২০২৬ চনৰ ১৬–১৭ ছেপ্টেম্বৰত নতুন দিল্লীৰ বাণিজ্য ভৱনত অকৰ্তৃত্বশীল বাণিজ্য নিয়ন্ত্ৰণৰ বাবে বাণিজ্য, সৰবৰাহ আৰু সহযোগিতা সম্পৰ্কীয় ভাৰত–নেপাল আন্তঃচৰকাৰী উপ-সমিতিৰ বৈঠক (আই জি এছ চি) অনুষ্ঠিত হয়।

ভাৰত চৰকাৰৰ বাণিজ্য বিভাগৰ যুটীয়া সচিব শ্ৰী উজ্জ্বল কুমাৰ ঘোষে ভাৰতীয় প্ৰতিনিধি দলটোৰ নেতৃত্ব দিয়াৰ লগতে নেপাল চৰকাৰৰ উদ্যোগ বাণিজ্য আৰু যোগান মন্ত্ৰালয়ৰ যুটীয়া সচিব শ্ৰী বুদ্ধ বাহাদুৰ গুৰুং উপস্থিত থাকে। এই বৈঠকত দুয়োখন দেশৰ সংশ্লিষ্ট মন্ত্ৰালয় আৰু বিভাগৰ জ্যেষ্ঠ বিষয়াসকলেও অংশগ্ৰহণ কৰে।

ব্যৱসায় আৰু বাণিজ্য সম্পৰ্কীয় বিষয়সমূহ বিশদভাৱে পৰীক্ষা কৰি দ্বিপাক্ষিক বাণিজ্য তথা সৰবৰাহৰ সুবিধা প্ৰদানৰ বাবে আই জি এছ চি হৈছে এক গুৰুত্বপূৰ্ণ দ্বিপাক্ষিক প্ৰতিষ্ঠানিক ব্যৱস্থা।

বৈঠকত দুয়োপক্ষই বজাৰ প্ৰৱেশ, শুল্ক আৰু বাণিজ্যৰ সুবিধা, মান, খাদ্য সুৰক্ষা, উদ্ভিদজনিত ব্যৱস্থা, ঔষধ, চিকিৎসা সঁজুলি, আয়ুষ সামগ্ৰী, সীমান্ত আন্তঃগাঁথনি, ৰে’ল আৰু পথ সংযোগ আৰু অন্যান্য বাণিজ্য সম্পৰ্কীয় বিষয়সমূহৰ সৈতে জড়িত বিস্তৃত বিষয়সমূহৰ পৰ্যালোচনা কৰে।

ভাৰত আৰু নেপালৰ উৎপাদিত সামগ্ৰীৰ বজাৰত অধিক প্ৰৱেশৰ সুবিধা প্ৰদানৰ ব্যৱস্থাৰ বিষয়ে আলোচনা কৰে দুয়োপক্ষই। কৃষিজাত সামগ্ৰী, দুগ্ধজাত সামগ্ৰী, খাদ্য সামগ্ৰী, ঔষধ, চিকিৎসা সঁজুলি আৰু আয়ুষ সামগ্ৰীৰ সৈতে জড়িত বিষয়সমূহৰ লগতে মান আৰু উদ্ভিদজনিত প্ৰয়োজনীয়তাসমূহৰ বিষয়ে বিবেচনা কৰা হয়।

উভয় পক্ষই শুল্ক সহযোগিতা আৰু বাণিজ্যিক সুবিধা শক্তিশালী কৰাৰ লগতে আগমনৰ পূৰ্বে তথ্য বিনিময়, উৎপত্তিৰ প্ৰমাণ-পত্ৰৰ ইলেক্ট্ৰনিক পৰীক্ষণ, শুল্ক স্বয়ংক্ৰিয়কৰণ আৰু ডিজিটেলাইজেশ্যনকে ধৰি বিভিন্ন আলোচনা কৰে। আলোচনাত প্ৰযোজ্য নিয়ম মানি চলাটো নিশ্চিত কৰাৰ লগতে অগ্ৰাধিকাৰ বাণিজ্যিক ব্যৱস্থাৰ অপব্যৱহাৰ ৰোধ কৰাৰ ব্যৱস্থা শক্তিশালী কৰাৰ লগতে বৈধ বাণিজ্যৰ সুবিধা প্ৰদানৰ ওপৰত গুৰুত্ব আৰোপ কৰা হয়।

সৰবৰাহ আৰু সংযোগ আছিল এই আলোচনাৰ মূল ক্ষেত্ৰ। দুয়োপক্ষই ৰেল আৰু পথ সংযোগ, মালবাহী যাতায়াত, সংহত চেকপোষ্ট আৰু স্থল-বন্দৰৰ আন্তঃগাঁথনিৰ মূল্যায়ন কৰে। আলোচনাত বৰ্তমানৰ সুবিধাসমূহ অধিক ফলপ্ৰসূভাৱে ব্যৱহাৰ কৰা আৰু দ্বিপাক্ষিক তথা সৰবৰাহ বাণিজ্যত প্ৰভাৱ পেলোৱা বৰ্তমানৰ বাধাসমূহ আঁতৰোৱাৰ ওপৰতো গুৰুত্ব আৰোপ কৰে।

প্ৰতিষ্ঠানিক সহযোগিতা আৰু সামৰ্থ্য বিকাশৰ পদক্ষেপকে ধৰি মান, খাদ্য সুৰক্ষা, উদ্ভিদ কোৱাৰেণ্টাইন আৰু অনুকূলতা মূল্যায়নৰ ক্ষেত্ৰত দুয়োপক্ষই আগবঢ়োৱা অবিৰত সহযোগিতাৰ শলাগ লয়।

বৈধ সীমা অতিক্ৰম কৰা বাণিজ্যৰ সুবিধা আৰু অকৰ্তৃত্বশীল বাণিজ্য আৰু বাণিজ্যিক জালিয়াতিৰ সৈতে জড়িত সমস্যাসমূহ সমাধানৰ বাবে সংশ্লিষ্ট সংস্থাসমূহৰ মাজত সহযোগিতা অব্যাহত ৰখাৰ গুৰুত্বৰ ওপৰত দুয়োপক্ষই গুৰুত্ব আৰোপ কৰে।

আন্তৰিক আৰু গঠনমূলক পৰিৱেশত এই বৈঠকৰ সামৰণি পৰে। দুয়োপক্ষই প্ৰতিষ্ঠিত প্ৰতিষ্ঠানিক ব্যৱস্থাৰ জৰিয়তে ঘনিষ্ঠ যোগাযোগ বৰ্তাই ৰাখিবলৈ আৰু অধিক কাৰিকৰী পৰীক্ষাৰ প্ৰয়োজনীয় বিষয়সমূহৰ ওপৰত সময়সীমাবদ্ধতাবোৰ অনুসৰণ কৰিবলৈ সন্মত হয়।

ভাৰত আৰু নেপালৰ মাজত ঘনিষ্ঠ ঐতিহাসিক, সাংস্কৃতিক আৰু অৰ্থনৈতিক সম্পৰ্ক আছে। ভাৰত নেপালৰ সৰ্ববৃহৎ বাণিজ্যিক অংশীদাৰ আৰু বিনিয়োগৰ এক গুৰুত্বপূৰ্ণ উৎস হৈয়ে আছে। আই জি এছ চিত হোৱা আলোচনাই দুয়োখন দেশৰ মাজত দ্বিপাক্ষিক বাণিজ্য, সৰবৰাহ সংযোগ আৰু অৰ্থনৈতিক সহযোগিতা অধিক শক্তিশালী কৰিব বুলি আশা কৰা হৈছে।

***

Abhishek Dayal/ Garima Singh/ Ishita Biswas/KD