য়াম্না থাগৎচরি।

কেন্দ্রগী কেবিনেত্তা থৌ পুমিন্নরিবা ঐগী মরুপশিং, অশ্বিনী বৈস্নব জী, জীতিন প্রসাদা জী, ইন্দস্ত্রীগী লুচিংবা পুম্নমক, সি.ই.ও.শিং (CEOs), মীহুৎশিং, অমসুং ভর্চ্যুৱল ওইনা শরুক য়ারিবা য়ুনিভর্সিতী অমসুং ইন্সতিত্যুত চা কয়া - ভারতকী তুংলমচৎ ওইরিবা ঐহাক্কী নহা ওইরিবা মরুপশিং। অমসুং মফম অসিদা তিল্লিবা, থৱায় য়াওরিবা নহা কয়া, ইবুংঙো অমসুং ইবেম্মশিং!

মসি সেমিকোন ইন্দিয়াগী মঙাশুবা এদিসন্নি। ঐহাক্না ময়াম পুম্নমকপু তরাম্না ওকচরি। ঐহাক্না মপান লৈবাক্তগী লাকখিবা মীথুংলেনশিংদা অখন্ননা তরাম্না ওকচরি।

মরুপশিং,

ঙসিদি বিস্বকর্মা জয়েন্তীসু ওইরি। বিস্বকর্মা জয়েন্তীগী থৌরমদা ঐহাক্না লৈবাক মীয়াম পুম্নমক্তা য়াইফ-পাউজেল পীজরি। ঐখোয়গী চৎন-পথাপতা, লাইনিংথৌ বিস্বকর্মবু শেমগৎপা অমসুং শেম-শাবগী শক্তিগী মহুৎ শিল্লবা খুদম অমা ওইনা লৌই। অমসুং তাঞ্জা অসি য়েংবীয়ু - সেমিকোন ইন্দিয়াসু ঙসিদগী হৌরে। অমরোমদা, ঐখোয়গী চহিচা কয়া শুরবা শেমগৎ-শাগৎপগী চৎন-পথাপ, অমসুং অতোপ্পা অমরোমদনা, ২১শুবা চহিচাগী তেক্নোলোজী অমসুং মঙলান - মসি ঐখোয়গী আত্মনির্ভর ভারত, ভিক্সিত ভারতকী ইথিলনি।

মরুপশিং,

মীয়াম খুদিংমক্না চাউখৎপা ভারত অমা শেমগৎনবগী ফিরেপ লৌরি। করিগুম্বা ঐখোয়না হৌখিবা নুমিৎ ১৫ খক্তা য়েংলবদি - ঐহাক্না ময়ামগী মীৎয়েং অদু নুমিৎ ১৫ খক্তদা চিংশিঞ্জরি - ভারতনা মাংলোমদা চংশিল্লিবা মাইকৈ অমসুং খোঙজেল অদু ঐখোয়না উবা ফংগনি। সেপ্তেম্বর থা অসিদা, নুমিৎ ১০ খক্তগী মমাংদা, মুম্বাইদা গ্লোবেল ফিনতেক ফেস্ত পাংথোকখি। মফম অদুদা এজেন্তীক এ.আই., তোকনাইজেসন, অমসুং ক্বান্তম তেক্নোলোজীশিংগী খুত্থাংদা ইনক্লুসিব ফাইনান্সকী মতাংদা খন্ন-নৈনখি। মতম অসিগী মনুংদা, ভারত্তা কিলোমিতর ৩,০০০ রোম শাংবা দেদিকেতেদ ফ্রেত কোরিদোর মপুং ফানা থবক হৌখি। ঐহাক্না সেপ্তেম্বরগী নুমিৎ ১০ গী মতাংদা ৱা ঙাংলি, য়াম্না কুইদ্রিবা মতমনি। মসিনা লৈবাক অসিদা ফ্রেত চত্থোক-চৎশিন তৌবা য়াংখৎহনগনি, লোজীস্তিক্স  ফগৎহনগনি, অমসুং মেন্যুফেকচরিংদা অনৌবা পাঙ্গল পীগনি।

মরুপশিং,

মতম অসিদা, সেপ্তেম্বর অসিদগী, ভারতকী ক্বাতর্লী জী.দি.পি. রিপোর্ত থোক্লকখি। অমসুং অসিগুম্বা অরুবা মতম অসিদফাওবা, ভারতনা চাদা ৭.৮ গী গ্রোথ ফংখি। অমসুং মতম অসিগী মনুংদা, জপানগী ক্রেদিত রেতিং এজেন্সীনা ভারতকী সোভরেইন রেতিং ৱাংখৎহনখি। অমসুং মসি চহি তরাগী খুজিং অহুমগী মতুংদা থোকপনি - চহি ৩৫ রোমগী মতুংদা। মসিগী অর্থদি, অমরোমদা ভারতকী ইকোনোমী চাউখৎলি, অমসুং অতোপ্পা অমরোমদনা, ভারত্তা থম্বা মালেমগী থাজবসু হেনগৎলক্লি।

মরুপশিং,

থাজবা অসিগী অতোপ্পা চাউরবা মমি অমা নুমিৎ অহুমগী মমাংদা ব্রিক্স সম্মিত্তা উবা ফংখি। ভারতনা সম্মিত অসি মাইপাক্না পাংথোকখি। নই দিল্লী দেক্লারেসনবু ময়াম পুম্বনা ৱারেপ অমদা লৌখিবা অসি ভারত্তা মালেম্না থম্লিবা থাজবগী অতোপ্পা অচৌবা খুদম অমনি।

মরুপশিং,

ভারতকী মাইপাকপশিং অসিগী মরকসিদা, সেমিকোন ইন্দিয়াগী থৌরম অসি হেন্না মরুওইবা ওইরক্লি। মসিগী অহানবা এদিসন অদু ২০২২দা পাংথোকখি। মতম অদুদা হৌনা ঐখোয়না চহি খুদিংগী উন্নরি, অদুবু চহি খুদিংগী ঐখোয়গী খন্ন-নৈনবগী হিরম অদু হোংলক্লি। অহানবা এদিসনদা, ঐখোয়না পোলিসীগী মতাংদা ৱা ঙাংখি। মথংগী এদিসনশিংদা, খন্ন-নৈনবা অদু মাংলোমদা চংশিনখি। ঐখোয়না প্রোজেক্তশিংগী মতাংদা ৱা ঙাংবা হৌখি - ফাইলশিংদা খুৎয়েক পীনবদগী হৌরগা উরেপ-উয়ুং তম্বফাওবা। মমাং চহিদা ঐখোয়না পাইলোত লাইনশিং অমসুং তেস্ত চিপশিংগী মতাংদা খন্ন-নৈনবা হৌখি। ভারতকী য়ুনিৎশিংদগী অহানবা সেম্পলশিং করম্না থোক্লকপা হৌখিবগে - মসি খন্নখি। অমসুং চহি অসিদা, ঐখোয়না কমর্সিয়েল ওইনা পুথোকপগী মতাংদা ৱা ঙাংলি। হৌজীক চিপশিং অসি ভারতকী প্লান্তশিংদগী থোক্লক্লি অমসুং ভারত অমসুং মালেমগী কস্তমরশিংদা য়ৌরি। অমসুং হৌজীক্কী ওইনদি, মোহালি অমসুং সুরত্তা অতোপ্পা প্লান্ত অনিনসু কমর্সিয়েল ওইনা পুথোকপা হৌরে। মখোয়বুসু ঐহাক্না নুংঙাইবা ফোংদোকচরি।

মরুপশিং,

লৈবাক অমগী ওইনদি, অসিগুম্বা অতেনবা মতম অসিদা থাক অসিফাওবা য়ৌবা হায়বসি অরাইবা নত্তে। মসি ফেক্তরী অমা লিংখৎলগা থবক লোইবা সেক্তর অমা নত্তে। তেক্নোলোজীগী ওইবা মতিকশিং শেমগৎপদা চহি তরাগী খুজিং কয়া চংই। মালেমদা সেমিকন্দক্তরগী ইকোসীস্তেমশিং শেমগৎখিবা মফম খুদিংমক্তা, মখোয় অদু চহি তরাগী খুজিং কয়াগী হোৎনজবগী মতুংদা শেম-শাখিবনি। অদুবু ভারতনা, ময়ামগী তেংবাংগা লোয়ননা, চিপ দিজাইন, মেন্যুফেকচরিং, ইক্বিপমেন্ত মেন্যুফেকচরিং, মেতরিয়েলগী ইকোসীস্তেম, তেস্তিংগী মতিক-ময়াই - অসি পুম্নমক্তা অমত্তা ওইনা থবক তৌখি অমসুং মাইপাকপা উৎখ্রে। খোঙচৎ অসিদা, অদোম ইন্দস্ত্রীগী লুচিংবশিংনা অচৌবা স্তেকহোল্দরশিং ওইখ্রে। ময়াম্না ভারতকী মাইপাকপগী য়ুম্বীশিংনি, ময়াম্না ঐখোয়গী খোঙচৎ অসিগী পার্তনরশিংনি।

মরুপশিং,

সেমিকন্দক্তরগী ইন্দস্ত্রীদা, ৱাহৈ অমা লৈ - "তেপ-আউত" ("tape-out")। মসিদি চিপ অমা, দিজাইন লোইশিল্লবা মতুংদা, প্রদক্সন তৌনবা চত্থোকপা নুমিৎ অদুবু খঙনৈ। অদুবু তেপ-আউতকী মতুংদা থবক লেপ্তে। নুমীৎ অদুদা, মথংগী ভর্সনগী থবক হৌই। অমসুং ভারতনসু অদুম্মক তৌরি। ভারতনা সেমিকন্দক্তর মিসনগী অনিশুবা তাঙ্কক হৌখ্রে। ঐখোয়গী অহানবা তাঙ্কক্কী সাইজ অদু দোল্লর বিলিয়ন ৮ রোম ওইখি, অদুগা অনিশুবা তাঙ্কক অসি ঐখোয়না দোল্লর বিলিয়ন ১৩.৫ দা লেপখ্রে। রিফোর্ম এক্সপ্রেসতা মাংলোমদা চংশিল্লদুনা, ঐখোয়না সেক্তর অসিদা অহেনবা রিফোর্মশিং পুরকখ্রে। হৌজিক মালেমগী কম্পেনীশিংনসু ঐখোয়গী স্তার্তঅপশিং, ভারতকী দিজাইন কম্পেনীশিং, অমসুং ও.সি.আই.না (OCI) মপু ওইবা কম্পেনীশিংগা লোয়ননা থবক তৌমিন্নবা য়াগনি। মসিগী অর্থদি পোলিসীশিং ওইরবসু, ফন্দশিং ওইরবসু, রেগ্যুলেতরী ফ্রেমৱার্কশিং ওইরবসু - অদোমগী প্রোজেক্তশিংগী মাইপাকপগীদমক মথৌ তাবা খুদিংমক, ভারত লৈঙাক্না খোঙথাং খুদিংমক লৌখৎলি।

মরুপশিং,

ঐখোয়গী পান্দমদি ফেবলেস কম্পেনীশিং ভারততা চাউখৎহনবা, অমসুং ইন্তেলেক্যুৱল প্রোপর্তী শেম্বসু ভারততা ওইহনবনি। তোঙান-তোঙানবা মখলগী কম্পাউন্দ সেমিকন্দক্তরশিং শেম্বা ওইরবসু, সিলিকোন ফোতোনিক্সপু ইকোসীস্তেমগী শরুক অমা ওইহনবা ওইরবসু, নত্ত্রগা এ.আই.গীদমক ইনফ্রাস্ত্রকচর শেমগৎপা ওইরবসু - মসি পুম্নমক মথৌ তাই। অমসুং মাইকৈ অসিদা, ঐখোয় পুনমিন্ননা মাংলোমদা চংশিনগদবনি। মসিগীদমক মথৌ তাবা য়ুম্ফম অদু মমাংদগী শেম-শাখ্রে। ভারতনা সপ্লাই চেনশিং মপাঙ্গল কনখৎহন্বদসু য়াম্না মীৎয়েং থম্লি। মসিগীদমক রিফোর্ম কয়া অমা তৌখ্রে। মফম অসিদা তিল্লিবা ইক্বুইপমেন্ত কম্পেনীশিংগী লুচিংবশিংদা, ঐহাক্না হায়জরি - মসিগী কান্নবা লৌবদা মতুং হুন্দুনা লৈহৌগনু। কেমিকেল, গ্যাস, অমসুং মেতরিএলগী লুচিংবশিংগীদমকসু, ভারত্তা  খুদোংচাবশিংনা ঙাইদুনা লৈরি। ঐখোয়না মপুং ফাবা ইকোসীস্তেম অমা পুন্না চাউখৎহনবা পাম্মি। মসিগীদমক, দিমান্দগী পাইপলাইনসু শেম-শারে। হৌজীক ফাওবদা, প্রোজেক্ত ১২ অয়াবা পীখ্রে, অমসুং মথংগী তাঙ্কক্তা মসিদগী হেন্না পাক-চাউনা চাউখৎকনি।

মরুপশিং,

ভারত্তা ময়াম পুম্নমক্কীদমক অতোপ্পা কান্নবা অমনা মফম অসিদা লৈরিবা লমদম অসিগী নহাশিং অসিনি – তেলেন্ত লৈরবা, হৈ-শিংবা মেনপাৱর। ঙসি ঐখোয়দা ইঞ্জিনীয়রিং তেলেন্তকী য়াম্না চাউরবা পুল অমা লৈরি। ভারত্তা ইঞ্জিনীয়রিং কোলেজ লিশিং কয়া লৈ, অমসুং চহি খুদিংগী ভারতনা ইঞ্জিনীয়র লাখ কয়া পুথোক্লি। অমুক্তংদি, অমেরিকাগী কম্পেনী অমগী মীওই অমা ঐহাক্কা উন্ননবা লাকখি। মহাক্না হায়খি, "ঐখোয়গী লৈবাক্তা ঐখোয়না ইঞ্জিনীয়রশিং রেক্রুত তৌবা পাম্লবদি, ঐখোয়না মখোয়বু কৌই, অমসুং মখোয় পুম্নমক কা অমদা পুল্লপ চল্লি। অদুবু ভারত্তদি, ঐখোয়না ইঞ্জিনীয়রশিংবু কৌরবদি, ফুতবোলগী ফিল্দ অমা ফাওবা য়াম্না পীকই।" মসি ভারতকী পাঙ্গলনি।

অমসুং মরুপশিং,

চিপ দিজাইনিংগীদমক, অচৌবা থাক্তা স্কিলিংগী থবক চত্থরি। মফম অসিদা লাক্ত্রিঙৈগী মমাংদা, ঐহাক্না কেম্পস অসিদা ইন্দস্ত্রীদগী লাকপা নহা ওইরিবা মরুপ খরগা উন্নখি - পুম্নমক মহৈরোইশিংনি। মহৈরোইশিং অসিনা মখোয় মশামক্না দিজাইন তৌবা চিপশিং ঐহাক্তা খুদোল পোৎ ওইনা পীখি। ঐখোয়গী লৈঙাক্না সেমিকন্দক্তর ইন্দস্ত্রীগীদমক ইঞ্জিনীয়রিংগী মহৈরোই লাখ অমা ত্রেনিং পীনবা পান্দম অমা থম্লি। অমসুং অদোমদা হায়খিবগুম্না, ঐখোয়না মমাংদগী নহা লিশিং ৭০ দগী হেন্না ত্রেনিং পীখ্রে। অসিগুম্বা চাউরবা তেলেন্ত পুল অসি ময়াম পুম্নমক্কীদমক সনাগী খনি অমদগী তাদনা খনবা য়াই।

মরুপশিং,

লৈঙাক্কী খোঙথাংশিং অসিগী মরকসিদা, ঙসি ঐহাক্না নহাশিংদসু অপীল তৌরি - ভারত্তা রিসর্স তৌরিবা নহা ওইরিবা তেলেন্তশিংনা মাংলোমদা থোরকউ। মপান লৈবাক্তা রিসর্স তৌরিবা নহাশিংনা ভারতকী এদভান্স তেক্নোলোজীশিং চাউখৎহনবদা শরুক য়াগদবনি। ঐহাক্না ইন্দস্ত্রীগী লুচিংবশিংদা লৈবাক অসিদা আর. এন্দ দি. (R&D) লুচিংনবা তকশিনজরি। মসিনা ইন্দস্ত্রীদা কান্নবা পীরি, অমসুং মসিনা ভারতকী নহাশিংগী শক্তিসু মপাঙ্গল কনখৎহল্লি।

মরুপশিং,

মাংলোমদা চংশিল্লিবা সেমিকন্দক্তর ইন্দস্ত্রীদা খুদোংচাদবা খরসু মায়োক্নরি, মদু ময়াম পুম্নমক্না খঙবী। চহি কয়াগী মনুংদা, অদোমগী ইন্দস্ত্রীগী মীওইশিংনা ত্রানজীসতরগী সাইজগী মতাংদা ৱা ঙাংখি। ত্রানজীসতরশিং পীকশিল্লকপগা লোয়ননা, কম্প্যুতিং হেন্না য়াংখৎলকখি অমসুং মতিক চাবা ওইরকখি। ঙসিসু ৱাহং অসি মরুওই। অদুবু হৌজিক, আর্তফিসিয়েল ইন্তেলিজেন্স লাকপগা লোয়ননা, ইন্দস্ত্রী অসিগী মাংদা অনৌবা ৱাহং খরা থোক্লক্লে। হৌখিবা চহি অনিরোম অসিদা, মালেমগী সেমিকন্দক্তর কৈথেল অসি চাদা ২০দগী হেন্না চাউখৎখ্রে। অমসুং গ্রোথ অসিগী য়াম্না চাউবা শরুক অমা এ.আই.না (AI) শেমগৎপা দিমান্দদগীনি। মসিগী অর্থদি, ঙসি অদোম্না এ.আই.দা থবক তৌরবদি, খুদোংচাদবশিং অসি চিপ মনুংদা করি লৈবগে হায়বা খক্তা নত্তে, অদুবু মসিগী অকোয়বদা করি থোক্লি হায়বসু য়াওরি। মেমোরীবু প্রোসেসরগা য়াম্না নকশিন্নহনবা, চিপ কয়া অমা সীস্তেম অমা ওইনা পুনশিন্নবগী থবক তৌনবা শম্নহনবা, দেতা য়াম্না থুনা মফম অমদগী মফম অমদা থাবা, হীত অমসুং পাৱর (power) মেনেজ তৌবা - মসি সেমিকন্দক্তর ইন্দস্ত্রীগী মাংদা লৈরিবা খুদোংচাদবা কয়ানি। খুদোংচাদবশিং অসিগী মরকসিদা, মালেম্না খ্বাইদগী মথৌ তারিবা অসি অনৌবা অমসুং থাজনিংঙাই ওইবা মেন্যুফেকচরিং লোকেসনশিংনি। অমসুং ভারত - ঐহাক্না ময়ামদা থাজবা পীরি - ভারতনা মসিগীদমক মশামকপু লেপ্তনা শেম-শারি।

মরুপশিং,

ঙসিগী সেমিকন্দক্তর ইন্দস্ত্রীগী মাংদা লৈরিবা অতোপ্পা অচৌবা ৱাফম অদুদি ইনর্জী সেক্যুরিতীনি। এ.আই.গীদমক শেম্লিবা চিপশিং অসি এ.আই. দাতা সেন্তরশিংদা শিজিন্নৈ। দেতা সেন্তরশিং অসিদা, মপাঙ্গল কনবা প্রোসেসর লিশিং কয়া পুন্নস থবক তৌই, অমসুং দেতা য়াম্না চাউনা প্রোসেস তৌই। এ.আই. পাকথোক-চাউথোকলকপগা লোয়ননা, কম্প্যুতিং পাৱরগী মথৌ তাবা অদুসু চাং অদুদা হেনগৎলক্কনি। অমসুং কম্প্যুতিং পাৱর হেনগৎলকপগা লোয়ননা, মৈগী মথৌ তাবসু য়াম্না হেনগৎলক্কনি। মরম অদুনা, পাৱর সেক্তরদা ইনভেস্তমেন্ত তৌবা অসি য়াম্না মরুওই। ঐখোয়গী প্লান্তশিং লৈরিবা মফমদা, মৈ মতম চানা ফংহনবা, মথৌ তাবা মতমদা মথৌ তাবা চাংদা ফংহনবা - মসি য়াম্না মরুওই। মরম অদুনা ভারতনা ঙসি পাৱর সেক্তরদা য়াম্না চাউবা ইনভেস্তমেন্তশিং তৌরি। হৌখিবা চহি তরাগী খুজিং অসিদা, ঐখোয়গী ইনস্তোল তৌখ্রিবা সোলার ইনর্জী কেপাসিতী অসি গিগাৱাত ২ রোমদগী গিগাৱাত ১৬০দগী হেন্না চাউখৎখ্রে - ২দগী ১৬০ ফাওবা। ন্যুকলিয়র ইনর্জীদসু, ঐখোয়না য়াম্না থুনা মাংলোমদা চংশিল্লি। সেক্তর অসি প্রাইভেত প্লেয়রশিংগীদমক হাংদোকখ্রে। ঐখোয়না স্মোল মোদ্যুলর রিএক্তরশিংদসু থবক তৌরি। হৌখিবা চহি তরাগী খুজিং অসিদা, ভারতনা মসিগী ত্রান্সমিসন নেতৱার্কসু পাকথোক-চাউথোকহনখ্রে।

মরুপশিং,

ভারততা পাৱর ইনফ্রাস্ত্রকচরগী পাকথোক-চাউথোকপা অসি ঐখোয়গী সেমিকন্দক্তর ইকোসীস্তেমগীদমকসু চাউরবা পাঙ্গল অমনি। ভারতনা মশামকপু সেমিকন্দক্তর ইন্দস্ত্রীগীদমক খ্বাইদগী পাম্নবা মফম অমা ওইহন্নবা মথৌ তাবা খোঙথাং খুদিংমক লৌখৎলি।

মরুপশিং,

ভারত অসি দেমোক্রেসীগী মমানি । চহি খরগী মমাংদা, ঐখোয়গী সংবিধান চহি ৭৫ শুরে। অসিগুম্বা লৈবাক অমনা মরুওইবা ইন্দস্ত্রী অমদা মাইপাকপা মতমদা, মসিনা মালেম পুম্বগী সপ্লাই চেনবু মপাঙ্গল কনখৎহল্লি। অমসুং ঙসি, সপ্লাই চেনশিংবু খুৎলায় অমা ওইনা শিজিন্নরকপা মতমদা, মসিগী মরুওইবা অদু হেন্না হেনগৎলক্লি। ভারত্তা থোক্লিবা চাউখৎ-থৌরাংগী খোঙথাংশিং অসি ঐখোয়না চাউরবা মীৎয়েং অসিদগী য়েংগদবনি। ভারতকী মঙলানশিং অদোমগী মাংদা লৈরি, অমসুং ভারত্তা শেমগৎলিবা অনৌবা খুদোংচাবশিং অসি অদোমবু তরাম্না ওক্নবা শেম-শাদুনা লৈরি। অমুক হন্না, থৌরম অসিগীদমক ঐহাক্না ময়াম পুম্নমকপু য়াম্না নুংঙাইবা ফোংদোকচরি।

য়াম্না থাগৎচরি।

******