ঐগী মরুপ রাস্ত্রপতি মেক্রোন, এক্সেলেন্সীশিং, শক্নাইরবা শরুক য়ারিবশিং, খুরুমজরি!

অহানবা ইন্তরনস্নেল স্পেস সম্মিতকী শরুক অমা ওইবা ফংবদা ঐহাক হরাওই। মসিগী মতম চাবা থৌরাং অসি লৌখৎপগীদমক অমসুং মহাক্কী মীনুংশি লৈরবা বার্তনগীদমক রাস্ত্রপতি মেক্রোনবু ঐহাক্না থাগৎচরি। চহিচা কয়াগী মমাংদগী, স্পেসনা ঐখোয়গী ৱাখল্লোনবু পুক্নিং থৌগৎলক্লি। ঙসিদি, মসিনা ক্লাইমেত অমসুং মহৈ-মরোংদগী হৌনা মহাসাগর অমসুং খুন্নাইশিং ফাওবা, মালেমদা পুন্সিগী মওং-মতৌ শেম্লি। স্পেসকী ৱাশক অসি লোইবা নাইদে। ঐখোয়গী থৌদাং অসি অপুনবনি। ওর্বিতশিং অসি হেন্না চিনশিল্লকপা, তেক্নোলোজীশিং হেন্না মপাঙ্গল কনখৎলকপা, অমসুং থবক তৌরিবশিং হেন্না য়াম্লকপগা লোয়ননা ঐখোয়না খনবা অদু ময়েক শেংবা ওইগদবনি: খৎন-চৈনবগী মহুৎ তেংবাংনবা, মতম খরা কান্নবগী মহুৎ তুং-কোইনা চৎনবা; অমসুং তোখাইবাগী মহুৎ পুন্সিনবা।

মরুপশিং,

ভারতকী থৌওং অসি বসুধৈব কুতুম্বকমদা য়ুম্ফম ওই, মদুদি মালেম অমা, ইমুং অমা, তুংলমচৎ অমা হায়ননি। ৱাখল্লোন অসি হৌজিক মালেমগী ৱাংমদা চৎকদবনি। ঐখোয়না ইন্তরনেস্নেল লো, ৱারী-ৱাতাই অমসুং মল্তিলেতরেল কোওপরেসনদা য়ুম্ফম ওইবা অশোই-অঙাম লৈতবা, শান্তি ওইবা অমসুং তুং-কোইনা চৎনবা য়াবা স্পেস দোমেন অমবু শৌগৎলি। সাইন্তিফিক দেতানা হাংদোকপা অমসুং চুম্না তৌবগা লোয়ননা ময়ামগী কান্ননবগীদমক থবক তৌগদবনি।

ভারতকী স্পেসকী খোঙচৎ অসিনা ৱাখল্লোন অসি উৎলি। খোঙচৎ অসিগী ময়াইদা লৈরিবা ইসরো (ISRO) না মসিগী খ্বাইদগী ফবা অমসুং চাদিং য়াম্না চংদবা মিসনশিংগীদমক মালেমগী ওইনা থাগৎপা ফংখ্রে। মসিগী মতিক-ময়াইশিং অসিনা লৌমীশিং অমসুং ঙামীশিং, নোংজু-নুংশাগী ফিভম খঙহনবা, অমাং-অতা থোকপদা ঙাকথোকপা অমসুং নেভিগেসনদা কান্নবা পীরি। লৈবাক ৩৪দগী সেতিলাইত ৪৩০ হেনবনা ভারতকী রোক্কেতশিংদা তোংদুনা স্পেস্তা চৎখ্রে। ইসরোগী তেক্নোলোজীশিং অমসুং পার্তনরশিপশিং অসিনা ভারত্তা খক্তা নত্তনা পাক-চাউরবা মালেমদসু কান্নবা পীরি।

মালেমগী থাজবা অসিগী মতুংদা ভারতকী সাইন্তিস্তশিং, ইঞ্জিনিয়রশিং অমসুং তেক্নিসিয়নশিংগী চারোল-শুরোল কয়াগী কত্থোকপা অমসুং কন্না হোৎনবা অদু লৈরি। অহিং-নুংথিল খাইদনা থবক তৌরদুনা, মখোয়না ইসরোগী মীংচৎ অদু মালেমগী  মমাংদা মিসন অমগী মতুংদা অমা, মাইপাকপা অমগী মতুংদা অমা শেমগৎখ্রে, অমসুং স্পেস্তা চৎপা লৈবাকশিংগী মরক্তা ভারতপু চাউথোকচনীংঙাই ওইবা মফম অমা পীখ্রে।

চন্দ্রয়ান-৩না ভারতপু থাগী খা-থংবা পোল (south pole) মনাক্তা তাখিবা অহানবা লৈবাক ওইহনখ্রে। অদিত্যা-L1 না নুমিৎকী অরোনবা ৱাফমশিং ময়েক শেংহল্লি। মমাং চহিদা, ভারত মচা অমা ইন্তরনেস্নেল স্পেস স্তেসন্দা চৎখি। তুংলমচৎতা য়েংলদুনা, ঐখোয়না ২০৩৫ ফাওবগী মনুংদা ভারতকী স্পেস স্তেসন অমা লিংখৎনবা অমসুং ২০৪০ ফাওবগী মনুংদা থাদা ভারত মচা অমা থাহন্নবা পান্দম থম্লি। হোৎনরিবা পুম্নমক অসিদা, ঐখোয়গী লমজিংলিবা কাংলোন অসি ময়েক শেংলি: মসিগী কান্নবশিং অসি মীওইবা খুন্নাই পুম্নমক্তা য়ৌহনগদবনি।

ইসরোগা লোয়ননা, ভারতকী প্রাইভেত স্পেস সেক্তরসু য়াম্না চাউনা চাউখৎলক্লি। এন্তর্প্রাইজকী ইনর্জী অসি ইসরোগী মতিক-ময়াইগা লেংমান্ননা শরুক য়ামিন্নরক্লি। ১৯৬০গী মতমদা থুম্বাদা ভারতকী স্পেস প্রোগ্রাম হৌরকপদগী ফ্রান্স অসি থাজনীংঙাই ওইবা পার্তনর অমা ওইদুনা লাক্লি। ঙসিদি, ঐখোয়গী মরক্তা খুৎশম্ননা থবক তৌমিন্নবা অসি অর্থ ওবজার্ভেসন অমসুং এদভান্স তেক্নোলোজীশিংদা পাকথোক-চাউথোক্লে, মসিনা সাইন্তিফিক্কী ওইবা খ্বাইদগী ফবা অদুবু মীওইবগী পান্দমগা পুন্সিনহল্লি। ঐখোয়না ফ্রান্স অমসুং মালেমবু ভারতকী মথংগী স্পেস ফ্রন্তিয়রদা পুন্না চৎমিন্নবা মীওইশিং ওইনবা বার্তন তৌরি।

মরুপশিং,

পেরিসতা পাংথোকপা স্পেস সম্মিত অসিনা ময়েক শেংবা পাউজেল অমা পীবা ওরসনু: ঐখোয়না মীওইবা খুন্নাই পুম্নমক্কীদমক, অমসুং লাক্কদৌরিবা চারোল-শুরোলশিংগীদমক পুন্না থি-হুমগনি, পুন্না অনৌবা পুথোক্কনি অমসুং স্পেসপু পুন্না ঙাক-শেনগনি। ঐহাক্না শরুক য়ারিবা পুম্নমক্তা ঐহাক্কী য়াইফ-পাউজেল পীজরি।

থাগৎচরি।

*****