প্রধান মন্ত্রী শ্রী নরেন্দ্র মোদীনা উজবেকিস্তানদা ওগস্ত ২৯-৩০দা লৈবাক অনিগী ওইবা খোঙচৎ অমদা চৎকনি অমসুং কির্গিজ রিপব্লিক্তা ওগস্ত ৩১দগী সেপ্তেম্বর ১, ২০২৬ ফাওবদা পাংথোক্কদবা ২৬শুবা এস.সি.ও. সম্মিৎকীদমক চৎকনি।

উজবেকিস্তানগী রাস্ত্রপতি, ঐচ.ই. শ্রী শাবকৎ মির্জিয়োয়েবনা বর্তন তৌরকপদগী প্রধান মন্ত্রীনা ২০২৬গী ওগস্ত ২৯ অমসুং ৩০দা তাশকেন্তদা স্তেৎ ভিজিৎ অমা চৎকনি। মসি প্রধান মন্ত্রীগী উজবেকিস্তানদা চৎপা মরিশুবা খোঙচৎনি। খোঙচৎ অসিগী মনুংদা, প্রধান মন্ত্রীনা লৈবাক অনিগী মরক্তা স্ত্রেতেজিক পার্তনরশিপ মখা তানা চেৎশিলহন্নবা রাস্ত্রপতি মির্জিয়োয়েবগা লোয়ননা মীহুৎ কাঙলুপকী থাক্তা ৱারী শানগনি। লুচিংবা অনিনা ললোন-ইতিক অমসুং ইনভেস্তমেন্ত, ঙাকশেল, দিজিতেল কনেক্তিবিতী, ইনর্জী, এজুকেসন অমসুং পিপল-তু-পিপলগী লমশিংদা তেংবাং পীনবগী মতাংদা য়েংশিনগনি অমসুং মাংলোমদা চংশিনগদবা থবকশিংগী এজেন্দা লেপকনি। মখোয়না বিক্সিত ভারত ২০৪৭ অমসুং উজবেকিস্তান ২০৩০গী শম্নবা চাউখৎ-থৌরাংগী মীৎয়েংশিং মাংলোমদা পুখৎনবগী মতাংদসু ৱাখল্লোনশিং ফোংদোক্কনি। প্রধান মন্ত্রীনা তাশকেন্তকী শাস্ত্রী মেমোরিয়েল অমসুং তাশকেন্ত স্তেৎ য়ুনিভর্সিতী ওরিয়েন্তেল স্তদিজতা লৈবা মহাত্মা গান্ধী সেন্তরদসু চৎকনি হায়না পানরি।

কির্গিজ রিপব্লিক্কী রাস্ত্রপতি, ঐচ.ই. শ্রী সাদির জাপারোবনা বর্তন তৌরকপদগী তাশকেন্তদগী প্রধান মন্ত্রীনা ২০২৬গী ওগস্ত ৩১দগী সেপ্তেম্বর ১ ফাওবদা পাংথোক্কদৌরিবা ২৬শুবা এস.সি.ও. সম্মিৎতা শরুক য়ানবা বিস্কেক্তা চৎকনি। সম্মিৎ অসিনা শাংহাই কোওপরেসন ওর্গনাইজেসনগী চহি ২৫শুবা মপোক কুমওন পাংথোক্লি, মসিদা ভারত অসি ২০১৭তগী মপুং ফাবা মেম্বর অমা ওইরক্লি। প্রধান মন্ত্রীনা সম্মিৎ অদুদা ৱা ঙাংগনি মদুদা মহাক্না ফোরম অসিদা সেক্যুরিতী, কনেক্তিবিতী অমসুং খুদোংচাবগী ভারতকী মরুওইবশিং অদু শন্দোক্না তাক্কনি। প্রধান মন্ত্রীনা সম্মিৎ অসিগী নাকলদা এস.সি.ও.গী লুচিংবশিংগা লোয়ননা নাকল অনিগী ওইবা মীফমশিংসু পাংথোক্কনি। মহাক্না সেন্ত্রেল এসিয়াগী ইনাক খুল্লবা কলচরেল হেরিতেজগী থৌরম অমা ওইরিবা ৬শুবা ৱর্ল্দ নোমাদ গেম্সকী হৌদোকপগী থৌরমদসু শরুক য়াগনি।

****