ભારતના ઉપરાષ્ટ્રપતિ અને હોદ્દાની રૂએ પંજાબ યુનિવર્સિટીના ચાન્સેલર, શ્રી સી. પી. રાધાકૃષ્ણને આજે ચંદીગઢની પંજાબ યુનિવર્સિટીની મુલાકાત લીધી હતી. તેમની મુલાકાત દરમિયાન, ઉપરાષ્ટ્રપતિએ સોફિસ્ટિકેટેડ એનાલિટિકલ ઈન્સ્ટ્રુમેન્ટ ફેસિલિટી/સેન્ટ્રલ ઈન્સ્ટ્રુમેન્ટેશન લેબોરેટરીઝ (SAIF/CIL) ખાતે એડવાન્સ્ડ ઈન્સ્ટ્રુમેન્ટેશન ફેસિલિટીનું ઉદ્ઘાટન કર્યું હતું. તેમણે પંજાબ યુનિવર્સિટી ટેક ઈનોવેશન ફોરમ (PU-TIF) નું પણ ઉદ્ઘાટન કર્યું હતું. SAIF/CIL અને PU-TIF સંશોધકો, ઇનોવેટર્સ અને ઉદ્યોગોને અદ્યતન એનાલિટિકલ, ઇન્ક્યુબેશન અને આંત્રપ્રિન્યોરિયલ સપોર્ટ પૂરો પાડીને શૈક્ષણિક, વ્યવહારુ અને ટ્રાન્સલેશનલ સંશોધન માટે યુનિવર્સિટીની ઇકોસિસ્ટમના મહત્વપૂર્ણ ઘટકોનું પ્રતિનિધિત્વ કરે છે.

સભાને સંબોધતા શ્રી સી. પી. રાધાકૃષ્ણને 1882 માં તેની સ્થાપના સમયથી યુનિવર્સિટીના વિશિષ્ટ વારસાને યાદ કર્યો હતો અને નેતાઓ, ન્યાયશાસ્ત્રીઓ, વૈજ્ઞાનિકો, રમતવીરો અને જાહેર સેવકોની પેઢીઓ દ્વારા રાષ્ટ્ર નિર્માણમાં તેના યોગદાનની નોંધ લીધી હતી.

ઉપરાષ્ટ્રપતિએ જણાવ્યું હતું કે પ્રધાનમંત્રી શ્રી નરેન્દ્ર મોદીના નેતૃત્વમાં ભારતની ઉચ્ચ શિક્ષણ અને વૈજ્ઞાનિક સંશોધન ઇકોસિસ્ટમમાં પરિવર્તનકારી બદલાવ આવ્યો છે. તેમણે અવલોકન કર્યું કે ગુણવત્તાયુક્ત શિક્ષણ, સંશોધન અને ઇનોવેશન માટે ભારત વધુને વધુ વૈશ્વિક સ્થળ તરીકે ઉભરી રહ્યું છે.

આજના ઉદ્ઘાટનોને બે મહત્વપૂર્ણ સીમાચિહ્નો ગણાવતા, શ્રી સી. પી. રાધાકૃષ્ણને જણાવ્યું હતું કે પાંચ અદ્યતન વૈજ્ઞાનિક સાધનો એટોમિક ફોર્સ માઇક્રોસ્કોપ, રામન સ્પેક્ટ્રોમીટર, ડીએનએ સિક્વન્સર, ફ્લો સાયટોમીટર અને FTIR સ્પેક્ટ્રોમીટરની સ્થાપનાથી નેનોટેકનોલોજી, મટિરિયલ્સ સાયન્સ, પર્યાવરણ વિજ્ઞાન અને જેનોમિક્સ સહિતના ક્ષેત્રોમાં યુનિવર્સિટીની સંશોધન ક્ષમતાઓમાં નોંધપાત્ર મજબૂતી આવશે.

ઇનોવેશનના મહત્વ પર ભાર મુકતા ઉપરાષ્ટ્રપતિએ જણાવ્યું હતું કે સેક્શન 8 બિન-નફાકારક કંપની તરીકે બાયો-નેસ્ટ (Bio-NEST) નું પંજાબ યુનિવર્સિટી ટેક ઈનોવેશન ફોરમમાં રૂપાંતરણ સંશોધન, સાહસિકતા અને ટેકનોલોજી વિકાસને આગળ વધારવા માટે નવા સંસ્થાકીય માળખાનું પ્રતિનિધિત્વ કરે છે. તેમણે ભારપૂર્વક જણાવ્યું હતું કે જ્યારે શિક્ષણવિદો, ઉદ્યોગ, ઇન્ક્યુબેટર્સ અને રોકાણકારો સાથે મળીને કામ કરે છે ત્યારે ઈનોવેશન ખીલે છે.

યુવા સંશોધકોને સંબોધતા, તેમણે તેઓને હેતુ સાથે વિજ્ઞાનને આગળ ધપાવવા, નિષ્ફળતાનો સામનો કરતી વખતે અડીખમ રહેવા અને સમાજની વાસ્તવિક જરૂરિયાતોને પૂર્ણ કરવા માટે સક્ષમ હોય તેવા સર્વસમાવેશી, સ્કેલેબલ અને ઈનોવેશન વિકસાવવા માટે આહ્વાન કર્યું હતું. તેમણે જણાવ્યું હતું કે સંશોધનની સમાજ પર અર્થપૂર્ણ અસર હોવી જોઈએ. તેમણે સંશોધકો અને વિદ્યાર્થીઓને યોગ્ય દિશામાં સંશોધન કરવા આહ્વાન કર્યું જેથી તેના લાભો મોટા પાયે સમાજ સુધી પહોંચે.

ઉપરાષ્ટ્રપતિએ કેમ્પસની સુરક્ષા અંગે પણ વાત કરી હતી અને જણાવ્યું હતું કે પીએચડીના એક વિદ્યાર્થીના દુર્ભાગ્યપૂર્ણ અવસાન પછી, તેમણે તુરંત જ યુનિવર્સિટી સત્તાવાળાઓને સમગ્ર કેમ્પસનું વ્યાપક સુરક્ષા ઓડિટ કરવા નિર્દેશ આપ્યો હતો. તેમણે કહ્યું કે હાલના ઈન્ફ્રાસ્ટ્રક્ચરની સમીક્ષા કરવા અને વિગતવાર અહેવાલ સબમિટ કરવા માટે એક આંતરિક સમિતિની રચના કરવામાં આવી છે, અને ભારપૂર્વક જણાવ્યું કે વિદ્યાર્થીઓ અને સ્ટાફની સુરક્ષા અને સુખાકારી યુનિવર્સિટીની સર્વોચ્ચ પ્રાથમિકતા રહેવી જોઈએ.

વિદ્યાર્થીઓને “નશા મુક્ત ભારત” તરફ યોગદાન આપવા માટે આહ્વાન કરતા શ્રી સી.પી. રાધાકૃષ્ણને તેઓને નશીલા પદાર્થોના સેવનથી દૂર રહેવા અને તેમના પરિવારો અને મિત્રોને પણ તેમ કરવા પ્રોત્સાહિત કરવા વિનંતી કરી હતી.

પોતાના સંબોધનના સમાપનમાં ઉપરાષ્ટ્રપતિએ વિશ્વાસ વ્યક્ત કર્યો હતો કે અદ્યતન વૈજ્ઞાનિક સુવિધાઓ અને પંજાબ યુનિવર્સિટી ટેક ઈનોવેશન ફોરમ સંશોધન, ઈનોવેશન અને સાહસિકતામાં યુનિવર્સિટીના યોગદાનને વધુ મજબૂત બનાવશે. તેમણે વિદ્યાર્થીઓ અને ફેકલ્ટીને વિનંતી કરી કે તેઓ સુનિશ્ચિત કરે કે વર્ગખંડો અને પ્રયોગશાળાઓમાંથી બહાર આવતા વિચારો યુવાનો માટે તકોમાં પરિણમે અને વિકસિત ભારત તેમજ આત્મનિર્ભર ભારતની વિઝનમાં યોગદાન આપે. તેમણે સામૂહિક પ્રયાસો માટે આહ્વાન કર્યું અને પંજાબ યુનિવર્સિટીને ઉચ્ચ શિક્ષણ અને સંશોધનની વિશ્વ કક્ષાની સંસ્થામાં રૂપાંતરિત કરવાના પગલાં અંગે યુનિવર્સિટી સમુદાય પાસેથી સૂચનો આમંત્રિત કર્યા.

પંજાબના રાજ્યપાલ અને ચંદીગઢ યુ.ટી.ના પ્રશાસક, શ્રી ગુલાબચંદ કટારિયા; હરિયાણાના રાજ્યપાલ, પ્રો. આશિમ કુમાર ઘોષ; લોકસભાના સાંસદ, શ્રી મનીષ તિવારી; પંજાબ યુનિવર્સિટીના વાઇસ ચાન્સલર, પ્રોફેસર મીનાક્ષી ગોયલ અને અન્ય અગ્રણીઓ આ પ્રસંગે ઉપસ્થિત રહ્યા હતા.

SM/NP/JD