ആദരണീയ പ്രധാനമന്ത്രി,
ഇരു രാജ്യങ്ങളിൽ നിന്നുമുള്ള പ്രതിനിധികളേ,
മാധ്യമ സുഹൃത്തുക്കളേ,
നമസ്കാരം!

പ്രധാനമന്ത്രിയെ അദ്ദേഹത്തിൻ്റെ ആദ്യ ഇന്ത്യാ സന്ദർശനത്തിൽ ഹൃദ്യമായി സ്വാഗതം ചെയ്യാൻ സാധിച്ചതിൽ ഞാൻ സന്തുഷ്ടനാണ്.

തീർച്ചയായും ഇത് അദ്ദേഹത്തിന്റെ ആദ്യ ഇന്ത്യാ സന്ദർശനമാണ്, എങ്കിലും അദ്ദേഹത്തിന് ഇന്ത്യയുമായി ദീർഘകാലത്തെ ബന്ധമുണ്ട്. വർഷങ്ങളോളം ആന്റ്‌വെർപിന്റെ മേയറായി സേവനമനുഷ്ഠിച്ച അദ്ദേഹം, ആന്റ്‌വെർപിലെ ഇന്ത്യൻ സമൂഹത്തെയും ഇന്ത്യ-ബെൽജിയം വജ്ര വ്യാപാരത്തെയും എല്ലായ്പ്പോഴും പിന്തുണച്ചു.

സുഹൃത്തുക്കളേ,

ഇന്ത്യ-ബെൽജിയം ബന്ധം ചരിത്രത്തിൽ വളരെ ആഴത്തിൽ വേരൂന്നിയതാണ്. ഒന്നാം ലോകമഹായുദ്ധകാലത്ത് ബെൽജിയത്തിൽ ആയിരക്കണക്കിന് ഇന്ത്യൻ സൈനികർ കാണിച്ച ധൈര്യവും ത്യാഗവും നമ്മുടെ പങ്കിട്ട ഓർമ്മകളുടെ സുപ്രധാന ഭാഗമാണ്. ഇന്ന് ജനാധിപത്യ മൂല്യങ്ങളും വിപണി സമ്പദ്‌വ്യവസ്ഥയും ആഴത്തിലുള്ള ജനകീയ ബന്ധങ്ങളും നമ്മെ സ്വാഭാവിക പങ്കാളികളാക്കുന്നു.

സുഹൃത്തുക്കളേ,

പത്ത് വർഷം മുമ്പ് എനിക്ക് ബെൽജിയം സന്ദർശിക്കാൻ അവസരം ലഭിച്ചിരുന്നു, കഴിഞ്ഞ ദശകത്തിൽ നമ്മുടെ പങ്കാളിത്തം ശ്രദ്ധേയമായ പുരോഗതി കൈവരിച്ചതിൽ ഞാൻ സന്തുഷ്ടനാണ്.

ഇന്ന് നമ്മുടെ സഹകരണത്തിന്റെ വ്യാപ്തി പരമ്പരാഗത മേഖലകൾക്കപ്പുറത്തേക്ക് പ്രതിരോധം, ശുദ്ധോർജ്ജം തുടങ്ങിയ തന്ത്രപ്രധാന മേഖലകളിലേക്ക് വ്യാപിച്ചിരിക്കുന്നു. 'സോറവാർ' (Zorawar) ടാങ്ക് പോലുള്ള ആധുനിക പ്രതിരോധ ഉപകരണങ്ങളിൽ നാം ഒരുമിച്ച് പ്രവർത്തിക്കുന്നു. ആന്ധ്രാപ്രദേശിലെ കാക്കിനഡയിൽ ലോകത്തിലെ തന്നെ ഏറ്റവും വലിയ ഗ്രീൻ അമോണിയ പദ്ധതികളിലൊന്ന് നാം വികസിപ്പിച്ചെടുക്കുകയാണ്.

സുഹൃത്തുക്കളേ,

ഇന്ന് ലോകം വളരെ വലിയ ഭിന്നതകളുടെ ഒരു കാലഘട്ടത്തിലൂടെയാണ് കടന്നുപോകുന്നത്. ലോകത്തിന്റെ പല ഭാഗങ്ങളിലും സംഘർഷങ്ങൾ തുടരുകയാണ്. ഭക്ഷണം, ഇന്ധനം, വിതരണ ശൃംഖലകൾ എന്നിവയെയെല്ലാം അനിശ്ചിതത്വം ബാധിച്ചുകൊണ്ടിരിക്കുന്നു. 

ഈ വെല്ലുവിളി നിറഞ്ഞ സാഹചര്യത്തിലും ഇന്ത്യയുടെ സമ്പദ്‌വ്യവസ്ഥ അതിന്റെ ചലനശക്തി നിലനിർത്തിയിട്ടുണ്ട്. കഴിഞ്ഞ പാദത്തിൽ നമ്മൾ 7.8% വളർച്ച കൈവരിച്ചു. ഇന്ന് ഇന്ത്യയുടെ വളർച്ചാ ​ഗാഥ ലോകത്തിന് ആത്മവിശ്വാസത്തിന്റെയും പുതിയ അവസരങ്ങളുടെയും ഉറവിടമായി മാറുകയാണ്.

സുഹൃത്തുക്കളേ,

ഈ വർഷത്തിന്റെ തുടക്കത്തിൽ ചരിത്രപ്രധാനമായ ഇന്ത്യ-യൂറോപ്യൻ യൂണിയൻ സ്വതന്ത്ര വ്യാപാര കരാറിന് നമ്മൾ അന്തിമരൂപം നൽകി. ലോകത്തിലെ ഏറ്റവും വലിയ രണ്ട് ജനാധിപത്യ ശക്തികൾ തമ്മിലുള്ള ഈ അഭൂതപൂർവ്വമായ സഹകരണം ആഗോള സ്ഥിരതയ്ക്കും വികസനത്തിനും പങ്കിട്ട സമൃദ്ധിക്കും പുതിയ ഊർജ്ജം നൽകും.

ഇന്ത്യയുടെ സുസ്ഥിരമായ സാമ്പത്തിക പുരോഗതിയും ഈ കരാറും നമ്മുടെ സാമ്പത്തിക ബന്ധങ്ങൾക്ക് പുതിയ വഴികൾ തുറന്നുതന്നിട്ടുണ്ട്. ഇന്ന് ഈ സാധ്യതകളെ പ്രകടമായ ഫലങ്ങളാക്കി മാറ്റുന്നതിനായി നാം നിരവധി സുപ്രധാന നടപടികൾ സ്വീകരിച്ചിട്ടുണ്ട്.

സുഹൃത്തുക്കളേ,

ബെൽജിയൻ കമ്പനികൾക്കായി ഇന്ത്യയിൽ ഒരു നിക്ഷേപ ഫാസ്റ്റ് ട്രാക്ക് സംവിധാനം നമ്മൾ രൂപീകരിച്ചിട്ടുണ്ട്. ഇന്ത്യ-ബെൽജിയം ബിസിനസ് ഫോറത്തെ ഒരു സ്ഥിരം സംവിധാനമാക്കാൻ നമ്മൾ തീരുമാനിച്ചു. ഇരുരാജ്യങ്ങളുടെയും സാമ്പത്തിക, ഫിൻടെക്, നിയന്ത്രണ സ്ഥാപനങ്ങൾ തമ്മിലുള്ള ഏകോപനം നാം ശക്തിപ്പെടുത്തും.

ഈ എല്ലാ സംരംഭങ്ങളിലൂടെയും അടുത്ത അഞ്ച് വർഷത്തിനുള്ളിൽ ഉഭയകക്ഷി വ്യാപാരം ഇരട്ടിയാക്കുക എന്ന നമ്മുടെ ലക്ഷ്യം നാം കൈവരിക്കും.

സുഹൃത്തുക്കളേ,

പ്രതിരോധ, സുരക്ഷാ സഹകരണം നമ്മുടെ ബന്ധത്തിന്റെ നെടുംതൂണാണ്. ഇന്ന് ഇരുരാജ്യങ്ങളും തമ്മിലുള്ള സൈനിക കൈമാറ്റങ്ങളും പരിശീലന സഹകരണവും വർധിപ്പിക്കാൻ നാം സമ്മതിച്ചു.

നമ്മുടെ ​ഗവൺമെന്റുകളും പ്രതിരോധ വ്യവസായങ്ങളും തമ്മിലുള്ള കരാറുകൾ പ്രതിരോധ രംഗത്തെ സംയുക്ത വികസനത്തിനും സംയുക്ത ഉൽപ്പാദനത്തിനും പുതിയ അവസരങ്ങൾ തുറന്നുനൽകും. രഹസ്യാന്വേഷണ വിവരങ്ങൾ പങ്കുവെക്കുന്നതും കുറ്റകൃത്യങ്ങൾ തടയുന്നതിൽ നമ്മുടെ ഏജൻസികൾ തമ്മിലുള്ള സഹകരണവും നമ്മൾ കൂടുതൽ ശക്തിപ്പെടുത്തും.

സുഹൃത്തുക്കളേ,

ഒരു ശുദ്ധോർജ്ജ ഭാവിയും വിശ്വസനീയമായ വിതരണ ശൃംഖലകളും നമ്മുടെ പങ്കിട്ട മുൻഗണനകളാണ്.

ഇന്ന് ഒപ്പുവെച്ച പുനരുപയോഗ ഊർജ്ജത്തെക്കുറിച്ചുള്ള ധാരണാപത്രം നമ്മുടെ സുസ്ഥിരതാ സഹകരണത്തിന് പുതിയ ഊർജ്ജം നൽകും. നിർണായക ധാതുക്കളുടെ കാര്യത്തിൽ സംസ്‌കരണത്തിലും പുനരുപയോഗത്തിലും സഹകരണം വർധിപ്പിക്കാൻ നാം തീരുമാനിച്ചു.

സെമികണ്ടക്ടർ രംഗത്തെ ബെൽജിയത്തിന്റെ വൈദഗ്ധ്യവും ഇന്ത്യയുടെ വിപുലമായ ശേഷിയും പരസ്പരം പൂരകങ്ങളാണ്. ഈ ദിശയിൽ ബെൽജിയത്തിലെ IMEC ഇൻസ്റ്റിറ്റ്യൂട്ടിനെ ഇന്ത്യയുടെ സെമികണ്ടക്ടർ ആവാസവ്യവസ്ഥയുമായി ബന്ധിപ്പിക്കുന്നതിന് നാം ഒരുമിച്ച് പ്രവർത്തിക്കും.

സുഹൃത്തുക്കളേ,

ജനങ്ങൾ തമ്മിലുള്ള ആഴത്തിലുള്ള ബന്ധമാണ് നമ്മുടെ സൗഹൃദത്തിന്റെ ഏറ്റവും വലിയ കരുത്ത്. ഇന്ന് നമ്മുടെ സ്റ്റാർട്ടപ്പുകൾ തമ്മിലുള്ള ബന്ധം ശക്തിപ്പെടുത്തുന്നതിനും സമുദ്ര മേഖലയിലെ ശേഷി വർധിപ്പിക്കുന്നതിനും നാം സമ്മതിച്ചു.

സർവകലാശാലാ, ഗവേഷണ സഹകരണങ്ങളും നാം ശക്തിപ്പെടുത്തും. കൂടാതെ, പ്രൊഫഷണലുകളുടെയും പ്രതിഭകളുടെയും സുഗമമായ യാത്ര സുഗമമാക്കുന്നതിന് ഒരു "മൈഗ്രേഷൻ ആൻഡ് മൊബിലിറ്റി പാർട്ണർഷിപ്പ് കരാർ" നാം ഉടൻ അന്തിമമാക്കും.

സുഹൃത്തുക്കളേ,

ഇന്ന് പ്രാദേശികവും ആഗോളവുമായ സംഭവവികാസങ്ങളെക്കുറിച്ച് നമ്മൾ വിശാലമായ ചർച്ചകൾ നടത്തി. ഇന്ത്യയും ബെൽജിയവും നിയമവാഴ്ചയിലും സംഭാഷണത്തിലും നയതന്ത്രത്തിലും വിശ്വസിക്കുന്നു.

യുക്രെയ്നായാലും പശ്ചിമേഷ്യയായാലും സംഘർഷങ്ങൾക്ക് വേഗത്തിൽ പരിഹാരം കാണുന്നതിനും സമാധാനം പുനഃസ്ഥാപിക്കുന്നതിനും ലക്ഷ്യമിട്ടുള്ള എല്ലാ പരിശ്രമങ്ങളെയും നാം പിന്തുണയ്ക്കുന്നു. തീവ്രവാദത്തെ അതിന്റെ എല്ലാ രൂപങ്ങളിലും ഭാവങ്ങളിലും ഇല്ലാതാക്കുക എന്നത് നമ്മുടെ പങ്കിട്ട പ്രതിബദ്ധതയാണ്.

ആദരണീയനായ പ്രസിഡൻ്റ്,

കഴിഞ്ഞ മാസം ബെൽജിയവും നെതർലൻഡ്‌സും ചേർന്ന് ഹോക്കി ലോകകപ്പിന് സംയുക്തമായി ആതിഥേയത്വം വഹിച്ചു. ഇത്രയും വലിയ ലോകകപ്പ് വിജയകരമായി സംഘടിപ്പിച്ചതിന് ഞാൻ നിങ്ങളെ അഭിനന്ദിക്കുന്നു. ഒപ്പം നമ്മുടെ കളിക്കാരുടെ കഠിനാധ്വാനത്തെയും പ്രകടനത്തെയും ഞാൻ പ്രശംസിക്കുന്നു.

വളരെക്കാലമായി ഇന്ത്യയും ബെൽജിയവും തമ്മിലുള്ള ഒരു കണ്ണിയാണ് വജ്രങ്ങൾ. ഇന്ന് നാം ഈ ചരിത്രപ്രധാന ബന്ധത്തെ നവീനവും കൂടുതൽ വിപുലവുമായ ബന്ധത്തിലേക്ക് മാറ്റുകയാണ്.

ഇന്നത്തെ ചർച്ചകൾ നമ്മുടെ ഉഭയകക്ഷി ബന്ധത്തിൽ ഒരു പുതിയ അധ്യായത്തിന്റെ തുടക്കമാകുമെന്ന് എനിക്ക് പൂർണ്ണ ആത്മവിശ്വാസമുണ്ട്. ഒരിക്കൽ കൂടി, നിങ്ങളെയും നിങ്ങളുടെ പ്രതിനിധി സംഘത്തെയും ഞാൻ ഇന്ത്യയിലേക്ക് ഹൃദ്യമായി സ്വാഗതം ചെയ്യുന്നു.

വളരെയധികം നന്ദി.

നിരാകരണം: ഇത് പ്രധാനമന്ത്രിയുടെ പ്രസ്താവനയുടെ ഏകദേശ പരിഭാഷയാണ്. യഥാർത്ഥ പ്രസ്താവന ഹിന്ദിയിലായിരുന്നു നടത്തിയത്.

***

NK