میرے دوست صدر میکرون ، عالی مرتبت  حضرات ، معزز شرکاء ، نمسکار!

مجھے پہلے بین الاقوامی خلائی اجلاس کا حصہ بننے پر خوشی ہے۔ میں صدر میکرون کا ان کی  پرخلوص دعوت اور اس بروقت اقدام کے لیے شکریہ ادا کرتا ہوں۔ صدیوں سے خلا نے ہمارے تخیل کو متاثر کیا۔ آج یہ زمین پر زندگی کے مختلف پہلوؤں، جیسے آب و ہوا، فصلوں، سمندروں اور انسانی برادریوں کو متاثر کر رہا ہے۔ خلائی شعبے کے امکانات لامحدود ہیں۔ اس کی ذمہ داری ہم سب کی مشترکہ ہے۔ جیسے جیسے خلائی مداروں میں بھیڑ بڑھ رہی ہے، ٹیکنالوجی زیادہ طاقتور ہو رہی ہے اور خلائی سرگرمیوں میں شامل ممالک اور اداروں کی تعداد بڑھ رہی ہے، ہمیں اپنی ترجیحات واضح رکھنی ہوں گی: ٹکراؤ کے بجائے تعاون، قلیل مدتی فائدے کے بجائے پائیداری، اور امتیاز کے بجائے شمولیت کو اختیار کرنا ہوگا۔

دوستو!

ہندوستان کا نقطہ نظر وسودھیو کٹمبکم یعنی ایک زمین، ایک خاندان، ایک مستقبل میں جڑا ہوا ہے۔ اس روح کو اب زمین سے آگے سفر کرنا ہوگا۔ ہم بین الاقوامی قانون، مکالمے اور کثیرجہتی تعاون پر مبنی ایک محفوظ، پرامن اور پائیدار خلائی ڈومین کی حمایت کرتے ہیں۔ سائنسی اعداد و شمار کو کھلے پن اور دیانتداری کے ساتھ مشترکہ بھلائی کے لیے کام کرنا چاہیے۔

ہندوستان کا خلائی سفر اسی فلسفے کی عکاسی کرتا ہے۔ اسرو ، جو اس سفر کے مرکز میں کھڑا ہے، نے اپنی بہترین کارکردگی اور کم لاگت والے مشنوں کے لیے عالمی سطح پر پذیرائی حاصل کی ہے۔ اس کی صلاحیتیں کسانوں اور ماہی گیروں، موسم کی پیشن گوئی، آفات کے انتظام اور نیویگیشن کی خدمت کرتی ہیں۔ 34ممالک کے 430 سے زیادہ سیٹلائٹ ہندوستانی راکٹوں پر سوار ہو کر خلا میں جا چکے ہیں۔ اسرو کی ٹیکنالوجی اور شراکت داری نہ صرف ہندوستان بلکہ وسیع تر دنیا کی خدمت کرتی ہے۔

اس عالمی اعتماد کے پیچھے ہندوستانی سائنسدانوں، انجینئروں اور تکنیکی ماہرین کی نسلوں کی لگن اور محنت ہے۔ دن رات کام کرتے ہوئے، انہوں نے مشن کے ذریعے اسرو کے عالمی ساکھ کے مشن کی تعمیر کی، کامیابی کے ذریعے کامیابی حاصل کی  اور ہندوستان کو خلائی سفر کرنے والے ممالک میں فخر کا مقام دیا۔

چندریان-3 نے ہندوستان کو چاند کے جنوبی قطب کے قریب اترنے والا پہلا ملک بنا دیا۔ آدتیہ-ایل 1 سورج کے راز کھول رہا ہے۔ پچھلے سال ایک ہندوستانی نے بین الاقوامی خلائی اسٹیشن کا دورہ کیا تھا۔ آگے دیکھتے ہوئے ہمارا مقصد 2035 تک ایک ہندوستانی خلائی اسٹیشن قائم کرنا اور 2040 تک ایک ہندوستانی کو چاند پر بھیجنا ہے۔ ان تمام کوششوں میں ، ہمارا رہنما اصول واضح رہا ہے: ان کے فوائد پوری انسانیت تک پہنچنا چاہیے۔

اسرو کے ساتھ ساتھ ہندوستان کا نجی خلائی شعبہ بھی بڑے پیمانے پر ترقی کر رہا ہے۔ انٹرپرائز کی توانائی اسرو کی بہترین کارکردگی میں شامل ہو رہی ہے۔ 1960کی دہائی میں تھمبا میں ہندوستانی خلائی پروگرام شروع ہونے کے بعد سے فرانس ایک قابل اعتماد شراکت دار رہا ہے۔ آج ، ہمارا تعاون زمین کے مشاہدے اور جدید ٹیکنالوجیز پر محیط ہے، جو سائنسی مہارت کو انسانی مقصد کے ساتھ متحد کرتا ہے۔ ہم فرانس اور دنیا کو ہندوستان کی اگلی خلائی سرحد میں شریک مسافر بننے کی دعوت دیتے ہیں۔

دوستو!

پیرس میں ہونے والی خلائی سربراہ کانفرنس سے ایک واضح پیغام جانا چاہیے: ہم پوری انسانیت اور آنے والی نسلوں کے لیے مل کر خلائی تحقیق کریں گے، مل کر اختراع کریں گے اور مل کر خلا کا تحفظ کریں گے۔ میں کانفرنس میں شرکت کرنے والے تمام افراد کے لیے نیک خواہشات کا اظہار کرتا ہوں۔

آپ کا شکریہ۔

*******

 (ش ح۔ع و۔ ن ع)

U- 3264