আপোনালোকক অশেষ ধন্যবাদ।

কেন্দ্ৰীয় মন্ত্ৰীসভাৰ মোৰ সহকৰ্মী অশ্বিনী বৈষ্ণৱজী, জিতিন প্ৰসাদজী, উদ্যোগ জগতৰ সকলো নেতৃবৃন্দ, মুখ্য কাৰ্যবাহী বিষয়া, প্ৰতিনিধিসকল আৰু ভাৰ্চুৱেল মাধ্যমেৰে সংযুক্ত হৈ থকা শ শ বিশ্ববিদ্যালয় তথা প্ৰতিষ্ঠানৰ প্ৰতিনিধিসকল—ভাৰতৰ ভৱিষ্যৎ, মোৰ যুৱ বন্ধুসকল।লগতে ইয়াত উপস্থিত থকা বৃহৎ সংখ্যক উৎসাহী যুৱক-যুৱতী, ভগ্নীসকল আৰু ভদ্ৰলোকসকল!

এয়া ছেমিকন ইণ্ডিয়াৰ পঞ্চম সংস্কৰণ।

মই আপোনালোক সকলোকে স্বাগতম জনাইছোঁ।

বিদেশৰ পৰা অহা অতিথিসকলক বিশেষভাৱে স্বাগতম জনাইছোঁ।

বন্ধুসকল,

আজি বিশ্বকৰ্মা জয়ন্তীও।

বিশ্বকৰ্মা জয়ন্তী উপলক্ষে মই দেশবাসীলৈ আন্তৰিক শুভেচ্ছা জ্ঞাপন কৰিছোঁ। আমাৰ পৰম্পৰাত ভগৱান বিশ্বকৰ্মাক নিৰ্মাণ আৰু সৃষ্টিশীল শক্তিৰ প্ৰতীক হিচাপে গণ্য কৰা হয়।আৰু চাওক, কিমান সুন্দৰ সংযোগ—আজি বিশ্বকৰ্মা জয়ন্তীৰ দিনাইছেমিকন ইণ্ডিয়া আৰম্ভ হৈছে।এফালে আমাৰ শতিকাজোৰা সৃষ্টিৰ পৰম্পৰা, আৰু আনফালে একবিংশ শতিকাৰ প্ৰযুক্তি আৰু দূৰদৰ্শী দৃষ্টিভংগী—এয়াই আত্মনিৰ্ভৰ ভাৰত আৰু বিকশিত ভাৰতৰ বাবে আমাৰ প্ৰেৰণা।

বন্ধুসকল,

প্ৰতিগৰাকী নাগৰিকেই বিকশিত ভাৰত গঢ়াৰ বাবে প্ৰতিশ্ৰুতিবদ্ধ।যদি আমি কেৱল যোৱা ১৫টা দিনলৈ লক্ষ্য কৰোঁ—মই আপোনালোকৰ দৃষ্টি কেৱল এই ১৫টা দিনৰ ওপৰতে নিৱদ্ধ  কৰিব বিচাৰিছোঁ—তেন্তে আমি ভাৰত যি দিশ আৰু যি গতিত আগবাঢ়ি আছে, সেয়া স্পষ্টভাৱে দেখিবলৈ পাওঁ।এই ছেপ্টেম্বৰ মাহত, মাত্ৰ ১০ দিন পূৰ্বে মুম্বাইত গ্ল’বেল ফিনটেক ফেষ্ট অনুষ্ঠিত হৈছিল। তাত এজেণ্টিক এআই, টোকেনাইজেচন আৰু কোৱাণ্টাম প্ৰযুক্তিৰ জৰিয়তে সৰ্বাংগীন বিত্তীয় অন্তৰ্ভুক্তিৰ বিষয়ে আলোচনা কৰা হৈছিল।একে সময়ছোৱাতে ভাৰতত প্ৰায় ৩,০০০ কিলোমিটাৰ দৈৰ্ঘ্যৰ ডেডিকেটেড ফ্ৰেইট কৰিড’ৰ সম্পূৰ্ণৰূপে কাৰ্যক্ষম হৈ উঠিছে।মই ছেপ্টেম্বৰৰ এই ১০টা দিনৰ কথাহে কৈছোঁ, বহু দিন আগৰ  কথা নহয়। ইয়াৰ ফলত দেশত সামগ্ৰী পৰিবহণৰ গতি বৃদ্ধি পাব, লজিষ্টিক ব্যৱস্থা উন্নত হ’ব আৰু উৎপাদন খণ্ডই নতুন শক্তি লাভ কৰিব।

বন্ধুসকল,

এই একে সময়ছোৱাতে, এই ছেপ্টেম্বৰ মাহতেই ভাৰতৰ ত্ৰৈমাসিক জিডিপিৰ প্ৰতিবেদন প্ৰকাশ পাইছে।এই প্ৰত্যাহ্বানপূৰ্ণ সময়ছোৱাতো ভাৰতে ৭.৮ শতাংশ অৰ্থনৈতিক বৃদ্ধি অৰ্জন কৰিছে।একেটা সময়তে জাপানৰ ঋণমান নিৰ্ধাৰণকাৰী সংস্থাই ভাৰতৰ সাৰ্বভৌম ঋণমান উন্নীত কৰিছে।এয়া  প্ৰায় তিনি দশকৰ পিছত—প্ৰায় ৩৫ বছৰৰ পিছত—ঘটিছে।অৰ্থাৎ, এফালে ভাৰতৰ অৰ্থনীতি বৃদ্ধি পাইছে আৰু আনফালে ভাৰতৰ ওপৰত বিশ্বৰ আস্থাও বৃদ্ধি পাইছে।

বন্ধুসকল,

এই আস্থাৰ আন এটা বৃহৎ প্ৰতিফলন মাত্ৰ তিনি দিন পূৰ্বে অনুষ্ঠিত ব্ৰিকছ সন্মিলনত দেখা গৈছিল।ভাৰতে সফলতাৰে এই সন্মিলনখন আয়োজন কৰিছিল।সৰ্বসন্মতিক্ৰমে ‘নতুন দিল্লী ঘোষণাপত্ৰ’ গ্ৰহণ কৰাটোও বিশ্বৰ ভাৰতৰ ওপৰত থকা আস্থাৰ এক বৃহৎ প্ৰমাণ।

বন্ধুসকল,

ভাৰতৰ এই সফলতাসমূহৰ মাজত ছেমিকন ইণ্ডিয়া অনুষ্ঠানটোৰ গুৰুত্ব আৰু অধিক বৃদ্ধি পাইছে।ইয়াৰ প্ৰথম সংস্কৰণ ২০২২ চনত অনুষ্ঠিত হৈছিল।তেতিয়াৰ পৰা আমি প্ৰতি বছৰে মিলিত হৈ আহিছোঁ, কিন্তু প্ৰতি বছৰে আমাৰ আলোচনাৰ বিষয় সলনি হৈছে।প্ৰথম সংস্কৰণত আমি নীতিৰ বিষয়ে আলোচনা কৰিছিলোঁ।পৰৱৰ্তী সংস্কৰণসমূহত আলোচনা আৰু আগবাঢ়িল।আমি প্ৰকল্পৰ বিষয়ে আলোচনা কৰিবলৈ আৰম্ভ কৰিলোঁ—ফাইলত স্বাক্ষৰ কৰাৰ পৰা আৰম্ভ কৰি আধাৰশিলা স্থাপনলৈকে।যোৱা বছৰ আমি পাইলট লাইন আৰু টেষ্ট চিপৰ বিষয়ে আলোচনা কৰিবলৈ আৰম্ভ কৰিছিলোঁ।ভাৰতৰ ইউনিটসমূহৰ পৰা প্ৰথম নমুনাসমূহ কেনেদৰে ওলাই আহিবলৈ আৰম্ভ কৰিছিল—সেই বিষয়েও আলোচনা কৰা হৈছিল।চলিত বৰ্ষত আমি বাণিজ্যিক উৎপাদনৰ বিষয়ে আলোচনা কৰি আছোঁ।এতিয়া ভাৰতৰ কাৰখানাসমূহৰ পৰা চিপ ওলাই আহিছে আৰু ভাৰত তথা বিশ্বৰ গ্ৰাহকৰ ওচৰলৈ গৈ আছে। মাত্ৰ এতিয়াই মহালি আৰু চুৰাটত আৰু দুটা কাৰখানাত বাণিজ্যিক উৎপাদন আৰম্ভ হৈছে।মই তেওঁলোককো অভিনন্দন জনাইছোঁ।

বন্ধুসকল,

যিকোনো দেশৰ বাবে ইমান কম সময়ৰ ভিতৰতে এই পৰ্যায়ত উপনীত হোৱাটো সহজ নহয়।এয়া এনে এটা খণ্ড নহয় য’ত আপুনি এটা কাৰখানা স্থাপন কৰিলেই কাম শেষ হৈ যায়।প্ৰযুক্তিগত সক্ষমতা গঢ়ি তুলিবলৈ কেইবা দশক সময়ৰ প্ৰয়োজন হয়।বিশ্বৰ যিবোৰ ঠাইত অৰ্ধপৰিবাহী উদ্যোগৰ পৰিৱেশ গঢ়ি উঠিছে, সেইবোৰো কেইবা দশকৰ প্ৰচেষ্টাৰ পিছতহে প্ৰস্তুত হৈছে।কিন্তু আপোনালোকৰ সহযোগত ভাৰতে একে সময়তে চিপ ডিজাইন, উৎপাদন, সঁজুলি নিৰ্মাণ, কেঁচামালৰ পৰিৱেশ, পৰীক্ষণৰ সক্ষমতা—এই সকলো ক্ষেত্ৰতে কাম কৰি সফলতা প্ৰদৰ্শন কৰিছে।এই যাত্ৰাত উদ্যোগ জগতৰ নেতৃবৃন্দ, আপোনালোকেই হৈছে মুখ্য অংশীদাৰ।ভাৰতৰ সফলতাৰ আপোনালোকেই স্তম্ভ, আৰু আমাৰ এই যাত্ৰাৰ আপোনালোকেই অংশীদাৰ।

বন্ধুসকল,

অৰ্ধপৰিবাহী উদ্যোগত এটা শব্দ আছে—“টেপ-আউট”।চিপৰ ডিজাইন সম্পূৰ্ণ হোৱাৰ পিছত যিদিনা ইয়াক উৎপাদনৰ বাবে প্ৰেৰণ কৰা হয়, সেই দিনটোক ‘টেপ-আউট’ বুলি কোৱা হয়।কিন্তু টেপ-আউটৰ পিছত কাম শেষ নহয়।সেই একেটা দিনতে পৰৱৰ্তী সংস্কৰণৰ ওপৰত কাম আৰম্ভ হয়। ভাৰতেও একেটা কামেই কৰি আছে।ভাৰতে অৰ্ধপৰিবাহী অভিযানৰ দ্বিতীয় পৰ্যায় আৰম্ভ কৰিছে।আমাৰ প্ৰথম পৰ্যায়ৰ আকাৰ আছিল প্ৰায় ৮ বিলিয়ন ডলাৰ, আনহাতে দ্বিতীয় পৰ্যায়ৰ বাবে আমি ১৩.৫ বিলিয়ন ডলাৰ নিৰ্ধাৰণ কৰিছোঁ।‘সংস্কাৰ এক্সপ্ৰেছ’ৰ পথত আগবাঢ়ি আমি এই খণ্ডতো অধিক সংস্কাৰ সাধন কৰিছোঁ।এতিয়া আন্তঃৰাষ্ট্ৰীয় কোম্পানীসমূহেও আমাৰ ষ্টাৰ্ট-আপ, ভাৰতীয় ডিজাইন কোম্পানী আৰু অ’চিআই-স্বত্বাধিকাৰী কোম্পানীসমূহৰ সৈতে সহযোগিতা কৰিব পাৰিব।অৰ্থাৎ, নীতি, পুঁজি, নিয়ামক কাঠামো—আপোনালোকৰ প্ৰকল্প সফল কৰাৰ বাবে যিয়েই প্ৰয়োজন নহওক কিয়, ভাৰত চৰকাৰে তাৰ বাবে প্ৰতিটো পদক্ষেপ গ্ৰহণ কৰি আছে।

বন্ধুসকল,

আমাৰ প্ৰচেষ্টা হৈছে ভাৰতত ফেবলেছ কোম্পানীসমূহৰ বিকাশ হওক আৰু বৌদ্ধিক সম্পত্তিৰ সৃষ্টিও ভাৰততে হওক।বিভিন্ন প্ৰকাৰৰ যৌগিক অৰ্ধপৰিবাহী নিৰ্মাণেই হওক, ছিলিকন ফটনিক্সক অৰ্ধপৰিবাহী পৰিৱেশৰ অংশ কৰি তোলাই হওক, অথবা কৃত্ৰিম বুদ্ধিমত্তাৰ বাবে প্ৰয়োজনীয় আন্তঃগাঁথনি সক্ষম কৰি তোলাই হওক—এই সকলোবোৰেই প্ৰয়োজনীয়।আৰু এই দিশত আমি সকলোৱে একেলগে আগবাঢ়িব লাগিব।ইয়াৰ বাবে প্ৰয়োজনীয় ভেটি ইতিমধ্যে প্ৰস্তুত কৰা হৈছে।ভাৰতে যোগান শৃংখল শক্তিশালী কৰাৰ ওপৰতো যথেষ্ট গুৰুত্ব আৰোপ কৰিছে।ইয়াৰ বাবে বহুতো সংস্কাৰ সাধন কৰা হৈছে।ইয়াত উপস্থিত সঁজুলি নিৰ্মাণ কোম্পানীসমূহৰ নেতৃবৃন্দক মই কওঁ—এই সুযোগৰ সুবিধা গ্ৰহণ কৰাত পিছ পৰি নাথাকিব।ৰাসায়নিক পদাৰ্থ, গেছ আৰু কেঁচামালৰ ক্ষেত্ৰৰ নেতৃবৃন্দৰ বাবেও ভাৰতত সোণালী সুযোগ অপেক্ষা কৰি আছে।আমি সমগ্ৰ পৰিৱেশটো একেলগে বিকশিত হোৱাটো বিচাৰোঁ।ইয়াৰ বাবে চাহিদাও সাজু হৈ আছে।এতিয়ালৈকে ১২টা প্ৰকল্পত অনুমোদন জনোৱা হৈছে, আৰু পৰৱৰ্তী পৰ্যায়ত ইয়াৰ পৰিসৰ আৰু অধিক সম্প্ৰসাৰিত হ’ব।

বন্ধুসকল,

ভাৰতত আপোনালোক সকলোৰে বাবে আন এটা ডাঙৰ সুবিধা হৈছে যুৱশক্তি—প্ৰতিভাৱান আৰু দক্ষ মানৱ সম্পদ।আজি আমাৰ দেশত অভিযান্ত্ৰিক প্ৰতিভাৰ এক বিশাল ভাণ্ডাৰ আছে।ভাৰতত হাজাৰ হাজাৰ অভিযান্ত্ৰিক মহাবিদ্যালয় আছে আৰু প্ৰতি বছৰে দেশত লাখ লাখ অভিযন্তা সৃষ্টি হয়।এবাৰ এটা আমেৰিকান কোম্পানীৰ এজন ব্যক্তি মোক সাক্ষাৎ কৰিবলৈ আহিছিল।তেওঁ কৈছিল, “যদি আমি আমাৰ দেশত অভিযন্তা নিয়োগ কৰিব বিচাৰোঁ, তেন্তে আমি তেওঁলোকক মাতি আনি এটা কোঠাতে সকলোকে বহুৱাব পাৰোঁ।কিন্তু ভাৰতত যদি আমি অভিযন্তাসকলক মাতোঁ, তেন্তে এখন ফুটবল খেলপথাৰো সৰু হৈ পৰিব।”এয়াই ভাৰতৰ শক্তি।

বন্ধুসকল,

চিপ ডিজাইনৰ বাবে বৃহৎ পৰিসৰত দক্ষতা বিকাশৰ কাম চলি আছে।ইয়ালৈ অহাৰ ঠিক আগতে এই চৌহদতে মই উদ্যোগ জগতৰ কেইগৰাকীমান যুৱ বন্ধুক লগ পাইছিলোঁ—তেওঁলোক সকলোৱেই শিক্ষাৰ্থী।এই শিক্ষাৰ্থীসকলে নিজে ডিজাইন কৰা চিপ মোক উপহাৰ দিছিল।আমাৰ চৰকাৰে অৰ্ধপৰিবাহী উদ্যোগৰ বাবে এক লাখ অভিযান্ত্ৰিক শিক্ষাৰ্থীক প্ৰশিক্ষণ দিয়াৰ লক্ষ্য নিৰ্ধাৰণ কৰিছে।আৰু আপোনালোকক যেনেদৰে কোৱা হৈছে, আমি ইতিমধ্যে ৭০,০০০ৰো অধিক যুৱক-যুৱতীক প্ৰশিক্ষণ দিছোঁ।ইমান বৃহৎ প্ৰতিভাৰ ভাণ্ডাৰ আপোনালোক সকলোৰে বাবে সোণৰ খনিৰ তুলনাত কোনো গুণে কম নহয়।

বন্ধুসকল,

চৰকাৰৰ এই প্ৰচেষ্টাসমূহৰ মাজতে আজি মই যুৱসমাজৰ প্ৰতিও আহ্বান জনাব বিচাৰোঁ।ভাৰতত গৱেষণা কৰি থকা যুৱ প্ৰতিভাসকলে আগবাঢ়ি আহিব লাগে।বিদেশত গৱেষণা কৰি থকা যুৱক-যুৱতীসকলেও ভাৰতত উন্নত প্ৰযুক্তিৰ বিকাশৰ সৈতে সংযুক্ত হ’ব লাগে।মই উদ্যোগ জগতৰ নেতৃবৃন্দক দেশত গৱেষণা আৰু উন্নয়নমূলক কামৰ নেতৃত্ব ল’বলৈ আহ্বান জনাইছোঁ।ইয়াৰ ফলত উদ্যোগ জগত লাভাৱান্বিত হ’ব আৰু লগতে ভাৰতৰ যুৱশক্তিও অধিক শক্তিশালী হ’ব।

বন্ধুসকল,

দ্ৰুতগতিত আগবাঢ়ি থকা অৰ্ধপৰিবাহী উদ্যোগটোৱে কিছুমান প্ৰত্যাহ্বানৰো সন্মুখীন হৈছে, যিবোৰৰ বিষয়ে আপোনালোক সকলোৱেই অৱগত।বছৰ বছৰ ধৰি আপোনালোকৰ উদ্যোগত ট্ৰেঞ্জিষ্টৰৰ আকাৰৰ বিষয়ে আলোচনা হৈ আহিছে।ট্ৰেঞ্জিষ্টৰৰ আকাৰ সৰু হৈ অহাৰ লগে লগে কম্পিউটিং অধিক দ্ৰুত আৰু কাৰ্যক্ষম হৈ পৰিছে।আজিও এই প্ৰশ্নটো গুৰুত্বপূৰ্ণ।কিন্তু কৃত্ৰিম বুদ্ধিমত্তাৰ আগমনৰ লগে লগে এই উদ্যোগৰ সন্মুখত কিছুমান নতুন প্ৰশ্নৰো সৃষ্টি হৈছে।যোৱা দুটা বছৰত বিশ্বৰ অৰ্ধপৰিবাহী বজাৰ ২০ শতাংশতকৈ অধিক বৃদ্ধি পাইছে।আৰু এই বৃদ্ধিৰ এক বৃহৎ অংশ কৃত্ৰিম বুদ্ধিমত্তাই সৃষ্টি কৰা চাহিদাৰ ফলত হৈছে।অৰ্থাৎ, আজি আপুনি যদি কৃত্ৰিম বুদ্ধিমত্তাৰ ওপৰত কাম কৰি আছে, তেন্তে প্ৰত্যাহ্বান কেৱল চিপৰ ভিতৰত কি আছে সেইটোতে সীমাবদ্ধ নহয়, চিপটোৰ চৌপাশে কি ঘটিছে সেয়াও গুৰুত্বপূৰ্ণ।মেম’ৰীক প্ৰচেছৰৰ ওচৰলৈ অনা, বহুতো চিপ এনেদৰে সংযোগ কৰা যাতে সেইবোৰে এটা একক ব্যৱস্থা হিচাপে একেলগে কাম কৰে, কোনো বিলম্ব নোহোৱাকৈ বিপুল পৰিমাণৰ তথ্য এঠাইৰ পৰা আন ঠাইলৈ স্থানান্তৰ কৰা, তাপ আৰু শক্তি নিয়ন্ত্ৰণ কৰা—এইবোৰ অৰ্ধপৰিবাহী উদ্যোগৰ সন্মুখত থকা বহুতো প্ৰত্যাহ্বান।এই প্ৰত্যাহ্বানসমূহৰ মাজতে বিশ্বক এতিয়া আটাইতকৈ বেছি প্ৰয়োজন নতুন আৰু নিৰ্ভৰযোগ্য উৎপাদনস্থলীৰ। ভাৰত—মই আপোনালোকক আশ্বাস দিছোঁ—ভাৰতে ইয়াৰ বাবে নিজকে নিৰন্তৰ প্ৰস্তুত কৰি আছে।

বন্ধুসকল,

আজিৰ অৰ্ধপৰিবাহী উদ্যোগৰ সন্মুখত থকা আন এটা গুৰুত্বপূৰ্ণ বিষয় হৈছে শক্তিৰ নিৰাপত্তা।কৃত্ৰিম বুদ্ধিমত্তাৰ বাবে নিৰ্মাণ কৰা চিপসমূহ এআই ডাটা চেণ্টাৰত ব্যৱহাৰ কৰা হয়।এই ডাটা চেণ্টাৰসমূহত হাজাৰ হাজাৰ উচ্চ-কাৰ্যক্ষমতাসম্পন্ন প্ৰচেছৰ একেলগে কাম কৰে আৰু বিপুল পৰিমাণৰ তথ্য প্ৰক্ৰিয়াকৰণ কৰে।এআইৰ সম্প্ৰসাৰণৰ লগে লগে কম্পিউটিং শক্তিৰ প্ৰয়োজনীয়তাও একে গতিতে বৃদ্ধি পাব।আৰু কম্পিউটিং শক্তি বৃদ্ধি পোৱাৰ লগে লগে বিদ্যুতৰ প্ৰয়োজনীয়তাও বৃহৎ পৰিমাণে বৃদ্ধি পাব।সেয়েহে শক্তি খণ্ডত বিনিয়োগ অতি গুৰুত্বপূৰ্ণ।আমাৰ কাৰখানাসমূহ য’তেই অৱস্থিত নহওক কিয়, তাত প্ৰয়োজনৰ সময়ত পৰ্যাপ্ত পৰিমাণৰ বিদ্যুৎ সময়মতে উপলব্ধ হোৱাটো অতি গুৰুত্বপূৰ্ণ।সেইবাবেই আজি ভাৰতে শক্তি খণ্ডত বৃহৎ পৰিমাণৰ বিনিয়োগ কৰি আছে।যোৱা এটা দশকত আমাৰ স্থাপিত সৌৰশক্তি উৎপাদন ক্ষমতা প্ৰায় ২ গিগাৱাটৰ পৰা ১৬০ গিগাৱাটতকৈও অধিকলৈ বৃদ্ধি পাইছে—২ৰ পৰা ১৬০ গিগাৱাট।পাৰমাণৱিক শক্তিৰ ক্ষেত্ৰতো আমি দ্ৰুতগতিত আগবাঢ়ি আছোঁ।এই খণ্ডটো ব্যক্তিগত অংশীদাৰসকলৰ বাবেও মুকলি কৰা হৈছে।আমি সৰু মডিউলাৰ ৰিয়েক্টৰ বা ক্ষুদ্ৰ মডিউলাৰ পাৰমাণৱিক ৰিয়েক্টৰৰ বিষয়তো  কাম কৰি আছোঁ।যোৱা এটা দশকত ভাৰতে নিজৰ বিদ্যুৎ সঞ্চালন নেটৱৰ্কো সম্প্ৰসাৰিত কৰিছে।

বন্ধুসকল,

ভাৰতত শক্তি আন্তঃগাঁথনিৰ এই সম্প্ৰসাৰণ আমাৰ অৰ্ধপৰিবাহী পৰিৱেশৰ বাবেও এক বৃহৎ শক্তি।অৰ্ধপৰিবাহী উদ্যোগৰ বাবে ভাৰতক এক পছন্দৰ গন্তব্যস্থান হিচাপে গঢ়ি তুলিবলৈ প্ৰয়োজনীয় প্ৰতিটো পদক্ষেপ ভাৰতে গ্ৰহণ কৰি আছে।

বন্ধুসকল,

ভাৰত হৈছে গণতন্ত্ৰৰ জননী।মাত্ৰ কেইবছৰমান পূৰ্বে আমাৰ সংবিধানে ৭৫ বছৰ সম্পূৰ্ণ কৰিছে।এনে এখন দেশে যেতিয়া কোনো গুৰুত্বপূৰ্ণ উদ্যোগত সফলতা অৰ্জন কৰে, তেতিয়া ই সমগ্ৰ বিশ্বৰ যোগান শৃংখলক শক্তিশালী কৰে। আজি যেতিয়া যোগান শৃংখলক অস্ত্ৰ হিচাপে ব্যৱহাৰ কৰা হৈছে, তেতিয়া ইয়াৰ গুৰুত্ব আৰু অধিক বৃদ্ধি পাইছে।ভাৰতত সংঘটিত হৈ থকা এই উন্নয়নসমূহ আমি এই বৃহত্তৰ পৰিপ্ৰেক্ষিতৰ পৰা চাব লাগিব।ভাৰতৰ আকাংক্ষা আপোনালোকৰ সন্মুখত আছে, আৰু ভাৰতত সৃষ্টি হোৱা নতুন সুযোগসমূহে আপোনালোকক আদৰণি জনাবলৈ সাজু হৈ আছে।আকৌ এবাৰ, এই অনুষ্ঠানৰ বাবে আপোনালোক সকলোকে আন্তৰিক অভিনন্দন জনাইছোঁ।

অশেষ ধন্যবাদ।

******

MJPS/SS/VJ/ST/DM