ہندوستان کے نائب صدر جمہوریہ اور پنجاب یونیورسٹی کے بربنائے  عہدہ چانسلر جناب سی. پی. رادھاکرشنن نے آج پنجاب یونیورسٹی، چندی گڑھ کا دورہ کیا۔ اپنے دورے کے دوران نائب صدر نے جدید آلات کی  سہولت کا افتتاح کیا، جو جدید تجزیاتی آلات کی سہولت/مرکزی آلاتی تجربہ گاہوں (ایس اے آئی ایف/سی آئی ایل) میں قائم کی گئی ہے۔ انہوں نے پنجاب یونیورسٹی ٹیک اختراعی فورم (پی یو-ٹی آئی ایف) کا بھی افتتاح کیا۔ ایس اے آئی ایف/سی آئی ایل اور پی یو-ٹی آئی ایف یونیورسٹی کے علمی، اطلاقی اور عملی تحقیق کے ماحولیاتی نظام کے اہم اجزا ہیں، جو محققین، اختراع کاروں اور صنعت کو جدید تجزیاتی سہولیات، نئے کاروباری منصوبوں کی پرورش اور کاروباری معاونت فراہم کرتے ہیں۔

اجتماع سے خطاب کرتے ہوئے جناب سی. پی. رادھاکرشنن نے 1882 میں اپنے قیام کے بعد سے یونیورسٹی کی شاندار علمی و تاریخی وراثت کو یاد کیا اور کہا کہ اس ادارے نے نسل در نسل قائدین، ماہرینِ قانون، سائنس دانوں، کھلاڑیوں اور سرکاری عہدیداروں کی خدمات کے ذریعے ملک کی تعمیر و ترقی میں نمایاں کردار ادا کیا ہے۔

نائب صدر جمہوریہ نے کہا کہ وزیر اعظم جناب نریندر مودی کی قیادت میں  ہندوستان  کے اعلیٰ تعلیمی اور سائنسی تحقیقی نظام میں انقلابی تبدیلی آئی ہے۔ انہوں نے کہا کہ ہندوستان معیاری تعلیم، تحقیق اور جدت طرازی کے لیے بتدریج ایک عالمی مرکز کے طور پر ابھر رہا ہے۔

آج کی افتتاحی تقریبات کو دو اہم سنگِ میل قرار دیتے ہوئے جناب سی. پی. رادھاکرشنن نے کہا کہ پانچ جدید سائنسی آلات—ایٹامک فورس مائیکرواسکوپ، رمن اسپیکٹرومیٹر، ڈی این اے سیکوینسر، فلو سائٹو میٹر اور ایف ٹی آئی آر اسپیکٹرومیٹر—کی تنصیب سے نینو ٹیکنالوجی، مادّی سائنس، ماحولیاتی سائنس اور جینومکس سمیت مختلف شعبوں میں یونیورسٹی کی تحقیقی صلاحیتوں کو نمایاں طور پر تقویت ملے گی۔

جدت طرازی کی اہمیت کو اجاگر کرتے ہوئے نائب صدر نے کہا کہ بایو-نیسٹ کو سیکشن 8 کے تحت غیر منافع بخش کمپنی کی حیثیت سے پنجاب یونیورسٹی ٹیک اختراعی فورم میں تبدیل کیا جانا تحقیق، کاروباری سرگرمیوں اور ٹیکنالوجی کی ترقی کو آگے بڑھانے کے لیے ایک نئے ادارہ جاتی ڈھانچے کی تشکیل کی نمائندگی کرتا ہے۔ انہوں نے زور دے کر کہا کہ جب تعلیمی ادارے، صنعت، کاروباری انکیوبیٹرز اور سرمایہ کار مل کر کام کرتے ہیں تو جدت طرازی کو فروغ ملتا ہے۔

نوجوان محققین سے خطاب کرتے ہوئے انہوں نے ان پر زور دیا کہ وہ بامقصد انداز میں سائنس کے شعبے میں آگے بڑھیں، ناکامیوں کے باوجود ثابت قدم رہیں اور ایسی اختراعات پیش کریں جو سب کے لیے مفید، وسیع پیمانے پر قابلِ عمل اور معاشرے کی حقیقی ضروریات کو پورا کرنے کی صلاحیت رکھتی ہوں۔ انہوں نے کہا کہ تحقیق کے معاشرے پر بامعنی اثرات مرتب ہونے چاہئیں۔ انہوں نے محققین اور طلبہ سے اپیل کی کہ وہ تحقیق کو درست سمت میں آگے بڑھائیں تاکہ اس کے فوائد معاشرے کے وسیع تر طبقے تک پہنچ سکیں۔

نائب صدر نے کیمپس کے تحفظ اور سلامتی کے معاملے پر بھی اظہارِ خیال کیا اور کہا کہ پی ایچ ڈی کے ایک طالب علم کی افسوس ناک موت کے بعد انہوں نے فوری طور پر یونیورسٹی انتظامیہ کو پورے کیمپس کا جامع حفاظتی جائزہ لینے کی ہدایت دی تھی۔ انہوں نے کہا کہ موجودہ بنیادی ڈھانچے کا جائزہ لینے اور تفصیلی رپورٹ پیش کرنے کے لیے ایک داخلی کمیٹی تشکیل دی گئی ہے۔ انہوں نے اس بات پر زور دیا کہ طلبہ اور عملے کی سلامتی اور بہبود یونیورسٹی کی اولین ترجیح ہونی چاہیے۔

طلبہ سے ’’نشہ سے پاک بھارت‘‘ کی تعمیر میں اپنا کردار ادا کرنے کی اپیل کرتے ہوئے جناب سی. پی. رادھاکرشنن نے ان پر زور دیا کہ وہ منشیات کے استعمال سے دور رہیں اور اپنے اہلِ خانہ اور دوستوں کو بھی ایسا کرنے کی ترغیب دیں۔

اپنے خطاب کے اختتام پر نائب صدر نے اس اعتماد کا اظہار کیا کہ جدید سائنسی سہولیات اور پنجاب یونیورسٹی ٹیک اختراعی فورم تحقیق، جدت طرازی اور کاروباری سرگرمیوں میں یونیورسٹی کے کردار کو مزید مستحکم کریں گے۔ انہوں نے طلبہ اور اساتذہ پر زور دیا کہ وہ اس بات کو یقینی بنائیں کہ کلاس رومز اور تجربہ گاہوں سے ابھرنے والے خیالات نوجوانوں کے لیے مواقع میں تبدیل ہوں اور وکست بھارت  اور خود کفیل بھارت کے وژن میں اپنا کردار ادا کریں۔ انہوں نے اجتماعی کوششوں کی ضرورت پر زور دیتے ہوئے یونیورسٹی برادری سے اپیل کی کہ پنجاب یونیورسٹی کو اعلیٰ تعلیم اور تحقیق کا عالمی معیار کا ادارہ بنانے کے لیے اقدامات کے بارے میں اپنی تجاویز پیش کریں۔

اس موقع پر پنجاب کے گورنر اور چندی گڑھ مرکز کے زیرِ انتظام علاقے کے منتظم جناب گلاب چند کٹاریہ؛ ہریانہ کے گورنر پروفیسر اشیم کمار گھوش؛ لوک سبھا کے رکن پارلیمنٹ جناب منیش تیواری؛ پنجاب یونیورسٹی کی وائس چانسلر پروفیسر میناکشی گوئل اور دیگر معزز شخصیات موجود تھیں۔

******

ش ح۔ ف ا۔ م ر

U-NO. 3030