উপ রাস্ত্রপতি, শ্রী সি. পি. রাধাকৃস্নন্না ঙসি ইতানগরদা পাংথোকপা অরুনাচল প্রদেশকী লেজিস্লেতিব এসেমব্লীগী অখন্নবা সেসন্দা ৱা ঙাংখ্রে, অমসুং দেমোক্রেসীগী খ্বাইদগী অৱাংবা চৎনবীশিং ঙাক্না চৎনবা অমসুং রাজ্য অমসুং লৈবাক্কী চাউখৎ-থৌরাংগীদমক থবক তৌনবা লেজিস্লেতরশিংদা হায়খ্রে।

এসেমব্লী কমপ্লেক্সতা মহাক্না য়ৌরকপদা, উপ রাস্ত্রপতিনা মহাত্মা গান্ধি অমসুং বাবাসাহেব দাক্তর বি. আর. অম্বেদকরগী মীতমশিংদা লৈ কৎলদুনা ইকায়খুম্নবা উৎখি অমসুং মহাকপু থৌরমগী ওইবা গার্দ ওফ ওনর অমা পীখি। মহাক্না রাজ্যগী লেজিস্লেচরগী শেমগৎলকপা অমসুং চাউখৎলকপা অমসুং মসিগী লেজিস্লেতিবকী খোঙচৎপু উৎলিবা অরুনাচল প্রদেশ এসেমব্লী ম্যুজিয়মদসু চৎখি।

এসেমব্লীদা ৱা ঙাংলদুনা, শ্রী সি. পি. রাধাকৃস্নন্না হায়খি মদুদি অরুনাচল প্রদেশতা স্ত্রেতেজিক্কী ওইবা চাউরবা মরুওইবা, ইনাক খুল্লবা কলচরগী মওং-মতৌ অমসুং মরাং কায়না লৈবা মহৌশাগী লন-থুম লৈ, অমসুং লৈবাক্কী ঙমখৈশিং ঙাক-শেনবদা মরুওইবা থৌদাং লৌরি। লৈবাক্কী অতৈ শরুকশিংগী সেক্যুরিতী অসি অরুনাচল প্রদেশকী মীয়াম্না ঙমখৈশিং ঙাক-শেনবগা নকশিন্না মরী লৈনৈ হায়না মহাক্না পনখি।

ভারতকী তোঙান-তোঙানবা মশকশিংগী মরকসিদা লৈরিবা অপুনবগী শক্তমদা মীৎয়েং থম্লদুনা, উপ রাস্ত্রপতিনা হায়খি মদুদি লৈবাক অসি কন্সতিত্যুসন অমা, 'রাস্ত্র প্রথম' (নেসন ফার্স্ত)কী মীৎয়েং অমা অমসুং ভিক্সিত ভারত @ ২০৪৭ কী পান্দম অমনা পুনশিনহল্লি। নেস্নেল পোএত সুব্রমানিয়া ভারতীগী ৱাহৈশিং পল্লদুনা, মহাক্না ভারতকী তোঙান- তোঙানবা লোনশিং অমসুং চৎনবীশিংগী মখাদা লৈরিবা ৱাখল্লোনগী অপুনবা অদু মশক উৎখি।

ভারতকী ইনাক-খুল্লবা দেমোক্রেতিক্কী ওইবা মওং-মতৌ অদুবু নিংশিংলদুনা, শ্রী সি. পি. রাধাকৃস্নন্না ভারতপু 'দেমোক্রেসীগী মমা' হায়না খঙহনখি অমসুং লেজিস্লেতরশিংদা চৎনবী অসিবু ঙক্না চৎনবা তকশিনখি।

মমাংগী প্রধান মন্ত্রী, শ্রী অতল বিহারী ভাজপায়িগী মতমদা মিনিস্ত্রী ওফ দোনর (DoNER) লিংখৎখিবা অদুবু নিংশিংলদুনা অমসুং প্রধান মন্ত্রী, শ্রী নরেন্দ্র মোদীগী এক্ত ইস্ত পোলিসীগী মখাদা লমদম অসিদা মীৎয়েং থম্বদু নিংশিংলদুনা, ভাইস-প্রসিদেন্তনা অৱাং-নোংপোক চাউখৎহন্নবা হেনগৎলক্লিবা মীৎয়েং অদুবু পনখি। মহাক্না অরুনাচল প্রদেশকী লৈঙাক অমসুং মীয়াম্বু লৈবাক্কী খ্বাইদগী মাংজিল থাবা কিৱি (kiwi) পুথোকপা রাজ্য অমা ওইরকপা, লম্বী-থোংগী ফীভম পাকথোক-চাউথোকপা, সোইল হেল্থ কার্দ লাখ অমদগী হেন্না য়েন্থোকপা অমসুং মহৈ-মশিং অমসুং মীওই অমগী ওইবা ইনকমদা (per capita income) ফংখিবা অচৌবা খুমাং চাউশিনবা য়াওনা রাজ্য অসিগী চাউখৎ-থৌরাংগী মাইপাকপশিংগীদমক নুংঙাইবা ফোংদোকখি।

রাজ্যগী লেজিস্লেচরনা মসিগী গোল্দন জুবিলী মপুং ফারকপদা নুংঙাইবা ফোংদোক্লদুনা, শ্রী সি. পি. রাধাকৃস্নন্না লেজিস্লেতিব সেক্রেতরিয়েৎপু প্লাস্তিক য়াওদবা অমা ওইহনবা অমসুং এসেমব্লী লাইব্রেরী অমসুং ম্যুজিয়ম লিংখৎপনচিংবা খোঙথাংশিংবু থাগৎখি।

লেজিস্লেতরশিংনা মীখলগী মাইপাকপদগী হেন্না মীয়ামগী সেবা তৌবনা হেন্না মরু ওইনা থম্নবা তকশিল্লদুনা, ুপ রাস্ত্রপতিনা হায়খি মদুদি মীখলশিংদি ভোৎকী খুত্থাংদা মাইপাকপা য়াই, অদুবু মীয়ামগী ইকায়খুম্নবা অমসুং থাজবদি কত্থোকপগা লোইননা সেবাগী খুত্থাংদতা ফংবা ঙমগনি। মহাক্না মেম্বরশিংদা মীয়ামগী পোলিসী অমসুং মখোয়গী কন্সতিত্যুয়েন্সীশিংগা মরী লৈনবা ৱাফমশিং পুখৎনবা ক্বেসন আৱর (Question Hour) অমসুং জিরো আৱর (Zero Hour)বু কান্নবা মওংদা শিজিন্ননবা হায়খি।

রাজ্য সভাগী প্রিসাইদিং ওফিসর অমা ওইনা, শ্রী সি. পি. রাধাকৃস্নন্না লেজিস্লেতিবকী থবক তৌবদা ৱারী-ৱাতাই শানবা, খন্ন-নৈনবা অমসুং ৱা খন্নবগী মরুওইবদু থমখি। "খন্ন-নৈনবা, ৱা খন্নবা নত্রগা অপনবা পীবনা ফাওবা মতম পুম্নমক্তা ৱারেপ অমদা পুরকপদি তঙাইফদে," হায়বা মহাক্কী ৱারোল অদু অমুক হন্না থমলদুনা, মহাক্না হায়খি মদুদি অফবা খন্ন-নৈনবা অমনা দেমোক্রেসীবু মপাঙ্গল কনখৎহল্লি অমসুং কান্নবা পীগদবা মওংদা তেংবাংনবনা রাজ্য অমসুং জাতিবু মাংলোমদা পুখৎলি।

উপ রাস্ত্রপতিনা হায়খি মদুদি ভিক্সিত অরুনাচল প্রদেশ লৈতনা ভিক্সিত ভারত লৈবা ঙম্লোই, অমসুং চাউখৎ-থৌরাং অসি পুম্নমক য়াওবা ওইগদবনি অমসুং ত্রাইবেল নত্রগা শোত্থরবা কাংলুপ অমত্তাহুন্দোক্তুনা থনমগদবা নত্তে হায়না য়াম্না মরু ওইনা পনখি। মহাক্না শেনমীৎলোন চাউখৎনবা অমসুং মীয়ামগী য়াইফনবগীদমক মহৌশাগী লন-থুমশিং অসি থৌদাং মশক খঙনা শিজিন্নবগা লোয়ননা অকোয়বগী ফীভমগী ৱাফমশিংদা চপ মান্নবা চাং অমা থম্বগী মথৌ তাবদুসু পনখি। অরুনাচল প্রদেশকী চাউরবা হাইদ্রোপাৱরগী পোতেন্সিয়েল লৈরিবা অদু পল্লদুনা, মহাক্না হায়খি মদুদি মসি মতিক চানা শীজিন্নবনা হেন্না চাউবা রেভেন্যু ফংহনবা ঙমগনি অমসুং রাজ্যগী চাউখৎ-থৌরাংবু য়াংখৎহনবা ঙমগনি।

অরুনাচল প্রদেশকী গভর্নর, লেফতনেন্ত জেনেরেল (রিতায়র্দ) কৈৱাল্যা ত্রিবিক্রম পর্নাইক, অরুনাচল প্রদেশ লেজিস্লেতিব এসেমব্লীগী স্পীকর, শ্রী তেসাম পোংতে, মুখ্য মন্ত্রী, শ্রী পেমা খান্দু, উপ মুখ্য মন্ত্রী, শ্রী চৌনা মেইন, লেজিস্লেতিব এসেমব্লীগী মেম্বরশিং, রাজ্য লৈঙাক অমসুং লেজিস্লেতিব সেক্রেতরিয়েৎকী সেনিয়র ওফিসিয়েলশিংনা থৌরম অদুদা শরুক য়াখি।

*****