مرکزی وزیر تعلیم جناب پرلہاد جوشی نے 16 ستمبر 2026 کو نئی دہلی میں پرائمری اساتذہ کی تعلیم (پی ٹی ای) میں چھ ماہ کے سرٹیفکیٹ (بریج) کورس کا آغاز کیا۔ یہ کورس بی ایڈ کی ڈگری رکھنے والے زیر ملازمت پرائمری اسکول اساتذہ کے لیے تیار کیا گیا ہے۔ یہ کورس ایسے اساتذہ کے لیے پرائمری سطح پر تدریس کی سند حاصل کرنے کا ایک اہم ذریعہ ثابت ہوگا۔ یہ خصوصی پیشہ ورانہ ترقیاتی پروگرام جامع تربیت فراہم کرے گا، جس سے اساتذہ پرائمری سطح (اول تا پنجم) کے طلبہ کو مؤثر طور پر تعلیم دینے کے لیے ضروری مہارتیں اور صلاحیتیں پیدا کر سکیں گے۔

بریج کورس کا نفاذ نیشنل انسٹی ٹیوٹ آف اوپن اسکولنگ (این آئی او ایس ) کے ذریعے کیا جائے گا اور اس کے تحت اساتذہ کو بچوں پر مرکوز، جامع اور بچوں کی نشوونما کے مطابق تدریسی طریقہ کار سے آراستہ کیا جائے گا، جس سے بنیادی اور پرائمری مراحل میں تعلیم کے معیار کو مزید مستحکم کرنے میں مدد ملے گی۔

نیشنل کونسل فار ٹیچر ایجوکیشن (این سی ٹی ای) کے فریم ورک کے مطابق تیار کیا گیا یہ کورس تعلیمی مطالعے، کم از کم 10 دن کی آن لائن رابطہ کلاسوں اور کم از کم 20 دن کے اسکول میں عملی تجربے کے ذریعے پرائمری سطح کی تدریسی صلاحیتوں کو مضبوط بنائے گا۔

یہ کورس اساتذہ کو چھوٹے بچوں کی متنوع تعلیمی ضروریات پوری کرنے کے قابل بنائے گا۔ چھ نظریاتی کورسز اور اسکول پر مبنی عملی تربیت پر مشتمل یہ پروگرام تعلیمی نظریات کو جماعت میں تدریسی عمل سے جوڑنے کے لیے ایک مضبوط نظام فراہم کرتا ہے۔ برج کورس کا مقصد پرائمری اساتذہ کو ایسی مہارتوں، رویوں اور غور و فکر کی صلاحیتوں سے بااختیار بنانا ہے جو پرائمری جماعتوں میں تمام بچوں کے لیے معیاری تعلیم اور زندگی بھر سیکھنے کو یقینی بنانے کے لیے ضروری ہیں۔ یہ تدریس کو ایک متحرک، حالات کے مطابق اور تحقیق پر مبنی پیشے کے طور پر فروغ دیتا ہے۔

عدالت عظمی نے 08 اپریل 2024 کے اپنے فیصلے، سول اپیل نمبر 5068 آف 2023، بعنوان دیویش شرما بنام  یونین آف انڈیا و دیگر، کے ذریعے این سی ٹی ای کو ان تقرری شدہ افراد کے لیے بریج کورس وضع کرنے کا اختیار دیا تھا، جنہیں پرائمری اساتذہ کے طور پر مقرر کیا گیا تھا لیکن ان کے پاس ڈی ایل ایڈ  کی اہلیت نہیں تھی۔ اسی کے مطابق، 28 جون 2018 سے 11 اگست 2023 کے درمیان بی ایڈ کی ڈگری کے ساتھ پرائمری سطح (جماعت اول تا پنجم) میں تدریس کے لیے مقرر کیے گئے زیر ملازمت پرائمری اسکول اساتذہ کے لیے برج کورس تیار کیا گیا۔ یہ کورس خاص طور پر ان اساتذہ کے لیے ہے جن کی تقرریاں این سی ٹی ای کے گزٹ نوٹیفکیشن F. No. NCTE-Reg. 012/2018 مورخہ 28 جون 2018 کے تحت محفوظ ہیں۔

اس پروگرام میں بنیادی تعلیمی اصولوں پر مبنی نظریاتی اور عملی دونوں اجزا شامل ہیں۔ تدریس کا ذریعہ ہندی اور انگریزی زبانیں ہوں گی۔ تاہم، اساتذہ کو آٹھویں آئینی شیڈول میں درج 22 مقررہ زبانوں میں سے کسی بھی زبان میں عوامی امتحان (نظریاتی) دینے کی اجازت ہوگی۔ یہ کورس او ڈی ایل طریقہ تدریس کے ذریعے کرایا جائے گا۔ کورس میں رابطہ پروگرام، اسکول پر مبنی عملی تربیت (تدریسی مشق، غور و فکر پر مبنی جرنلز، پورٹ فولیوز)، ویڈیو ٹیوٹوریل، ای لرننگ مواد اور ڈیجیٹل پلیٹ فارم شامل ہوں گے۔ اس طریقہ کار سے زیر ملازمت اساتذہ اپنی پیشہ ورانہ ذمہ داریوں کے ساتھ توازن برقرار رکھتے ہوئے کورس کے مواد میں فعال طور پر حصہ لے سکیں گے۔

کورس میں داخلہ آن لائن نیشنل انسٹی ٹیوٹ آف اوپن اسکولنگ (این آئی او ایس) کے سرکاری بریج کورس پورٹل کے ذریعے ہوگا (https://bridge.nios.ac.in)۔ اہل اساتذہ رجسٹریشن کر سکیں گے، مطلوبہ دستاویزات اپ لوڈ کر سکیں گے اور مقررہ ڈیش بورڈ کے ذریعے داخلے کی حیثیت دیکھ سکیں گے۔ کورس کا تمام مواد، بشمول خود سیکھنے کا مواد، ڈیجیٹل شکل میں فراہم کیا جائے گا۔ اساتذہ کو اپنی تعلیمی استعداد بہتر بنانے کے لیے آڈیو/ویڈیو، انٹرایکٹو مواد اور دیگر اضافی وسائل تک آن لائن رسائی بھی حاصل ہوگی۔

*****

ش ح ۔ت ف۔ خ م

U. No.3720