સિન્થેટિક ડ્રગ્સના ગેરકાયદેસર વેપાર સામેની તેની સતત કાર્યવાહીને ચાલુ રાખતા, ડિરેક્ટોરેટ ઓફ રેવન્યુ ઈન્ટેલિજન્સ (DRI)એ 25.08.2026ના રોજ ગુપ્ત માહિતી આધારિત બે કામગીરીમાં, બેંગલુરુ ખાતે આશરે 14.9 કિલો એમ્ફેટામાઈન અને પુણે ખાતે 2.53 કિલો (આશરે) એમ્ફેટામાઈન સાથે 878 ગ્રામ MDMA ગોળીઓ જપ્ત કરી છે, જેનું કુલ વજન 18 કિલોથી વધુ થાય છે. નાર્કોટિક ડ્રગ્સ એન્ડ સાયકોટ્રોપિક સબસ્ટન્સ (NDPS) એક્ટ, 1985 ની જોગવાઈઓ હેઠળ બંને કેસોમાં ચાર લોકોની ધરપકડ કરવામાં આવી છે.

25.08.26ના રોજ, ગુપ્ત માહિતી આધારિત એક કામગીરીમાં, DRIના અધિકારીઓએ કેએસઆર બેંગલુરુ રેલ્વે સ્ટેશન પર એક ભારતીય મહિલા મુસાફરને અટકાવી હતી, જે નવી દિલ્હીથી બેંગલુરુ ટ્રેનમાં મુસાફરી કરી રહી હતી અને તેની પાસે મોટી માત્રામાં પ્રતિબંધિત માલ હોવાની શંકા હતી.

તેના સામાનની વિગતવાર તપાસ કરતા સ્ફટિકીય પદાર્થ ધરાવતા સાત પેકેટો મળી આવ્યા હતા, જેનું વજન 14.9 કિલો (આશરે) હતું, જેણે ફિલ્ડ ડ્રગ ડિટેક્શન કિટનો ઉપયોગ કરીને પ્રાથમિક પરીક્ષણ કરતા એમ્ફેટામાઈનની હાજરી દર્શાવી હતી. રિકવર કરાયેલ સાયકોટ્રોપિક પદાર્થ, સંબંધિત પેકિંગ અને છુપાવવાના મટિરિયલ સાથે, NDPS એક્ટ, 1985 ની જોગવાઈઓ હેઠળ જપ્ત કરવામાં આવ્યો હતો.

કાર્યવાહી દરમિયાન એકત્ર કરવામાં આવેલી માહિતીના આધારે, DRI અધિકારીઓએ નિર્ધારિત ડિલિવરી સ્થાને ઝડપી ફોલો-અપ ઓપરેશન હાથ ધર્યું હતું. કેરિયર પાસેથી સામાન મેળવવા માટે ઘટનાસ્થળે પહોંચેલા એક વ્યક્તિને અટકાવવામાં આવ્યો હતો. આગળની ફોલો-અપ કાર્યવાહીને કારણે પ્રથમ રીસીવર પાસેથી પ્રતિબંધિત માલ મેળવવા આવેલા અન્ય એક વ્યક્તિને અટકાવવામાં આવ્યો હતો. સાયકોટ્રોપિક પદાર્થનું પરિવહન અને મેળવવાનો પ્રયાસ કરનારા ત્રણેય વ્યક્તિઓની NDPS એક્ટ, 1985 ની જોગવાઈઓ હેઠળ ધરપકડ કરવામાં આવી હતી.

25.08.2026 ના રોજ અન્ય એક સંબંધિત ન હોય તેવા ગુપ્ત માહિતી આધારિત ઓપરેશનમાં, DRI એ પુણે જંકશન સ્ટેશન પર અન્ય એક ભારતીય મહિલા મુસાફરને અટકાવી હતી, જે હઝરત નિઝામુદ્દીન રેલ્વે સ્ટેશન, દિલ્હીથી પુણે થઈને ટ્રેનમાં મુસાફરી કરી રહી હતી.

તેના સામાનની વિગતવાર તપાસ કરતા સફેદ/પીળા રંગનો સ્ફટિકીય પદાર્થ રિકવર થયો હતો જે એમ્ફેટામાઈન હોવાનું મનાય છે, જેનું વજન 2.53 કિલો (આશરે) હતું અને 3,4-મેથિલિનડિઓક્સિમેથેમ્ફેટામાઈન (MDMA) હોવાનું મનાતી ગોળીઓ રિકવર થઈ હતી, જેનું વજન 878 ગ્રામ (ગ્રોસ) હતું. રિકવર કરાયેલ પ્રતિબંધિત માલ NDPS એક્ટ, 1985 ની જોગવાઈઓ હેઠળ જપ્ત કરવામાં આવ્યો હતો અને મુસાફરની ધરપકડ કરવામાં આવી હતી.

તાજેતરની જપ્તી એ સિન્થેટિક ડ્રગ્સને રોકવા અને દેશભરમાં કાર્યરત નેટવર્ક્સને ધ્વસ્ત કરવાના DRI ના તીવ્ર પ્રયાસોનો એક ભાગ છે. એક પખવાડિયામાં, DRI એ હવે પાંચ કામગીરીમાં આશરે 150 કિલો એમ્ફેટામાઈન ટાઈપ સ્ટિમ્યુલન્ટ (ATS) વર્ગના ડ્રગ્સ જપ્ત કર્યા છે, જેમાં ભારતની ઉત્તર-પૂર્વીય સરહદે બે કામગીરીમાં 76 કિલો મેથેમ્ફેટામાઈન ગોળીઓ અને જેદ્દાહ, સાઉદી અરેબિયા જઈ રહેલા નિકાસ કન્સાઇનમેન્ટમાં મકાઈ/કોર્ન સાથે મિશ્ર કરીને છુપાવવામાં આવેલ 55.86 કિલો મેથેમ્ફેટામાઈનનો સમાવેશ થાય છે.

SM/NP/JD