ਏਸ਼ੀਆ ਦੇ ਸਭ ਤੋਂ ਵੱਡੇ ਏਅਰ ਸ਼ੋਅ ਅਤੇ ਦੁਨੀਆ ਦੇ ਪ੍ਰਮੁੱਖ ਏਅਰੋਸਪੇਸ ਅਤੇ ਰੱਖਿਆ ਪ੍ਰਦਰਸ਼ਨੀਆਂ ਵਿੱਚੋਂ ਇੱਕ, 16ਵਾਂ ਏਅਰੋ ਇੰਡੀਆ, 8 ਤੋਂ 12 ਫਰਵਰੀ, 2027 ਤੱਕ ਬੰਗਲੁਰੂ ਸਥਿਤ ਯੇਲਹਾਂਕਾ ਦੇ ਏਅਰ ਸਪੇਸ ਫੋਰਸ ਸਟੇਸ਼ਨ ਵਿੱਚ ਆਯੋਜਿਤ ਹੋਵੇਗਾ। ਰੱਖਿਆ ਮੰਤਰਾਲੇ ਦੇ ਰੱਖਿਆ ਉਤਪਾਦਨ ਵਿਭਾਗ ਦੇ ਇਸ ਆਯੋਜਨ ਵਿੱਚ ਗਲੋਬਲ ਏਅਰੋਸਪੇਸ ਅਤੇ ਰੱਖਿਆ ਉਤਪਾਦ ਨਾਲ ਜੁੜੀਆਂ ਮੋਹਰੀ ਕੰਪਨੀਆਂ, ਨੀਤੀ ਨਿਰਮਾਤਾ, ਤਕਨਾਲੋਜੀ ਮਾਹਿਰ, ਨਵੀਨਤਾਕਾਰੀ, ਉਦਯੋਗ ਹਿਤਧਾਰਕ ਅਤੇ ਰੱਖਿਆ ਬਲਾਂ ਦੇ ਅਧਿਕਾਰੀ ਸ਼ਾਮਲ ਹੋਣਗੇ।

ਏਅਰੋ ਇੰਡੀਆ ਪ੍ਰਮੁੱਖ ਅੰਤਰਰਾਸ਼ਟਰੀ ਆਯੋਜਨ ਹੈ ਜੋ ਏਅਰੋਸਪੇਸ, ਡਿਫੈਂਸ ਮੈਨੂਫੈਕਚਰਿੰਗ, ਉਭਰਦੀਆਂ ਤਕਨਾਲੋਜੀਆਂ ਅਤੇ ਨਵੀਨਤਾ ਵਿੱਚ ਦੇਸ਼ ਦੀ ਵਧਦੀ ਸਮਰੱਥਾ ਪ੍ਰਦਰਸ਼ਿਤ ਕਰਦਾ ਹੈ। ਇਹ ਵਪਾਰਕ ਸਬੰਧਾਂ, ਤਕਨਾਲੋਜੀ ਅਦਾਨ-ਪ੍ਰਦਾਨ, ਅੰਤਰਰਾਸ਼ਟਰੀ ਸਹਿਯੋਗ ਅਤੇ ਰਣਨੀਤਕ ਸੰਵਾਦ ਦਾ ਵਿਸ਼ੇਸ਼ ਮੌਕਾ ਪ੍ਰਦਾਨ ਕਰਨ ਦੇ ਨਾਲ ਹੀ ਭਾਰਤ ਦੇ ਵਧਦੇ ਰੱਖਿਆ ਉਦਯੋਗਿਕ ਈਕੋਸਿਸਟਮ ਅਤੇ ਗਲੋਬਲ ਏਅਰੋਸਪੇਸ ਅਤੇ ਰੱਖਿਆ ਖੇਤਰ ਵਿੱਚ ਉਸ ਦੀ ਵਧਦੀ ਭੂਮਿਕਾ ਦਰਸਾਉਂਦਾ ਹੈ।

ਪੰਜ ਦਿਨਾਂ ਦੇ ਇਸ ਆਯੋਜਨ ਵਿੱਚ ਵਿਆਪਕ ਪ੍ਰਦਰਸ਼ਨੀ ਅਤੇ ਕਈ ਵਪਾਰਕ ਅਤੇ ਰਣਨੀਤਕ ਗਤੀਵਿਧੀਆਂ ਸ਼ਾਮਲ ਹੋਣਗੀਆਂ, ਜੋ ਉਦਯੋਗ ਜਗਤ ਨੂੰ ਵਪਾਰਕ ਗੱਲਬਾਤ, ਸਰਕਾਰ ਅਤੇ ਉਦਯੋਗ ਦਰਮਿਆਨ ਤਾਲਮੇਲ, ਤਕਨਾਲੋਜੀ ਪ੍ਰਦਰਸ਼ਨ ਅਤੇ ਸਹਿਯੋਗ ਦੇ ਮੌਕੇ ਪ੍ਰਦਾਨ ਕਰਨਗੀਆਂ। ਇਸ ਆਯੋਜਨ ਵਿੱਚ ਭਾਰਤੀ ਹਵਾਈ ਸੈਨਾ ਅਤੇ ਅੰਤਰਰਾਸ਼ਟਰੀ ਉਡਾਣ ਟੀਮਾਂ ਦਾ ਸ਼ਾਨਦਾਰ ਹਵਾਈ ਪ੍ਰਦਰਸ਼ਨ ਵੀ ਹੋਵੇਗਾ ਜਿਸ ਨਾਲ ਲੋਕ ਉੱਨਤ ਹਵਾਬਾਜ਼ੀ ਸਮਰੱਥਾ ਪ੍ਰਤੱਖ ਤੌਰ ‘ਤੇ ਦੇਖ ਸਕਣਗੇ।

ਏਅਰੋ ਇੰਡੀਆ 2027 ਲਈ ਇੱਕ ਸਮਰਪਿਤ ਵੈੱਬ-ਅਧਾਰਿਤ ਪੋਰਟਲ ਤਿਆਰ ਕੀਤਾ ਗਿਆ ਹੈ ਤਾਂ ਜੋ ਪ੍ਰਦਰਸ਼ਨੀ ਵਿੱਚ ਆਪਣੇ ਉਤਪਾਦ ਦੇ ਨਾਲ ਹਿੱਸਾ ਲੈਣ ਵਾਲੇ ਪ੍ਰਦਰਸ਼ਕਾਂ ਅਤੇ ਲੋਕਾਂ ਦੀ ਪਹੁੰਚਯੋਗ ਭਾਗੀਦਾਰੀ ਯਕੀਨੀ ਹੋਵੇ ਅਤੇ ਉਨ੍ਹਾਂ ਨੂੰ ਵਿਆਪਕ ਸੇਵਾਵਾਂ ਪ੍ਰਦਾਨ ਕੀਤੀਆਂ ਜਾ ਸਕਣ। ਪ੍ਰਦਰਸ਼ਨੀ ਵਿੱਚ ਸਥਾਨ ਲਈ ਔਨਲਾਈਨ ਰਜਿਸਟ੍ਰੇਸ਼ਨ ਅਤੇ ਬੁਕਿੰਗ www.aeroindia.gov.in ‘ਤੇ ਕੀਤੀ ਜਾ ਸਕੇਗੀ, ਜੋ 3 ਸਤੰਬਰ, 2026 ਤੋਂ ਸ਼ੁਰੂ ਹੋ ਰਹੀ ਹੈ।

ਏਅਰੋ ਇੰਡੀਆ 2027 ਤੋਂ ਭਾਰਤ ਦੇ ਆਤਮਨਿਰਭਰ ਭਾਰਤ ਦੇ ਦ੍ਰਿਸ਼ਟੀਕੋਣ ਨੂੰ ਗਤੀ ਮਿਲਣ ਅਤੇ ਗਲੋਬਲ ਰੱਖਿਆ ਅਤੇ ਐਵੀਏਸ਼ਨ ਸਪਲਾਈ ਚੇਨ ਵਿੱਚ ਭਰੋਸੇਮੰਦ ਭਾਗੀਦਾਰ ਦੇ ਰੂਪ ਵਿੱਚ ਸਥਿਤੀ ਮਜ਼ਬੂਤ ਹੋਣ ਦੀ ਸੰਭਾਵਨਾ ਹੈ। ਇਸ ਆਯੋਜਨ ਨਾਲ ਛੋਟੇ ਅਤੇ ਦਰਮਿਆਨੇ ਉੱਦਮਾਂ ਅਤੇ ਸਟਾਰਟਅੱਪਸ ਸਮੇਤ ਭਾਰਤੀ ਰੱਖਿਆ ਉਦਯੋਗਾਂ ਦੀ ਵਧੇਰੇ ਭਾਗੀਦਾਰੀ ਨੂੰ ਹੁਲਾਰਾ ਮਿਲੇਗਾ। ਨਾਲ ਹੀ ਇਹ ਆਯੋਜਨ ਸਾਂਝੇਦਾਰੀ, ਨਿਵੇਸ਼, ਨਿਰਯਾਤ ਅਤੇ ਤਕਨਾਲੋਜੀ ਸਹਿਯੋਗ ਦੇ ਨਵੇਂ ਮੌਕੇ ਪ੍ਰਦਾਨ ਕਰੇਗਾ।

*********

ਵੀਕੇ/ਸੈਵੀ/ਏਕੇ