும் வலுவடையும்," என்று திரு மோடி கூறினார்.

மேலும் விவரங்களுக்கு இந்த செய்திக் குறிப்பை ஆங்கிலத்தில் இங்கே காணவும்: https://www.pib.gov.in/PressReleaseDetail.aspx?PRID=2311307&reg=3&lang=1

***

TV/BR/GS