വളരെ നന്ദി.

കേന്ദ്ര മന്ത്രിസഭയിലെ സഹപ്രവർത്തകരായ അശ്വിനി വൈഷ്ണവ് ജി, ജിതിൻ പ്രസാദ ജി, വ്യവസായ പ്രമുഖർ, സിഇഒമാർ, പ്രതിനിധികൾ, ഒപ്പം ഓൺലൈനായി (വെർച്വലായി) ബന്ധപ്പെട്ടിരിക്കുന്ന നൂറുകണക്കിന് സർവകലാശാലകളും സ്ഥാപനങ്ങളും - ഇന്ത്യയുടെ ഭാവിശക്തിയായ എന്റെ യുവ സുഹൃത്തുക്കളേ, കൂടാതെ ഇവിടെ വലിയ തോതിൽ ഇവിടെ സന്നിഹിതരായ ഉത്സാഹികളായ യുവാക്കളേ, മാന്യ സുഹൃത്തുക്കളേ!

ഇത് 'സെമികോൺ ഇന്ത്യ'യുടെ അഞ്ചാമത്തെ പതിപ്പാണ്. നിങ്ങളെ എല്ലാവരെയും ഞാൻ സ്വാഗതം ചെയ്യുന്നു. വിദേശത്തുനിന്നെത്തിയ അതിഥികൾക്ക് പ്രത്യേക സ്വാഗതം നേരുന്നു.

സുഹൃത്തുക്കളേ,

ഇന്ന് വിശ്വകർമ്മ ജയന്തി കൂടിയാണ്. എല്ലാ നാട്ടുകാർക്കും വിശ്വകർമ്മ ജയന്തി ആശംസകൾ നേരുന്നു. നമ്മുടെ പാരമ്പര്യത്തിൽ, നിർമ്മാണത്തിന്റെയും സൃഷ്ടിയുടെയും ശക്തിയുടെ പ്രതീകമായാണ് ഭഗവാൻ വിശ്വകർമ്മാവിനെ കണക്കാക്കുന്നത്. ഒപ്പം ഒരു യാദൃശ്ചികത കൂടി ശ്രദ്ധിക്കൂ - 'സെമികോൺ ഇന്ത്യ' ആരംഭിക്കുന്നത് ഇന്ന് തന്നെയാണ്. ഒരു വശത്ത് നൂറ്റാണ്ടുകൾ പഴക്കമുള്ള നമ്മുടെ സൃഷ്ടിയുടെ പാരമ്പര്യം, മറുവശത്ത് ഇരുപത്തിയൊന്നാം നൂറ്റാണ്ടിലെ സാങ്കേതികവിദ്യയും കാഴ്ചപ്പാടും - ഇതാണ് 'ആത്മനിർഭർ ഭാരതി'നും (സ്വയംപര്യാപ്തമായ ഇന്ത്യ) വികസിത ഇന്ത്യയ്ക്കുമുള്ള നമ്മുടെ പ്രചോദനം.

സുഹൃത്തുക്കളേ,

ഓരോ പൗരനും വികസിത ഇന്ത്യ കെട്ടിപ്പടുക്കുന്നതിൽ പ്രതിജ്ഞാബദ്ധരാണ്. കഴിഞ്ഞ 15 ദിവസത്തെ മാത്രം കാര്യങ്ങൾ പരിശോധിച്ചാൽ - വെറും 15 ദിവസത്തെ കാര്യം മാത്രമാണ് ഞാൻ നിങ്ങളുടെ ശ്രദ്ധയിൽപ്പെടുത്തുന്നത് - ഇന്ത്യ മുന്നോട്ട് പോകുന്ന ദിശയും വേഗതയും നമുക്ക് കാണാൻ കഴിയും. ഈ സെപ്റ്റംബറിൽ, വെറും 10 ദിവസം മുമ്പ്, മുംബൈയിൽ 'ഗ്ലോബൽ ഫിൻടെക് ഫെസ്റ്റ്' നടന്നു. ഏജന്റിക് എഐ (agentic AI), ടോക്കണൈസേഷൻ, ക്വാണ്ടം സാങ്കേതികവിദ്യകൾ എന്നിവയിലൂടെയുള്ള സാമ്പത്തിക ഉൾച്ചേർക്കലിനെക്കുറിച്ചുള്ള ചർച്ചകൾ അവിടെ നടന്നു. അതേ കാലയളവിൽ, ഇന്ത്യയിൽ ഏകദേശം 3,000 കിലോമീറ്റർ ദൈർഘ്യമുള്ള 'ഡെഡിക്കേറ്റഡ് ഫ്രൈറ്റ് കോറിഡോർ' (ചരക്ക് ഗതാഗതത്തിനായുള്ള പ്രത്യേക പാത) പൂർണ്ണമായും പ്രവർത്തനസജ്ജമായി. അധികം അകലെയല്ലാത്ത, സെപ്റ്റംബറിലെ ആ 10 ദിവസങ്ങളെക്കുറിച്ചാണ് ഞാൻ പറയുന്നത്. ഇത് രാജ്യത്തെ ചരക്ക് നീക്കം വേഗത്തിലാക്കുകയും, ലോജിസ്റ്റിക്സ് മെച്ചപ്പെടുത്തുകയും, ഉൽപ്പാദന മേഖലയ്ക്ക് പുതിയ കരുത്ത് പകരുകയും ചെയ്യും.

സുഹൃത്തുക്കളേ,

ഇതേ കാലയളവിൽ, അതായത് ഈ സെപ്റ്റംബറിൽ തന്നെ, ഇന്ത്യയുടെ ത്രൈമാസ ജിഡിപി റിപ്പോർട്ട് പുറത്തുവന്നു. വെല്ലുവിളികൾ നിറഞ്ഞ ഈ കാലഘട്ടത്തിലും ഇന്ത്യ 7.8 ശതമാനം വളർച്ച കൈവരിച്ചു. ഒപ്പം, ജപ്പാനിലെ ഒരു ക്രെഡിറ്റ് റേറ്റിംഗ് ഏജൻസി ഇന്ത്യയുടെ സോവറിൻ റേറ്റിംഗ് (രാജ്യത്തിന്റെ സാമ്പത്തിക വിശ്വാസ്യതയുടെ റേറ്റിംഗ്) ഉയർത്തുകയും ചെയ്തു. മൂന്ന് പതിറ്റാണ്ടുകൾക്ക് - ഏകദേശം 35 വർഷങ്ങൾക്ക് - ശേഷമാണ് ഇത്തരമൊരു സംഭവം നടക്കുന്നത്. ഇതിനർത്ഥം, ഒരു വശത്ത് ഇന്ത്യയുടെ സമ്പദ്‌വ്യവസ്ഥ വളരുന്നു, മറുവശത്ത് ലോകത്തിന് ഇന്ത്യയുടെ മേലുള്ള വിശ്വാസവും വർദ്ധിക്കുന്നു എന്നാണ്.

സുഹൃത്തുക്കളേ,

ഈ വിശ്വാസത്തിന്റെ മറ്റൊരു വലിയൊരു ചിത്രം മൂന്ന് ദിവസം മുമ്പ് നടന്ന ബ്രിക്സ് (BRICS) ഉച്ചകോടിയിൽ നാം കണ്ടു. ഇന്ത്യ ഈ ഉച്ചകോടി വിജയകരമായി ആതിഥേയത്വം വഹിച്ചു. 'ന്യൂഡൽഹി പ്രഖ്യാപനം' ഏകകണ്ഠമായി അംഗീകരിക്കപ്പെട്ടത് ലോകത്തിന് ഇന്ത്യയുടെ മേലുള്ള വിശ്വാസത്തിന്റെ മറ്റൊരു വലിയ തെളിവാണ്.

സുഹൃത്തുക്കളേ,

ഇന്ത്യയുടെ ഈ നേട്ടങ്ങൾക്കിടയിൽ, 'സെമികോൺ ഇന്ത്യ' (Semicon India) എന്ന ഈ പരിപാടിക്ക് കൂടുതൽ പ്രാധാന്യം കൈവന്നിരിക്കുന്നു. ഇതിന്റെ ആദ്യ പതിപ്പ് 2022-ലായിരുന്നു. അന്നു മുതൽ നാം എല്ലാ വർഷവും ഒത്തുചേരുന്നുണ്ടെങ്കിലും, ഓരോ വർഷവും നമ്മുടെ ചർച്ചാവിഷയം മാറിക്കൊണ്ടിരുന്നു. ആദ്യ പതിപ്പിൽ നാം നയങ്ങളെക്കുറിച്ചാണ് സംസാരിച്ചത്. തുടർന്നുള്ള പതിപ്പുകളിൽ ചർച്ചകൾ മുന്നോട്ട് പോയി. ഫയലുകളിൽ ഒപ്പിടുന്നത് മുതൽ തറക്കല്ലിടുന്നതു വരെയുള്ള പദ്ധതികളെക്കുറിച്ച് നാം സംസാരിച്ചു തുടങ്ങി. കഴിഞ്ഞ വർഷം പൈലറ്റ് ലൈനുകളെക്കുറിച്ചും ടെസ്റ്റ് ചിപ്പുകളെക്കുറിച്ചും നാം ചർച്ച ചെയ്തു. ഇന്ത്യയിലെ യൂണിറ്റുകളിൽ നിന്ന് ആദ്യത്തെ സാമ്പിളുകൾ എങ്ങനെ പുറത്തുവരാൻ തുടങ്ങി എന്നത് ചർച്ചാവിഷയമായി. ഈ വർഷം നാം വാണിജ്യാടിസ്ഥാനത്തിലുള്ള ഉൽപ്പാദനത്തെക്കുറിച്ചാണ് സംസാരിക്കുന്നത്. ഇപ്പോൾ ഇന്ത്യയിലെ പ്ലാന്റുകളിൽ നിന്ന് ചിപ്പുകൾ പുറത്തുവരികയും ഇന്ത്യയിലെയും ലോകമെമ്പാടുമുള്ള ഉപഭോക്താക്കളിലേക്ക് എത്തുകയും ചെയ്യുന്നു. മൊഹാലിയിലും സൂറത്തിലും രണ്ട് പ്ലാന്റുകളിൽ കൂടി വാണിജ്യാടിസ്ഥാനത്തിലുള്ള ഉൽപ്പാദനം ഇപ്പോൾ ആരംഭിച്ചിരിക്കുന്നു. അവരെയും ഞാൻ അഭിനന്ദിക്കുന്നു.

സുഹൃത്തുക്കളേ,

ഏതൊരു രാജ്യത്തിനും ഇത്രയും കുറഞ്ഞ സമയത്തിനുള്ളിൽ ഈ നിലയിലെത്തുക എന്നത് എളുപ്പമുള്ള കാര്യമല്ല. ഒരു ഫാക്ടറി സ്ഥാപിച്ചാൽ മാത്രം തീരുന്ന ജോലിയല്ല ഇത്. സാങ്കേതിക ശേഷി കെട്ടിപ്പടുക്കാൻ പതിറ്റാണ്ടുകൾ വേണ്ടിവരും. ലോകത്ത് എവിടെയെല്ലാം സെമികണ്ടക്ടർ ആവാസവ്യവസ്ഥകൾ (ecosystems) രൂപപ്പെട്ടിട്ടുണ്ടോ, അവയെല്ലാം പതിറ്റാണ്ടുകൾ നീണ്ട പരിശ്രമത്തിനൊടുവിലാണ് സജ്ജമായത്. എന്നാൽ ഇന്ത്യ, നിങ്ങളുടെ സഹകരണത്തോടെ, ചിപ്പ് ഡിസൈൻ, നിർമ്മാണം, ഉപകരണ നിർമ്മാണം, അനുബന്ധ സാമഗ്രികളുടെ ആവാസവ്യവസ്ഥ, പരിശോധനാ ശേഷി എന്നിവയിൽ ഒരേസമയം പ്രവർത്തിക്കുകയും വിജയം കൈവരിക്കുകയും ചെയ്തു. ഈ യാത്രയിൽ വ്യവസായ രംഗത്തെ പ്രമുഖരായ നിങ്ങളാണ് പ്രധാന പങ്കാളികൾ. ഇന്ത്യയുടെ വിജയത്തിന്റെ തൂണുകൾ നിങ്ങളാണ്; ഞങ്ങളുടെ ഈ യാത്രയിലെ പങ്കാളികളും നിങ്ങളാണ്.

സുഹൃത്തുക്കളേ,

സെമികണ്ടക്ടർ വ്യവസായത്തിൽ 'ടേപ്പ്-ഔട്ട്' (tape-out) എന്നൊരു പദമുണ്ട്. ഡിസൈൻ പൂർത്തിയായ ശേഷം ഒരു ചിപ്പ് ഉൽപ്പാദനത്തിലേക്ക് കടക്കുന്ന ദിവസമാണിത്. എന്നാൽ 'ടേപ്പ്-ഔട്ടി'ന് ശേഷം ജോലി അവസാനിക്കുന്നില്ല. അന്ന് തന്നെ അടുത്ത പതിപ്പിനായുള്ള പ്രവർത്തനങ്ങൾ ആരംഭിക്കുന്നു. ഇന്ത്യയും അതുതന്നെയാണ് ചെയ്യുന്നത്. ഇന്ത്യ 'സെമികണ്ടക്ടർ മിഷന്റെ' രണ്ടാം ഘട്ടം ആരംഭിച്ചു കഴിഞ്ഞു. നമ്മുടെ ആദ്യ ഘട്ടത്തിന്റെ വ്യാപ്തി ഏകദേശം 8 ബില്യൺ ഡോളർ ആയിരുന്നുവെങ്കിൽ, രണ്ടാം ഘട്ടത്തിനായി നാം 13.5 ബില്യൺ ഡോളറാണ് നിശ്ചയിച്ചിരിക്കുന്നത്. 'പരിഷ്കരണ പാതയിൽ' (Reform Express) മുന്നേറിക്കൊണ്ട്, ഈ മേഖലയിൽ നാം കൂടുതൽ പരിഷ്കാരങ്ങൾ വരുത്തിയിട്ടുണ്ട്. ഇപ്പോൾ അന്താരാഷ്ട്ര കമ്പനികൾക്ക് നമ്മുടെ സ്റ്റാർട്ടപ്പുകൾ, ഇന്ത്യൻ ഡിസൈൻ കമ്പനികൾ, OCI ഉടമസ്ഥതയിലുള്ള കമ്പനികൾ എന്നിവയുമായി സഹകരിച്ച് പ്രവർത്തിക്കാനാകും. അതായത്, നയങ്ങളോ ഫണ്ടുകളോ നിയന്ത്രണ ചട്ടക്കൂടുകളോ - നിങ്ങളുടെ പദ്ധതികളുടെ വിജയത്തിന് ആവശ്യമായതെന്തും ഒരുക്കാൻ ഇന്ത്യാ ഗവൺമെന്റ് എല്ലാ നടപടികളും സ്വീകരിക്കുന്നുണ്ട്.

സുഹൃത്തുക്കളേ,

ഇന്ത്യയിൽ 'ഫാബ്‌ലെസ്' (fabless) കമ്പനികൾ വളരണമെന്നും ബൗദ്ധിക സ്വത്തവകാശ സൃഷ്ടി (intellectual property creation) ഇവിടെത്തന്നെ നടക്കണമെന്നുമാണ് ഞങ്ങളുടെ ആഗ്രഹം. വിവിധ തരം കോമ്പൗണ്ട് സെമികണ്ടക്ടറുകളുടെ നിർമ്മാണം, സിലിക്കൺ ഫോട്ടോണിക്സിനെ ഈ ആവാസവ്യവസ്ഥയുടെ ഭാഗമാക്കൽ, അല്ലെങ്കിൽ AI-ക്ക് ആവശ്യമായ അടിസ്ഥാന സൗകര്യങ്ങൾ ഒരുക്കൽ - ഇവയെല്ലാം അത്യന്താപേക്ഷിതമാണ്. ഈ ദിശയിൽ നമുക്ക് ഒന്നിച്ച് മുന്നേറണം. ഇതിനാവശ്യമായ അടിത്തറ ഇതിനകം തന്നെ ഒരുക്കിക്കഴിഞ്ഞു. വിതരണ ശൃംഖലകൾ (supply chains) ശക്തിപ്പെടുത്തുന്നതിലും ഇന്ത്യ വലിയ ശ്രദ്ധ കേന്ദ്രീകരിക്കുന്നുണ്ട്. ഇതിനായി നിരവധി പരിഷ്കാരങ്ങൾ നടപ്പിലാക്കിയിട്ടുണ്ട്. ഇവിടെ സന്നിഹിതരായ ഉപകരണ നിർമ്മാണ കമ്പനികളുടെ തലവന്മാരോട് എനിക്ക് പറയാനുള്ളത് ഇതാണ് - ഈ അവസരം പ്രയോജനപ്പെടുത്തുന്നതിൽ ഒട്ടും പിന്നിലായിപ്പോകരുത്. രാസവസ്തുക്കൾ, വാതകങ്ങൾ, മറ്റ് അസംസ്കൃത വസ്തുക്കൾ എന്നിവ കൈകാര്യം ചെയ്യുന്ന കമ്പനികളുടെ തലവന്മാർക്കും ഇന്ത്യയിൽ സുവർണ്ണാവസരങ്ങൾ കാത്തിരിക്കുന്നുണ്ട്. ഈ ആവാസവ്യവസ്ഥ മൊത്തത്തിൽ വളരണമെന്നാണ് ഞങ്ങൾ ആഗ്രഹിക്കുന്നത്. ഇതിനാവശ്യമായ ഡിമാൻഡ് പൈപ്പ്‌ലൈനും (demand pipeline) തയ്യാറാണ്. ഇതുവരെ 12 പദ്ധതികൾക്ക് അംഗീകാരം നൽകിക്കഴിഞ്ഞു; അടുത്ത ഘട്ടത്തിൽ ഇതിന്റെ വ്യാപ്തി ഇനിയും വർദ്ധിക്കും.

സുഹൃത്തുക്കളേ,

ഇന്ത്യയിൽ നിങ്ങൾക്ക് ലഭിക്കുന്ന മറ്റൊരു വലിയ നേട്ടം നമ്മുടെ യുവശക്തിയാണ് - അതായത് കഴിവുറ്റതും നൈപുണ്യമുള്ളതുമായ മനുഷ്യവിഭവശേഷി. ഇന്ന് എഞ്ചിനീയറിംഗ് രംഗത്ത് വലിയൊരു പ്രതിഭാശേഖരം തന്നെ നമുക്കുണ്ട്. ഇന്ത്യയിൽ ആയിരക്കണക്കിന് എഞ്ചിനീയറിംഗ് കോളേജുകളുണ്ട്, ഓരോ വർഷവും ലക്ഷക്കണക്കിന് എഞ്ചിനീയർമാരെയാണ് രാജ്യം വാർത്തെടുക്കുന്നത്. ഒരിക്കൽ, ഒരു അമേരിക്കൻ കമ്പനിയിലെ പ്രതിനിധി എന്നെ കാണാൻ വന്നിരുന്നു. അദ്ദേഹം പറഞ്ഞു, "ഞങ്ങളുടെ രാജ്യത്ത് എഞ്ചിനീയർമാരെ നിയമിക്കാൻ വിളിച്ചുകൂട്ടിയാൽ അവരെല്ലാം ഒരു മുറിയിൽ ഒതുങ്ങും. എന്നാൽ ഇന്ത്യയിൽ എഞ്ചിനീയർമാരെ വിളിച്ചുകൂട്ടിയാൽ ഒരു ഫുട്ബോൾ മൈതാനം പോലും തികയില്ല." ഇതാണ് ഇന്ത്യയുടെ കരുത്ത്.

സുഹൃത്തുക്കളേ,

ചിപ്പ് ഡിസൈനിംഗ് മേഖലയ്ക്കായി വിപുലമായ തോതിലുള്ള നൈപുണ്യ വികസന പ്രവർത്തനങ്ങൾ നടന്നുവരികയാണ്. ഇവിടെ വരുന്നതിന് തൊട്ടുമുമ്പ്, ഈ ക്യാമ്പസിൽ വെച്ച് വ്യവസായ മേഖലയുമായി ബന്ധപ്പെട്ട ചില യുവപ്രതിഭകളെ - വിദ്യാർത്ഥികളെ - ഞാൻ കണ്ടിരുന്നു. അവർ സ്വന്തമായി രൂപകൽപ്പന ചെയ്ത ചിപ്പുകൾ എനിക്ക് സമ്മാനമായി നൽകി. സെമികണ്ടക്ടർ വ്യവസായത്തിനായി ഒരു ലക്ഷം എഞ്ചിനീയറിംഗ് വിദ്യാർത്ഥികൾക്ക് പരിശീലനം നൽകാൻ ഞങ്ങളുടെ ​ഗവൺമെന്റ് ലക്ഷ്യമിടുന്നു. നിങ്ങളോട് സൂചിപ്പിച്ചതുപോലെ, 70,000-ത്തിലധികം യുവാക്കൾക്ക് ഇതിനകം തന്നെ ഞങ്ങൾ പരിശീലനം നൽകിക്കഴിഞ്ഞു. ഇത്രയും വലിയൊരു പ്രതിഭാശേഖരം നിങ്ങൾക്ക് എല്ലാവർക്കും ഒരു സ്വർണ്ണഖനിക്ക് തുല്യമാണ്.

സുഹൃത്തുക്കളേ,

​ഗവൺമെന്റിന്റെ ഈ ശ്രമങ്ങൾക്കിടയിൽ, ഇന്ന് ഞാൻ യുവാക്കളോടും അഭ്യർത്ഥിക്കുന്നു - ഇന്ത്യയിൽ ഗവേഷണം നടത്തുന്ന യുവപ്രതിഭകൾ മുന്നോട്ട് വരണം. വിദേശത്ത് ഗവേഷണം നടത്തുന്ന യുവജനങ്ങളും ഇന്ത്യയിലെ നൂതന സാങ്കേതികവിദ്യകളുടെ വികസനവുമായി ബന്ധപ്പെടേണ്ടതുണ്ട്. രാജ്യത്തെ ഗവേഷണ-വികസന (R&D) പ്രവർത്തനങ്ങൾക്ക് നേതൃത്വം നൽകാൻ വ്യവസായ പ്രമുഖരോട് ഞാൻ അഭ്യർത്ഥിക്കുന്നു. ഇത് വ്യവസായ മേഖലയ്ക്ക് ഗുണകരമാകുന്നതിനൊപ്പം ഇന്ത്യയുടെ യുവശക്തിയെ ശക്തിപ്പെടുത്തുകയും ചെയ്യും.

സുഹൃത്തുക്കളേ,

അതിവേഗം വളരുന്ന സെമികണ്ടക്ടർ വ്യവസായം ചില വെല്ലുവിളികളും നേരിടുന്നുണ്ട്; അവയെക്കുറിച്ച് നിങ്ങളെല്ലാം ബോധവാന്മാരാണ്. വർഷങ്ങളായി, ഈ മേഖലയിലുള്ളവർ ട്രാൻസിസ്റ്ററുകളുടെ വലുപ്പത്തെക്കുറിച്ചാണ് സംസാരിച്ചിരുന്നത്. ട്രാൻസിസ്റ്ററുകളുടെ വലുപ്പം കുറഞ്ഞതോടെ കമ്പ്യൂട്ടിംഗ് കൂടുതൽ വേഗതയുള്ളതും കാര്യക്ഷമവുമായി മാറി. ഇന്നും ആ ചോദ്യം പ്രസക്തമാണ്. എന്നാൽ ഇപ്പോൾ, ആർട്ടിഫിഷ്യൽ ഇന്റലിജൻസിന്റെ (AI) വരവോടെ ഈ വ്യവസായത്തിന് മുന്നിൽ പുതിയ ചില ചോദ്യങ്ങൾ ഉയർന്നു വന്നിരിക്കുന്നു. കഴിഞ്ഞ രണ്ട് വർഷത്തിനിടെ ആഗോള സെമികണ്ടക്ടർ വിപണി 20 ശതമാനത്തിലധികം വളർച്ച നേടി. ഈ വളർച്ചയുടെ വലിയൊരു ഭാഗവും AI സൃഷ്ടിച്ച ആവശ്യകത മൂലമാണ് ഉണ്ടായത്. അതായത്, ഇന്ന് നിങ്ങൾ AI-യുമായി ബന്ധപ്പെട്ട പ്രവർത്തനങ്ങളിൽ ഏർപ്പെടുമ്പോൾ, ചിപ്പിനുള്ളിലെ കാര്യങ്ങൾ മാത്രമല്ല, അതിനു ചുറ്റും നടക്കുന്ന കാര്യങ്ങളും വെല്ലുവിളികളായി മാറുന്നു. മെമ്മറിയെ പ്രോസസറിനോട് കൂടുതൽ അടുപ്പിക്കുക, പല ചിപ്പുകളെയും ഒരുമിച്ച് ഒരു സംവിധാനമായി പ്രവർത്തിക്കുന്ന രീതിയിൽ ബന്ധിപ്പിക്കുക, വലിയ അളവിലുള്ള ഡാറ്റ കാലതാമസമില്ലാതെ കൈമാറുക, ചൂടും ഊർജ്ജ ഉപഭോഗവും നിയന്ത്രിക്കുക - ഇങ്ങനെ നിരവധി വെല്ലുവിളികൾ സെമികണ്ടക്ടർ വ്യവസായത്തിന് മുന്നിലുണ്ട്. ഈ വെല്ലുവിളികൾക്കിടയിൽ, പുതിയതും വിശ്വസനീയവുമായ ഉൽപ്പാദന കേന്ദ്രങ്ങളെയാണ് ലോകത്തിന് ഏറ്റവും ആവശ്യം. ഇന്ത്യ ഇതിനായി നിരന്തരം തയ്യാറെടുപ്പുകൾ നടത്തുന്നുണ്ടെന്ന് ഞാൻ നിങ്ങൾക്ക് ഉറപ്പുനൽകുന്നു.

സുഹൃത്തുക്കളേ,

ഇന്നത്തെ സെമികണ്ടക്ടർ വ്യവസായം നേരിടുന്ന മറ്റൊരു പ്രധാന പ്രശ്നം ഊർജ്ജ സുരക്ഷയാണ്. AI-ക്കായി നിർമ്മിക്കുന്ന ചിപ്പുകൾ AI ഡാറ്റാ സെന്ററുകളിലാണ് ഉപയോഗിക്കുന്നത്. ഈ ഡാറ്റാ സെന്ററുകളിൽ, ഉയർന്ന ശേഷിയുള്ള ആയിരക്കണക്കിന് പ്രോസസറുകൾ ഒന്നിച്ച് പ്രവർത്തിക്കുകയും വലിയ അളവിലുള്ള ഡാറ്റ കൈകാര്യം ചെയ്യുകയും ചെയ്യുന്നു. AI വികസിക്കുമ്പോൾ, അതിനനുസരിച്ച് കമ്പ്യൂട്ടിംഗ് ശേഷിക്കുള്ള ആവശ്യകതയും വർദ്ധിക്കും. കമ്പ്യൂട്ടിംഗ് ശേഷി വർദ്ധിക്കുമ്പോൾ വൈദ്യുതിയുടെ ആവശ്യകതയും ഗണ്യമായി വർദ്ധിക്കും. അതിനാൽ, ഊർജ്ജ മേഖലയിലെ നിക്ഷേപം വളരെ പ്രധാനമാണ്. നമ്മുടെ പ്ലാന്റുകൾ സ്ഥിതി ചെയ്യുന്ന സ്ഥലങ്ങളിൽ, കൃത്യസമയത്തും ആവശ്യമായ അളവിലും വൈദ്യുതി ലഭ്യമാകേണ്ടത് അത്യന്താപേക്ഷിതമാണ്. അതുകൊണ്ടാണ് ഇന്ത്യ ഇന്ന് ഊർജ്ജ മേഖലയിൽ വൻതോതിൽ നിക്ഷേപം നടത്തുന്നത്. കഴിഞ്ഞ ദശകത്തിൽ, നമ്മുടെ സൗരോർജ്ജ ഉൽപ്പാദന ശേഷി ഏകദേശം 2 ഗിഗാവാട്ടിൽ നിന്ന് 160 ഗിഗാവാട്ടിലധികമായി വർദ്ധിച്ചു - അതായത് 2-ൽ നിന്ന് 160-ലേക്ക്. ആണവോർജ്ജ മേഖലയിലും നാം അതിവേഗം മുന്നേറുകയാണ്. ഈ മേഖല സ്വകാര്യ സംരംഭകർക്കായി തുറന്നുകൊടുത്തിട്ടുണ്ട്. ചെറിയ മോഡുലാർ റിയാക്ടറുകൾ (SMRs) സ്ഥാപിക്കുന്നതിനുള്ള പ്രവർത്തനങ്ങളും നടക്കുന്നുണ്ട്. കഴിഞ്ഞ ദശകത്തിൽ ഇന്ത്യ തന്റെ വൈദ്യുതി പ്രസരണ ശൃംഖലയും വിപുലീകരിച്ചിട്ടുണ്ട്.

സുഹൃത്തുക്കളേ,

ഇന്ത്യയിലെ ഊർജ്ജ അടിസ്ഥാന സൗകര്യങ്ങളുടെ ഈ വിപുലീകരണം നമ്മുടെ സെമികണ്ടക്ടർ ആവാസവ്യവസ്ഥയ്ക്ക് വലിയൊരു കരുത്താണ്. സെമികണ്ടക്ടർ വ്യവസായത്തിന് ഏറ്റവും അനുയോജ്യമായ ഒരു കേന്ദ്രമായി മാറാൻ ആവശ്യമായ എല്ലാ നടപടികളും ഇന്ത്യ സ്വീകരിക്കുന്നുണ്ട്. സുഹൃത്തുക്കളെ,

ഇന്ത്യ ജനാധിപത്യത്തിന്റെ മാതാവാണ്. ഏതാനും വർഷങ്ങൾക്കു മുൻപ് നമ്മുടെ ഭരണഘടന 75 വർഷം പൂർത്തിയാക്കി. ഇത്തരമൊരു രാജ്യം നിർണായകമായ ഒരു വ്യവസായരംഗത്ത് വിജയം കൈവരിക്കുമ്പോൾ, അത് ലോകമെമ്പാടുമുള്ള വിതരണ ശൃംഖലയെ (supply chain) ശക്തിപ്പെടുത്തുന്നു. വിതരണ ശൃംഖലകൾ ഇന്ന് ആയുധമായി ഉപയോഗിക്കപ്പെടുന്ന സാഹചര്യത്തിൽ, ഇതിന്റെ പ്രാധാന്യം കൂടുതൽ വർധിക്കുന്നു. ഇന്ത്യയിൽ നടക്കുന്ന പുരോഗതിയെ ഈ വിശാലമായ കാഴ്ചപ്പാടോടെ വേണം നാം നോക്കിക്കാണാൻ. ഇന്ത്യയുടെ അഭിലാഷങ്ങൾ നിങ്ങളുടെ മുന്നിലുണ്ട്; ഇന്ത്യയിൽ സൃഷ്ടിക്കപ്പെടുന്ന പുതിയ അവസരങ്ങൾ നിങ്ങളെ സ്വാഗതം ചെയ്യാൻ സജ്ജവുമാണ്. ഈ പരിപാടിയുടെ ഭാഗമായ എല്ലാവർക്കും ഒരിക്കൽ കൂടി ഞാൻ അഭിനന്ദനങ്ങൾ അറിയിക്കുന്നു.

വളരെ നന്ദി.

***

SK