ఆర్థిక వ్యవస్థలో మారుతున్న అవసరాలకు అనుగుణంగా.. బ్యాంకింగ్, ఆర్థిక రంగాన్ని బలోపేతం చేయడానికీ, వ్యాపార నిర్వహణను మరింత సులభతరం చేయడానికీ, చట్టపరమైన, నిబంధనా యంత్రాంగాల ఆధునికీకరణకూ ప్రభుత్వం నిరంతరం సంస్కరణలను అమలు చేస్తోంది. బ్యాంకింగ్ విధానాలు, సాంకేతిక పరిజ్ఞానం వేగంగా విస్తరిస్తున్న నేపథ్యంలో.. ఈ మార్పులకు అనుగుణంగా బ్యాంకింగ్ రికార్డుల నిర్వహణ చట్టాలను మార్చాల్సిన అవసరం ఏర్పడుతోంది.

‘రుజువులుగా బ్యాంకింగ్ రికార్డుల చట్టం (బ్యాంకర్స్ బుక్స్ ఎవిడెన్స్ యాక్ట్)-1891’ స్థానంలో కొత్తగా రూపొందించిన ‘బ్యాంకర్స్ బుక్స్ ఎవిడెన్స్ యాక్ట్- 2026’ చట్టానికి 2026 ఆగస్టు 13న గౌరవ రాష్ట్రపతి ఆమోదం లభించింది. ప్రస్తుత ఆధునిక బ్యాంకింగ్ విధానాలకు అనుగుణంగా బ్యాంకింగ్ రికార్డులను సాక్ష్యాలుగా వినియోగించేలా.. ఒక కొత్త విధానానికి ఈ చట్టం అవకాశం కల్పిస్తుంది.

2026 సెప్టెంబర్ 10 నాటి నోటిఫికేషన్ (గెజిట్ నోటిఫికేషన్ లింక్ కింద ఉంది)... ఈ చట్టంలోని నిబంధనలు అమలులోకి వచ్చే తేదీగా 2026 అక్టోబరు 1ని నిర్ణయించింది.

భౌతిక, ఎలక్ట్రానిక్, డిజిటల్, వర్చువల్, క్లౌడ్ ఆధారిత, ఇతర ఆధునిక రూపాల్లో నిర్వహించే బ్యాంకింగ్ రికార్డులకు గుర్తింపునిస్తూ.. సాంకేతిక నిష్పాక్షికత విధానాన్ని ఈ చట్టం అవలంబిస్తుంది. అలాగే చేత్తో చేసిన, డిజిటల్ లేదా ఎలక్ట్రానిక్ సంతకాల ద్వారా బ్యాంకింగ్ రికార్డులను సులభంగా, ప్రామాణికంగా ధ్రువీకరించే వెసులుబాటును కల్పిస్తుంది.

న్యాయ విచారణల్లో బ్యాంకు నేరుగా ఒక పక్షం కానప్పుడు.. బ్యాంకు అధికారులకు సమన్లు పంపే అంశంపై కొత్త చట్టంలో స్పష్టతనిచ్చారు. ఇకపై అలాంటి సందర్భాల్లో బ్యాంకు అధికారులను పిలవాల్సి వస్తే.. దానికి గల ‘ప్రత్యేక కారణాన్ని’ కోర్టు లిఖితపూర్వకంగా నమోదు చేయాల్సి ఉంటుంది.

అంతేకాకుండా, మారుతున్న ఆర్థిక రంగానికి అనుగుణంగా ఈ విధానపరమైన ఏర్పాట్లు ఉండేలా చేయడం లక్ష్యంగా.. నిర్దిష్ట ఆర్థిక రంగ సంస్థలకు లేదా సంస్థావర్గాలకు కూడా కేంద్ర ప్రభుత్వం ఈ నిబంధనలను వర్తింపజేయవచ్చు.

సాంకేతిక పురోగతి, మారుతున్న ఆర్థిక అవసరాలకు అనుగుణంగా చట్టాలను ఆధునికీకరించడం, వాణిజ్య సౌలభ్యాన్ని ప్రోత్సహించడం, ఆధునిక - ప్రభావవంతమైన ఆర్థిక వ్యవస్థను బలోపేతం చేయడం పట్ల ప్రభుత్వ నిరంతర నిబద్ధతను ఈ సంస్కరణలు ప్రతిబింబిస్తాయి.

2026 సెప్టెంబరు 10 నాటి గెజిట్ నోటిఫికేషన్ లింక్:

https://egazette.gov.in/(S(4du1dbsf0xrjj5ut3dnpovun))/ViewPDF.aspx

https://egazette.gov.in/(S(blcfbghvrddn1sxjnyv5hrpw))/ViewPDF.aspx