غیر قانونی طور پر سائیکوٹروپک ادویات کی منتقلی اور اسمگلنگ کے خلاف ایک بڑی کارروائی میں سنٹرل بیورو آف نارکوٹکس (سی بی این) کی مدھیہ پردیش یونٹ نے، سی بی این نیمچ، مدھیہ پردیش یونٹ سے ملنے والی مخصوص خفیہ اطلاع کی بنیاد پر کارروائی کی۔

پنجاب–ہماچل پردیش راستے سے بڑی مقدار میں غیر قانونی سائیکوٹروپک ادویات لے جائے جانے کی مخصوص خفیہ اطلاع ملنے کے بعد، سی بی این مدھیہ پردیش یونٹ کی خصوصی انسدادِ منشیات ٹیم نے مسلسل نگرانی کی اور آپریشن وجر 2.0 کے تحت 27 اور 28 اگست 2026 کو چنڈی گڑھ–بدی بین ریاستی راستے پر حکمتِ عملی کے ساتھ اپنی پوزیشن سنبھالی۔

اس کارروائی کے نتیجے میں 66 لاکھ 79 ہزار 980 سائیکوٹروپک گولیاں ضبط کی گئیں۔ ان میں الپرازولام، ٹراماڈول، نائٹرازپام اور کلونازپام شامل ہیں۔ یہ ادویات ضروری قانونی دستاویزات کے بغیر لے جائی جا رہی تھیں۔ ایک شخص کو گرفتار کیا گیا ہے اور ایک ایس ایم ایل اسوزو سرتاج ٹرک بھی ضبط کیا گیا ہے۔

رات بھر نگرانی جاری رکھنے کے بعد، 27 اگست 2026 کو ٹیم نے اتر پردیش رجسٹریشن نمبر والے ایک مشتبہ ایس ایم ایل اسوزو سرتاج ٹرک کو روکا اور تفصیلی تلاشی کے لیے اسے ایک محفوظ مقام پر لے جایا گیا۔

کارگو کی ہر کارٹن کی تفصیلی جانچ کے دوران 120 بڑے کارٹن ملے، جن میں کنٹرول شدہ سائیکوٹروپک ادویات موجود تھیں۔ اس کھیپ میں الپرازولام، ٹراماڈول، نائٹرازپام اور کلونازپام کی گولیاں شامل تھیں، جن کی مجموعی تعداد 66 لاکھ 79 ہزار 980 گولیاں تھی۔

ابتدائی جانچ سے معلوم ہوا کہ غیر قانونی سپلائی چین کو چھپانے اور ضابطہ جاتی نگرانی سے بچنے کے لیے بظاہر کئی جان بوجھ کر اقدامات کیے گئے تھے۔ بڑی تعداد میں بلسٹر پیک اور ڈبوں سے بیچ نمبر، تیاری کی تاریخ اور میعاد ختم ہونے کی تاریخ مٹا دی گئی تھی۔

اس کے علاوہ بڑی مقدار میں ایسی ادویات بھی پائی گئیں جن پر ”پنجاب، ہریانہ ریاست میں فروخت نہ کی جائے“ درج تھا۔ یہ ادویات بغیر کسی درست معاون دستاویز، جیسے انوائس، بلٹی یا ای-وے بل کے اس علاقے میں لے جائی جا رہی تھیں۔

تفصیلی فہرست سازی، جانچ اور مہر بندی کی کارروائی رات بھر 14 گھنٹے سے زیادہ جاری رہی۔ سائیکوٹروپک ادویات کی 66 لاکھ 79 ہزار 980 گولیوں کی پوری کھیپ اور ان کی نقل و حمل کے لیے استعمال ہونے والا ایس ایم ایل اسوزو سرتاج ٹرک، نارکوٹک ڈرگس اینڈ سائیکوٹروپک سبسٹینسز (این ڈی پی ایس) ایکٹ، 1985 کی متعلقہ دفعات کے تحت ضبط کر لیا گیا۔

ایک مشتبہ شخص کو بھی این ڈی پی ایس ایکٹ، 1985 کی متعلقہ دفعات کے تحت گرفتار کیا گیا ہے۔

اس بڑے بین الریاستی غیر قانونی ادویات کی منتقلی کے ریکیٹ میں شامل اوپری سطح کے مینوفیکچرنگ اور سپلائی ذرائع کے ساتھ ساتھ آگے کی تقسیم کے نیٹ ورک کی شناخت اور اسے ختم کرنے کے لیے گہری تفتیش جاری ہے۔ تفتیش کے دوران ان دیگر افراد اور اداروں کی بھی شناخت کی جائے گی جو ان سائیکوٹروپک ادویات کی غیر قانونی منتقلی اور اسمگلنگ سے وابستہ ہیں۔

سنٹرل بیورو آف نارکوٹکس (سی بی این) ادویات کے محفوظ استعمال اور نشہ مکت بھارت ابھیان (این ایم بی اے)کے وژن کے لیے پُرعزم ہے اور منشیات اور سائیکوٹروپک اشیا کی غیر قانونی اسمگلنگ اور منتقلی کے خلاف خفیہ معلومات کی بنیاد پر کارروائیاں مسلسل جاری رکھے ہوئے ہے۔

موجودہ کیلنڈر سال 2026 کے دوران سنٹرل بیورو آف نارکوٹکس (سی بی این)نے منشیات کی اسمگلنگ کے خلاف نمایاں کارکردگی کا مظاہرہ کرتے ہوئے 197 مقدمات درج کیے اور غیر قانونی منشیات کے نیٹ ورک سے وابستہ 272 افراد کو گرفتار کیا۔ مصنوعی منشیات کی تیاری کے خلاف سخت کارروائی کرتے ہوئے بیورو نے 6 خفیہ لیبارٹریوں کا بھی پردہ فاش کیا۔

مزید برآں، ایجنسی کی وسیع پیمانے پر کی گئی کارروائیوں کے دوران تقریباً 51 ہزار کلوگرام مختلف این ڈی پی ایس منشیات ضبط کی گئیں، جبکہ اس کے علاوہ 12 کروڑ 72 لاکھ سائیکوٹروپک ادویات کی گولیاں اور کیپسول بھی برآمد کیے گئے۔

*******

) ش ح ۔ ع ا خ ۔ ر ا )

U.No. 2756